|
|
 |
| (GMT+08:00)
2005-01-13 09:28:40
|
 |
|
ຄະນະສັງເກດການຂອງຈີນໄດ້ສຳເລັດພາລະກຳຢ່າງສະດວກໃນການເລືອກຕັ້ງທົ່ວໄປຂອງປາເລັສຕິນ
cri
CRIລາຍງານວ່າ,ໂດຍຕອບສະໜອງຄຳເຊີນຂອງລັດຖະບານປາເລັສຕິນປົກຄອງຕົນເອງ,ວັນທີ9ມັງກອນ,ຄະນະສັງເກດການຂອງຈີນທີ່ນຳໂດຍທ່ານເອອັກຄະລັດຖະທູດຢາວຄ່ວງອີໄດ້ຕິດຕາມສັງເກດການເລືອກຕັ້ງປະທານອົງການອຳນາດແຫ່ງຊາດປາເລັສຕິນ,ໄດ້ສຳເລັດພາລະກຳເທື່ອນີ້ຢ່າງສະດວກ.ວັນທີ11ມັງກອນ,ໃນເວລາທ່ານນາບິນຊາອັດລັດຖະມົນຕີການຕ່າງປະເທດຂອງລັດຖະບານປາເລັສຕິນປົກຄອງຕົນເອງພົບປະສະມາຊິກຄະນະສັງເກດການຈີນນັ້ນ,ທ່ານໄດ້ຍ້ອງຍໍໃນລະດັບສູງຕໍ່ຄະນະສັງເກດການຈີນທີ່ໄດ້ເສີມຂະຫຍາຍບົດບາດພິເສດໃນການເລືອກຕັ້ງທົ່ວໄປຂອງປາເລັສຕິນ.
ວັນທີ11ມັງກອນ,ໃນເວລາໃຫ້ສຳພາດຕໍ່ນັກຂ່າວວິທະຍຸCRIກ່ຽວກັບສະພາບການເລືອກຕັ້ງທົ່ວໄປຂອງປາເລັສຕິນ,ທ່ານເອອັກຄະລັດຖະທູດຢາວຄ່ວງອີ ກ່າວວ່າ,ທ່ານເຫັນວ່າການເລືອກຕັ້ງເທື່ອນີ້ສຳເລັດຜົນດີສົມຄວນ.ພ້ອມກັນນັ້ນ,ທ່ານຍັງກ່າວເນັ້ນວ່າ,ການເລືອກຕັ້ງທົ່ວໄປຈັດຂຶ້ນຢ່າງສຳເລັດຜົນແມ່ນແຍກອອກຈາກຄວາມພະຍາຍາມຂອງອົງການອຳນາດແຫ່ງຊາດປາເລັສຕິນແລະການສະໜັບສະໜູນຢ່າງກວ້າງຂວາງຂອງປະຊາຄົມໂລກບໍ່ໄດ້.ທ່ານຢາວຄ່ວງອີ ເວົ້າວ່າ:
"ສິ່ງປະທັບໃຈທົ່ວໄປແມ່ນການເລືອກຕັ້ງຂອງປາເລັສຕິນໄດ້ຈັດຂຶ້ນຂ້ອນຂ້າງສະດວກ,ປະຊາຊົນຜູ້ມີສິດເລືອກຕັ້ງໄດ້ໃຊ້ສິດປະຊາທິປະໄຕຂອງຕົນໃນທ່າມກາງບັນຍາກາດປະຊາທິປະໄຕແລະທ່ຽງທຳ.ວຽກງານການຈັດຕັ້ງກໍດີສົມຄວນ.ເທື່ອນີ້,ນອກຈາກຄະນະສັງເກດການຂອງຈີນແລ້ວ,ຍັງມີຄະນະສັງເກດການຂອງອົງການສະຫະປະຊາຊາດ,ສະຫະພາບເອີລົບແລະອາເມລິກາເປັນຕົ້ນໄດ້ມາຕິດຕາມ ການເລືອກຕັ້ງ ເທື່ອນີ້.ເວົ້າລວມແລ້ວ,ການເລືອກຕັ້ງເທື່ອນີ້ແມ່ນດຳເນີນໄປຢ່າງສະດວກແລະຂ້ອນຂ້າງສຳເລັດຜົນ."
ທ່ານເອກອັກຄະລັດຖະທູດຢາວຄ່ວງອີ ສະເໜີໃຫ້ຮູ້ວ່າ,ຄະນະສັງເກີດການຈີນລວມ6ຄົນແມ່ນເດີນທາງໄປຮອດລາມາລາໃນວັນທີ8ມັງກອນ,ໃນໄລຍະເລືອກຕັ້ງ,ພວກເຂົາເຈົ້າໄດ້ເລາະສຳຫຼວດຢູ່ບ່ອນປ່ອນບັດເກືອບ20ແຫ່ງຢູ່ແຖບກາຊາ,ຝັ່ງຕາເວັນຕົກແມ່ນ້ຳຈໍແດນແລະເຢລູຊາເລມຕາເວັນອອກເປັນຕົ້ນ.ໄດ້ສັງເກດຕະຫຼອດການເລືອກຕັ້ງທົ່ວໄປຂອງປາເລັສຕິນຢູ່ກັບທີ່,ໄດ້ຊອກຮູ້ສະພາບຕົວຈິງຂອງການເລືອກຕັ້ງຢ່າງຮອບດ້ານ.ທ່ານຢາວຄ່ວງອີ ເຜີຍໃຫ້ຮູ້ວ່າ,ໃນໄລຍະຈັດການເລືອກຕັ້ງທົ່ວໄປ,ຄະນະສັງເກດການຈີນຍັງໄດ້ຕິດຕໍ່ກັບຄະນະສັງເກດການສາກົນອື່ນໆຢ່າງກວ້າງຂວາງ,ຄະນະສັງເກດການສາກົນເຫຼົ່ານີ້ກໍໄດ້ຕີລາຄາຢ່າງຕັ້ງໜ້າຕໍ່ການເລືອກຕັ້ງເທື່ອນີ້.
ກ່ອນຄະນະສັງເກດການຈີນຈະກັບຄືນປະເທດພາຍຫຼັງໄດ້ສຳເລັດໜ້າທີ່ຕິດຕາມສັງເກດການເລືອກຕັ້ງ,ທ່ານຊາອັດລັດຖະມົນຕີກະຊວງການຕ່າງປະເທດຂອງລັດຖະບານປາເລັສຕິນປົກຄອງຕົນເອງໄດ້ພົບປະຄະນະສັງເກດການຈີນໃນວັນທີ11ມັງກອນ.ທ່ານເອກອັກຄະລັດຖະທູດຢາວຄ່ວງອີສະເໜີໃຫ້ຮູ້ວ່າ,ໃນການພົບປະ,ທ່ານຊາອັດໄດ້ຕາງໜ້າຝ່າຍປາເລັສຕິນຂອບໃຈນຳລັດຖະບານຈີນທີ່ສະໜັບສະໜູນປະຊາຊົນປາເລັສຕິນ,ຍ້ອງຍໍຄະນະສັງເກດການຈີນທີ່ໄດ້ເສີມຂະຫຍາຍບົດບາດພິເສດໃນການເລືອກຕັ້ງທົ່ວໄປຂອງປາເລັສຕິນ,ແລະຊີ້ອອກວ່າ,ບັນຫາຕາເວັນອອກກາງຄັນບໍ່ມີຈີນເຂົ້າຮ່ວມແມ່ນບໍ່ໄດ້.ຝ່າຍປາເລັສຕິນຫວັງໃຫ້ຈີນເສີມຂະຫຍາຍບົດບາດໃຫຍ່ຫຼວງກວ່າເກົ່າ.
ທ່ານຊາອັດຍັງກ່າວເນັ້ນເປັນພິເສດວ່າ,ພາຍຫຼັງທ່ານອັບບັສປະທານຄະນະບໍລິຫານງານອົງການປົດປ່ອຍປາເລັສຕິນໄດ້ຮັບໄຊຊະນະດ້ວຍສຽງສ່ວນຫຼາຍກວ່າໝູ່ໃນການເລືອກຕັ້ງທົ່ວໄປແລ້ວບໍ່ດົນ,ທ່ານຫູຈິນທາວ ປະທານປະເທດຈີນກໍໄດ້ຝາກໂທລະເລກອວຍພອນໂດຍໄວ,ນີ້ແມ່ນການສະໜັບສະໜູນຢ່າງແຂງແຮງຕໍ່ໝູ່ຄະນະນຳໃໝ່ຂອງປາເລັສຕິນ,ແລະກໍແມ່ນໃຫ້ກຳລັງໃຈແກ່ປະຊາຊົນປາເລັສຕິນປົກປ້ອງສິດປະໂຫຍດຂອງຊາດ.
ໃນການພົບປະ,ທ່ານເອກອັກຄະລັດຖະທູດຢາວຄ່ວງອີ ໄດ້ກ່າວເນັ້ນຫຼາຍເທື່ອວ່າ,ລັດຖະບານຈີນເອົາໃຈໃສ່ໃນລະດັບສູງຕໍ່ການເລືອກຕັ້ງທົ່ວໄປຂອງປາເລັສຕິນເທື່ອນີ້,ລັດຖະບານຈີນແຕ່ງຄະນະສັງເກດການໄປສັງເກດການເລືອກຕັ້ງເທື່ອນີ້ຕົ້ນຕໍກໍແມ່ນເພື່ອສະໜັບສະໜູນປະຊາຊົນປາເລັສຕິນ.
ຕາມໄດ້ຊາບ,ຄະນະສັງເກດການຂອງຈີນຕົກລົງຈະເດີນທາງອອກຈາກປາເລັສຕິນໃນຕອນຄ່ຳວັນທີ11ມັງກອນ.
|
|
|
