|
ຕາມຂ່າວ CRI: ວິທະຍາສາດຊີວິດແມ່ນວິທະຍາສາດທຳມະຊາດພື້ນຖານຂະແໜງໜຶ່ງທີ່ໂລກປັດຈຸບັນເອົາໃຈໃສ່ຫຼາຍກວ່າໝູ່. ມັນຕົ້ນຕໍຄົ້ນຄວ້າທາດແທ້,ຈຸດພິເສດແລະກົດເກນແຫ່ງການກຳເນີດແລະການພັດທະນາຂອງປະກົດການຊີວິດແລະການເຄື່ອນໄຫວຊີວິດ,ເພື່ອຄວບຄຸມການເຄື່ອນໄຫວຊີວິດຢ່າງບັງເກີດຜົນ,ດັດສ້າງວົງການຊີວະຊາດ,ແລ້ວສ້າງຄວາມສຸກໃຫ້ແກ່ມວນມະນຸດ. ປັດຈຸບັນ,ວິທະຍາສາດຊີວິດກັບການຢູ່ລອດ,ສຸຂະພາບຂອງມະນຸດແລະການພັດທະນາເສດຖະກິດສັງຄົມລ້ວນແຕ່ມີການພົວພັນຢ່າງແໜ້ນແຟ້ນທີ່ສຸດ. ໃນລາຍການວິທະຍາສາດພາກນີ້ ພວກເຮົາຂໍຍົກເອົາບາງຕົວຢ່າງມາແນະນຳສະພາບນຳການໃຊ້ເຕັກນິກວິທະຍາສາດຊີວິດຢູ່ຈີນ.
ກ່ອນອື່ນ,ພວກເຮົາຈົ່ງມາເບິ່ງຕົວເລກຈຳນວນໜຶ່ງ: ອາຍຸສະເລ່ຍຂອງຊາວຈີນໃນປີ 1950 ມີແຕ່ 35 ປີ,ແຕ່ປັດຈຸບັນແມ່ນ 73 ປີ. ທ່ານນາງວັງເວີນລີ ສາສະດາຈານຂອງສະຖາບັນແພດສາດມະຫາວິທະຍາໄລປັກກິ່ງເວົ້າວ່າ,ຖ້າປາສະຈາກວັກແຊງແລະຢາຕ້ານເຊື້ອ,ປາສະຈາກເງື່ອນໄຂສຸຂາພິບານແລະການປິ່ນປົວສາທາລະນະສຸກທີ່ຖືວິທະຍາສາດຊີວິດເປັນພື້ນຖານແລ້ວ,ເປົ້າໝາຍດັ່ງກ່າວແມ່ນບັນລຸຜົນເປັນຈິງບໍ່ໄດ້. ນາງເຫັນວ່າ,ອາຍຸຂອງຊາວຈີນຍາວຂຶ້ນແລະສຸຂະພາບດີຂຶ້ນລ້ວນແຕ່ມີການພົວພັນໂດຍກົງກັບການຂະຫຍາຍຕົວຂອງຊີວິດວິທະຍາສາດ.
"ປັດຈຸບັນ,ວິທະຍາສາດຊີວິດໄດ້ຂະຫຍາຍຕົວໄວຫຼາຍ,ເຮັດໃຫ້ຄົນຕື່ນເຕັ້ນທີ່ສຸດ. ຜູ້ທີ່ຄົ້ນຄວ້າວິທະຍາສາດຊີວິດພວກເຮົາລ້ວນແຕ່ມີຄວາມປາຖະໜາຮ່ວມ,ຄືຫວັງໃຫ້ແຕ່ລະຄົນລ້ວນແຕ່ມີຊີວິດຍິ່ງດີແລະສຸຂະພາບຍິ່ງດີ."
ທ່ານນາງວັງເວີນລີໄດ້ຍົກເອົາຕົວຢ່າງມາເວົ້າວ່າ,ວັກແຊງທີ່ຄົ້ນຄວ້າຜະລິດດ້ວຍເຕັກນິກວິທະຍາສາດຊີວິດໄດ້ປະກອບສ່ວນອັນສຳຄັນເພື່ອສຸຂະພາບຂອງຊາວຈີນ. ເມື່ອຫາກໍ່ສະຖາປະນາປະເທດຈີນໃໝ່ເມື່ອປີ 1949 ພະຍາດຕິດແປດຫຼາຍຢ່າງເຊັ່ນພະຍາດໝາກສຸກ,ໂຣກອະຫິວາແລະວັນນະໂຣກເປັນຕົ້ນໄດ້ແຜ່ລະບາດຢ່າງຮ້າຍແຮງ,ຂົ່ມຂູ່ສຸຂະພາບຂອງສາທາລະນະຊົນຢ່າງໜັກໜ່ວງ. ເພື່ອປ່ຽນແປງສະພາບການດັ່ງກ່າວນີ້,ຈີນໄດ້ເພີ່ມທະວີການຄົ້ນຄວ້າແລະຜະລິດວັກແຊງ,ອອກແຮງດຳເນີນວຽກງານສັກຢາວັກແຊງ,ໄດ້ຄວບຄຸມການແຜ່ລະບາດຂອງພະຍາດຕິດແປດຢ່າງບັງເກີດຜົນ,ຮັບປະກັນສຸຂະພາບຂອງສາທາລະນະຊົນ. ໃນນັ້ນ ການສັກຢາວັກແຊງພະຍາດໝາກສຸກແມ່ນສຳເລັດຜົນທີ່ສຸດ,ເຮັດໃຫ້ຈີນໄດ້ດັບສູນພະຍາດໝາກສຸກໃນປີ 1960,ໄວກວ່າທົ່ວໂລກປະກົດເຫັນຜູ້ເປັນພະຍາດໝາກສຸກຜູ້ສຸດທ້າຍນັ້ນ 10 ກວ່າປີ.
ໃນຂະນະດຽວກັນນີ້ ໂດຍແນໃສ່ພະຍາດຕິດແປດທີ່ປະກົດເຫັນໃໝ່,ຈີນຍັງໄດ້ຕັ້ງໜ້າດຳເນີນວຽກງານຄົ້ນຄວ້າຜະລິດຢາວັກແຊງທີ່ກ່ຽວຂ້ອງ. ພະຍາດຊາສ໌ທີ່ເກີດຂຶ້ນໃນປີ 2003 ເຄີຍນຳເອົາຜົນສະທ້ອນຢ່າງໜັກໜ່ວງມາໃຫ້ສຸຂະພາບຂອງສາທາລະນະຊົນແລະການພັດທະນາເສດຖະກິດສັງຄົມຂອງຈີນ. ເພື່ອຊອກຫາວິທີປ້ອງກັນພະຍາດຊາສ໌ທີ່ບັງເກີດຜົນ,ຜູ້ຄົ້ນຄວ້າວິທະຍາສາດຂອງຈີນໄດ້ເລີ່ມນຳໃຊ້ເຕັກນິກວິທະຍາສາດຊີວິດດຳເນີນວຽກງານຄົ້ນຄວ້າຜະລິດວັກແຊງພະຍາດຊາສ໌ພາຍຫຼັງເກີດມີພະຍາດຊາສ໌ບໍ່ດົນ. ຫວ່າງກ່ອນນີ້ບໍ່ດົນ,ການທົດລອງໄລຍະທີໜຶ່ງຂອງການຄົ້ນຄວ້າລາຍນີ້ໄດ້ຮັບຜົນສຳເລັດ. ທ່ານວັງສຽວຟາງ ຜູ້ຮັບຜິດຊອບທີ່ກ່ຽວຂ້ອງຂອງໜ່ວຍຄົ້ນຄວ້າວິທະຍາສາດພະຍາດຊາສ໌ຂອງຈີນແນະນຳວ່າ:
"ໝາກຜົນຄົ້ນຄວ້າຢາວັກແຊງຢັບຢັ້ງພະຍາດຊາສ໌ໄລຍະທີໜຶ່ງໄດ້ສະແດງໃຫ້ເຫັນຢ່າງແຈ່ມແຈ້ງວ່າ,ການຄົ້ນຄວ້າພະຍາດຊາສ໌ໄດ້ມີການຄືບໜ້າອັນໃຫຍ່ຫຼວງອີກ. ຄວາມໝາຍຂອງໝາກຜົນດັ່ງກ່າວແມ່ນຢູ່ບ່ອນວ່າ,ມັນໄດ້ບອກຄົນທັງຫຼາຍວ່າ,ພະຍາດຊາສ໌ບໍ່ເປັນຕາຢ້ານ,ຖ້ານຳໃຊ້ກຳລັງວິທະຍາສາດ,ລະດົມຄວາມຫ້າວຫັນຂອງຝ່າຍຕ່າງໆ,ພະຍາດຊາສ໌ແມ່ນປ້ອງກັນໄດ້,ຄວບຄຸມໄດ້ແລະປິ່ນປົວໄດ້."
ວິທະຍາສາດຊີວິດນອກຈາກໄດ້ເສີມຂະຫຍາຍບົດບາດສຳຄັນໃນດ້ານປ້ອງກັນພະຍາດຕິດແປດແລ້ວ,ໃນດ້ານປິ່ນປົວພະຍາດທີ່ຖືກຄົນທັງຫຼາຍຖືເປັນພະຍາດທີ່ຮັກສາບໍ່ໄດ້ເຊັ່ນມະເຮັງເລືອດແລະພະຍາດເລືອດຈາງຮ້າຍແຮງເປັນຕົ້ນກໍໄດ້ເສີມຂະຫຍາຍບົດບາດອັນພົ້ນເດັ່ນ.
ປັດຈຸບັນ,ຢູ່ຈີນ ຜູ້ເປັນພະຍາດມະເຮັງເລືອດທີ່ລອດຊີວິດໂດຍຜ່ານຈາກການຍ້າຍຈຸລັງລຳຕົ້ນສ້າງເລືອດນັ້ນໄດ້ມີ 100 ກວ່າຄົນແລ້ວ,ແພດສາດແລະເຕັກນິກວິທະຍາສາດຊີວິດໄດ້ຊ່ອຍພວກເຂົາເຈົ້າເອົາຊະນະພະຍາດ,ໃຫ້ຄອບຄົວຂອງພວກເຂົາເຈົ້າມີຄວາມສຸກຄືນອີກ.
ເມື່ອໄດ້ຊອກຮູ້ສະພາບກ່ຽວກັບແພດສາດແລະວິທະຍາສາດຊີວິດແລ້ວ,ພວກເຮົາຈົ່ງມາເບິ່ງຄວາມຄືບໜ້າທີ່ຈີນໄດ້ຮັບໃນການນຳໃຊ້ເຕັກນິກວິທະຍາສາດຊີວິດມາບົ່ມເພາະແນວພັນກະສິກຳ. ໃຜໆກໍຮູ້ກັນແລ້ວວ່າ,ຈີນມີປະຊາກອນ 1 ສ່ວນ 5 ຂອງໂລກ,ຄວາມປອດໄພດ້ານທັນຍາຫານແມ່ນບັນຫາທີ່ສຳຄັນທີ່ສຸດຕໍ່ຈີນ. ແຕ່ທີ່ດິນຂອງຈີນພຽງແຕ່ກວມ 7% ຂອງໂລກ,ເພື່ອໄດ້ເກັບກ່ຽວທັນຍາຫານຍິ່ງຫຼາຍຈາກທີ່ດິນອັນຈຳກັດ,ເລິ່ມແຕ່ກາງຊຸມປີ 80 ສະຕະວັດທີ 20,ຈີນກໍໄດ້ດຳເນີນວຽກງານຜ່ານຈາກການຄົ້ນຄວ້າພັນທຸກຳມາບົ່ມເພາະທັນຍາຫານທີ່ມີຜົນຜະລິດສູງແລະຄຸນນະພາບດີ. ໃນນັ້ນ ວຽກງານຄົ້ນຄວ້າເຂົ້ານານ້ຳໄດ້ນຳໜ້າໂລກແລ້ວ. ໃນການຄົ້ນຄວ້າລາຍນີ້,ນັກວິທະຍາສາດຈີນໄດ້ເອົາພັນທຸກຳຂອງເຂົ້ານາປ່າກັບເຂົ້ານາທຳມະດາມາປະສົມພັນ,ແລ້ວໄດ້ບົ່ມເພາະເຂົ້ານານ້ຳແນວພັນໃໝ່ໄລຍະທີໜຶ່ງ,ປັດຈຸບັນໄດ້ເຜີຍແຜ່ຢ່າງກວ້າງຂວາງແລ້ວ. ຖ້າປູກເຂົ້າແນວພັນໃໝ່ຊະນິດນີ້ ແຕ່ລະເຮັກຕາສາມາດມີຜົນຜະລິດຫຼາຍກວ່າເຂົ້ານານ້ຳທຳມະດາ 0,75 ໂຕນຮອດ 1,5 ໂຕນ,ຄຸນນະພາບຂອງເຂົ້າກໍໄດ້ຍົກສູງຂຶ້ນອ່າວຫຼາຍ. ເພື່ອຍົກຜົນຜະລິດແລະຄຸນນະພາບຂອງເຂົ້ານານ້ຳໃຫ້ສູງຂຶ້ນຕື່ມອີກ,ປັດຈຸບັນ,ເຂົ້ານາປະສົມພັນໄລຍະທີສອງທີ່ນັກວິທະຍາສາດຈີນບົ່ມເພາະນັ້ນກໍໄດ້ເລີ່ມທົດລອງປູກໃນເນື້ອທີ່ແຄບແລ້ວ,ແລະຈະເຜີຍແຜ່ຢ່າງກວ້າງຂວາງໃນໄວໆນີ້. ທ່ານດຣ.ເສີນຮາວ ຂອງສະພາບັນດິດວິທະຍາດສາດສັງຄົມຈີນແນະນຳວ່າ:
"ໃນປີ 2006 ຊຸບເປີເຂົ້ານານ້ຳປະສົມພັນໄລຍະທີສອງຂອງຈີນກໍຈະປູກໃນເນື້ອທີ່ກວ້າງ,ເມື່ອຮອດເວລານັ້ນ ຖ້າພວກເຮົາຄິດໄລ່ຕາມເນື້ອທີ່ປູກເຂົ້າ 6 ແສນ 6 ໝື່ນເຮັກຕາຕໍ່ປີແລ້ວ,ຜົນຜະລິດທັນຍາຫານທີ່ເພີ່ມຂຶ້ນໃນແຕ່ລະປີສາມາດລ້ຽງຄົນເພີ່ມຂຶ້ນ 30 ກວ່າລ້ານຄົນ."
ຕົວຢ່າງທີ່ໄດ້ຍົກເມື່ອກີ້ນີ້ມີແຕ່ແມ່ນພາກສ່ວນໜ້ອຍໃນການນຳໃຊ້ເຕັກນິກວິທະຍາສາດຊີວິດຂອງຈີນເທົ່ານີ້. ພວກເຮົາມີເຫດຜົນເຊື່ອວ່າ,ຄຽງຄູ່ກັບການຂະຫຍາຍຕົວແລະນຳໃຊ້ເຕັກນິກວິທະຍາສາດຊີວິດ,ຊີວິດຂອງຊາວຈີນຈະຍິ່ງດີງາມກວ່າເກົ່າ.
|
