|
|
 |
| (GMT+08:00)
2005-01-25 14:48:14
|
 |
|
ຈີນອອກແຮງອະນຸລັກມໍລະດົກໂລກ(ສຽງ)
cri
Author: mo
|
ປະຈຸບັນ, ມໍລະດົກໂລກຂອງຈີນມີ 30 ລາຍແລ້ວ, ຈີນເປັນທີ 3 ໃນໂລກ. ການເຮັດແນວໃດຈະອະນຸລັກແລະຄຸ້ມຄອງສິ່ງປະເສີດຂອງມວນມະນຸດຫລາຍຊ່ຳນີ້ໃຫ້ດີແມ່ນບັນຫາທີ່ວົງການພາຍນອກສົນໃຈນຳໂດຍຕະຫລອດ. ໃນລາຍການມື້ນີ້, ຂ້າພະເຈົ້າຂໍແນະນຳເນື້ອໃນໃນດ້ານນີ້ສູ່ຟັງ.
ປີ 1972, ອົງການຢູເນັສໂກສະຫະປະຊາຊາດໄດ້ຜ່ານສົນທິສັນຍາມໍລະດົກໂລກ. ຈີນໄດ້ເຂົ້າຮ່ວມສົນທິສັນຍາດັ່ງກ່າວເມື່ອປີ 1985. ປະຈຸບັນ, ມໍລະດົກວັດທະນະທຳແລະທຳມະຊາດຂອງຈີນ 30 ລາຍໄດ້ຖືກຈັດເຂົ້າໃນບັນຊີລາຍຊື່ມໍລະດົກໂລກແລ້ວ, ໃນນັ້ນ, ເຂດທັດສະນີຍະພາບ 4 ແຫ່ງຄືພູທ້າຍຊານ, ພູຮວງຊານ, ພູເອີເມີຍຊານ-ພະພຸດທະຮູບໃຫຍ່ເລີ້ຊານ, ແລະພູວູອີຊານເປັນຕົ້ນຖືກຈັດເປັນມໍລະດົກວັດທະນະທຳທັງເປັນມໍລະດົກທຳມະຊາດຂອງໂລກ. ນອກນີ້, ຈີນຍັງມີເກືອບຮ້ອຍໂຄງການພວມຫລືກຽມຮ້ອງຂໍຈັດເປັນມໍລະດົກໂລກ, ແມ່ນປະເທດໜຶ່ງທີ່ຈຳນວນຮ້ອງຂໍຈັດເປັນມໍລະດົກໂລກຫລາຍກວ່າໝູ່ໃນປະຈຸບັນນີ້.
ຈີນມີດິນແດນກວ້າງໃຫຍ່ໄພສານ, ມີປະຫວັດສາດດົນນານ, ເຂດທີ່ມີຄຸນຄ່າວັດຖຸບູຮານສຳຄັນແລະຄຸນຄ່າທັດສະນີຍະພາບນັ້ນກໍມີຫລວງຫລາຍ, ຖ້າຖືກຈັດເຂົ້າໃນບັນຊີລາຍຊື່ມໍລະດົກໂລກ, ກໍຈະກາຍເປັນບ່ອນທີ່ມີຄົນເຮີ່ກັນໄປທ່ອງທ່ຽວໃນທັນທີ. ຂໍຍົກເອົາເມືອງເກົ່າພີງຢາວແຂວງຊ່ານຊີເປັນຕົວຢ່າງ: ກ່ອນຖືກຈັດເຂົ້າໃນບັນຊີລາຍຊື່ມໍລະດົກໂລກນັ້ນ, ເມືອງນີ້ໄດ້ມີຢູ່ຫລາຍຮ້ອຍປີແລ້ວ, ຄົນທີ່ມາທ່ອງທ່ຽວຢູ່ບ່ອນນີ້ບໍ່ກາຍ 1 ແສນຄົນຕໍ່ປີ, ແຕ່ພາຍຫລັງຖືກຈັດເຂົ້າເປັນມໍລະດົກໂລກເມື່ອທ້າຍປີ 1997 ແລ້ວ, ຈຳນວນນັກທ່ອງທ່ຽວໄດ້ເພີ່ມຂຶ້ນຄົບເທົ່າຕໍ່ປີ, ປະຈຸບັນ, ນັກທ່ອງທ່ຽວທີ່ມາທ່ຽວເມືອງເກົ່າແຫ່ງນີ້ມີເຖິງ 1 ລ້ານຄົນຕໍ່ປີ.
ທ່ານໂກຈັນ ຫົວໜ້າພະແນກຄຸ້ມຄອງມໍລະດົກໂລກຂອງກົມວັດຖຸບູຮານແຫ່ງຊາດຈີນເວົ້າວ່າ:
ຈີນມີດິນແດນກວ້າງໃຫຍ່ໄພສານ, ລະດັບເສດຖະກິດແລະວັດທະນະທຳກໍບໍ່ສະເໝີກັນ. ໃນບາງທ້ອງຖິ່ນ, ຍັງມີສະພາບການທີ່ເບິ່ງໜັກການຮ້ອງຂໍ, ເບິ່ງເບົາການຄຸ້ມຄອງ, ເບິ່ງໜັກການບຸກເບີກ, ເບິ່ງເບົາການອະນຸລັກໃນລະດັບຕ່າງກັນ.
ປະຈຸບັນ, ສະພາບການດັ່ງກ່າວພວມໄດ້ຮັບການດັດແກູ້. ກົມວັດຖຸບູຮານແຫ່ງຊາດຈີນແລະກະຊວງການກໍ່ສ້າງຈີນເປັນຕົ້ນລ້ວນແຕ່ໄດ້ຈັດງານຟັງຄຳໃຫ້ການໂດຍສະເພາະ, ຊອກຄົ້ນແຜນການອະນຸລັກມໍລະດົກໂລກທີ່ເໝາະກັບສະພາບແຫ່ງຊາດຈີນ. ພ້ອມກັນນັ້ນ, ຄຽງຄູ່ກັບກຳລັງເສດຖະກິດໄດ້ເພີ່ມຂຶ້ນເປັນກ້າວໆ, ຄວາມສາມາດອອກເງິນອະນຸລັກແລະສ້ອມແປງວັດຖຸບູຮານຂອງລັດຖະບານກາງຈົນຮອດອົງການປົກຄອງທ້ອງຖິ່ນກໍໄດ້ເພີ່ມຂຶ້ນຢ່າງຫລວງຫລາຍ. ປີ 2004, ນະຄອນປັກກິ່ງໄດ້ປະກາດແຜນການສ້ອມແປງແລະອະນຸລັກຮອບດ້ານຕໍ່ມໍລະດົກໂລກ 6 ແຫ່ງພາຍໃນເຂດປົກຄອງ. ທ່ານເມີຍນິງຮວາ ຫົວໜ້າພະແນກວັດຖຸບູຮານນະຄອນປັກກິ່ງໃຫ້ສຳພາດຕໍ່ນັກຂ່າວວ່າ:
ຫໍສີນຽນຂອງຫໍທຽນຖານໄດ້ເລີ່ມສ້ອມແປງແລ້ວ, ສວນອຸທິຍານອີເຫີຢວນແລະກຳແພງຍັກເປັນຕົ້ນກໍພວມສ້ອມແປງຢູ່, ການລົງທຶນໃນຫລາຍປີມານີ້ແມ່ນບໍ່ເຄີຍມີມາກ່ອນໃນປະຫວັດສາດ. ສະພາບການອະນຸລັກມໍລະດົກໂລກຂອງນະຄອນປັກກິ່ງໄດ້ມີການປັບປຸງໃຫ້ດີຂຶ້ນໃນດ້ານກົກຮາກ.
ຢູ່ເຂດອື່ນໆໃນທົ່ວປະເທດ, ໃນຫລາຍປີມານີ້, ວຽກງານອະນຸລັກມໍລະດົກໂລກກໍໄດ້ເພີ່ມທະວີຂຶ້ນ. ນອກຈາກໄດ້ລົງທຶນຫລາຍກວ່າເກົ່າແລະເພີ່ມການນິຕິບັນຍັດແລ້ວ, ພາຫະນະວິທະຍາສາດເຕັກນິກໃໝ່ກໍນັບມື້ນັບຫລາຍຖືກນຳໃຊ້ເຂົ້າໃນການອະນຸລັກແລະການສ້ອມແປງມໍລະດົກໂລກ. ຂໍຍົກເອົາວັງກູ້ກົງປັກກິ່ງ ເຊິ່ງເປັນມໍລະດົກໂລກເປັນຕົວຢ່າງ: ສິ່ງກໍ່ສ້າງແຕ່ລະຢ່າງຂອງພະລາຊະວັງເກົ່ານີ້ແລະຕົວເລກທີ່ກ່ຽວຂ້ອງຂອງວັດຖຸບູຮານແຕ່ລະຢ່າງລ້ວນແຕ່ຖືກບັນທຶກດ້ວຍເຕັກນິກຖ່າຍຮູບໃໝ່ສຸດ, ແລະຖືກຈັດເຂົ້າໃນລະບົບຂໍ້ມູນຂ່າວສານແລ້ວ.
ນອກນັ້ນ, ໃນຫລາຍປີມານີ້, ຈີນໄດ້ເຮັດວຽກຢ່າງຫລວງຫລາຍໃນດ້ານເຜີຍແຜ່ຄວາມຮູ້ແລະຄວາມສຳຄັນຂອງມໍລະດົກໂລກ, ສະຕິອະນຸລັກວັດຖຸບູຮານຂອງສາທາລະນະຊົນໃນສັງຄົມໄດ້ເພີ່ມຂຶ້ນຢ່າງຫລວງຫລາຍ.
ຕໍ່ມໍລະດົກໂລກທີ່ເພີ່ມຂຶ້ນຢ່າງບໍ່ຢຸດຢັ້ງ, ປະຈຸບັນ, ວົງການວັດຖຸບູຮານຂອງຈີນນັບມື້ນັບມີຄວາມຮັບຮູ້ຄືກັນ, ເຊິ່ງກໍຄື: ການຮ້ອງຂໍເປັນໂຄງການມໍລະດົກໂລກຢ່າງສຳເລັດຜົນນັ້ນ, ເປັນການຊຸກຍູ້ວຽກງານອະນຸລັກວັດຖຸບູຮານ ອະນຸລັກທັດສະນີຍະພາບວັດທະນະທຳ, ແລະທີວທັດທຳມະຊາດທັງໝົດ, ຍ້ອນວ່າສິ່ງເຫຼົ່ານີ້ແມ່ນຊັບສິນຂອງມວນມະນຸດທີ່ເກີດຂຶ້ນຄືນໃໝ່ບໍ່ໄດ້, ຄົນໃນຍຸກປະຈຸບັນຄວນຮັກສາໃຫ້ດີໆ, ເພື່ອຈົ່ງໄວ້ໃຫ້ລູກຫລານເຫຼັ້ນຫຼ້ອນ. ທ່ານໂກຈັນ ຫົວໜ້າພະແນກຄຸ້ມຄອງມໍລະດົກໂລກຂອງກົມວັດຖຸບູຮານແຫ່ງຊາດຈີນກ່າວວ່າ,
ພວກເຮົາບໍ່ແມ່ນເອົາໃຈໃສ່ແຕ່ການເພີ່ມຂຶ້ນຂອງຈຳນວນໂຄງການທີ່ຮ້ອງຂໍເປັນມໍລະດົກໂລກ , ພວກເຮົາພວມລຽບລຽງຄືນໃໝ່ຕໍ່ບັນຊີທີ່ກຽມຮ້ອງຂໍເປັນມໍລະດົກໂລກ, ຍົກລະດົບອະນຸລັກແລະການຄຸ້ມຄອງໃຫ້ສູງຂຶ້ນ, ເຖິງຈະບໍ່ສາມາດຮ້ອງຂໍເປັນມໍລະດົກໂລກຢ່າງເປັນທາງການກໍຕາມ, ກໍຈະອາໄສທັດສະນະຄະຕິແລະວິທີການຂອງມໍລະດົກໂລກ, ອາໄສກຳລັງດັນຂອງມັນ, ມາຊຸກຍູ້ວຽກງານອະນຸລັກມໍລະດົກຂອງພວກເຮົາຢ່າງຮອບດ້ານ.
|
|
|
