|
ຕາມຂ່າວCRI: ວັນທີ 5 ມັງກອນ, ກຳມະບານທຸກຂັ້ນຂອງຈີນໄດ້ເລີ່ມເຮັດວຽກລາຍໜຶ່ງປົວແປງເງື່ອນໄຂຊີວິດການເປັນຢູ່ຂອງກຳມະກອນຜູ່ທຸກຍາກ. ທ່ານຕົງລີ ຜູ່ຮັບຜິດຊອບທີ່ກ່ຽວຂ້ອງຂອງສະຫະກຳມະບານແຫ່ງຊາດຈີນກ່າວວ່າ, ອົງການກຳມະບານຂອງຈີນຈະວາງງົບປະມານ 35 ລ້ານຢວນ, ໃຊ້ເຂົ້າໃນການຢ້ຽມຢາມກຳມະກອນຜູ່ທຸກຍາກໃນໄລຍະບຸນກຸດຈີນ ເຊິ່ງເປັນບຸນປະເພນີຂອງຈີນ. ທ່ານຍັງກ່າວວ່າ, ກຳມະບານໃນຂະນະຊ່ອຍລັດຖະບານແກ້ໄຂບັນຫາການຜະລິດແລະຊີວິດການເປັນຢູ່ຂອງກຳມະກອນຜູ່ທຸກຍາກ ກຳມະບານຈະພະຍາຍາມສ້າງລະບົບຊ່ອຍເຫຼືອກຳມະກອນຜູ່ທຸກຍາກອີກດ້ວຍ.
ແຕ່ກາງຊຸມປີ 90 ສະຕະວັດທີ່ແລ້ວເປັນຕົ້ນມາ, ໃນຂະບວນການປະຕິຮູບໂຄງປະກອບເສດຖະກິດຈີນ, ກຳມະກອນຈຳນວນໜຶ່ງໄດ້ຕົກງານ, ຊີວິດການເປັນຢູ່ພົບຄວາມຫຍຸ້ງຍາກ; ຍັງມີກຳມະກອນສ່ວນໜຶ່ງເຈັບປ່ວຍແລະມູນເຫດອື່ນໆ ຊີວິດການເປັນຢູ່ຂອງພວກເຂົາເຈົ້າຝືດເຄື່ອງ. ໃນຫຼາຍປີມານີ້, ກຳມະບານທຸກຂັ້ນຂອງຈີນໄດ້ໃຊ້ມາດຕະການຫຼາຍຢ່າງຕັ້ງໜ້າປົວແປງເງື່ອນໄຂຊີວິດການເປັນຢູ່ຂອງກຳມະກອນຜູ່ທຸກຍາກ.
ແຕ່ລະປີ ໃນເວລາບຸນປະເພນີສຳຄັນຂອງຈີນໃກ້ຈະວຽນມາເຖິງ, ກຳມະບານທຸກຂັ້ນຂອງຈີນລ້ວນແຕ່ແຕ່ງຄົນໄປຢາມກຳມະກອນຜູ່ທຸກຍາກເຫຼົ່ານີ້, ສົ່ງເງິນຊ່ອຍເຫຼືອແລະເຄື່ອງໃຊ້ປະຈຳວັນໃຫ້ພວກເຂົາເຈົ້າ, ຊອກຮູ້ສະພາບການດຳລົງຊີວິດແລະປະກອບອາຊີບຂອງພວກເຂົາເຈົ້າ, ຊ່ອຍພວກເຂົາເຈົ້າແກ້ໄຂຄວາມຫຍຸ້ງຍາກ. ທ່ານຕົງລີ ຫົວໜ້າຄະນະກຳມະການກວດກາຄ່າໃຊ້ຈ່າຍຂອງສະຫະກຳມະບານແຫ່ງຊາດຈີນສະເໜີວ່າ, ໃນ 10 ປີຜ່ານມາ, ກຳມະບານທຸກຂັ້ນຂອງຈີນຫ້າງຫາເງິນໄດ້ 18 ຕື້ຢວນຊ່ອຍເຫຼືອກຳມະກອນຜູ່ທຸກຍາກປັບປຸງເງື່ອນໄຂຊີວິດການເປັນຢູ່, ນັບລວມແລ້ວ ໄດ້ໄປຢາມຄອບຄົວກຳມະກອນຜູ່ທຸກຍາກ 55 ລ້ານກວ່າຄອບຄົວ.
ນອກຈາກໄປຢາມກຳມະກອນຜູ່ທຸກຍາກໃນໄລຍະມື້ບຸນແລ້ວ, ອົງການກຳມະບານຈີນຍັງຖືເອົາວຽກງານແກ້ໄຂການປະກອບອາຊີບຂອງຜູ່ຕົກງານໄວ້ເປັງວຽກອັນດັບໜຶ່ງ. ພວກທ່ານຈັດຕັ້ງບໍລິສັດບໍລິການຈັດຫາງານ ອົງການອົບຮົມເຕັກນິກອາຊີບ ແລະແຫຼ່ງປະກອບອາຊີບຄືນໃໝ່, ບໍລິການກຳມະກອນຜູ່ຕົກງານໂດຍບໍ່ເກັບຄ່າ. ນອກນີ້, ກຳມະບານຍັງປ່ອຍເງິນກູ້ຈຳນວນໜ້ອຍໃຫ້ແກ່ຜູ່ຕົກງານ, ອຳນວຍຄວາມສະດວກໃຫ້ແກ່ກຳມະກອນຜູ່ຕົກງານປະກອບອາຊີບຄືນໃໝ່. ຕາມສະເໜີວ່າ, ໃນໜຶ່ງປີຜ່ານມາ, ກຳມະບານທຸກຂັ້ນໄດ້ອົບຮົມ 6 ໝື່ນກວ່າຄົນເພື່ອໃຫ້ພວກເຂົາເຈົ້າປະກອບອາຊີບຄືນໃໝ່, ມີເກືອບ 3 ໝື່ນຄົນໄດ້ມີວຽກເຮັດງານທຳຄືນໃໝ່ພາຍຫຼັງໄດ້ຮັບການຊ່ອຍເຫຼືອຂອງກຳມະບານ.
ໂດຍອີງຕາມມູນເຫດທີ່ພາໃຫ້ຊີວິດການເປັນຢູ່ຂອງກຳມະກອນປະສົບຄວາມຫຍຸ້ງຍາກ, ກຳມະບານທຸກຂັ້ນຂອງຈີນຍັງໄດ້ແກ້ໄຂຫຼືຜ່ອນຄາຍຄວາມຫຍຸ້ງຍາກຂອງກຳມະກອນຜູ່ທຸກຍາກທີ່ສຸດ. ທ່ານວາງເອີລີເປັນຄົນພິການ, ປີນີ້ອາຍຸ 40 ປີ, ແຕ່ເດີມແມ່ນກຳມະກອນຂອງໂຮງງານຜະລິດຖ້ວຍຊາມບ່ວງສ້ອມນະຄອນທຽນສິນ, ກ່ອນໜ້ານີ້ບໍ່ເທົ່າໃດປີ ໂຮງງານນີ້ປິດປະຕູເຊົາການຜະລິດແລ້ວ, ທ່ານວາງເອີລີກໍ່ຕົກງານ ເມຍເພິ່ນກໍບໍ່ມີວຽກເຮັດ, ສອງຜົວເມຍພ້ອມລູກສາມຄົນຈຳເປັນຕ້ອງອາໄສການສົງເຄາະຂອງອົງການປົກຄອງ.
ສອງປີກ່ອນ, ຄອບຄົວຂອງທ່ານວາງເອີລີເຄີຍເປັນຄອບຄົວຮັບການຊ່ອຍເຫຼືອຈາກສູນຊ່ອຍເຫຼືອກຳມະກອນຜູ່ມີຄວາມຫຍຸ້ງຍາກທີ່ກຳມະບານນະຄອນທຽນສິນສ້າງຂຶ້ນ. ເມື່ອຊີວິດການເປັນຢູ່ພົບຄວາມຫຍຸ້ງຍາກ, ທະແນມແຕ່ໂທໄປຍັງສູນດັ່ງກ່າວ, ກໍຈະໄດ້ຮັບການຊ່ອຍເຫຼືອຢ່າງທັນການ. ປີກາຍນີ້, ຄອບຄົວຂອງທ່ານວາງເອີລີໄດ້ຮັບເງິນຊ່ອຍເຫຼືອຈຳນວນ 1000 ກວ່າຢວນຈາກກຳມະບານແຫ່ງນັ້ນ.
ທ່ານຕົງລີ ຫົວໜ້າຄະນະກຳມະການກວດຄ່າໃຊ້ຈ່າຍສະຫະກຳມະບານແຫ່ງຊາດຈີນກ່າວວ່າ, ປີ 2005, ກຳມະບານຈີນຈະພະຍາຍາມສ້າງລະບົບຊ່ອຍເຫຼືອກຳມະກອນຜູ່ທຸກຍາກ, ເຮັດໃຫ້ເນື້ອໃນການຊ່ອຍເຫຼືອຂອງກຳມະບານເປີດກວ້າງຈາກການຊ່ອຍເຫຼືອຊີວິດການເປັນຢູ່ໄປສູ່ຍັງດ້ານປະກອບອາຊີບ ອຸດໜູນທຶນຮຽນ ການແພດແລະດ້ານກົດໝາຍເປັນຕົ້ນ, ຊຸກຍູ້ໃຫ້ວຽກງານຊ່ອຍເຫຼືອຂະຫຍາຍໄປສູ່ທິດຫັນເຫັນເປັນລະບອບແລະລະບົບ.
|
