ຕາມຂ່າວCRI: ຫວ່າງມໍ່ໆນີ້ ສະຖານະການປາເລັສຕິນອິສລາແອນໄດ້ຊຸດຮ້າຍລົງຢ່າງໄວພະລັນ. ວັນທີ 14 ມັງກອນ, ອິສລາແອນໄດ້ປະກາດຕັດການພົວພັນທັງໝົດກັບອົງການອຳນາດແຫ່ງຊາດປາເລັສຕິນ ໂດຍອ້າງວ່າຊັ້ນນຳໃໝ່ຂອງປາເລັສຕິນບໍ່ໄດ້ໃຊ້ມາດຕະການສະກັດກັ້ນຜູ່ປະກອບອາວຸດປາເລັສຕິນຫຼອນໂຈມຕີເປົ້າໝາຍອິສລາແອນ, ແລະຢຸດຕິການກະກຽມການເຈລະຈາລະຫວ່າງທ່ານຊາລົງ ນາຍົກລັດຖະມົນຕີ ອິສລາແອນແລະທ່ານອັບບັສ ປະທານອົງການອຳນາດແຫ່ງຊາດປາເລັສຕິນ. ນີ້ແມ່ນວິກິດການຄັ້ງທຳອິດຂອງການພົວພັນລະຫວ່າງປາເລັສຕິນອິສລາແອນພາຍຫຼັງການເລືອກຕັ້ງທົ່ວໄປຂອງປາເລັສຕິນສິ້ນສຸດລົງ.
ສາມາດເວົ້າໄດ້ວ່າ, ພາຍຫຼັງທ່ານອາລາຟັດ ຜູ່ນຳປາເລັສຕິນເຖິງແກ່ກຳແລ້ວ, ການຫຼອນໂຈມຕີຕ້ານອິສລາແອນຂອງຜູ່ປະກອບອາວຸດປາເລັສຕິນທີ່ຈິງບໍ່ໄດ້ຢຸດເຊົາຈັກເທື່ອ. ບຸກຄົນວິເຄາະເຫັນວ່າ, ກ່ອນແລະຫຼັງການເລືອກຕັ້ງທົ່ວໄປຂອງປາເລັສຕິນ, ເນື່ອງຈາກປະຊາຄົມໂລກໄດ້ຝາກຄວາມຫວັງຢ່າງແຮງກ້າຕໍ່ການເລືອກຕັ້ງທົ່ວໄປຂອງປາເລັສຕິນ, ສະນັ້ນ ອິສລາແອນໄດ້ຮັກສາຄວາມອົດກັ້ນເພື່ອຫຼີກເວັ້ນໂທດກຳອັນທີ່ວ່າທຳລາຍການເລືອກຕັ້ງທົ່ວໄປຂອງປາເລັສຕິນ. ແຕ່ພາຍຫຼັງການເລືອກຕັ້ງຂອງປາເລັສຕິນສິ້ນສຸດລົງ, ອິສລາແອນເຫັນວ່າບໍ່ມີຄວາມຈຳເປັນຕ້ອງຮັກສາຄວາມອົດກັ້ນແນວນີ້ອີກແລ້ວ. ເຈົ້າໜ້າທີ່ຊັ້ນສູງຜູ່ໜຶ່ງຂອງອິສລາແອນກ່າວວ່າ, ອິສລາແອນບໍ່ມີຄວາອົດທົນແລະເວລາຄອຍຖ້າທ່ານອັບບັສໃຊ້ພາຫະນະການເຈລະຈາແລະການສົນທະນາຊັກຊວນອົງການຫົວຮຸນແຮງປາເລັສຕິນຢຸດຍິງກັບອິສລາແອນ.
ສະຖານະການປາເລັສຕິນອິລາແອນຊຸດຮ້າຍລົງຢ່າງໄວພະລັນເປັນການສະແດງການນາບຂູ່ຕໍ່ທ່ານອັບບັສທີ່ຫາກໍ່ສາບານຕົວຂຶ້ນຮັບຕຳແໜ່ງ, ຈະເວົ້າໄດ້ວ່າໃນສະເພາະໜ້ານີ້ ທ່ານອັບບັສປະສົບຄວາມຫຍຸ້ງຍາກທັງພາຍໃນແລະພາຍນອກ: ຢູ່ພາຍໃນ ອົງການຫົວຮຸນແຮງຂອງປາເລັສຕິນບໍ່ຍອມປະລະການຕໍ່ສູ້ດ້ວຍກຳລັງອາວຸດ; ຢູ່ພາຍນອກ, ອິສລາແອນປະຕິເສດບໍ່ຟື້ນຟູການເຈລະຈາສັນຕິພາບກັບຝ່າຍປາເລັສຕິນໂດຍອ້າງວ່າອົງການຫົວຮຸນແຮງປາເລັສຕິນກໍ່ການຫຼອນໂຈມຕີ.
ບຸກຄົນວິເຄາະເຫັນວ່າ, ທ່ານອັບບັສຫາກໍ່ຂຶ້ນຮັບຕຳແໜ່ງ, ເວົ້າສຳລັບທ່ານແລ້ວ, ໜ້າທີ່ອັນດັບໜຶ່ງຂອງທ່ານຍັງຄົງແມ່ນຈັ້ງຕີນໃຫ້ແໜ້ນບົນເວທີການເມືອງປາເລັສຕິນ, ຮັກສາຄວາມສາມັກຄີຢູ່ພາຍໃນປາເລັສຕິນ. ຄວາມວຸ້ນວາຍຍ້ອນສົງຄາມແລະການໂຈມຕີທາງການທະຫານຂອງອິສລາແອນເປັນເວລາຍາວນານເຮັດໃຫ້ກອງຕຳຫຼວດແລະກອງຮັກສາຄວາມປອດໄພຂອງປາເລັສຕິນອ່ອນແອທີ່ສຸດ, ຈົນຮອດປະຈຸບັນ ອິສລາແອນຍັງບໍ່ອະນຸຍາດໃຫ້ຕຳຫຼວດແລະກອງຮັກສາຄວາມປອດໄພຂອງປາເລັສຕິນທີ່ຢູ່ຝັ່ງຕາເວັນຕົກແມ່ນ້ຳຈໍແດນຖືອາວຸດ, ສະນັ້ນ ທ່ານອັບບັສບໍ່ມີກຳລັງການເມືອງ, ກໍ່ບໍ່ມີກຳລັງທະຫານອັນພຽງພໍບັງຄັບອົງການຫົວຮຸນແຮງຂອງປາເລັສຕິນຢຸດຍິງກັບອິສລາແອນ. ຍິ່ງສຳຄັນກວ່ານັ້ນແມ່ນ ຜົນປະໂຫຍດແຫ່ງຊາດປາເລັສຕິນຕ້ອງການປາເລັສຕິນມີແຕ່ສາມັກຄີເປັນຈິດໜຶ່ງໃຈດຽວກັນຈຶ່ງສາມາດສູ້ກັບພາຍນອກໄດ້, ທ່ານອັບບັສບໍ່ອາດຈະໃຊ້ກຳລັງອາວຸດຕໍ່ຊາວປາເລັສຕິນ. ນອກນີ້, ໃນສາມັນຊົນປາເລັສຕິນ, ຍັງມີຄົນຈຳນວນຫຼວງຫຼາຍສະໜັບສະໜູນການສືບຕໍ່ຕໍ່ສູ້ກັບອິສລາແອນດ້ວຍກຳລັງອາວຸດ. ໃຕ້ສະພາບການແນວນີ້, ທ່ານອັບບັສມີແຕ່ໃຊ້ພາຫະນະການສົນທະນາ ນຳໃຊ້ກຳລັງໜີບຂອງປະຊາຄົມໂລກແລະມວນຊົນປາເລັສຕິນທີ່ມີຈິດໃຈສະແຫວງຫາຄວາມສະຫງົບໂດຍທົ່ວໄປ, ນຳໃຊ້ໄມ້ງັດການເມືອງໃນກຳມືຂອງຕົນທີ່ແບ່ງປັນອຳນາດການເມືອງປາເລັສຕິນຄືນໃໝ່, ຊັກຈູງໄປຕາມທ່ວງທ່າຂະຫຍາຍຕົວຂອງສະພາບການ, ຊັກຊວນໃຫ້ອົງການຫົວຮຸນແຮງປາເລັສຕິນຢຸດຍິງກັບອິສລາແອນ.
ຕໍ່ທ່າທີອັນແຂງແຮງຂອງອິສລາແອນ, ຝ່າຍປາເລັສຕິນເຫັນວ່າ, ຢູ່ຝ່າຍປາເລັສຕິນແລະຝ່າຍອິສລາແອນລ້ວນແຕ່ມີອິດທິກຳລັງຫົວຈັດທີ່ເຈດຕະນາສະກັດກັ້ນຂະບວນວິວັດສັນຕິພາບ, ຖ້າອິສລາແອນຢາກບັນລຸສັນຕິພາບຢ່າງແທ້ຈິງ, ກໍຕ້ອງໃຊ້ທ່າທີລັກສະນະສ້າງສັນຕໍ່ການເຄື່ອນໄຫວທຳລາຍຂອງອິດທິກຳລັງຫົວຈັດ, ບໍ່ຄວນປິດປະຕູການເຈລະຈາສັນຕິພາບໃນທັນທີພາຍຫຼັງເກີດເຫດການຫຼອນໂຈມຕີ.
ໜັງສືພິມຮາອາເລັສສະບັບວັນທີ 16 ຂອງອິສລາແອນໄດ້ພິມບົດວິຈານວ່າ, ຖ້າປາເລັສຕິນເກີດຄວາມວຸ້ນວາຍຢູ່ພາຍໃນຫຼືທ່ານອັບບັສຄອງອຳນາດເສຍໄຊແລ້ວ, ອິສລາແອນຈະບໍ່ໄດ້ຜົນດີແຕ່ຢ່າງໃດ. ທ່ານຊາລົງຄວນສືບຕໍ່ເຈລະຈາກັບທ່ານອັບບັສ, ຮ່ວມມືກັບຝ່າຍປາເລັສຕິນ, ພ້ອມກັນວາງແຜນການສິ້ນສຸດການເປັນປໍລະປັກກັນດ້ວຍກຳລັງຮຸນແຮງ, ຫາກບໍ່ແມ່ນໃຫ້ການປະທະກັນດ້ວຍກຳລັງຮຸນແຮງລະຫວ່າງປາເລັສຕິນອິສລາແອນໝູນວຽນໄປໃນແງ່ຮ້າຍຕໍ່ໄປອີກ.
|