|
|
(GMT+08:00)
2005-01-13 09:23:07
|
|
ນັກຮຽນຢູ່ເຂດປະສົບໄພເລີ່ມເຂົ້າຮຽນໃຫມ່
cri
ໄພຄຶ້ນທະເລຊູນາມີມະຫາສະຫມຸດອິນເດຍໄດ້ສ້າງຊາກສະຫລັກຫັກພັງຢ່າງຫຼວງຫຼາຍໄວ້ໃຫ້ແກ່ປະເທດອາຊີອາຄະເນແລະອາຊີໃຕ້,ປະຈຸບັນ,ມື້ໄຂສົກຮຽນຂອງໂຮງຮຽນໄດ້ມາຮອດແລ້ວ,ແຕ່ໂຮງຮຽນທີ່ເດັກນ້ອຍທັງຫລາຍເຄີຍຄຸ້ນເຄີຍແລະມັກນັ້ນພັດປ່ຽນໂສມຫນ້າໄປຫມົດ.ຕໍ່ໄປແມ່ນບົດແຈ້ງຂ່າວທີ່ນັກຂ່າວສຳນັກຂ່າວສານຊິນຮວາລາຍງານຈາກບາງກອກ.
ວັນທີ 10 ມັງກອນ,ນັກຮຽນຂອງບ້ານນ້ຳເຄັມອຳເພີຕະກົ່ວປ່າຈັງຫວັດພັງງາທີ່ປະສົບໄພຮ້າຍແຮງກວ່າຫມູ່ຢູ່ພາກໃຕ້ຂອງໄທໄດ້ໄຂສົກຮຽກຄືນໃຫມ່ຢ່າງເປັນທາງການ.ຕອນທ່ຽງ ວັນທີ 10 ມັງກອນ,ນັກຂ່າວໄດ້ໄປຮອດໂຮງຮຽນຫລັງຫນຶ່ງທີ່ຫ່າງຈາກບ້ານນ້ຳເຄັມ 2,5 ກິໂລແມັດ.ພໍຍ່າງເຂົ້າປະຕູໂຮງຮຽນກໍໄດ້ເຫັນນັກຮຽນ 40 ກວ່າຄົນທີ່ອາຍຸຕ່າງກັນໄດ້ລຽນກັນເປັນຫລາຍແຖວ,ເພື່ອກຽມຮັບເງິນສົງເຄາະ.
ຢູ່ຫ້ອງການຫນຶ່ງຂອງໂຮງຮຽນ,ຄົນເຢຍລະມັນຜູ້ຫນຶ່ງທີ່ແຂນຖືກບາດເຈັບຈາກຄຶ້ນ ທະເລຊູນາມີພວມບັນຊາເພື່ອນຂອງທ່ານແຈກເງິນສົງເຄາະໃຫ້ນັກຮຽນທັງຫລາຍ.ທ່ານເວົ້າວ່າ,"ບາດເຈັບຂອງຂ້າພະເຈົ້າບໍ່ເປັນຫຍັງ.ຜູ້ທີ່ຖືກຜົນສະທ້ອນຈາກໄພພິບັດຢ່າງແທ້ຈິງນັ້ນມີຢູ່ຢ່າງຫລວງຫລາຍ.ຊາວປະມົງບາງຄົນໄດ້ເສຍເຮືອຫາປາທີ່ອາໄສໃນການທຳມາຫາກິນ, ລູກເສຍພໍ່ເສຍແມ່,ມີຄົນຈຳນວນບໍ່ຫນ້ອຍໄຮ້ທີ່ເພິ່ງພາອາໄສ."
ຕາມຮູ້ວ່າ,ຄູແລະນັກຮຽນຫລາຍໆຄົນຂອງໂຮງຮຽນຫລັງນີ້ລ້ວນແຕ່ໄດ້ຖືກຜົນສະທ້ອນຈາກໄພຄຶ້ນທະເລ.ໃນນັກຮຽນ 600 ກວ່າຄົນຂອງທົ່ວໂຮງຮຽນ,ມີປະມານ 50 ຄົນໄດ້ກຳພ້າພໍ່ຫລືແມ່,ໃນນັ້ນຍັງມີ 9 ຄົນໄດ້ກາຍເປັນເດັກກຳພອຍ.ຜູ້ທີ່ອາຍຸນ້ອຍກວ່າຫມູ່ໃນຫມູ່ພວກເຂົາເຈົ້າມີພຽງບໍ່ເທົ່າໃດຂວບ ພວມຮຽນຢູ່ຫ້ອງກຽມປະຖົມ,ຜູ້ໃຫຍ່ກວ່າຫມູ່ພວມຮຽນຢູ່ມັດທະຍົມຕົ້ນປີທີສອງ.ຫລາຍບໍລິສັດທ່ອງທ່ຽວຂອງສິງກະໂປ ມາເລເຊຍແລະພູເກັດຂອງໄທໄດ້ຈັດການເຄື່ອນໄຫວບໍລິຈາກໂດຍສະເພາະເພື່ອເລື່ອງນີ້,ຫ້າງຫາເງິນໄດ້ລວມສອງແສນບາດ,ແຈກໃຫ້ເດັກນ້ອຍທີ່ປະສົບໄພຂອງໂຮງຮຽນຫລັງນີ້.ນາງຢາງຂອງບໍລິສັດທ່ອງທ່ຽວຫລັງຫນຶ່ງຢູ່ພູເກັດກ່າວວ່າ,ເງິນທີ່ພວກເຂົາເຈົ້າຫ້າງຫາໄດ້ນັ້ນບໍ່ຫລາຍ,ແຕ່ນ້ຳໃຈຢູ່ໃນນັ້ນແມ່ນເອົາເງິນຄຳມາຊັ່ງຊາບໍ່ໄດ້.
ນັກຂ່າວໄດ້ເຫັນວ່າ,ພາຍຫລັງໄດ້ຮັບເງິນບໍລິຈາກແລ້ວ,ນັກຮຽນຜູ້ຍິງມັດທະຍົມປີທີສອງຜູ້ຫນຶ່ງມີນ້ຳຕາເຕັມເບົ້າ,ຄູສອນລູບຫົວນາງ,ປອບໃຈນາງຢູ່ເລື້ອຍໆ,ໃຫ້ນາງຈົ່ງເຮັດໃຈເຂັ້ມແຂງ.ຄູບອກນັກຂ່າວວ່າ,ລັດຖະບານໄທໄດ້ຈັດຕັ້ງຈິດຕະແພດມາໃຫ້ຄຳປຶກສາດ້ານຈິດຕະສາດແກ່ເດັກນ້ອຍທີ່ກຳພ້າພໍ່ແມ່ຢູ່ໂຮງຮຽນຫລາຍເທື່ອແລ້ວ.
ປະຈຸບັນ,ລັດຖະບານໄທພວມປຸກເຮືອນໃຫ້ແກ່ເດັກນ້ອຍທັງຫລາຍທີ່ກຳພ້າພໍ່ແມ່.ສົມເດັດພູມິພົນ ອະດຸນຍະເດດ ເຈົ້າຊີວິດໄທກໍ່ຊົງໄດ້ເຂົ້າຮ່ວມການບໍລິຈາກ,ແລະຊົງຮຽກຮ້ອງໃຫ້ສ້າງໂຮງຮຽນເດັກກຳພ້າກຳພອຍສອງຫລັງເພື່ອຊ່ອຍໃຫ້ເດັກກຳພ້າກຳພອຍເຂົ້າໂຮງຮຽນຕະຫລອດຮອດຮຽນຈົບຈາກມະຫາວິທະຍາໄລ.
|
|
|