|
 ເພງທີ່ທ່ານພວມຟັງຢູ່ນີ້ແມ່ນເພງLoulangunian ສາວເມືອງໂລວລານ ເພງທີ່ເຮັດໃຫ້ນາງຢູຈິ້ງຂຶ້ນຊື່ລືນາມ, ແລະກໍແມ່ນເພງທີ່ທ່ານຟູ້ລິນ ນັກແຕ່ງນົດແຕ່ງເພື່ອນາງໂດຍສະເພາະ. ປີ 1994, ນາງຢູຈິ້ງກໍແມ່ນໄດ້ຮ້ອງເພງນີ້, ແລ້ວຊິງໄດ້ລາງວັນທີສອງໃນການແຂ່ງຂັນນັກຮ້ອງຊາວໜຸ່ມທົ່ວປະເທດຈີນຄັ້ງທີ 6 ທີ່ຈັດໂດຍCCTV, ແຕ່ນັ້ນມາ ນາງໄດ້ກ້າວຂຶ້ນສູ່ເວທີເພງຈີນ.
ນາງຢູຈິ້ງເປັນຄົນຄິງບາງຮ່າງນ້ອຍ, ຕາໃຫຍ່ໃສແຈ້ງ, ສະຫລາດແຕ່ສີຂີ້ອາຍຂີ້ອາຍ. ນາງເວົ້າວ່າ, ນາງເຕີບໃຫຍ່ຢູ່ບ້ານພູດອຍ, ມັກຮ້ອງເພງມາແຕ່ຍາມຍັງນ້ອຍ. ສະນັ້ນ, ໃນເວລາເສັງເຂົ້າມະຫາວິທະຍາໄລນັ້ນ, ນາງໄດ້ສະໝັກເສັງເຂົ້າໂຮງຮຽນດົນຕີ, ເລີ່ມຮັບເອົາການເຝິກອົບຮົມວິຊາຮ້ອງເພງຢ່າງເປັນລະບົບ.
ກໍຍ້ອນໄດ້ຮ້ອງເພງ Loulangunian ສາວເມືອງໂລວລານ ທີ່ທ່ານຟັງເມື່ອກີ້ນີ້, ເຮັດໃຫ້ນາງຢູຈິ້ງເລີ່ມພົ້ນເດັ່ນບົນເວທີເພງຈີນ, ແລະໄດ້ມີແຟນເພງຫລວງຫລາຍ. ຈາກນັ້ນມາ, ນາງຢູຈິ້ງໄດ້ເລີ່ມເຊັນສັນຍາກັບບໍລິສັດແຜ່ນສຽງ, ປີໜຶ່ງຫລັງຈາກນັ້ນ ນາງໄດ້ອັດຈຳໜ່າຍCDສ່ວນຕົວແຜ່ນທຳອິດທີ່ໃຫ້ຊື່ວ່າ: Zhufuniyisheng ອວຍພອນເຈົ້າຕະຫລອດຊີວິດ, ໄດ້ຮັບຄວາມນິຍົມຫລາຍບໍ່ຢອດ. ຕໍ່ໄປເຊີນຟັງເພງຄືເພງZhufuniyisheng ອວຍພອນເຈົ້າຕະຫລອດຊີວິດໃນCDແຜ່ນນີ້.
 ຫລັງຈາກCDແຜ່ນທຳອິດ, ນາງຢູຈິ້ງກໍໄດ້ອັດເພງອີກຫລາຍເພງ, ແລະຍັງໄດ້ຮ້ອງເພງສະຫລັບເລື່ອງໂທລະພາບທີ່ນິຍົມກັນເປັນຕົ້ນ, ໄດ້ຮັບຄວາມຊົມເຊີຍຫລາຍ. ໂດຍສະເພາະໃນເວລາຮົງກົງກັບຄືນສູ່ຊວງເອິກປິດຕຸພູມໃນປີ 1997, ນາງຢູຈິ້ງໄດ້ຮ້ອງເພງXianggangbielaiwuyang ຮົງກົງສະບາຍດີບໍ່ ດ້ວຍການຂັບຮ້ອງທີ່ມີອາລົມຈິດເລິກເຊິ່ງ, ໄດ້ຮັບຄວາມຍ້ອງຍໍຈາກຜູ້ຟັງທັງຫລາຍ, ແລະຜູ້ຮ້ອງນຳຢ່າງກວ້າງຂວາງ.
ປີ 2004, ນາງຢູຈິ້ງໄດ້ອັດຈຳໜ່າຍແຜ່ນCDໃໝ່ທີ່ໃຫ້ຊື່ວ່າJing ແປວ່າມິດງຽບ ເຊີ່ງໄດ້ສະແດງອາລົມຈິດແທ້ຈິງຂອງນາງ. CDແຜ່ນນີ້ເຮັດໃຫ້ຄົນຮູ້ສຶກເຖິງຄວາມງສະຫງົບງຽບໃນໃຈຂອງນາງ. ໃນCDແຜ່ນນີ້, ບໍ່ມີການດິ້ນຮົນ, ເຖິງວ່າບາງທີຈະມີຄວາມບໍ່ສົນໃຈ ນາງກໍບໍ່ໃສ່ໃຈ, ເໝືອນດັ່ງກາເຟທີ່ຈຶດຈາງ, ເຖິງຈະມີລົດຂົມຈັກໜ້ອຍ, ແຕ່ກໍຢັງມີກິ່ນຫອມ.
"ຄວາມງ່ວມເຫງົາເໝືອນດັ່ງສະຖານີລົດເມທີ່ບໍ່ມີຄົນ, ແສງຕາເວັນຍິ່ງສາດສ່ອງປານໃດ, ມັນກໍຍິ່ງໂດດດ່ຽວທໍ່ນັ້ນ, ເບິ່ງເງົາຂ້ອຍທີ່ຍ່າງໄປມາ, ກໍງ່ວມເຫງົາເປົ່າປ່ຽວ, ແຕ່ຂ້ອຍບໍ່ຍິນດີ". ທີ່ທ່ານພວມຟັງຢູ່ນີ້ແມ່ນເພງJimofeixiang ບິນຢ່າງງ່ວມເຫງົາ, ໄດ້ວາດພາບອາລົມຈິດອັນອ່ອນໂຍນແຕ່ສະດຸ້ງໄວຂອງແມ່ຍິງຍິງໃນຕົວເມືອງທັນສະໄໝ, ເພງນີ້ຟັງຄືເສົ້າໝອງ, ແຕ່ພັດສະແດງໃຫ້ເຫັນຄວາມເດັດດ່ຽວໜຽວແໜ້ນຂອງເພດຍິງ.
ນາງຢູຈິ້ງຮ້ອງເພງມາໄດ້ 10 ປີແລ້ວຢູ່ບົນເວທີເພງຈີນ, ແຕ່ນາງມີຈິດໃຈສະຫງົບຫລາຍ. ນາງເວົ້າວ່າ, ດຽວນີ້, ນາງເຮັດວຽກດົນຕີມີຈິດໃຈຕ່າງເກົ່າຫລາຍ, ຕ້ອງແມ່ນຍາມທີ່ນາງຢາກສະແດງຄວາມນຶກຄິດຈິດໃຈແນວໃດແນວໜຶ່ງ, ນາງຈຶ່ງຮ້ອງເພງ. ນາງໃສ່ຊື່ໃຫ້CDແຜ່ນໃໝ່ວ່າ" Jing ງຽບ"ກໍແມ່ນໄດ້ສະຫລຸບຊີວິດໃນດຽວນີ້ແລະທັດສະນະຄຸນມູນຄ່າຂອງນາງເອງຢ່າງດີທີ່ສຸດ. ຕໍ່ໄປພວກເຮົາມາຟັງເພງ"Xuehua" ຫິມະ ໃນCDແຜ່ນໃໝ່ນີ້.
|
