|
ທີ່ນີ້ວິທະຍຸສາກົນແຫ່ງປະເທດຈີນ, ສະບາຍດີທ່ານຜູ່ຟັງທີ່ໂຄລົບ, ລາຍການນິທານສຸພາສິດໄດ້ວຽນມາພົບກັບທ່ານອີກຕາມເຄີຍ. ໃນລາຍການພາກນີ້ ຂ້າພະເຈົ້າຈະເລົ່າເລື່ອງ "ເຢີນເຈີອູຕີ" ແປວ່າ "ຜູ່ມີເມດຕາປານີຈະບໍ່ມີໃຜຊະນະໄດ້" ເຊິ່ງເປັນແນວຄິດປົກຄອງບ້ານເມືອງທີ່ຈັກກະພັດໃນສະໄໝບູຮານຂອງຈີນນຳມາປະຕິບັດ.
ຄຳສຸພາສິດ "ເຢີນເຈີອູຕີ" ໝາຍເຖິງຜູ່ມີເມດຕາປານີຈະບໍ່ມີໃຜໃນໂລກນີ້ເອົາຊະນະໄດ້. ນີ້ແມ່ນຄຳເວົ້າຂອງເມິ້ງຈືທີ່ເວົ້າເມື່ອຫຼຽງຮຸ້ຍຫວັງ ເຈົ້າຊີວິດລັດເວີ້ຍຊົງຖາມເພິ່ນວ່າຈະປົກຄອງແນວໃດ, ເຊິ່ງຖືກບັນທຶກໃນປື້ມ "ເມີ້ງຈື" "ບົດຫຼຽງຮຸ້ຍຫວັງພາກຕົ້ນ". ເມີ້ງຈືແມ່ນນັກການເມືອງ ນັກແນວຄິດແລະນັກການສຶກສາທີ່ມີຊື່ສຽງໃນສະໄໝຍຸດທະຈັກຂອງຈີນ. ມີມື້ໜຶ່ງ, ຫຼຽງຮຸ້ຍຫວັງຊົງຖາມເມີ້ງຈືວ່າຈະເຮັດແນວໃດຈຶ່ງສາມາດແກ້ແຄ້ນໃຫ້ລັດເວີ້ຍໄດ້? ເມີ້ງຈືເວົ້າວ່າ, ທະແນມແຕ່ປົກຄອງລັດດ້ວຍເມດຕາປານີ ແລະຖືປະຊາຊົນເປັນກົກແລ້ວ, ປະຊາຊົນກໍຈະຍິນຍອມຮັບໃຊ້ປະເທດຊາດ. ສ່ວນລັດທີ່ເປັນສັດຕູກັນມີແຕ່ກົດຂີ່ຂູດຮີດປະຊາຊົນ, ຖ້າພະອົງສົ່ງກອງທັບໄປປາບພວກເຂົາເຈົ້າ ກໍຈະໄດ້ຮັບໄຊຊະນະຢ່າງແນ່ນອນ ເພາະພະອົງເປັນຜູ່ມີເມດຕາປານີ. ເມີ້ງຈືມີເຈດຈຳນົງໃຫ້ປົກຄອງລັດດ້ວຍເມດຕາປານີ. ເພິ່ນເຫັນວ່າທະແນມແຕ່ຜູ່ປົກຄອງມີຈະລິຍະທຳອັນສູງສົ່ງ ເອົາໃຈໃສ່ແລະຮັກແພງປະຊາຊົນແລ້ວ, ກໍຈະສາມາດເຮັດໃຫ້ສາມັນຊົນຮູ້ສຶກກະຕຸ້ນໃຈ, ແລ້ວຈະບອກໄດ້ໃຊ້ຟັງ, ຍອມຮັບການປົກຄອງຂອງເຈົ້າຊີວິດຢ່າງເປັນເຈົ້າການ. ນະທີ່ນີ້ ເມີ້ງຈືໄດ້ເນັ້ນໜັກຄວາມສຳຄັນແຫ່ງ "ການປົກຄອງລັດດ້ວຍຈະລິຍະທຳ". ແນ່ນອນແລ້ວ, ເມີ້ງຈືກໍບໍ່ໄດ້ປະຕິເສດການ "ປົກຄອງລັດຕາມກົດໝາຍ", ສ່ວນການພົວພັນລະຫວ່າງສອງຢ່າງນີ້, ເມີ້ງຈືກ່າວວ່າ: ຖ້າມີແຕ່ຈະລິຍະທຳ, ຍັງບໍ່ພໍທີ່ຈະປົກຄອງລັດໃຫ້ດີໄດ້, ເພາະຈະລິຍະທຳບໍ່ແມ່ນໃຊ້ການໄດ້ໝົດທຸກຢ່າງ; ອີກດ້ານໜຶ່ງ, ອາໄສແຕ່ກົດໝາຍກໍບໍ່ສາມາດເຮັດໃຫ້ສາມັນຊົນໂຄລົບຢ່າງເປັນເຈົ້າການດ້ວຍຄວາມສະໝັກໃຈໄດ້, ເພາະວ່າກົດໝາຍມັນຕ້ອງອາໄສຄົນເປັນຜູ່ປະຕິບັດ. ເວົ້າສຳລັບສັງຄົມທີ່ສົມບູນແລ້ວ, ຈະລິຍະທຳກັບກົດໝາຍ ການປົກຄອງດ້ວຍຈະລິຍະທຳກັບການປົກຄອງຕາມກົດໝາຍນັ້ນກໍເໝືອນດັ່ງລົດກັບສອງລໍ້, ເໝືອນນົກກັບປີກທັງສອງຂ້າງ ເຊິ່ງຂາດກັນບໍ່ໄດ້, ຕ່າງຊ່ອຍຊູຍູ້ໜູນກັນ ປະລະຢ່າງໃດກໍບໍ່ໄດ້.
ທີ່ຈິງແລ້ວ, ຄຳເວົ້າຂອງເມີ້ງຈືທີ່ວ່າ "ຜູ່ມີເມດຕາປານີຈະບໍ່ມີໃຜຊະນະໄດ້" ນີ້, ບໍ່ພຽງແຕ່ໄດ້ເວົ້າເຖິງການປະຕິບັດຕົນຂອງຜູ່ປົກຄອງທໍ່ນັ້ນ, ກົດເກນໃນນັ້ນກໍເໝາະໃຊ້ສຳລັບທຸກໆຄົນເຊັ່ນດຽວກັນ. ເວົ້າສຳລັບສ່ວນຕົວບຸກຄົນແລ້ວ, ສະເໜດ້ານຈະລິຍະທຳແລະບຸກຄະລິກກະພາບ ກໍມີອິດທິພົນຄືກັນ. ຄົນທັງຫຼາຍມັກເວົ້າວ່າ "ກຳລັງຂອງແບບຢ່າງນັ້ນບໍ່ມີທີ່ສິ້ນສຸດ" ກໍມີຄວາມໝາຍຄືແນວນີ້ຄືກັນ.
ເບິ່ງຜິວເຜີນແລ້ວ, ຈະລິຍະທຳຄືວ່າອ່ອນແອຫຼາຍ, ມີບົດບາດຈຳກັດ, ການໃຫ້ຜູ່ອື່ນຍິນຍອມດ້ວຍຈະລິຍະທຳບໍ່ທໍ່ການບັງຄັບໃຫ້ຜູ່ອື່ນຍິນຍອມດ້ວຍກຳລັງແຮງ ເຊິ່ງໄດ້ຜົນຫຼາຍກວ່າ. ແຕ່ສັງເກດເບິ່ງໃນໄລຍະຍາວໄກແລ້ວເຫັນວ່າ, ມີແຕ່ການກະທຳຂອງຜູ່ມີເມດຕາປານີເທົ່ານັ້ນຈຶ່ງສາມາດເຮັດໃຫ້ຄົນທັງຫຼາຍຮູ້ສຶກກະຕຸ້ນໃຈແລະຍິນຍອມ. ກໍເໝືອນດັ່ງຄຳເວົ້າຂອງເມີ້ງຈືທີ່ວ່າ ບັງຄັບໃຫ້ຜູ່ອື່ນຍິນຍອມດ້ວຍກຳລັງແຮງ ຜູ່ອື່ນຍິນຍອມແມ່ນຍ້ອນກຳລັງເຂົາສູ້ເຈົ້າບໍ່ໄດ້, ແຕ່ໃນໃຈພັດບໍ່ຍິນຍອມ. ສ່ວນໃຫ້ຜູ່ອື່ນຍິນຍອມດ້ວຍຈະລິຍະທຳ, ຜູ່ອື່ນກໍຈະຍິນຍອມດ້ວຍຄວາມຈິງໃຈ. ທຸກສິ່ງທຸກຢ່າງລ້ວນແຕ່ເປື່ອຍເນົ່າໄດ້ ທຸກສິ່ງທຸກຢ່າງລ້ວນແຕ່ປ່ຽນແປງໄດ້, ມີແຕ່ຈະລິຍະທຳທໍ່ນັ້ນ ມີອິດທິພົນຖາວອນທີ່ທົນຕໍ່ການເຊາະລ້າງຂອງເວລາ. ສິ່ງທີ່ເມີ້ງຈືລິເລີ່ມນັ້ນ ກໍ່ແມ່ນຈິດໃຈອັນສູງສົ່ງຂອງມະນຸດຄືແນວນີ້ຫລະ.
ທ່ານຜູ່ຟັງທີ່ໂຄລົບ, ລາຍການນິທານສຸພາສິດພາກນີ້ຂໍສ້ຽງສຸດລົງພຽງທໍ່ນີ້, ຂອບໃຈທີ່ທ່ານຮັບຟັງ. ໃນລາຍການອາທິດໜ້າ, ຂ້າພະເຈົ້າຈະເລົ່າເລື່ອງປະຫວັດສາດ "ບໍ່ຕ້ອງສູ້ກໍເອົາຊະນະກອງທະຫານສັດຕູ" ໄດ້, ເພື່ອນຜູ່ຟັງຢ່າພາດແທ້ໆ!
|
