|
|
 |
| (GMT+08:00)
2005-01-06 16:36:51
|
 |
|
ສິ່ງສຳຄັນນັ້ນແມ່ນປະຕິບັດຕາມຄຳຫມັ້ນສັນຍາ
cri
Author: sayvanny
ໄພແຜ່ນດິນໄຫວແລະຄື້ນທະເລຊູນາມີທີ່ເກີດຂຶ້ນຢູ່ມະຫາສະຫມຸດອິນເດຍໃນທ້າຍປີ 2004 ໄດ້ເຮັດໃຫ້ປະຊາຄົມໂລກຕື່ນຕົກໃຈ.ນັບມາຮອດວັນທີ 5 ມັງກອນປີ 2005, ໄພພິບັດເທື່ອນີ້ໄດ້ເຮັດໃຫ້ເກືອບ 1 ແສນ 5 ຫມື່ນຄົນຕາຍ,ຊັບສິນເສຍຫາຍປະມານ 14 ຕື້ໂດລາສະຫະລັດ,ປະເທດປະສົບໄພໄດ້ປະເຊີນກັບຫນ້າທີ່ກູ້ໄພແລະສ້າງບ້ານແປງເມືອງຄືນໃຫມ່ຢ່າງຫນັກຫນາ. ພາຍຫລັງເກີດໄພແລ້ວ, ປະຊາຄົມໂລກໄດ້ສະແດງໃຫ້ເຫັນນ້ຳໃຈລັດທິມະນຸດສະທຳອັນສູງສົ່ງ, ທະຍອຍກັນໃຫ້ການຊ່ອຍເຫລືອ, ພ້ອມກັບປະເທດແລະປະຊາຊົນປະສົບໄພຜ່ານຜ່າຄວາມຫຍຸ້ງຍາກ.ແຕ່ຫາງສຽງຊີ້ອອກວ່າ,ຄຽງຄູ່ກັບການເຄື່ອນໄຫວກູ້ໄພດຳເນີນຕໍ່ໄປ, ສິ່ງສຳຄັນທີ່ສຸດແມ່ນປະເທດທີ່ກ່ຽວຂ້ອງຕ້ອງປະຕິບັດຕາມຄຳຫມັ້ນສັນຍາ, ສົ່ງເຄື່ອງຊ່ອຍເຫລືອໄປໃຫ້ຜູ່ປະສົບໄພຢ່າງແທ້ຈິງ.
ປະຈຸບັນ ປະຊາຄົມໂລກໄດ້ຊ່ອຍເຫລືອປະເທດປະສົບໄພດ້ວຍສີ່ຮູບການ.ຫນຶ່ງແມ່ນຊ່ອຍເຫລືອດ້ານເງິນຄຳ.ວັນທີ 5 ມັງກອນ ທ່ານເອເກີແລນ ຮອງເລຂາທິການໃຫຍ່ອົງການສະຫະປະຊາຊາດທີ່ຮັບຜິດຊອບວຽກງານກອບກູ້ມະນຸດສະທຳເວົ້າວ່າ, ເງິນບໍລິຈາກທີ່ປະຊາຄົມໂລກໃຫ້ຄຳຫມັ້ນສັນ ຍາຈະບໍລິຈາກໃຫ້ປະເທດປະສົບໄພ ນັ້ນໄດ້ບັນລຸເກືອບ 4 ຕື້ໂດລາສະຫະລັດແລ້ວ,ນອກນີ້ ການຊ່ອຍເຫລືອດ້ານພັດສະດຸຂອງປະຊາຄົມໂລກກໍ່ຫລາຍພໍສົມຄວນ. ສອງແມ່ນຊ່ອຍເຫລືອດ້ານກຳລັງຄົນ.ພາຍຫລັງເກີດໄພແລ້ວ, ຫລາຍໆປະເທດເຊິ່ງລວມທັງຈີນໄດ້ຟ້າວສົ່ງຫນ່ວຍກອບກູ້ປິ່ນປົວເດີນທາງໄປເຂດປະສົບໄພ,ເພື່ອຈຳແນກ ຊາກສົບ ປົວໃຫ້ຜູ່ບາດເຈັບ ແຈກຢາຍເຄື່ອງຊ່ອຍເຫລືອແລະອື່ນໆໃຕ້ສະພາບອັນລຳບາກທີ່ສຸດ.ສາມແມ່ນຫລຸດຫລືຍົກເວັ້ນຫນິ້ສິນ.ວັນທີ 4 ມັງກອນ ອັງກິດສະເຫນີໃຫ້ກຸ່ມ 8 ປະເທດແກ່ຍາວເວລາກຳນົດປະເທດປະສົບໄພໃຊ້ຫນີ້ສິນ,ຫລືຈົນຮອດຍົກເວັ້ນຫນີ້ສິນສ່ວນຫນຶ່ງ.ຕາມຊາບວ່າ, ໃນກອງປະຊຸມປະເທດເຈົ້າຫນີ້ກຸ່ມ 8 ປະເທດທີ່ຈະຈັດຂຶ້ນໃນວັນທີ 12 ເດືອນນີ້, ບັນດາຝ່າຍທີ່ກ່ຽວຂ້ອງອາດຈະກ້າວເຖິງຂັ້ນຕົກລົງກັນໃນບັນຫາດັ່ງກ່າວ.ສີ່ແມ່ນຊ່ອຍສ້າງລະບົບເຕືອນໄພທີ່ກ່ຽວຂ້ອງ.ຕໍ່ເລື່ອງນີ້, ທ່ານມີເຊຣ໌.ຈາໂລດເລຂາທິການໃຫຍ່ອົງການອຸຕຸນິຍົມໂລກປະກາດວ່າ, ອົງການອຸຕຸນິຍົມໂລກພວມພິຈາລະນາສ້າງລະບົບເຕືອນໄພຄື້ນທະເລຊູນາມີຢູ່ມະຫາສະຫມຸດອິນເດຍ.
ໃນຂະນະດຽວກັນ, ພາຍໃນຂອບຂອງອົງການສະຫະປະຊາຊາດ, ປະ ຊາຄົມໂລກໄດ້ເພີ່ມທະວີການປະສານງານການເຄື່ອນໄຫວກູ້ໄພ. ວັນທີ 6 ມັງກອນ ປະມຸກລັດແລະຫົວຫນ້າລັດຖະບານຂອງ 20 ກວ່າປະເທດແລະຜູ່ຕາງຫນ້າອົງການຈັດຕັ້ງສາກົນໄດ້ຈັດກອງປະຊຸມວິສາມັນຢູ່ຢາກາກຕາ ນະຄອນຫລວງອິນໂດເນເຊຍ, ຫາລືບັນຫາຕ້ານໄພຄື້ນທະເລຊູນາມີ;ວັນທີ 11 ສະຫະປະຊາຊາດຈະຈັດກອງປະຊຸມບໍລິຈາກສາກົນລະດັບລັດຖະມົນຕີ, ຫາລືບັນຫາຊ່ອຍເຫລືອປະເທດປະສົບໄພສ້າງບ້ານແປງເມືອງຄືນໃຫມ່; ວັນທີ 18 ຫາວັນທີ 22, ສະຫະປະຊາຊາດຈະຈັດກອງປະຊຸມຫລຸດຄວາມເສຍຫາຍຍ້ອນໄພທຳມະຊາດໃນໂລກຢູ່ເມືອງໂກເບຍີ່ປຸ່ນ, ເຈາະຈົງຫາລືບັນຫາສ້າງກົນໄກເຕືອນໄພໃນທົ່ວໂລກ.
ໃນຂະນະດຽວກັນ, ຫາງສຽງໂລກກ່າວເນັ້ນວ່າ, ສິ່ງສຳຄັນໃນປະຈຸບັນແມ່ນ,ປະຊາຄົມໂລກຈະສາມາດສົ່ງພັດສະດຸຊ່ອຍເຫລືອໄປຮອດມືຂອງຜູ່ທີ່ຕ້ອງການທີ່ສຸດເຫລົ່ານັ້ນໄດ້ຫລືບໍ່,ການໃຫ້ຄຳຫມັ້ນສັນຍາຈະບໍລິຈາກເງິນບໍ່ຄວນເວົ້າແຕ່ປາກທໍ່ນັ້ນ, ຫາກຍັງຕ້ອງເອົາໃຫ້ແທ້,ແລະກໍ່ບໍ່ຄວນເອົາເງິນບໍລິຈາກທາງພີ້ໄປຫາທາງພຸ້ນ.ຕໍ່ບັນຫານີ້, ວັນທີ 3 ມັງກອນ ທ່ານອານນານ ເລຂາທິການໃຫຍ່ອົງການສະຫະປະຊາຊາດເວົ້າວ່າ, ຫວັງວ່າປະເທດແລະອົງການຈັດຕັ້ງສາກົນທີ່ເວົ້າວ່າຈະບໍລິຈາກເງິນໃຫ້ປະເທດປະສົບໄພນັ້ນຈົ່ງປະຕິບັດຕາມຄຳຫມັ້ນສັນຍາຂອງຕົນ, ສະຫນອງເງິນທຶນແກ່ການເຄື່ອນໄຫວກູ້ໄພແລະການສ້າງສາເຂດປະສົບໄພຄືນໃຫມ່.
ສິ່ງທີ່ຕ້ອງກ່າວເຖິງເປັນພິເສດນັ້ນແມ່ນ: ປະເທດປະສົບໄພເທື່ອນີ້ສ່ວນຫລາຍແມ່ນປະເທດພວມພັດທະນາ,ໃນນັ້ນ ປະເທດສ່ວນຫນຶ່ງທຸກຍາກ ຜ່ານເສິກສົງຄາມແລະຖືກລັດທິກໍ່ການຮ້າຍຂົ່ມຂູ່,ສະນັ້ນ, ປະເທດພັດທະນາຄວນໃຫ້ການສະຫນັບສະຫນູນດ້ານເງິນທຶນ ເຕັກນິກແລະກຳລັງຄົນແກ່ປະເທດພວມພັດທະນາເຊິ່ງລວມທັງປະເທດປະສົບໄພເທື່ອນີ້, ໃຫ້ພວກເຂົາເຈົ້າ ມີໂອກາດພັດທະນາເສດຖະກິດແລະມີຄວາມສາມາດປັບປຸງການກໍ່ສ້າງໃນດ້ານເຕືອນໄພໃຫ້ຄົບຖ້ວນບໍລິບູນ,ເພື່ອສະແຫວງການພັດທະນາແລະສ້າງຄວາມຈະເລີນຮຸ່ງເຮືອງພ້ອມກັນ,ເຮັດໃຫ້ໂລກຍິ່ງປອດໄພແລະຫມັ້ນທ່ຽງກວ່າເກົ່າ.
|
|
|
