|
ຕາມຂ່າວCRI: ໃນຫຼາຍປີມານີ້, ລັດຖະບານຈີນຕັ້ງໜ້າຊຸກຍູ້ການແລກປ່ຽນແລະການຮ່ວມມືກັບຕ່າງປະເທດດ້ານຢາຈີນແລະແພດສາດຈີນ. ກອງປະຊຸມວຽກງານຂອງກົມຄຸ້ມຄອງຢາຈີນແລະແພດສາດຈີນແຫ່ງຊາດຈີນພວມໄຂຂຶ້ນຢູ່ປັກກິ່ງໄດ້ເຜີຍໃຫ້ຮູ້ວ່າ, ຈີນໄດ້ເຊັນສັນຍາຮ່ວມມືສອງຕໍ່ສອງກັບ 61 ປະເທດໃນດ້ານຢາຈີນແລະແພດສາດຈີນ, ອິດທິພົນແລະຖານະຂອງຢາຈີນແລະແພດສາດຈີນໃນສາກົນໄດ້ຍົກສູງຂຶ້ນຂ້ອນຂ້າງຫຼາຍ.
ຢາຈີນແລະແພດສາດຈີນຕົ້ນຕໍໃຊ້ຢາທຳມະຊາດມາປິ່ນປົວພະຍາດ, ມີລະບົບທິດສະດີສົມບູນແລະໄດ້ນຳໃຊ້ເປັນເວລາຍາວນານ, ດັ່ງນັ້ນ ໄດ້ຮັບຄວາມນິຍົມຊົມຊອບຈາກປະຊາຊົນຈີນຫຼາຍ; ພ້ອມກັນນັ້ນ ໂດຍອາໄສຜົນການປິ່ນປົວ ຢາຈີນແລະແພດສາດຈີນກໍໄດ້ຮັບຄວາມໄວ້ເນື້ອເຊື່ອໃຈຈາກປະຊາຊົນບັນດາປະເທດໃນໂລກ. ໃນຫຼາຍປີມານີ້, ຈັງຫວະເຕີບໂຕຂອງຢາທຳມະຊາດໃນຕະຫຼາດສາກົນໄດ້ສູງກວ່າຈັງຫວະເຕີບໂຕຂອງຢາເຄມີ.
ໂດຍອີງໃສ່ແງ່ຂະຫຍາຍດັ່ງກ່າວນີ້ ລັດຖະບານຈີນຕັ້ງໜ້າດຳເນີນການແລກປ່ຽນແລະການຮ່ວມມືກັບບັນດາປະເທດດ້ານຢາຈີນແລະແພດສາດຈີນ. ໃນກອງປະຊຸມ ວຽກງານຂອງກົມຄຸ້ມຄອງຢາຈີນແລະແພດສາດຈີນແຫ່ງຊາດຈີນທີ່ຈະອັດລົງໃນວັນທີ 7 ມັງກອນ ທ່ານເສີນຈືຊຽງ ຫົວໜ້າກົມຮ່ວມມືສາກົນສັງກັດກົມຄຸ້ມຄອງຢາຈີນແລະແພດສາດຈີນແຫ່ງຊາດຈີນສະເໜີວ່າ, ນັບມາຮອດເດືອນທັນວາປີ 2004, ຈີນໄດ້ເຊັນສັນຍາຮ່ວມມືສອງຕໍ່ສອງ ກັບ 61ປະເທດໃນດ້ານຢາຈີນແລະແພດສາດຈີນ. ທ່ານເວົ້າວ່າ: ພາຍຫຼັງຈີນເຊັນສັນຍາການຮ່ວມມືດ້ານຢາຈີນແລະແພດສາດຈີນກັບປະເທດອື່ນແລ້ວ, ຢາຈີນແລະແພດສາດຈີນກໍໄດ້ກ້າວໄປສູ່ໂລກ, ນີ້ກໍໄດ້ເປັນເງື່ອນໄຂສຳຄັນທີ່ໃຫ້ຢາຈີນແລະແພດສາດຈີນເຂົ້າໃນລະບົບປິ່ນປົວແລະສາທາລະນະສຸກແຫ່ງຊາດປະເທດອື່ນໆ.
ທ່ານເສີຈືຊຽງກ່າວວ່າ, ພາຍຫຼັງເຊັນສັນຍາແລ້ວ, ລັດຖະບານຈີນຍັງສຸດທີ່ເອົາໃຈໃສ່ນຳການຈັດຕັ້ງປະຕິບັດສັນຍາທີ່ກ່ຽວຂ້ອງ, ຕັ້ງໜ້າຊີ້ນຳ ເຕືອນໃຫ້ອົງການປະຕິບັດງານຄື ອົງການວິຊາການ ມະຫາວິທະຍາໄລແລະໂຮງໝໍເປັນຕົ້ນດຳເນີນການຮ່ວມມືສາກົນໃຕ້ຂອບສັນຍາຮ່ວມມື. ການຮ່ວມມືລະຫວ່າງອົງການປິ່ນປົວແລະອົງການຄົ້ນຄວ້າລະຫວ່າງຈີນແລະຕ່າງປະເທດໄດ້ເພີ່ມຂຶ້ນຢ່າງບໍ່ຢຸດຢັ້ງ, ຕົວຢ່າງຄື ໂຄງການປ້ອງກັນແລະປິ່ນປົວພະຍາດເລືອດດ້ວຍຢາຈີນແລະແພດສາດຈີນທີ່ຈີນອົສຕຼາລີຮ່ວມກັນດຳເນີນແລະໂຄງການອື່ນໆ, ລ້ວນແຕ່ໄດ້ຮັບການສະໜັບສະໜູນຢ່າງແຂງແຮງຈາກລັດຖະບານທັງສອງປະເທດ.
ຄຽງຄູ່ກັບການແລກປ່ຽນແລະການຮ່ວມມືລະຫວ່າງຊາດດ້ານຢາຈີນແລະແພດສາດຈີນໄດ້ຂະຫຍາຍຕົວອອກ, ປະຊາຄົມໂລກໄດ້ຮັບຮູ້ຈຸດພິເສດແລະທ່າແຮງຂອງຢາຈີນແລະແພດສາດຈີນເປັນກ້າວໆ, ແຕ່ໃນຂະນະດຽວກັນນີ້ ການແລກປ່ຽນແລະການຮ່ວມມືລະຫວ່າງຊາດດ້ານຢາຈີນແລະແພດສາດຈີນກໍປະສົບຄວາມຫຍຸ້ງຍາກແລະບັນຫາຈຳນວນໜຶ່ງ, ຕົວຢ່າງຄື ຍ້ອນເບື້ອງຫຼັງວັດທະນະທຳຕ່າງກັນ, ພາກສ່ວນສາທາລະນະສຸກ ອົງການວິຊາການແລະມວນຊົນຂອງຫຼາຍປະເທດບໍ່ເຂົ້າໃຈຢາຈີນແລະແພດສາດຈີນ, ສະນັ້ນ ຢູ່ຫຼາຍປະເທດ ຢາຈີນແລະແພດສາດຈີນຍັງບໍ່ທັນມີຖານະທີ່ຊອບກົດໝາຍ; ບາງສື່ມວນຊົນພົ້ນທະເລບໍ່ເຂົ້າໃຈຢາຈີນແລະແພດສາດຈີນ ເລີຍໂຄສະນາແຕ່ລັກສະນະພິດແລະບົດບາດດ້ານລົບຂອງຢາຈີນແລະແພດສາດຈີນ, ຈຶ່ງພາມວນຊົນຕ່າງປະເທດເຂົ້າໃຈໄປທາງຜິດ.
ທ່ານເສີນຈືຊຽງ ຫົວໜ້າກົມຮ່ວມມືລະຫວ່າງຊາດສັງກັດກົມຄຸ້ມຄອງຢາຈີນແລະແພດສາດຈີນແຫ່ງຊາດຈີນກ່າວວ່າ, ຕໍ່ໄປພາຍໜ້າ ພາກສ່ວນຄຸ້ມຄອງຢາຈີນແລະແພດສາດຈີນຂອງຈີນຈະສືບຕໍ່ຊຸກຍູ້ການແລກປ່ຽນແລະການຮ່ວມມືລະຫວ່າງຊາດດ້ານຢາຈີນແລະແພດສາດຈີນ, ດ້ານໜຶ່ງ, ຈີນຈະສືບຕໍ່ຍຶດໝັ້ນການແລກປ່ຽນແລະການຮ່ວມມືລະຫວ່າງຊາດ, ເຊັນສັນຍາຮ່ວມມືສອງຕໍ່ສອງກັບປະເທດຫຼາຍກວ່າເກົ່າກ່ຽວກັບຢາຈີນແລະແພດສາດຈີນ; ອີກດ້ານໜຶ່ງ, ຈີນຈະຊຸກຍູ້ການກຳນົດມາດຖານແຫ່ງຢາຈີນແລະແພດສາດຈີນ, ເລັ່ງລັດພັດທະນາຢາຈີນແລະແພດສາດຈີນຢູ່ຕ່າງປະເທດ, ເສີມຂະຫຍາຍບົດບາດສຳຄັນກວ່າເກົ່າຂອງຢາຈີນແລະແພດສາດຈີນໃນການຮັກສາສຸຂະພາບຂອງມະນຸດ.ທ່ານເວົ້າວ່າ: ຢາຈີນແລະແພດສາດຈີນຈະກ້າວໄປສູ່ໂລກໃນລະດັບສູງແລະມີຄຸນນະພາບສູງໄດ້ຫຼືບໍ່ນັ້ນ ຂໍກະແຈແມ່ນຕ້ອງມີມາດຖານ, ລວມທັງມາດຖານຂອງຢາຈີນ ມາດຖານຂອງການສຶກສາແລະມາດຖານປິ່ນປົວ.
ນອກນີ້ ປະຈຸບັນ ຈີນໄດ້ຮັບຜົນອັນແນ່ນອນແລ້ວໃນການປູກຢາສະໝູນໄພເປັນແບບສະບັບ ຍົກສູງລະດັບວິທະຍາສາດເຕັກນິກປຸງແຕ່ງຢາຈີນແລະແພດສາດຈີນແລະເພີ່ມທະວີການຄົ້ນຄວ້າພື້ນຖານຢາຈີນແລະແພດສາດຈີນເປັນຕົ້ນ.
|
