|
ຕາມຂ່າວCRI: ປີ 2004 ຫາກໍ່ຜ່ານພົ້ນໄປ. ໃນໜຶ່ງປີທີ່ຜ່ານມາ, ນັກກິລາຈີນໄດ້ຮັບຜົນສຳເລັດຢ່າງໃຫຍ່ຫຼວງໃນງານກິລາໂອລິມປິກ, ພ້ອມກັນນັ້ນມີງານແຂ່ງຂັນໂລດໂຜນງວດໜຶ່ງຄື ການແຂ່ງຂັນລົດສູດໜຶ່ງແລະການແຂ່ງຂັນບານບ້ວງ NBA ເປັນຕົ້ນໄດ້ຈັດຂຶ້ນຢູ່ຈີນ, ເປັນອາຫານຕາຂອງແຟນກິລາທັງຫຼາຍ, ກິລາຈີນໃນປີ 2004 ເຮັດໃຫ້ຄົນລືມໄດ້ຍາກ. ໃນລາຍການພາກນີ້ ເຊີນຟັງບົດແຈ້ງຂ່າວປະກອບສຽງທີ່ພາດຫົວເລື່ອງວ່າ: ກິລາຈີນປີ 2004 ມີສະເໜຫຼາຍ. ຂໍໃຫ້ທ່ານພ້ອມກັນກັບພວກເຮົາຫວນຄືນກິລາຈີນປີ 2004.
ປີ 2004 ແມ່ນປີໜຶ່ງທີ່ກິລາຈີນໄດ້ຮັບຜົນສຳເລັດຫຼາຍ. ໃນນັ້ນ ຄະນະນັກກິລາຈີນໄດ້ຮັບຜົນສຳເລັດຢ່າງໃຫຍ່ຫຼວງໃນງານກິລາໂອລິມປິກອາແຕນ, ນີ້ແມ່ນຈຸດຮຸ່ງຈຸດໜຶ່ງໃນທົ່ວປີ 2004.
ໃນງານກິລາໂອລິມປິກອາແຕນທີ່ຈັດຂຶ້ນໃນເດືອນສິງຫາ, ຄະນະນັກກິລາຈີນໄດ້ຮັບຜົນງານດີທີ່ບໍ່ເຄີຍມີມາກ່ອນຄື ຊິງໄດ້ຫຼຽນຄຳ 32 ຫຼຽນ, ຈຳນວນຫຼຽນຄຳລື່ນກາຍຣັດເຊຍ ປະເທດກິລາແຂງແຮງດັ້ງເດີມເປັນຄັ້ງທຳອິດ, ໜ້ອຍກວ່າອາເມລິກາທີ່ຢູ່ອັນດັບໜຶ່ງໃນຕາລາງຫຼຽນຄຳພຽງ 3 ຫຼຽນ. ສິ່ງທີ່ໜ້າເວົ້າເຖິງນັ້ນແມ່ນ ໃນງານກິລາໂອລິມປິກຄັ້ງນີ້, ນັກກິລາຈີນຊິງໄດ້ຫຼຽນຄຳຈາກລາຍການແຂ່ງຂັນຍິ່ງຫຼາຍ, ນອກຈາກລາຍການແຂ່ງຂັນຄືໂດດນ້ຳ ປິງປອງແລະຍິງເປົ້າເປັນຕົ້ນຍັງມີທ່າແຮງຢູ່ຄືເກົ່າແລ້ວ, ຄະນະນັກກິລາຈີນຍັງມີການບຸກທະລຸເຮັດໃຫ້ຄົນຕື່ນຕົກໃຈໃນລາຍການອ່ອນແອຄືແລ່ນແລະລານ ການຊ່ວງເຮືອກາໂນ ແລະເທັນນິສເປັນຕົ້ນອີກດ້ວຍ. ໃນການແຂ່ງຂັນ 110 ແມັດຂ້າມຮົ້ວເພດຊາຍຮອບຊິງຊະນະເລີດ, ທ້າວລິວສຽງ ນັກກິລາແລ່ນຂ້າມຮົ້ວຈີນທີ່ອາຍຸ 21 ປີຊິງໄດ້ຫຼຽນຄຳ, ເປັນຫຼຽນຄຳໂອລິມປິກຫຼຽນທຳອິດຂອງຊາວອາຊີໃນລາຍການແຂ່ງຂັນແລ່ນໄວປະເພດແລ່ນແລະລານ, ຜົນການແຂ່ງຂັນແມ່ນ 12 ວິນາທີ 91 ສະເໝີກັບສະຖິຕິໂລກຂອງລາຍການນີ້. ທ້າວລິວສຽງເລີຍກາຍເປັນບຸກຄົນກະເດື່ອງບ້ານກະເດື່ອງເມືອງບົນເວທີກິລາຈີນປີ 2004; ໃນລາຍການແຂ່ງຂັນຊວງເຮືອກາໂນພາຍສອງຄົນເພດຊາຍ 500 ແມັດ, ທ້າວເມິງກວນລຽງແລະທ້າວຢາງເວີນຈຸນຊິງໄດ້ຫຼຽນຄຳ ເປັນຫຼຽນຄຳຫຼຽນທຳອິດຂອງຈີນໃນລາຍການແຂ່ງຂັນໜ້ານ້ຳຂອງງານກິລາໂອລິມປິກ; ນາງລີຖິງກັບນາງຊຸນຖຽນຖຽນຊິງໄດ້ຫຼຽນຄຳໃນການແຂ່ງຂັນເທັນນິສຕີຄູ່ເພດຍິງໃນງານກິລາໂອລິມປິກອາແຕນ. ເມື່ອເວົ້າເຖິງງານກິລາໂອລິມປິກອາແຕນ, ທ່ານຢວນເວີຍໝິນ ປະທານຄະນະກຳມະການໂອລິມປິກຈີນເວົ້າວ່າ:
ໃນງານກິລາໂອລິມປິກຄັ້ງນີ້ ພວກເຮົາມີຈຸດພິເສດເດັ່ນດັ່ງລຸ່ມນີ້: ໜຶ່ງ ໃນຕາລາງຫຼຽນຄຳ ຄະນະນັກກິລາພວກຂ້າພະເຈົ້າພຽງຖັດຈາກອາເມລິກາ ເປັນທີສອງ; ສອງ ຈຳນວນຫຼຽນຄຳ ຍອດຈຳນວນຫຼຽນສາມຊະນິດແລະຈຳນວນນັກກິລາທີ່ເຂົ້າໃນຖັນແຖວຈາກທີໜຶ່ງຫາທີ 8 ໄດ້ລື່ນກາຍງານກິລາໂອລິມປິກຄັ້ງກ່ອນຢ່າງຮອບດ້ານ; ສາມ ໃນລາຍການພື້ນຖານຄືແລ່ນແລະລານແລະການລອຍນ້ຳ ລາຍການແຂ່ງຂັນປະເພດບານ ລວມໝູ່ແລະລາຍການລະດັບຫຼ້າຫຼັງ ຊິງໄດ້ຫຼຽນຄຳໃນບາງລາຍການ, ໄດ້ຮັບຜົນງານບຸກທະລຸທີ່ໜ້າຊື່ນຊົມ; ສີ່ ນັກກິລາໜຸ່ມໄດ້ຮັບການຝຶກຝົນຫຼໍ່ຫຼອມ.
ນອກຈາກຊິງໄດ້ຫຼຽນໃນງານກິລາໂອລິມປິກອາແຕນແລ້ວ, ກິລາຈີນໃນປີ 2004 ກໍໄດ້ຮັບຜົນສຳເລັດຢ່າງໃຫຍ່ຫຼວງໃນ "ສະໜາມແຂ່ງຂັນ" ດ້ານອື່ນ. ໃນປີ 2004 , ງານແຂ່ງຂັນໂລດໂຜນລະດັບໂລກຫຼາຍປະເພດໄດ້ຈັດຂຶ້ນຫຼືກຳນົດຈະຈັດຂຶ້ນຢູ່ຈີນ. ວັນທີ 26 ກັນຍາ, ງານແຂ່ງຂັນລົດສູດໜຶ່ງນັດຊິງຊະນະເລີດໂລກຢູ່ຈີນໄດ້ຈັດຂຶ້ນຢູ່ສະໜາມແຂ່ງລົດສາກົນຊຽງໄຮ້ເປັນຄັ້ງທຳອິດ. ແຕ່ປີ 2004 ເປັນຕົ້ນໄປ ຊຽງໄຮ້ຈະເປັນເຈົ້າພາບຈັດງານແຂ່ງຂັນລົດສູດໜຶ່ງນັດຊິງຊະນະເລີດໂລກຢູ່ຈີນ 7 ປີລຽນຕິດ. ການໃຫ້ຊຽງໄຮ້ເປັນເຈົ້າພາບຈັດງານແຂ່ງຂັນລົດສູດໜຶ່ງຊິງຊະນະເລີດໂລກບໍ່ພຽງແຕ່ໄດ້ເຮັດໃຫ້ແຟນລົດຂອງຈີນໄດ້ມີໂອກາດສຳຜັດກັບດາລາແຂ່ງລົດຄື ມີແຊນ ຊູມາເກີແລະຣະແບນ ບາຣີແຊໂລເປັນຕົ້ນຢ່າງໃກ້ຊິດເປັນຄັ້ງທຳອິດທໍ່ນັ້ນ, ທັງໄດ້ສະແດງໃຫ້ເຫັນສະເໜມະຫານະຄອນຊຽງໄຮ້ ພ້ອມຄວາມສາມາດແລະຄຸນທາດຂອງຊາວຈີນທີ່ເປັນເຈົ້າພາບຈັດງານແຂ່ງຂັນລະດັບໂລກຂະໜາດໃຫຍ່ໄປສູ່ທົ່ວໂລກອີກດ້ວຍ.
ທ່ານເບີນີ ແອັກແຄຼສຕອນ ປະທານສະພາບໍລິຫານຂອງບໍລິສັດຄຸ້ມຄອງການແຂ່ງລົດສູດໜຶ່ງກ່າວວ່າ, ຊຽງໄຮ້ໄດ້ສິດເປັນເຈົ້າພາບຈັດງານແຂ່ງຂັນລົດສູດໜຶ່ງ, ແມ່ນຍ້ອນວ່າງານແຂ່ງຂັນດັ່ງກ່າວຈະເສຍຕະຫຼາດຈີນທີ່ມີປະຊາກອນຫຼວງຫຼາຍແລະມີກຳລັງບົ່ມຊ້ອນອັນມະຫາສານນີ້ບໍ່ໄດ້, ຍັງຍ້ອນວ່ານັກທຸລະກິດທີ່ອຸປະຖຳຂະບວນລົດສູດໜຶ່ງຫຼາຍບໍລິສັດຢາກເຂົ້າຕະຫຼາດຈີນມາແຕ່ດົນແລ້ວ.
ຍ້ອນເຫດຜົນເຊັ່ນດຽວກັນ, ອົງການການກິລາສາກົນປະເພດດ່ຽວອື່ນໆກໍຊິງກັນເຂົ້າສູ່ຕະຫຼາດຈີນ ເຊັ່ນ ເດືອນກໍລະກົດປີ 2004, ງານແຂ່ງຂັນບານເຕະຊິງຂັນອາຊີໄດ້ຈັດຂຶ້ນຢູ່ຈີນເປັນຄັ້ງທຳອິດ; ເດືອນຕຸລາ, NBA ໄດ້ຈັດການແຂ່ງຂັນຮອບກ່ອນລະດູການແຂ່ງຂັນສອງນັດຢູ່ປັກກິ່ງແລະຊຽງໄຮ້; ກາງເດືອນທັນວາ, ສະຫະພັນຫຼິ້ນສະເກດສາກົນໄດ້ໃຫ້ປັກກິ່ງເປັນເຈົ້າພາບຈັດງານແຂ່ງຂັນຮອບຊິງຊະນະເລີດຂອງງານແຂ່ງຂັນຫຼິ້ນສະເກດແບບລວດລາຍຊິງລາງວັນໃຫຍ່ເປັນຄັ້ງທຳອິດ; ໃນປີ 2004 ວົງການກິລາຂອງຈີນຍັງໄດ້ເຊັນສັນຍາຫຼາຍສະບັບກ່ຽວກັບຈີນເປັນເຈົ້າພາບຈັດງານແຂ່ງຂັນສຳຄັນຫຼາຍເທື່ອໃນຫຼາຍປີຂ້າງໜ້າ, ແຕ່ປີ 2005 ຫາປີ 2007, ງານແຂ່ງຂັນເທັນນິສມາສເຕີຂັບ ATP ທີ່ມີລະດັບສູງສຸດໃນກິລາເທັນນິສເພດຊາຍຂອງໂລກໃນປະຈຸບັນຈະຈັດຂຶ້ນຢູ່ນະຄອນຊຽງໄຮ້ 3 ປີລຽນຕິດ. ປີ 2005 ,ຈີນຍັງຈະຈັດງານແຂ່ງຂັນກອຟລະດັບໂລກ 4 ຄັ້ງພາຍໃນປີດຽວ.
ຈີນເປັນເຈົ້າພາບຈັດງານແຂ່ງຂັນສາກົນລະດັບສູງຢ່າງເນື່ອງນິດ, ໄດ້ເພີ່ມທະວີການແລກປ່ຽນລະຫວ່າງວົງການກິລາຈີນກັບວົງການກິລາໂລກ, ພ້ອມກັນນັ້ນ ກໍໄດ້ສະແດງຄວາມສາມາດບໍລິໂພກອັນມະຫາສານໃນຕະຫຼາດກິລາຈີນຕໍ່ໂລກອີກດ້ວຍ. ທ່ານລີຢົງ ຮອງເລຂາສະມາຄົມກອຟຈີນກ່າວວ່າ, ການເປັນເຈົ້າພາບຈັດງານແຂ່ງຂັນລະດັບໂລກຈະຊ່ອຍໃຫ້ວົງການກິລາຈີນເຊື່ອມໂຍງເຂົ້າໃນວົງການກິລາໂລກດີກວ່າເກົ່າ. ທ່ານເວົ້າວ່າ:
ການຈັດງານແຂ່ງຂັນເຫຼົ່ານີ້ ກ່ອນອື່ນ ມີຜົນດີຕໍ່ການເຜີຍແຜ່ແລະຊຸກຍູ້ການກິລາເຫຼົ່ານີ້, ເຊີນນັກກິລາລະດັບຍອດຢ້ຽມໃນໂລກມາເຂົ້າຮ່ວມການແຂ່ງຂັນຢູ່ຈີນ, ຈະເສີມຂະຫຍາຍບົດບາດໃນການເຜີຍແຜ່ແລະຊຸກຍູ້ການກິລາ. ສອງ ການກໍ່ສ້າງຂອງສະໜາມກິລາບາງແຫ່ງແລະຜູ່ຊົມຢ່າງຫຼວງຫຼາຍ, ກໍໃຫ້ທົ່ວໂລກຮັບຮູ້ສະພາບການພັດທະນາໃນຂອງຈີນປະຈຸບັນ.
ການກິລາຂອງຈີນໄດ້ຮັບຜົນສຳເລັດໃນປີ 2004, ເຮັດໃຫ້ຊາວຈີນຢ່າງຫຼວງຫຼາຍຮູ້ສຶກເພິ່ງພໍໃຈແລະພາກພູມໃຈ. ທ້າວໄຊເຟີຍ ແຟນກິລາຈີນຜູ່ໜຶ່ງກ່າວວ່າ, ເມື່ອທຽບກັບນັກກິລາຈີນທີ່ຊິງໄດ້ຜົນງານດີເດັ່ນໃນງານກິລາໂອລິມປິກແລ້ວ, ຢູ່ພາຍໃນປະເທດກໍໄດ້ຊົມງານແຂ່ງຂັນສາກົນລະດັບສູງຫຼາຍປານນີ້ກໍໃຫ້ເພິ່ນຮູ້ສຶກດີໃຈເຊັ່ນດຽວກັນ. ເພິ່ນເວົ້າວ່າ:
ຂ້າພະເຈົ້າເຫັນວ່າປີ 2004 ແມ່ນປີກິລາຂອງຈີນ, ນັກກິລາຈີນຊິງໄດ້ຜົນງານດີເດັ່ນໃນງານແຂ່ງຂັນສາກົນຫຼາຍຄັ້ງ ຕົວຢ່າງຄຶ ງານກິລາໂອລິມປິກອາແຕນເປັນຕົ້ນ, ທັງນີ້ເຮັດໃຫ້ຊາວຈີນເຮົາຮູ້ສຶກຊື່ນຊົມທີ່ສຸດ. ແລະໃນປີ 2004 ຈີນຍັງໄດ້ເປັນເຈົ້າພາບຈັດງານກິລາສາກົນຫຼາຍເທື່ອ, ຕົວຢ່າງຄື ງານແຂ່ງຂັນລົດສູດໜຶ່ງໄດ້ມາຈັດຢູ່ຈີນເປັນຄັ້ງທຳອິດ, NBA ໄດ້ມາຈັດຢູ່ຈີນເປັນຄັ້ງທຳອິດ, ທັງນີ້ເຮັດໃຫ້ຈີນກັບວົງການການກິລາສາກົນມີຄວາມໃກ້ຊິດກັນຍິ່ງຫຼາຍ, ທັງເຮັດໃຫ້ຈີນຕິດຕໍ່ກັບໂລກນັບມື້ນັບແໜ້ນແຟ້ນ.
|
