|
|
 |
| (GMT+08:00)
2005-01-12 16:18:08
|
 |
|
ອິນໂດເນເຊຍໃນສອງອາທິດປາຍຫຼັງປະສົບໄພຄື້ນທະເລຊູນາມີ
cri
Author: zl
ໄພແຜ່ນດິນໄຫວແລະຄື້ນທະເລຊູນາມີມະຫາສະໝຸດອິນເດຍໄດ້ຜ່ານໄປສອງອາທິດປາຍແລ້ວ, ວັນທີ 8 ມັງກອນ, ນັກຂ່າວຕ່າງປະເທດຫຼາຍຄົນ ຊຶ່ງລວມທັງນັກຂ່າວຊິນຮວາ ໄດ້ຂີ່ຍົນຂົນສົ່ງຂອງສິງກະໂປ, ບິນໄປອິນໂດເນເຊຍທີ່ປະສົບໄພຮ້າຍແຮງກວ່າເພິ່ນເທື່ອນີ້,ນັກຂ່າວທຸກຄົນໃຜກໍຮູ້ສຶກຢ່າງເລິກເຊິ່ງວ່າ,ຄື້ນທະເລໄດ້ນຳເອົາຄວາມເສຍຫາຍແລະຄວາມເຈັບຊ້ຳມາໃຫ້ແຫ່ງນີ້ ຈົນສະເທືອນຈິດສະເທືອນໃຈຄົນຢ່າງພິລຶກ.
ໃນເວລານັກຂ່າວເບິ່ງລົງມາຈາກຍົນ ໄດ້ເຫັນເມືອງມີລາອູແຂວງອາເຊ ອິນໂດເນເຊຍທີ່ຕັ້ງຢູ່ຝັ່ງກົງກັນຂ້າມກັບເມືອງບານດາອາເຊ,ເຫັນຫາດຊາຍທະເລທີ່ຍາວ 250 ກິໂລແມັດແຕ່ບານດາອາເຊຮອດມີລາອູ,ປະກົດມີສະພາບທີ່ເປັນຕາຢ້ານແລະບໍ່ໜ້າເຊື່ອເລີຍ.ຄື້ນທະເລຊູນາມີໄດ້ລ້າງຜານທຸກສິ່ງທຸກຢ່າງຢູ່ແຫ່ງນັ້ນໃນເວລາພັບຕາດຽວ,ຕົວເມືອງແລະໝູ່ບ້ານທັງໝົດຖືກຄື້ນທະເລກະທົບທຳລາຍຈົນແປນບໍ່ມົ້ມຈັກບ່ອນ.ສະຖານທີ່ພັກຜ່ອນທີ່ຄົນທັງຫຼາຍຖືເປັນສະຫວັນເມືອງຄົນໃນເມື່ອກ່ອນ ຈົນຊອກບໍ່ເຫັນຮ່ອງຮອຍເລີຍ,ເຫຼືອແຕ່ຊາກເຮືອນຫຼືໂບດຫຼັງໜຶ່ງສອງຫຼັງເທົ່ານັ້ນ.ຝ່າຍທີ່ກ່ຽວຂ້ອງຄາດຄະເນວ່າ,ຖ້າສ້າງສາຄືນໃໝ່ທັງໝົດ ຕ້ອງການເວລາຫຼາຍປີ.
ໃນເວລານັກຂ່າວຍ່າງຢູ່ຕາມຖະໜົນຫົນທາງເມືອງບານດາອາເຊທີ່ປະສົບໄພໜັກໜ່ວງທີ່ສຸດນັ້ນ,ໄດ້ເຫັນຄຸ້ມຖະໜົນການຄ້າທີ່ສີວິໄລຮຸ່ງເຮືອງໃນເມື່ອກ່ອນ ຍັງເຫຼືອແຕ່ຊາກສະຫຼັກຫັກພັງ,ເກີບ ປຶ້ມຮຽນ ໝໍ້ຂາງ ຊາມແລະຖັງແກັສຢາຍຊະຊາຍ; ຮ້ານຄ້າເປັນຫຼັງໆ ກໍກາຍເປັນໂໝ້ງມືດທີ່ເປັນຕາຢ້ານ. ມີແຕ່ປ້າຍໂຄສະນາຂອງຮ້ານເສີມສວຍຮ້ານໜຶ່ງ ຍັງແຂວນໄວ້ຢູ່ບ່ອນເກົ່າຢ່າງເປັນຕາງຶດ, ຮູບຍິງສາວຢູ່ເທິງປ້າຍ,ຈັ່ງແມ່ນປະຈັກຕາພິເສດໃນກອງຊາກເຮືອນທີ່ເພພັງ.
ຮາວເຫຼັກຂອງຂົວຢູ່ກາງເມືອງຖືກນ້ຳຊຸຈົນຄົດ,ຢູ່ສົ້ນໜຶ່ງຂອງຂົວ,ມີເຮືອຫາປາໃຫຍ່ສອງລຳ,ທ້ອງເຮືອຖືກຕຳຈົນແຕກຍະອອກຄ້າງຢູ່ສອງຟາກທາງ.ຢູ່ໃຕ້ຂົວ,ມີລົດທະຫານສອງສາມຄັນຈອດຢູ່,ພວກທະຫານອິນໂດເນເຊຍພວມຂົນເອົາສົບທີ່ໃສ່ໃນຖົງຢາງຂຶ້ນລົດ.ຄົນຢູ່ແຫ່ງນັ້ນເວົ້າວ່າ,ຢ່າງໜ້ອຍຍັງມີສົບ 1 ສ່ວນ 3 ຖືກເຕັງຢູ່ກ້ອງຊາກເຮືອນທີ່ຫັກພັງ.ຍາມຝົນຕົກ,ຫົນທາງຢູ່ລະຫວ່າງຊາກເຮືອນເຕັມໄປແຕ່ຂີ້ຕົມ,ຍ່າງໄປມາກໍຍາກ,ໃນເວລາຟ້າແດດ,ພັດມີແມງວັນບິນໄປບິນມາຢູ່ວື່ໆ.
ຜູ້ປະສົບໄພຫຼາຍຄົນບອກນັກຂ່າວວ່າ,ດຽວນີ້,ເລື່ອງທີ່ພວກເຂົາເຈົ້າເປັນຫ່ວງທີ່ສຸດ ກໍແມ່ນຂາດນ້ຳກິນແລະຢາປົວພະຍາດ, ແລະຢາກໃຫ້ສ້າງສາບ້ານເກີດເມືອງນອນຂອງຕົນຄືນໃໝ່ໂດຍໄວ.
ຢືນຢູ່ເທິງຂົວແນມເບິ່ງທາງໄກ,ເຫັນທະຫານອິນໂດເນເຊຍໄດ້ເລີ່ມເຜົາຊາກເຮືອນທີ່ຫັກພັງຢ່າງມີແຜນການແລ້ວ.ຢູ່ເດີ່ນບ້ານແຫ່ງໜຶ່ງ,ກອງກອບກູ້ຂອງອົສຕຼາລີທີ່ປະຈຳຢູ່ໃນເມືອງ,ກຳລັງກັ່ນເອົານ້ຳສະອາດສຳລັບກິນ.
ນາຍທະຫານສອງຄົນຂອງກອງກອບກູ້ສິງກະໂປແນະນຳໃຫ້ນັກຂ່າວຊາບວ່າ,ຜູ້ກອບກູ້ຂອງສິງກະໂປຢູ່ອິນໂດເນເຊຍດຽວນີ້ມີປະມານ 900 ຄົນ,ໃນນັ້ນ ມີ 700 ຄົນເຮັດວຽກຢູ່ເຂດມີລາອູ.ຍ້ອນຖະໜົນຫົນທາງເພຫຼາຍ, ການຄົມມະນາຄົມທາງບົກຢູ່ເຂດມີລາອູໄດ້ຂາດສະບັ້ນໄປ.ສິງກະໂປໄດ້ເປີດການຂົນສົ່ງທາງອາກາດແລະທາງທະເລ,ເພື່ອຂົນສົ່ງພັດສະດຸຊ່ອຍເຫຼືອໄປໃຫ້ເຂດມີລາອູ.ຝ່າຍທະຫານສິງກະໂປຍັງຕັ້ງໂຮງໝໍສະໜາມແຫ່ງໜຶ່ງຢູ່ມີໂລອູ,ແລະເລີ່ມເຮັດວຽກໃນວັນທີ 3 ມັງກອນ,ແຕ່ລະມື້ ຕ້ອງປົວໃຫ້ຜູ້ບາດເຈັບປະມານ 150 ຮອດ 200 ຄົນ.ທະຫານຊ່າງສິງກະໂປໄດ້ສ້າງບ່ອນທຽບທ່າ 2 ແຫ່ງແລ້ວ,ໄດ້ແປງບ່ອນໃຫ້ຍົນເຮລີກົບລົງຈອດ 7 ແຫ່ງ,ເປີດກວ້າງທາງແລ່ນໃຫ້ຍົນເຮລີກົບລົງຈອດ,ທັງພະຍາຍາມສ້າງຖະໜົນຫົນທາງຢູ່ໃນເມືອງມີລາອູຄືນໃໝ່.ພວກເຂົາເຈົ້າຍັງໄດ້ມອບເຄື່ອງຕອງນ້ຳໃຫ້ເຂດມີລາອູ.
ໃນຂະນະທີ່ປະຊາຄົມໂລກໃຫ້ການສະໜັບສະໜູນຊ່ອຍເຫຼືອຢ່າງແຂງແຮງນັ້ນ,ປະຊາຊົນເຂດປະສົບໄພຂອງອິນໂດເນເຊຍກໍເລີ່ມສ້າງສາບ້ານເມືອງຂອງຕົນຄືນໃໝ່ແລ້ວ.ບໍ່ວ່າຈະແມ່ນຢູ່ບານດາອາເຊຫຼືວ່າຢູ່ມີລາອູ,ກໍຈະໄດ້ເຫັນທະຫານອິນໂດເນເຊຍລາດຕະເວນຢູ່.ຢູ່ໃສກໍມີຜູ້ກອບກູ້ທີ່ນຸ່ງຊຸດສີແສດພວມເຮັດວຽກຢູ່,ລົດດຸດດິນຂະໜາດໃຫຍ່ກໍຂຸ້ນຂ້ຽວຂົນເອົາຂີ້ເຫຍື້ອແລະຂອງເປເພທີ່ກອງປານພູ,ສາມັນຊົນກໍເລີ່ມສ້ອມແປງເຮືອນຊານບ້ານຊ່ອງຂອງຕົນແລ້ວ.
ເຖິງວ່າໄພພິບັດບໍ່ປານີ,ຂໍແຕ່ມະນຸດເຮົາມີຄວາມຮັກແພງຊຶ່ງກັນແລະກັນ.ພວກເຮົາເຊື່ອວ່າ,ພາຍໃຕ້ການສະໜັບສະໜູນຊ່ອຍເຫຼືອຢ່າງແຂງແຮງຂອງປະຊາຄົມໂລກ,ປະຊາຊົນເຂດປະສົບໄພອິນໂດເນເຊຍຍ່ອມຈະສາມາດຜ່ານຜ່າຄວາມຫຍຸ້ງຍາກ,ລຸກຢືນຂຶ້ນຢ່າງກ້າຫານທົນທານ,ສ້າງສາບ້ານເມືອງທີ່ແຕກສະຫຼາຍຂອງຕົນຄືນໃໝ່ໄດ້.
|
|
|
