|
|
 |
| (GMT+08:00)
2005-01-18 21:28:54
|
 |
|
ອີຣັກວາງມາດຕະການອັນເຄັ່ງຄັດເພື່ອຮັບປະກັນຄວາມປອດໄພຂອງການເລືອກຕັ້ງທົ່ວໄປ
cri
CRIລາຍງານວ່າ: ຫວ່າງມໍ່ໆນີ້,ລັດຖະບານຊົ່ວຄາວ ອີຣັກແລະຄະນະກຳມະການເລືອກຕັ້ງອິດສະຫຼະຂອງອີຣັກໄດ້ຮ່ວມກັນປະກາດມາດຕະການປ້ອງກັນຄວາມປອດໄພທີ່ເຄັ່ງຄັດຢ່າງເປັນລະບົບ,ເພື່ອຮັບປະກັນຄວາມປອດໄພຂອງການເລືອກຕັ້ງທົ່ວໄປທີ່ຈະຈັດຂຶ້ນໃນວັນທີ30ມັງກອນນີ້.
ວັນທີ15ມັງກອນ,ໃນງານຊຸມນຸມນັກຂ່າວທີ່ທ່ານລາຕິຟ ລັດຖະມົນຕີລັດຖະກິດທີ່ຮັບຜິດຊອບວຽກງານແຂວງຂອງລັດຖະບານຊົ່ວຄາວອີຣັກແລະທ່ານເຮັນດາວີ ປະທານຄະນະກຳມະການເລືອກຕັ້ງອິດສະຫຼະອີຣັກຮ່ວມກັນຈັດຂຶ້ນນັ້ນ,ທ່ານລາຕິຟກ່າວວ່າ,ໃນມື້ປ່ອນບັດເລືອກຕັ້ງ,ທຸກເຂດແຂວງ,ໃນທົ່ວແດນອີຣັກພ້ອມດ້ວຍທຸກ ຄຸ້ມໃນນະຄອນຫຼວງແບກແດດຈຳກັດການສັນຈອນຂອງລົດຍົນ,ຢູ່ນອກສະຖານທີ່ປ່ອນບັດ,ຈະຈັດວາງເສັ້ນອັດຕັນ,ຫ້າມບໍ່ໃຫ້ລົດແລ່ນເຂົ້າໃກ້.ຕຳຫຼວດ,ທະຫານແລະກອງປ້ອງກັນຊາດຂອງອີຣັກຈະປະສານສົມທົບກັບກອງທະຫານນານາຊາດປະຈຳອີຣັກ,ປ້ອງກັນຄວາມປອດໄພຂອງການເລືອກຕັ້ງທົວໄປເທື່ອນີ້.ທ່ານລາຕິຟກ່າວວ່າ,ທ່ານອາລາວີ ນາຍົກລັດຖະມົນຕີລັດຖະບານຊົ່ວຄາວ ອີຣັກຈະປະກາດໃນຫວ່າງມໍ່ໆນີ້ວ່າ,ຈະກຳນົດໄລຍະການເລືອກຕັ້ງທົ່ວໄປເປັນວັນພັກແຫ່ງຊາດ.ທ່ານລາຕິຟກ່າວວ່າ,ໃນ18ແຂວງຂອງອີຣັກ,ມີ14ແຂວງມີສະຖຽນລະພາບ.ນອກນີ້,ສະຖານະການຄວາມປອດໄພຂອງອີກ4ແຂວງຍັງຄົງຂ້ຽວຂາດຢູ່.ໃນງານຖະແຫຼງຂ່າວດັ່ງກ່າວ,ທ່ານເຮັນດາວີກ່າວວ່າ,ຢູ່ແຂວງທີ່ມີການເຄື່ອນໄຫວຫຼອນໂຈມຕີຕ້ານອາເມລິກາດ້ວຍກຳລັງຮຸນແຮງເກີດຂຶ້ນເລື້ອຍໆ,ຄືແຂວງອານບາແລະແຂວງນີເນເວເຊິ່ງເປັນທີ່ຕັ້ງຂອງເມືອງໂມຊຸນ ເມືອງໃຫຍ່ທີສາມຂອງອີຣັກ,ຈົນຮອດປະຈຸບັນ,ຍັງບໍ່ມີຜູ້ມີສິດເລືອກຕັ້ງມາຈົດທະບຽນ. ຜູ້ມີສິດເລືອກຕັ້ງຈະຈົດທະບຽນແລະປ່ອນບັດໃນວັນທີ30ມັງກອນ.ທ່ານກ່າວວ່າ,ລັດຖະບານຊົ່ວຄາວອີຣັກຕົກລົງໃຊ້ມາດຕະການຕ່າງໆເພື່ອຮັບປະກັນການເລືອກຕັ້ງທົ່ວໄປດຳເນີນໄປຢ່າງສະດວກ.
ນອກນີ້,ຄະນະກຳມະການເລືອກຕັ້ງອີຣັກກໍຈະໃຊ້ມາດຕະການຈຳນວນໜຶ່ງ,ພະຍາຍາມຮັບປະກັນຄວາມປອດໄພຂອງການເລືອກຕັ້ງ.ໃນນັ້ນ,ມີດັ່ງນີ້: ໃນໄລຍະຈັດການເລືອກຕັ້ງ,ເວັ້ນແຕ່ຜູ້ປ້ອງກັນຄວາມປອດໄພແລ້ວ,ຫ້າມບໍ່ໃຫ້ທຸກຄົນຖືອາວຸດຢູ່ໃນຂອບເຂດ100ແມັດຕາເຊິ່ງຖືບ່ອນຈົດທະບຽນ,ບ່ອນປ່ອນບັດແລະສູນນັບບັດເປັນໃຈກາງ,ຜູ້ລະເມີດຂໍ້ກຳນົດດັ່ງກ່າວຈະຖືກລົງໂທດຢ່າງເຂັ້ມງວດ.ຈົນຮອດມື້ປ່ອນບັດຈິ່ງປະກາດລາຍຊື່ຜູ້ສະໝັກຮັບເລືອກຕັ້ງທຸກຄົນ.ເມື່ອມໍ່ຈະຮອດມື້ເລືອກຕັ້ງທົ່ວໄປຈິ່ງຈະປະກາດທີ່ຕັ້ງບ່ອນປ່ອນບັດ,ເພື່ອຫຼີກເວັ້ນການຫຼອນໂຈມຕີຂອງກອງປະກອບອາວຸດຕ້ານອາເມລິກາໃນເມື່ອຫາກປະກາດກ່ອນລ່ວງໜ້າ.
ນອກນີ້,ມີຂ່າວແຈ້ງວ່າ,ເພື່ອຮັບປະກັນຄວາມປອດໄພຂອງການເລືອກຕັ້ງທົ່ວໄປ.ໃນໄລຍະຈັດການເລືອກຕັ້ງ,ອີຣັກຍັງຈະປິດຊາຍແດນທິ່ຕິດກັບປະເທດໃກ້ຄຽງ,ແລະເຊົາການບໍລິການໂທລະຄົມເຄື່ອນທີ່ພາຍໃນແດນອີຣັກເປັນຕົ້ນ.
ບຸກຄົນວິເຄາະຊີ້ອອກວ່າ,ເຈົ້າໜ້າທີ່ອາເມລິກາແລະອີຣັກໃຊ້ມາດຕະການປ້ອງກັນຄວາມປອດໄພຢ່າງເຄັ່ງຄັດແມ່ນມີຈຸດປະສົງສອງຢ່າງດັ່ງນີ້:ໜຶ່ງແມ່ນເພື່ອສະແດງຕໍ່ ຜູ້ມີສິດເລືອກຕັ້ງ4ລ້ານກວ່າຄົນວ່າ:ພວກເຂົາເຈົ້າເຂົ້າຮ່ວມການປ່ອນບັດຈະໄດ້ຮັບການຮັບປະກັນດ້ານຄວາມປອດໄພ,ລົບລ້າງຄວາມວິຕົກກັງວົນຂອງພວກເຂົາເຈົ້າ,ໄປປ່ອນບັດຢ່າງໄວ້ວາງໃຈ.ສອງ,ເພື່ອສົ່ງສັນຍານນາບຂູ່ໄປຍັງກອງປະກອບອາວຸດຕ້ານອາເມລິກາທີ່ເຈດຕະນາທຳລາຍການເລືອກຕັ້ງ,ເຕືອນໃຫ້ພວກເຂົາເຈົ້າຢ່າໃຊ້ການເຄື່ອນໄຫວຢ່າງງ່າຍດາຍ,ເພາະວ່າເຈົ້າໜ້າທີ່ອາເມລິກາແລະອີຣັກຈະຮັບປະກັນການເລືອກຕັ້ງທົ່ວໄປຈັດຂຶ້ນຢ່າງສະດວກຕາມເວລາກຳນົດໂດຍບໍ່ເສຍດາຍຄ່າຕອບແທນໃດໆ.
ບຸກຄົນວິເຄາະເຫັນວ່າ,ມາດຕະການເຫຼົ່ານີ້ຈະປົວແປງສະພາບຄວາມປອດໄພໃນໄລຍະການເລືອກຕັ້ງໃນລະດັບໃດໜຶ່ງ,ແຕ່ບໍ່ສາມາດກຳຈັດເຫດການຫຼອນໂຈມຕີດ້ວຍກຳລັງຮຸນແຮງໄດ້.ເພາະວ່າກອງປະກອບອາວຸດຕ້ານອາເມລິກາຈະສວຍໃຊ້ທຸກໂອກາດ,ໃຊ້ທຸກພາຫະນະທຳລາຍການເລືອກຕັ້ງ,ຖ້າບໍ່ສາມາດສະກັດກັ້ນການເລືອກຕັ້ງຢ່າງເຖິງຖອງໄດ້,ແຕ່ກໍຈະສ້າງຄວາມວຸ້ນວາຍຢ່າງໃຫຍ່,ກະທົບກະເທືອນເຖິງອັດຕາການປ່ອນບັດ,ເຮັດໃຫ້ການເລືອກຕັ້ງເສຍຄວາມທ່ຽງທຳ,ລັກສະນະຕົວແທນແລະຜົນສັກສິດ,ສ້າງພື້ນຖານໃຫ້ແກ່ການຍຸຍົງການປະທະກັນລະຫວ່າງພັກຝ່າຍແລະຄວາມແຕກແຍກໃນສັງຄົມພາຍຫຼັງການເລືອກຕັ້ງ.
ນອກນີ້,ໃນມື້ຈັດການເລືອກຕັ້ງ,ເຈົ້າໜ້າທີ່ອາເມລິກາແລະອີຣັກຈະຈຳກັດການເຄື່ອນໄຫວຂອງຄົນທັງຫຼາຍ,ຜູ້ມີສິດເລືອກຕັ້ງສ່ວນໜຶ່ງກ່ອນຈະປ່ອນບັດຈິ່ງຈົດທະບຽນ,ແລະຮູ້ຊື່ຂອງຜູ້ສະໝັກຮັບເລືອກຕັ້ງ,ນີ້ຈະສ້າງຄວາມຫຍຸ້ງຍາກສົມຄວນໃຫ້ແກ່ຜູ້ມີສິດເລືອກຕັ້ງທຳການຄັດເລືອກ,ແລະກໍຍາກທີ່ຈະຮັບປະກັນຄວາມຍຸດຕິທຳ,ຄວາມທ່ຽງທຳແລະຄວາມໂປ່ງໃສຂອງການເລືອກຕັ້ງ.ມີຄົນເຫັນວ່າ,ການເລືອກຕັ້ງທີ່ອ້າງວ່າມີເສລີພາບ,ປະຊາທິປະໄຕເທື່ອນີ້,ໃນທີ່ສຸດມີແຕ່ເປັນການສະແດງທາງການເມືອງຂອງອາເມລິກາເທົ່ານັ້ນ.
|
|
|
