|
ທ່ານເວີນເຈຍປາວກ່າວວ່າ, ຈີນຍິນດີເຂົ້າຮ່ວມການສ້າງສາຄືນໃໝ່ແລະການພັດທະນາເຂດປະສົບໄພດ້ວຍຮູບການຕ່າງໆ
cri
Author: MO
ວັນທີ 6 ມັງກອນ, ທ່ານເວີນເຈຍປາວ ນາຍົກລັດຖະມົນຕີຈີນ ໄດ້ເຂົ້າຮ່ວມກອງປະຊຸມວິສາມັນຂອງຜູ້ນຳອາຊຽນກ່ຽວກັບບັນຫາຫລັງໄພພິບັດແຜ່ນດິນໄຫວແລະຄື້ນທະເລຊູນາມີທີ່ຈັດຂຶ້ນຢູ່ຢາກາກຕາ ນະຄອນຫລວງອິນໂດເນເຊຍ , ທ່ານໄດ້ກ່າວຄຳປາໄສຢູ່ໃນກອງປະຊຸມເຊິ່ງພາດຫົວເລື່ອງວ່າ: ຮ່ວມໃຈຮ່ວມແຮງກັນ, ສ້າງບ້ານແປງເມືອງທີ່ສວຍງາມຄືນໃໝ່, ໄດ້ສະແດງຄວາມປາຖະໜາອັນຈິງໃຈຂອງຈີນທີ່ຍິນດີເຂົ້າຮ່ວມການສ້າງສາຄືນໃໝ່ແລະການພັດທະນາຢູ່ເຂດປະສົບໄພດ້ວຍຮູບການຕ່າງໆຢ່າງຂະຫຍັນຫ້າວຫັນ, ແລະຕາງໜ້າລັດຖະບານຈີນສະເໜີຂໍ້ສະເໜີລະອຽດກ່ຽວກັບວຽກງານກູ້ໄພແລະສ້າງສາຄືນໃໝ່ຂອງປະເທດປະສົບໄພ.
ກ່ອນອື່ນ, ທ່ານນາຍົກລັດຖະມົນຕີເວີນເຈຍປາວຕາງໜ້າລັດຖະບານຈີນແລະປະຊາຊົນຈີນ 1 ຕື້ 300 ລ້ານຄົນສະແດງຄວາມຢື້ຢາມຖາມຂ່າວຢ່າງເລິກເຊີ່ງທີ່ສຸດຕໍ່ປະເທດແລະປະຊາຊົນຜູ້ປະສົບໄພອີກເທື່ອໜຶ່ງ, ມີຄວາມໝັນໃຈຫລາຍທີ່ສຸດຕໍ່ລັດຖະບານແລະປະຊາຊົນທີ່ປະສົບໄພໃນການສ້າງບ້ານແປງເມືອງຄືນໃໝ່. ທ່ານເວົ້າວ່າ, ໄພພິບັດທີ່ເກີດຂຶ້ນຢ່າງກະທັນຫັນເທື່ອນີ້ໄດ້ດຶງໃຈຊາວຈີນໝົດທຸກຄົນ. ລັດຖະບານຈີນຍິນດີແບ່ງປັນຄວາມໂສກເສົ້າຂອງປະຊາຊົນປະເທດປະສົບໄພທີ່ໄດ້ເສຍຍາດຕິພີ່ນ້ອງ ແລະໝູ່ເພື່ອນ, ຈະສືບຕໍ່ທຳຄວາມພະຍາຍາມສຸດຂີດ, ຊ່ອຍປະເທດປະສົບໄພດຳເນີນວຽກງານກູ້ໄພແລະການສ້າງສາຄືນໃໝ່.
ໃນກອງປະຊຸມ, ທ່ານເວີນເຈຍປາວກ່າວວ່າ, ຈີນຍິນດີປະກອບສ່ວນອັນຕັ້ງໜ້າເຂົ້າໃນການກູ້ໄພແລະສ້າງສາຄືນໃໝ່ເທື່ອນີ້. ທ່ານໄດ້ສະເໜີຂໍ້ສະເໜີ 7 ຂໍ້. ນັກຂ່າວວິທະຍຸພວກເຮົາລາຍງານວ່າ:
ຂໍ້ສະເໜີ 7 ຂໍ້ມີດັ່ງນີ້, 1,ໃຫ້ການກອບກູ້ຊ່ອຍເຫຼືອດ່ວນ, 2, ຊ່ອຍປະຊາຊົນປະເທດປະສົບໄພສ້າງບ້ານແປງເມືອງຄືນໃໝ່, ຟື້ນຟູການຜະລິດໂດຍໄວເທົ່າທີ່ຈະໄວໄດ້; 3, ສ້າງການທ່ອງທ່ຽວຂອງປະເທດປະສົບໄພໃຫ້ຈະເລີນຄືນໃໝ່; 4, ສ້າງກົນໄກເຕືອນໄພ; 5 ເພີ່ມທະວີການຊົມໃຊ້ແລະການແລກປ່ຽນຂໍ້ມູນຂ່າວສານ; 6, ເສີມຂະຫຍາຍບົດບາດຂອງກົນໄກທີ່ມີຢູ່ໃນປະຈຸບັນ; 7, ຈີນຈະຕັ້ງໜ້າເຂົ້າຮ່ວມແຜນການຊ່ອຍເຫຼືອທີ່ນຳໂດຍອົງການສາກົນຄືສະຫະປະຊາຊາດແລະອາຊຽນ.
ທ່ານເວີນເຈຍປາວໄດ້ໃຫ້ຄຳໝັ້ນສັນຍາຢ່າງໜັກແໜ້ນວ່າ, ຈີນເວົ້າແລ້ວກໍຖືເປັນສັດຈະໂດຍຕະຫລອດ, ຄຳໝັ້ນສັນຍາຂອງຈີນຈະບັນລຸຜົນເປັນຈິງຢ່າງແນ່ນອນ. ໃນອະດິດແມ່ນແນວນີ້, ປະຈຸບັນແມ່ນແນວນີ້, ໃນອະນາຄົດກໍແມ່ນແນວນີ້ເຊັ່ນດຽວກັນ.
ທ່ານເວີ່ນເຈຍປາວຍັງໄດ້ແນະນຳຢ່າງລະອຽດກ່ຽວກັບຈີນຈະໃຫ້ການຊ່ອຍເຫຼືອທີ່ມີລັກສະນະທາດແທ້ແກ່ປະເທດປະສົບໄພໃນການສ້າງບ້ານແປງເມືອງຄືນໃໝ່. ທ່ານເວົ້າວ່າ, ລັດຖະບານຈີນຈະຮ່ວມມືກັບປະເທດປະສົບໄພ, ຊ່ອຍເຂດປະສົບໄພສ້າງພື້ນຖານໂຄງລ່າງຄືສ້ອມແປງເສັ້ນທາງ, ຂົວ, ໂຮງຮຽນແລະໂຮງໝໍເປັນຕົ້ນ, ຈະສະໜັບສະໜູນວິສາຫະກິດຈີນເຂົ້າຮ່ວມການສ້າງສາຄືນໃໝ່ແລະການພັດທະນາຂອງເຂດປະສົບໄພດ້ວຍຮູບການຕ່າງໆຄື ລັດຖະບານໃຫ້ເງິນກູ້ສິນເຊື່ອ, ໃຫ້ກູ້ເງິນບໍ່ມີດອກເບ້ຍຫຼືດອກເບ້ຍຕ່ຳ. ລັດຖະບານຈີນຈະສົ່ງເສີມນັກທ່ອງທ່ຽວຈີນໄປທ່ຽວປະເທດປະສົບໄພເມື່ອໄດ້ຮັບການຟື້ນຟູ, ຮ່ວມມືກັບປະເທດທີ່ກ່ຽວຂ້ອງເຜີຍແຜ່ສຶກສາຄວາມຮູ້ປ້ອງກັນໄພຕໍ່ໄທເມືອງແລະນັກທ່ອງທ່ຽວ. ລັດຖະບານຈີນຍິນດີຊ່ອຍເຫຼືອປະເທດອ້ອມຂ້າງ ໂດຍສະເພາະແມ່ນປະເທດປະສົບໄພສ້າງສະຖານີແລະຕາໜ່າງທີ່ຕິດຕາມວັດແທກແຜ່ນດິນໄຫວແລະເຕືອນໄພຄື້ນທະເລຊູນາມີ, ເພື່ອແລກປ່ຽນແລະຕີລາຄາຂໍ້ມູນຂ່າວສານທີ່ກ່ຽວຂ້ອງຢ່າງທັນການ, ພະຍາກອນແລະປ້ອງກັນໄພທຳມະຊາດຄືແຜ່ນດິນໄຫວແລະຄື້ນທະເລຊູນາມີເປັນຕົ້ນ. ຈີນຍິນດີສະໜອງເອກະສານແລະຜະລິດຕະພັນທີ່ກ່ຽວຂ້ອງຂອງດາວທຽວເຟີງຢຸນເລກ 2 ຂອງຈີນໃຫ້ບັນດາປະເທດໃນພາກພື້ນແຫ່ງນີ້, ສະໜອງເຕັກນິກແລະຂໍ້ມູນຂ່າວສານໃຫ້ບັນດາປະເທດພາກພື້ນແຫ່ງນີ້ເພື່ອໃຊ້ໃນການພະຍາກອນອາກາດ ຕິດຕາມສິ່ງແວດລ້ອມ ແລະຕີລາຄາໄພພິບັດເປັນຕົ້ນ.
ຈີນໄດ້ທຳຄວາມພະຍາຍາມຫລວງຫລາຍໃນຂົງເຂດຫລາຍຝ່າຍເພື່ອສ້າງກົນໄກເຕືອນໄພຄື້ນທະເລຊູນາມີທີ່ບັງເກີດຜົນ. ທ່ານເວີນເຈຍປາວກ່າວວ່າ, ຈີນຈະຈັດງານສຳມະນາເຕືອນໄພຄື້ນທະເລຊູນາມີຈີນອາຊຽນຢູ່ປັກກິ່ງໃນທ້າຍເດືອນມັງກອນ. ຝ່າຍຈີນຍັງຍິນດີຈັດກອງປະຊຸມຫລຸດໄພພິບັດອາຊີ, ແລະຍິນດີອອກທຶນຈັດງານແລກປ່ຽນບົດຮຽນໃນດ້ານປ້ອງກັນໄພພິບັດ ກູ້ໄພ ແລະການສ້າງສາຄືນໃໝ່ເປັນຕົ້ນ, ແລະສ້າງໂຄງການອົບຮົມ. ທ່ານເວີນເຈຍປາວຍັງສະເໜີວ່າ, ການຮ່ວມມືສົນທະນາລະຫວ່າງຈີນກັບອາຊຽນ ອາຊຽນກັບຈີນ ຍີ່ປຸ່ນແລະສ.ເກົາຫລີ, ແລະທົ່ວອາຊີຄວນຖືການຫລຸດຜ່ອນຜົນຮ້າຍຈາກໄພພິບັດ ປ້ອງກັນໄພແລະກູ້ໄພເປັນຂົງເຂດຮ່ວມມືຈຸດໜັກ.
|
|
