|
ທະນາຄານພັດທະນາອາຊີເຫັນວ່າ, ຜົນກະທົບທາງລົບຈາກຄື້ນຊູນາມີຕໍ່ເສດຖະກິດພາກພື້ນມີຄວາມຈຳກັດ
cri
Author: zl
ວັນທີ 26 ທັນວາປີ 2004,ຢູ່ມະຫາສະໝຸດອິນເດຍໄດ້ເກີດແຜ່ນດິນໄຫວ ທັງພາໃຫ້ເກີດຄື້ນຊູນາມີອັນຮ້າຍແຮງ,ເຮັດໃຫ້ປະເທດອາຊີປະສົບຄວາມເສຍຫາຍທາງຊີວິດແລະຊັບສິນຢ່າງໜັກໜ່ວງ.ແຕ່ທະນາຄານພັດທະນາອາຊີເຫັນວ່າ,ຜົນສະທ້ອນຈາກໄພພິບັດຕໍ່ການພັດທະນາເສດຖະກິດກວມລວມຂອງປະເທດແລະເຂດແຄວ້ນທີ່ປະສົບໄພເທື່ອນີ້ມີຄວາມຈຳກັດ.
ຫວ່າງມໍ່ໆນີ້,ໃນເວລາຕ້ອນຮັບການເຂົ້າສຳພາດຂອງນັກຂ່າວຊິນຮວາ,ທ່ານຊີໂນ ທາດາໂອ ຜູ້ວ່າການທະນາຄານພັດທະນາອາຊີເວົ້າວ່າ,ຍ້ອນວ່າ ສະພາບການພັດທະນາເສດຖະກິດຂອງປະເທດທີ່ປະສົບໄພຕ່າງກັນ,ຜົນສະທ້ອນຈາກໄພຄື້ນຊູນາມີທີ່ມີຕໍ່ເສດຖະກິດຂອງປະເທດເຫຼົ່ານີ້ກໍຕ່າງກັນ.ທ່ານເຫັນວ່າ,ໄພພິບັດເທື່ອນີ້ຕົ້ນຕໍໄດ້ກະໜ່ຳການທ່ອງທ່ຽວ ການປະມົງແລະກະສິກຳຂອງປະເທດທີ່ປະສົບໄພ,ບໍ່ໄດ້ກະທົບກະເທືອນເຖິງເສດຖະກິດກວມລວມຂອງພາກພື້ນແຫ່ງນີ້ຫຼາຍປານໃດ.
ທ່ານຊີໂນ ທາດາໂອເວົ້າວ່າ,ໃນບັນດາປະເທດທີ່ປະສົບໄພ,ຄາດຄະເນວ່າ,ອັດຕາເຕີບໂຕGDPຂອງອິນໂດເນເຊຍໃນປີນີ້ແລະປີໜ້າຈະຫຼຸດລົງ 0,2 ຈຸດ; ລັດຖະບານໄທກໍຄາດຄະເນວ່າ,ອັດຕາເຕີບໂຕGDPຂອງໄທໃນປີ 2005 ຈະຫຼຸດຈາກ 7% ກ່ອນເກີດໄພພິບັດ ລົງເຖິງ5,7%. ມານດິວແລະສິລັງກາມີດິນແດນໜ້ອຍ,ສະນັ້ນ,ການທ່ອງທ່ຽວແລະກະສິກຳກວມສ່ວນຫຼາຍໃນອົງປະກອບເສດຖະກິດ,ຂຸມການເງິນເລິກ,ດັ່ງນັ້ນ,ເສດຖະກິດຂອງສອງປະເທດດັ່ງກ່າວຈຶ່ງຈະຖືກກະທົບກະເທືອນຫຼາຍ.
ສຳລັບຜົນກະທົບທາງລົບຈາກແຜ່ນດິນໄຫວແລະຄື້ນຊູນາມີທີ່ມີຕໍ່ເສດຖະກິດແລະສັງຄົມຂອງພາກພື້ນແຫ່ງນີ້,ທ່ານຊີໂນ ທາດາໂອເຫັນວ່າ,ໄພພິບັດເທື່ອນີ້ຈະເຮັດໃຫ້ມີຜູ້ທຸກຍາກເພີ່ມຕື່ມ 2 ລ້ານຄົນ,ນີ້ເປັນການໂຈມຕີຢ່າງໜັກໜ່ວງຕໍ່ວຽກງານຫຼຸດຜ່ອນຄວາມທຸກຍາກຂອງປະເທດອາຊີ. ມັນອາດຈະເຮັດໃຫ້ຄວາມທຸກຍາກແລະຄວາມຮັ່ງມີພົ້ນເດັ່ນຂຶ້ນກວ່າເກົ່າ,ລະດັບສຸຂະພາບຂອງປະຊາຊົນຕ່ຳລົງ ສະພາບແວດລ້ອມສັງຄົມຊຸດຮ້າຍລົງ.ສະນັ້ນ,ທ່ານເຫັນວ່າ,ປະເທດທີ່ປະສົບໄພແລະປະຊາຄົມໂລກຄວນເພີ່ມຄວາມແຮງເຂົ້າໃນການບຳບັດຄວາມທຸກຍາກ,ຫຼີກເວັ້ນບໍ່ໃຫ້ຜົນກະທົບທາງລົບຈາກຄື້ນຊູນາມີເພີ່ມທະວີຂຶ້ນຕື່ມອີກ.
ນັກເສດຖະສາດຂອງທະນາຄານພັດທະນາອາຊີເຫັນວ່າ,ເຂດປະສົບໄພເທື່ອນີ້ຕົ້ນຕໍແມ່ນຢູ່ເຂດແຄມທະເລ,ຫາກບໍ່ແມ່ນເຂດເສດຖະກິດແລະອຸດສາຫະກຳຢູ່ໜາແໜ້ນ.ເຊັ່ນແຂວງອາເຈະອິນໂດເນເຊຍທີ່ປະສົບໄພຮ້າຍແຮງທີ່ສຸດກວມແຕ່ 2% ຂອງGDP ທົ່ວປະເທດ,ຊັບພະຍາກອນຂອງມັນຕົ້ນຕໍແມ່ນມາຈາກອາຍແກັສທຳມະຊາດແລະນ້ຳມັນເຊື້ອໄຟທີ່ຍັງບໍ່ທັນພັດທະນາ,ບໍ່ຫ່ອນຖືກກະທົບຈາກໄພພິບັດເທື່ອນີ້.ຍອດມູນຄ່າການຜະລິດຂອງ 6 ເມືອງແຄມທະເລທາງພາກໃຕ້ທີ່ປະສົບໄພຂອງໄທມີ 2 ຕື້ໂດລາສະຫະລັດທໍ່ນັ້ນ,ພຽງກວມ 1,3%ຂອງ GDP ທົ່ວປະເທດ.
ນັກເສດຖະສາດຍັງເຫັນວ່າ,ຫຼັງຈາກໄພພິບັດ,ການທ່ອງທ່ຽວຂອງອາຊີອາຄະເນແລະອາຊີໃຕ້ຈະຕົກຕ່ຳຢູ່ໃນໄລຍະສັ້ນ,ແຕ່ບໍ່ຫ່ອນຫຼົ້ມເຫຼວຕະຫຼອດໄປ.ນອກຈາກເຂດແຄມທະເລແລະເກາະທີ່ປະສົບໄພແລ້ວ,ຊັບພະຍາກອນທ່ອງທ່ຽວສ່ວນຫຼາຍຢູ່ເຂດນີ້ຍັງມີຢູ່ຄືເກົ່າ,ຄາດຄະເນວ່າ ຍອດຈຳນວນຜູ້ທ່ອງທ່ຽວບໍ່ຫ່ອນຫຼຸດໜ້ອຍຢ່າງຫຼວງຫຼາຍ,ພຽງແຕ່ປ່ຽນປາຍທາງການທ່ອງທ່ຽວທໍ່ນັ້ນ.ຢູ່ເຂດປະສົບໄພ,ການບໍລິການແລະສິ່ງກໍ່ສ້າງການທ່ອງທ່ຽວກໍມີຫວັງຈະໄດ້ຮັບການສ້າງສາຄືນໃໝ່.ນອກນີ້,ແຜ່ນດິນໄຫວ ຄື້ນຊູນາມີຕ່າງກັບພະຍາດລະບາດເຊັ່ນພະຍາດຊາສ໌ທີ່ເກີດມີຜົນກະທົບຍາວນານ,ແຕ່ບໍ່ຫ່ອນມີປັດໄຈທີ່ບໍ່ດີຍືດເຍືອໄປ,ເວັ້ນແຕ່ມີພະຍາດລະບາດກຳເນີດຂຶ້ນຢູ່ເຂດປະສົບໄພ.ສະນັ້ນ,ຖ້າວ່າປະສານສົມທົບໃຊ້ມາດຕະການສ້າງສາຄືນໃໝ່ແລະໂຄສະນາຢ່າງບັງເກີດຜົນ,ແຂກທ່ອງທ່ຽວກໍຈະຟື້ນຟູມີຄວາມເຊື່ອໃຈໃນຂ້າງໜ້າບໍ່ດົນນີ້.
ຜູ້ຊ່ຽວຊານຂອງທະນາຄານພັດທະນາອາຊີຍັງຊີ້ອອກວ່າ,ໃນ 3 ປີຜ່ານມາ,ເສດຖະກິດຂອງອິນເດຍ ອິນໂດເນເຊຍແລະໄທທີ່ປະສົບໄພເທື່ອນີ້ລ້ວນແຕ່ຮັກສາທ່ວງທ່າເຕີບໂຕເປັນຢ່າງດີ,ສະພາບການເງິນກໍໄດ້ດີຂຶ້ນ,ເງິນຄັງສຳຮອງທີ່ເປັນເງິນຕ່າງປະເທດກໍພຽງພໍ,ມີຄວາມສາມາດຕ້ານການກະໜ່ຳຕໍ່ເສດຖະກິດຈາກໄພພິບັດ.ນອກນີ້,ເງິນບໍລິຈາກກ່ຽວກັບການກູ້ໄພແລະສ້າງສາຄືນໃໝ່ທີ່ປະຊາຄົມໂລກໃຫ້ຄຳໝັ້ນສັນຍາໄດ້ລື່ນກາຍ 5 ຕື້ໂດລາສະຫະລັດ,ແລະສົ່ງໄປຮອດເກືອບ 1 ຕື້ໂດລາສະຫະລັດແລ້ວ,ໂຄງການສ້າງສາຄືນໃໝ່ຫຼັງໄພພິບັດກໍຈະນຳໃຊ້ທຶນຕ່າງປະເທດ,ນີ້ຈະຊັກນຳການເຕີບໂຕຂອງອຸດສາຫະກຳແລະຕະຫຼາດກໍ່ສ້າງໃນແຫ່ງນັ້ນໃນລະດັບຕ່າງກັນອີກດ້ວຍ.
|
|
