|
|
(GMT+08:00)
2005-01-11 16:56:20
|
|
ປາເລັສຕິນກ້າວເຂົ້າສູ່ຍຸກໃໝ່ທີ່ສືບຕໍ່ພາລະກິດຂອງຄົນຮຸ່ນກ່ອນ ເບີກທາງໃນອະນາຄົດ
cri
CRIລາຍງານວ່າ,ໃນການເລືອກຕັ້ງທົ່ວໄປຂອງປາເລັສຕິນທີ່ຈັດຂຶ້ນໃນວັນທີ9ມັງກອນ,ທ່ານອັບບັສ ປະທານຄະນະບໍລິຫານງານອົງການປົດປ່ອຍປາເລັສຕິນຊຸດປະຈຸບັນໄດ້ຮັບໄຊຊະນະດ້ວຍທ່າແຮງເດັດຖານ,ໄດ້ຮັບເລືອກຕັ້ງເປັນປະທານອົງການອຳນາດແຫ່ງຊາດປາເລັສຕິນຢ່າງສະດວກ.ໃນນາມເປັນຜູ້ສືບທອດແລະຜູ້ບຸກເບີກພາລະກິດປົດປ່ອຍຊາດປາເລັສຕິນ,ເມື່ອໄດ້ຮັບການເລືອກຕັ້ງແລ້ວ,ທ່ານອັບບັສໄດ້ກ່າວໃນທັນທີວ່າ: ທ່ານຈະພ້ອມກັນກັບປະຊາຊົນປາເລັສຕິນແລະບັນດາຝ່າຍຂອງປາເລັສຕິນ,ສຸມກຳລັງສ້າງຕັ້ງປະເທດປາເລັສຕິນທີ່ທຸກຄົນມີຄວາມປອດໄພ,ຕັ້ງນະຄອນຫຼວງຢູ່ເຢລູຊາເລມ,ເປັນເອກະລາດແລະມີເສລີພາບ.
ປະຊາຊົນປາເລັສຕິນໄດ້ມີຄວາມຫ້າວຫັນຢ່າງບໍ່ເຄີຍມີມາກ່ອນຕໍ່ການເລືອກຕັ້ງທົ່ວໄປເທື່ອນີ້,ຕົ້ນຕໍແມ່ນສະແດງອອກໃຫ້ເຫັນໃນດ້ານຕ່າງໆເຊັ່ນ: ປະຊາຊົນຜູ້ມີສິດເລືອກຕັ້ງທີ່ຈົດທະບຽນໄດ້ກວມອັດຕາສ່ວນສູງ,ແລະ ຜູ້ປ່ອນບັດກໍຫຼາຍ.ຕາມສະຖິຕິ,ອັດຕາປ່ອນບັດເທື່ອນີ້ກວມ65%,ເຊິ່ງກາຍຈຳນວນເຄິ່ງໜຶ່ງທີ່ກຳນົດໃນຫຼັກການນັບບັດຂອງການເລືອກຕັ້ງເທື່ອນີ້.ຕາມຕົວເລກທີ່ອົງການຊົງອິດທິພົນປະກາດ,ອັດຕາໄດ້ບັດຂອງທ່ານອັບບັສສູງເຖິງ66%.ທ່ານອັບບັສທີ່ຖືກຖືເປັນຕົວແທນຂອງຝ່າຍອ່ອນໂຍນຂອງປາເລັສຕິນໄດ້ຮັບເລືອກຕັ້ງດ້ວຍບັດສ່ວນຫຼາຍເດັດຖານ,ທັງນີ້,ດ້ານໜຶ່ງສະແດງໃຫ້ເຫັນວ່າ,ມວນຊົນປາເລັສຕິນຮັບຮູ້ປີຊາສາມາດຂອງສ່ວນຕົວທ່ານອັບບັສແລະຖານະຂອງທ່ານໃນປະຊາຄົມໂລກ,ອີກດ້ານໜຶ່ງ,ໄດ້ສະແດງໃຫ້ເຫັນວ່າ,ເມື່ອໄດ້ຜ່ານປະສົບການປະທະກັນຢ່າງນອງເລືອດເປັນເວລາເຄິ່ງສະຕະວັດກວ່າແລ້ວ,ຊາວປາເລັສຕິນນັບມື້ນັບຫຼາຍເລີ່ມເບື່ອໜ່າຍ ສົງຄາມແລະການປະທະກັນດ້ວຍກຳລັງຮຸນແຮງ,ປາຖະໜາສັນຕິພາບ,ປາຖະໜາບັນລຸຄວາມຝັນສ້າງຕັ້ງປະເທດດ້ວຍຮູບການເຈລະຈາສັນຕິພາບ.
ການເລືອກຕັ້ງທົ່ວໄປເທື່ອນີ້ຈັດຂຶ້ນຢ່າງສະດວກບໍ່ພຽງແຕ່ແມ່ນເຫດການໃຫຍ່ຂອງປະຊາຊົນປາເລັສຕິນເທົ່ານັ້ນ,ແລະກໍໄດ້ຮັບຄວາມເອົາໃຈໃສ່ຢ່າງກວ້າງຂວາງຈາກປະຊາຄົມໂລກ.ຜູ້ສັງເກດການ800ກວ່າຄົນຂອງ60ກວ່າປະເທດໄດ້ເດີນທາງໄປກວດກາການເລືອກຕັ້ງຢູ່ປາເລັສຕິນ.ປະຊາຄົມໂລກເຂົ້າຮ່ວມຢ່າງກວ້າງຂວາງໄດ້ຮັບປະກັນລັກສະນະຍຸດຕິທຳ,ຄວາມໂປ່ງໃສແລະປະຊາທິປະໄຕຂອງການເລືອກຕັ້ງ ເທື່ອນີ້.
ຄົນທັງຫຼາຍເຫັນວ່າ,ຊັ້ນຜູ້ນຳໃໝ່ຂອງປາເລັສຕິນທີ່ນຳໂດຍທ່ານອັບບັສພວມປະເຊີນກັບການທ້າທາຍແລະການທົດສອບທີ່ລຳບາກກາກກຳ,ໃນນັ້ນ,ລວມທັງບັນຫາເຮັດແນວໃດ,ດຳເນີນການປະຕິຮູບການເມືອງປະຊາທິປະໄຕພາຍໃນປາເລັສຕິນ,ລົງໂທດການຊຸດໂຊມເປື່ອຍເຍື່ອຍ,ເຮັດແນວໃດ, ພັດທະນາເສດຖະກິດ,ຍົກລະດັບຊີວິດການເປັນຢູ່ຂອງປະຊາຊົນໃຫ້ສູງຂຶ້ນ.ເຮັດແນວໃດ,ເພີ່ມທະວີການຄວບຄຸມຝ່າຍຫົວຮຸນແຮງ,ປົວແປງສະຖານະການຄວາມປອດໄພຂອງເຂດໃຫ້ດີຂຶ້ນເປັນຕົ້ນ.ແນ່ນອນແລ້ວ,ການທ້າທາຍທີ່ຂ້ຽວຂາດກວ່າໝູ່ຍັງຄົງແມ່ນເຮັດແນວໃດຟື້ນຟູການເຈລະຈາສັນຕິພາບກັບອິສລະແອນໂດຍໄວແລະຈະເຮັດແນວໃດໃຫ້ອຸດົມການສ້າງຕັ້ງປະເທດຂອງປະຊາຊົນປາເລັສຕິນບັນລຸຜົນເປັນຈິງ.ເວົ້າສຳລັບທ່ານອັບບັສແລ້ວ,ຕ້ອງເຈລະຈາ,ຍາດແຍ່ງປົກປ້ອງສິດປະໂຫຍດອັນຊອບກົດໝາຍຂອງປະຊາຊົນປາເລັສຕິນ,ທັງຕ້ອງມີຄວາມຄ່ອງແຄ້ວສະຫຼາດຫຼັກແຫຼມ,ທັງນີ້ຕ້ອງການໃຫ້ມີສະຕິປັນຍາແລະເຕັກນິກການເມືອງອັນຍອດຢ້ຽມ.ຄົນທັງຫຼາຍໄດ້ສັງເກດເຫັນວ່າ,ເຖິງວ່າໃນໄລຍະມໍ່ໆນີ້,ປາເລັສຕິນແລະອິດສະລະແອນລ້ວນແຕ່ໄດ້ສະແດງໃຫ້ເຫັນວິແວວປອງດອງກັນບາງຢ່າງກໍຕາມ,ແຕ່ໃນບັນຫາສຳຄັນຕ່າງໆ, ຫຼັກໝັ້ນຫຼັກການຂອງສອງຝ່າຍຍັງ ໄກກັນຫຼາຍ.ກໍຄືກັບທ່ານວາງຊືເຈ ທູດພິເສດກ່ຽວກັບບັນຫາຕາເວັນອອກກາງຂອງຈີນໄດ້ເວົ້ານັ້ນວ່າ,ປາເລັສຕິນກັບອິດສະລະແອນມີຫວັງຈະຟື້ນຟູການເຈລະຈາສັນຕິພາບ,ແຕ່ຍ້ອນສອງຝ່າຍລ້ວນແຕ່ຖືກກຳລັງຕໍ່ຕ້ານຢູ່ພາຍໃນຖ່ວງດຶງ,ຂະບວນການເຈລະຈາສັນຕິພາບຈິ່ງຈະຄົດລ້ຽວແລະຍາວໄກ.
ເວົ້າລວມແລ້ວ,ທ່ານອັບບັສໄດ້ຮັບເລືອກຕັ້ງເປັນປະທານອົງການອຳນາດແຫ່ງຊາດປາເລັສຕິນເປັນຂີດໝາຍສະແດງໃຫ້ເຫັນວ່າ,ປາເລັສຕິນໄດ້ກ້າວເຂົ້າສູ່ຍຸກໃໝ່.ແຕ່ເວົ້າສຳລັບສັນຕິພາບລະຫວ່າງປາເລັສຕິນແລະອິດສະລະແອນ,ແລະເວົ້າສຳລັບອຸດົມການສ້າງຕັ້ງປະເທດຂອງປາເລັສຕິນແລ້ວ,ຍັງຈະປະເຊີນກັບປັດໄຈອັນບໍ່ແນ່ນອນຕ່າງໆບົນເສັ້ນທາງກ້າວເດີນ.
|
|
|