|
|
(GMT+08:00)
2005-01-05 16:20:09
|
|
ປະຊາຄົມໂລກເອົາໃຈໃສ່ນຳການປະທະກັນດ້ວຍກຳລັງຮຸນແຮງລະຫວ່າງປາເລັສຕິນກັບອິສລະແອນ
cri
Author: sayvanny
ຕາມຂ່າວ CRI: ວັນທີ 4 ມັງກອນ ປະຊາຄົມໂລກໄດ້ສະແດງຄວາມເອົາໃຈໃສ່ນຳການປະທະກັນດ້ວຍກຳລັງຮຸນແຮງລະຫວ່າງປາເລັສຕິນກັບ ອິສລະແອນທີ່ເກີດຂຶ້ນເລື້ອຍໆກ່ອນຈັດການເລືອກຕັ້ງທົ່ວໄປຂອງປາເລັສຕິນ,ແລະທະຍອຍກັນສະແດງວ່າຫວັງໃຫ້ການເລືອກຕັ້ງທົ່ວໄປຂອງປາເລັສຕິນດຳເນີນໄປຢ່າງສະດວກ.
ທ່ານອານນານ ເລຂາທິການໃຫຍ່ສະຫະປະຊາຊາດໄດ້ຜ່ານໂຄສົກຂອງທ່ານອອກຖະແຫລງການ,ສະແດງຄວາມເອົາໃຈໃສ່ທີ່ສຸດນຳອິສລະແອນທີ່ໃຊ້ການເຄື່ອນໄຫວທາງການທະຫານຢູ່ແຖບກາຊາແລະການປະທະກັນດ້ວຍກຳລັງຮຸນແຮງລະຫວ່າງປາເລັສຕິນກັບອິສລະແອນເລື່ອນຂັ້ນເລື້ອຍໆໃນຫວ່າງມໍ່ໆນີ້,ຮຽກຮ້ອງສອງຝ່າຍຈົ່ງຮັກສາຄວາມອົດກັ້ນ.
ສົມເດັດອັບດຸນລາ ລັດຊະການທີສອງ ເຈົ້າຊີວິດຊອກດານີຮຽກຮ້ອງປະຊາຄົມໂລກອອກແຮງສະຫນັບສະຫນູນແລະຊ່ອຍອົງການນຳປາເລັສຕິນ ສຳເລັດການເລືອກຕັ້ງແລະບັນລຸເປົ້າຫມາຍສ້າງຕັ້ງປະເທດໂດຍໄວ, ເພື່ອເຮັດໃຫ້ປາເລັສຕິນອິສລະແອນມີຄວາມປອດໄພແລະສະຖຽນລະພາບນຳ ກັນ.
ກະຊວງການຕ່າງປະເທດລັດເຊຍໄດ້ອອກປະກາດ,ຫວັງໃຫ້ສອງຝ່າຍປາເລັສຕິນອິສລະແອນສາມາດຟື້ນຟູການເຈລະຈາສັນຕິພາບພາຍຫລັງປາເລັສຕິນຈັດການເລືອກຕັ້ງທົ່ວໄປ,ແລະນຳໃຊ້ມາດຕະການຢຸດຕິການປະທະກັນດ້ວຍກຳລັງຮຸນແຮງ.ຝ່າຍລັດເຊຍຍັງຮຽກຮ້ອງອິສລະແອນໃຫ້ການຊ່ອຍເຫລືອອັນຈຳເປັນແກ່ປາເລັສຕິນໃນເວລາຈັດການເລືອກຕັ້ງທົ່ວໄປ.
ວັນທີ 4 ມັງກອນ ທະຫານອິສລະແອນໄດ້ຍິງປືນໃຫຍ່ໃສ່ພາກເຫນືອແຖບກາຊາ, ເຮັດໃຫ້ຊາວປາເລັສຕິນຕາຍ 8 ຄົນ, ແລະຫລາຍຄົນບາດເຈັບ.ຫວ່າງມໍ່ໆນີ້, ລະຫວ່າງປາເລັສຕິນກັບອິສລະແອນໄດ້ເກີດການປະທະກັນເລື້ອຍໆ,ໄດ້ເຮັດໃຫ້ຫລາຍຄົນຕາຍແລະບາດເຈັບແລ້ວ.
|
|
|