|
|
 |
| (GMT+08:00)
2005-01-20 17:32:20
|
 |
|
ຄື້ນທະເລຊູນາມີມະຫັນຕະໄພ ກັບນ້ຳໃຈຂອງປະຊາຊົນລາວ
cri
Author: dalavanh
ຕອນເຊົ້າວັນທີ 26 ທັນວາປີຜ່ານມາ,ໄດ້ເກີດແຜ່ນດິນໄຫວຢູ່ທາງທິດເໜືອຂອງເກາະສຸມາຕຣາທີ່ຂຶ້ນກັບແຂວງອາເຈະ ປະເທດອິນໂດເນເຊຍ ວັດແທກຄວາມແຮງສັນສະເທືອນໄດ້ 8.9 ຣິກເຕີ,ອັນໄດ້ພາໃຫ້ເກີດມີຄື້ນທະເລໃຫຍ່ຊູນາມີກະທົບໄປເຖິງຫຼາຍປະເທດໃນອາຊີໃຕ້,ອາຊີຕາເວັນອອກສຽງໃຕ້ ແລະປະເທດຈຳນວນໜຶ່ງໃນທະວີບອາຟຼີກາເໜືອ,ລວມມີອິນເດຍ,ສີລັງກາ,ເກາະມານດິຟ,ໄທ,ມາເລເຊຍ,ອິນໂດເນເຊຍ,ມຽນມາ,ບັງກຼາເດັດ,ໂຊມາລີໃນອາຟຼີກາເໜືອແລະປະເທດອື່ນໆ,ຊຶ່ງໄດ້ສ້າງຄວາມເສຍຫາຍເຖິງຊີວິດແລະຊັບສິນຂອງປະຊາຊົນປະເທດເຫຼົ່ານີ້ເປັນຈຳນວນຫຼວງຫຼາຍພາຍມາກ,ຕົວເລກຜູ້ເສຍຊີວິດມີຫຼາຍກວ່າ 1 ແສນ 5 ໝື່ນກວ່າຄົນ,ຫຼາຍໝື່ນຄົນຫາຍສາບສູນ,ມີຜູ້ບາດເຈັບຫຼາຍພັນຄົນ,ຫຼາຍແສນຄົນຂາດທີ່ພັກອາໄສ ພາໃຫ້ມີຜູ້ກຳພ້າກຳພອຍ,ນີ້ແມ່ນຄວາມສູນກາຍອັນໃຫຍ່ຫຼວງໃນເຫດໂສກນາດຕະກຳຄັ້ງຍິ່ງໃຫຍ່ສຳລັບມວນມະນຸດ.
ພໍຮູ້ຂ່າວເຫດໂສກນາດຕະກຳຄັ້ງນີ້,ປະເທດຕ່າງໆໃນທົ່ວໂລກຕ່າງໍກໄດ້ພາກັນສະແດງຄວາມເສຍໃຈຕໍ່ເຫດຮ້າຍທາງທຳມະຊາດໃນຄັ້ງນີ້,ພ້ອມທັງໄດ້ສົ່ງຄວາມຊ່ອຍເຫຼືອສຸກເສີນຮີບດ່ວນດ້ານຕ່າງໆ ນັບທັງວັດຖຸເງິນຄຳ ເຂົ້າຂອງເຄື່ອງໃຊ້,ຢາປົວພະຍາດ ແລະຊ່ຽວຊານແພດໝໍດ້ານຕ່າງໆເຂົ້າຊ່ອຍເຫຼືອເພື່ອກອບກູ້ເອົາບັນດາປະເທດທີ່ຖືກໄພພິບັດເປັນການດ່ວນ.
ສຳລັບຢູ່ສປປລາວແລ້ວ,ປະຊາຊົນລາວຍ່ອມເຂົ້າໃຈດີເຖິງຄວາມສູນເສຍ ເພາະເຂົ້າເຈົ້າເຫຼົ່ານັ້ນເຄີຍໄດ້ຮັບເຄາະກຳມາແລ້ວຈາກສົງຄາມ ຊຶ່ງແມ່ນສີມືຂອງມະນຸດເອງເປັນຜູ້ສ້າງຂຶ້ນ,ເຖິງວ່າປະຈຸບັນ,ປະຊາຊົນລາວຈະຢູ່ໃນໄລຍະແຫ່ງການສ້າງສາພັດທະນາ ເພື່ອນຳເອົາປະເທດຊາດໃຫ້ຫຼຸດພົ້ນຈາກຄວາມດ້ອຍພັດທະນາກໍຕາມ,ແຕ່ປະຊາຊົນລາວຊຶ່ງຍາມໃດກໍລ້ວນແຕ່ມີນ້ຳໃຈມະນຸດສະທຳເອື້ອເຟື້ອເພື່ອແຜ່ຢູ່ສະເໝີ,ລາວກໍໄດ້ປະກອບສ່ວນກັບບັນດາປະຊາຊາດໃນທົ່ວໂລກ,ໃຫ້ການຊ່ອຍເຫຼືອແບ່ງເບົາຄວາມທຸກໂສກຕໍ່ລັດຖະບານແລະປະຊາຊົນບັນດາປະເທດທີ່ໄດ້ຮັບເຄາະຮ້າຍເຫຼົ່ານັ້ນຕາມທີ່ພໍເຮັດໄດ້ເຊັ່ນວ່າ:ສົ່ງໂທລະເລກໄປເຖິງຜູ້ນຳບັນດາປະເທດທີ່ປະສົບໄພແຜ່ນດິນໄຫວແລະຄື້ນທະເລໃຫຍ່ຊູນາມີ ສະແດງຄວາມເຫັນອົກເຫັນໃຈ ພ້ອມທັງສະແດງຄວາມສາມັກຄີກັບປະເທດເຫຼົ່ານັ້ນ.
ເຖິງວ່າເປັນປະເທດທີ່ທຸກຍາກດ້ອຍພັດທະນາ,ແຕ່ດ້ວຍຈິດໃຈມະນຸດສະທຳອັນສູງສົ່ງຂອງຕົນ,ລັດຖະບານລາວໄດ້ຕົກລົງໃຫ້ການຊ່ອຍເຫຼືອສຸກເສີນແກ່ບັນດາປະເທດທີ່ໄດ້ຮັບຜົນກະທົບຫຼາຍກວ່າໝູ່ເປັນຈຳນວນເງິນເຖິງ 1 ແສນໂດລາ.ພ້ອມນັ້ນກໍໄດ້ຈັດຕັ້ງຄະນະສະເພາະກິດຂຶ້ນຄະນະໜຶ່ງ ເພື່ອປຸກລະດົມຂົນຂວາຍການບໍລິຈາກສິ່ງຂອງເຄື່ອງໃຊ້,ວັດຖຸເຖິງຄຳຈາກປະຊາຊົນລາວເພື່ອສົ່ງໄປບັນເທົາແກ່ຜູ້ປະສົບໄພໃນຄັ້ງນີ້.ຄຽງຄູ່ກັນນີ້ ພະສົງ 108 ອົງແລະອອກຕົນຍາດໂຍມ 350 ຄົນ ນຳໜ້າໂດຍພະອາຈານ ວິຈິດ ສິງຫາລາດ,ປະທານອົງການພຸດທະສາສະໜາສຳພັນແຫ່ງປະເທດລາວ,ໄດ້ຈັດຕັ້ງພິທີທາງສາສະໜາ ຊັກອະນິຈາເຮັດບັງສະກຸນ ນັ່ງພາວັນນາສະມາທິ ເພື່ອສົ່ງບຸນກຸກົນໄປຫາດວງວິນຍານຂອງຜູ້ທີ່ເສຍຊີວິດຈາກຄື້ນທະເລໃຫຍ່ຊູນາມີ.ຈັດຕັ້ງງານໂຮມຊຸມນຸມໃຫຍ່ ໄວ້ອາໄລເຖິງຜູ້ເສຍຊີວິດ,ຊຶ່ງໃນງານໂຮມຊຸມນຸມນີ້ ມີທ່ານສີສະຫວາດ ແກ້ວບຸນພັນ ປະທານສູນກາງແນວລາວສ້າງຊາດ,ທັງເປັນປະທານຄະນະສະເພາະກິດ ເພື່ອລະດົມແລະຮັບເອົາການບໍລິຈາກຂອງປະຊາຊົນ ເພື່ອຊ່ອຍເຫຼືອບັນດາປະເທດທີ່ໄດ້ຮັບຜົນເສຍຫາຍ.ມີທ່ານສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ,ລັດຖະມົນຕີວ່າການກະຊວງການຕ່າງປະເທດ,ພ້ອມດ້ວຍບັນດາລັດຖະມົນຕີວ່າການ,ຊ່ວຍວ່າການກະຊວງຕ່າງໆ,ພະເຖລະນຸເຖລະ,ບັນດາທູຕານູທູດ,ຜູ້ຕາງໜ້າອົງການຈັດຕັ້ງສາກົນຕ່າງປະເທດປະຈຳລາວແລະມວນຊົນເຂົ້າຮ່ວມຫຼາຍຮ້ອຍຄົນ.ທ່ານສີສະຫວາດ ແກ້ວບຸນພັນ ໄດ້ກ່າວຢູ່ໃນງານໂຮມຊຸມນຸມສະແດງຄວາມເສົ້າໂສກ ຕໍ່ຜູ້ເຄາະຮ້າຍຈາກຄື້ນທະເລໃຫຍ່ຊູນາມີຄັ້ງນີ້ວ່າ:ໃນຍາມທີ່ເພື່ອມະນຸດດ້ວຍກັນພວມຕົກທຸກໄດ້ຍາກນີ້ ປະຊາຊົນລາວເຊິ່ງມີຈິດໃຈໂອບເອື້ອອາລີ,ມີຄວາມເມດຕາກະລຸນາແລະມີຄວາມເປັນຫ່ວງເປັນໃຍຕໍ່ຊາຕະກຳຂອງຜູ້ປະສົບເຄາະຮ້າຍ ຕ່າງກໍສະແດງຄວາມປາຖະໜາອັນແຮງກ້າຢາກປະກອບສ່ວນບໍລິຈາກ ເພື່ອຊ່ອຍປະເທດທີ່ຖືກມະຫັນຕະໄພຄັ້ງນີ້ຫຼາຍທີ່ສຸດ.
ທ່ານບົວສອນ ບຸບຜາວັນ ຮອງນາຍົກລັດຖະມົນຕີ,ຜູ້ປະຈຳການລັດຖະບານສປປລາວ,ທ່ານສີສະຫວາດ ແກ້ວບຸນພັນ ປະທານສູນກາງແນວລາວສ້າງຊາດ,ປະທານສະເພາະກິດເພື່ອລະດົມແລະຮັບເອົາການບໍລິຈາກຂອງປະຊາຊົນ ໄດ້ຕາງໜ້າໃຫ້ລັດຖະບານລາວ ຮ່ວມລົງລາຍເຊັນໃນປຶ້ມສະແດງຄວາມເສຍໃຈ ຢູ່ສະຖານທູດອິນໂດເນເຊຍແລະສະຖານທູດໄທປະຈຳລາວຕາມລຳດັບ.ສ່ວນສະມາຄົມນັກຂ່າວສປປລາວ ກໍໄດ້ຮ່ວມກັບອົງການຈັດຕັ້ງມະຫາຊົນ,ອົງການຈັດຕັ້ງເພື່ອການກຸສົນຕ່າງໆ ໄດ້ຈັດການສະແດງສີລະປະວັນນະຄະດີຂຶ້ນ,ເພື່ອຂໍການບໍລິຈາກນຳມະຫາຊົນ.ນອກຈາກນີ້,ສະມາຄົມອົງການຕ່າງໆ ກໍໄດ້ຮ່ວມກັນບໍລິຈາກເພື່ອຊ່ອຍເຫຼືອບັນດາປະເທດທີ່ເຄາະຮ້າຍໄດ້ເປັນຢ່າງດີ ນັບທັງຢູ່ນະຄອນຫຼວງວຽງຈັນແລະຂອບເຂດທົ່ວປະເທດ.
ຊາດລາວເປັນຊາດໜຶ່ງ ທີ່ມຣມູນເຊື້ອສາມັກຄີຊ່ອຍເຫຼືອຊຶ່ງກັນແລະກັນ ແລະມີເມດຕາຈິດຕໍ່ເພື່ອນມະນຸດດ້ວຍກັນ ຊຶ່ງມີມາແຕ່ດຶກດຳບັນ ແລະມູນເຊື້ອນີ້ໄດ້ຖືກເສີມຂະຫຍາຍຂຶ້ນສູ່ຄຸນນະພາບໃໝ່ ໃນຄວາມສຳນຶກຕົນເພື່ອທຸກຈົນ,ທຸກຄົນເພື່ອຕົນ ອັນເປັນຄຸນນະພາບສູງສົ່ງໃນການພົວພັນລະຫວ່າງຄົນກັບຄົນ.ມະຫັນຕະໄພແຜ່ນດິນໄຫວກໍໃຫ້ເກີດຂຶ້ນທະເລໃຫຍ່ຊູນາມີ ນຳເອົາໄພພິບັດອັນໃຫຍ່ຫຼວງມາສູ່ມະນຸດຊາດໃນຄັ້ງນີ້ ໄດ້ສ້າງຄວາມສະເທືອນໃຈຕໍ່ປະຊາຊົນລາວ ກໍຄືປະຊາຊົນທົ່ວໂລກ,ແລະໄດ້ພ້ອມກັນແບ່ງປັນນ້ຳໃຈ ສົ່ງສິ່ງຂອງເງິນຄຳໄປຊ່ອຍເຫຼືອບັນເທົາທຸກແກ່ຜູ້ປະສົບໄພດ້ວຍຄວາມເຫັນອົກເຫັນໃຈຢ່າງສຸດຊຶ້ງ.ເວລານີ້ຍິ່ງກວ່າເວລາໃດໝົດທີ່ລັດຖະບານພ້ອມປະຊາຊົນລາວ 5 ລ້ານກວ່າຄົນ,ໄດ້ສະແດງອອກເຖິງມູນເຊື້ອແຫ່ງຄວາມສາມັກຄີຂອງຊາດ ນ້ຳໃຈສາກົນອັນສ່ອງໃສ ແລະຄວາມຮັບຜິດຊອບຂອງຕົນ ຕໍ່ປະເທດເພື່ອນມິດດ້ວຍການບໍລິຈາກ ເຂົ້າຂອງເງິນຄຳຕາມຄວາມສາມາດຂອງຕົນ ປະກອບສ່ວນເຂົ້າໃນກອງທຶນບັນເທົາທຸກແກ່ຜູ້ປະສົບເຄາະຮ້າຍ ຈາກຄື້ນທະເລໃຫຍ່ຊູນາມີຄັ້ງນີ້.
ແນ່ນອນປະເທດລາວຍັງທຸກຍາກ ລາຍໄດ້ຂອງແຕ່ລະຄົນມີຂີດຈຳກັດ ແຕ່ເງິນຄຳນວນນ້ອຍທີ່ໄດ້ບໍລິຈາກໄປນັ້ນ ແມ່ນມີຄຸນຄ່າໃຫຍ່ຫຼວງທາງດ້ານຈ້ຳໃຈ ເປັນການສະແດງອອກເງິນນ້ຳໃຈມະນຸດສະທຳຂອງທັງໝົດຊາດ ແລະປະຊາຊົນລາວ ທີ່ມີຕໍ່ເພື່ອນມະນຸດຮ່ວມໂລກທີ່ປະສົບກັບໄພພິບັດຈາກຄື້ນທະເລໃຫຍ່ຊູນາມີ.
|
|
|
