|
ພະຍາດເລືອດດັນສູງແມ່ນພະຍາດທີ່ມີຄົນເປັນຫຼາຍ,ທັງພາໃຫ້ເປັນພະຍາດອື່ນຫຼາຍຢ່າງແລະອັດຕາພາໃຫ້ພິການຍ້ອນກໍສູງ,ມັນໄດ້ຂົ່ມຂູ່ສຸຂະພາບແລະຄຸນນະພາບຊີວິດຂອງຄົນທັງຫຼາຍຢ່າງຮ້າຍແຮງ. ການຄວບຄຸມເລືອດດັນສູງເປັນຢ່າງດີມີຄວາມໝາຍສຳຄັນຫຼາຍຕໍ່ການຫຼຸດຜ່ອນຫຼືຫຼົບຫຼີກຜົນຮ້າຍຂອງມັນທີ່ມີຕໍ່ອະໄວຍະວະສຳຄັນຂອງຄົນເຈັບ. ແຕ່ວ່າ,ຄົນເຈັບບໍ່ໜ້ອຍຍັງມີຄວາມຮັບຮູ້ແລະການກະທຳທີ່ບໍ່ຖືກຕ້ອງໃນເວລາປິ່ນປົວພະຍາດດັ່ງກ່າວ,ສະນັ້ນ ຈຶ່ງໄດ້ກະທົບກະເທືອນເຖິງຜົນຂອງການປິ່ນປົວ.
ບາງຄົນທີ່ເປັນເລືອດດັນສູງມັກກະຄວາມດັນຂອງເລືອດສູງຫຼືຕ່ຳຕາມຄວາມຮູ້ສຶກຂອງຕົນເອງ. ເຮັດແນວນີ້ແມ່ນບໍ່ຖືກຕ້ອງ,ໂດຍສະເພາະແມ່ນຜູ້ເປັນເລືອດດັນສູງມາຍາວນານ,ຍ້ອນວ່າລື້ງເຄີຍແລ້ວ,ສະນັ້ນ ເຖິງວ່າຄວາມດັນເລືອດຈະສູງຂຶ້ນຢ່າງເດັ່ນຊັດ,ກໍບໍ່ມີຄວາມຮູ້ສຶກບໍ່ສະບາຍໃດໆ. ຖ້າອີງຕາມຄວາມຮູ້ສຶກຂອງຕົນມາກຳນົດຈະກິນຢາຫຼືບໍ່ນັ້ນ,ຈະມີຜົນຮ້າຍຢ້ອນຫຼັງຫຼາຍທີ່ສຸດ. ວິທີທີ່ຖືກຕ້ອງແມ່ນ,ຄົນເຈັບຄວນແທກຄວາມດັນຂອງເລືອດເປັນປະຈຳ,ຢ່າງໜ້ອຍອາທິດລະເທື່ອ.
ຄົນເຈັບບາງຄົນບໍ່ສາມາດຍຶດໝັ້ນກິນຢາຕາມໝໍສັ່ງ,ບາງທີກິນ,ບາງທີບໍ່ກິນ,ພາໃຫ້ຄວາມດັນເລືອດບໍ່ໝັ້ນທ່ຽງ,ເຮັດແນວນີ້ຈະພາໃຫ້ອະໄວຍະວະສຳຄັນເຊັ່ນໝາກຫົວໃຈ,ສະໝອງແລະໝາກໄຂ່ຫຼັງຖືກຜົນຮ້າຍຍາວນານ.
ບາງຄົນເມື່ອເຫັນຄວາມດັນເລືອດເປັນປົກກະຕິແລ້ວ,ກໍເຊົາກິນຢາໂລດ,ນີ້ກໍແມ່ນວິທີທີ່ບໍ່ຖືກຕ້ອງ. ເຮັດແນວນີ້ບໍ່ພຽງແຕ່ເຮັດໃຫ້ການປິ່ນປົວບໍ່ໄດ້ຜົນທໍ່ນັ້ນ ຫາກຍັງຈະພາໃຫ້ໝາກຫົວໃຈ,ສະໝອງແລະໝາກໄຂ່ຫຼັງເປັນພະຍາດຢ່າງໜັກໜ່ວງເຊັ່ນສາຍເລືອດສະໝອງແຕກເປັນຕົ້ນຍ້ອນຄວາມດັນເລືອດຂຶ້ນໆລົງໆຫຼາຍ. ວິທີທີ່ຖືກຕ້ອງແມ່ນ,ຫຼັງຈາກກິນຢາແລ້ວ,ຄວາມດັນເລືອດຕ່ຳລົງ,ຈາກນັ້ນ ຍັງຕ້ອງກິນຢາຕໍ່ໄປໃນປະລິມານຮັກສາຄວາມດັນເລືອດ,ຢາໃຫ້ໜ້ອຍລົງພາຍໃຕ້ການຊີ້ນຳຂອງນາຍໝໍ,ເຊັ່ນເພີ່ມຫຼືຫຼຸດຊະນິດຢາຫຼືປະລິມານຢາ,ແຕ່ບໍ່ຄວນເຊົາບໍ່ກິນຢາເລີຍ.
ຄົນເຈັບບາງຄົນກິນແຕ່ຢາເປັນເວລາຍາວນານ,ບໍ່ໄປກວດຢູ່ໂຮງໝໍຕາມເວລາກຳນົດ,ເຮັດແນວນີ້ມັກເຮັດໃຫ້ຢາເກີດມີບົດບາດຂ້າງຄຽງຫຼືລື້ງຢາ. ເພາະວ່າຄົນເຈັບຕ່າງກັນຄວນອີງຕາມສະພາບຕ່າງກັນຂອງຄົນເຈັບເຊັ່ນໄລຍະເວລາເປັນພະຍາດ,ອາຍຸ,ຄວາມຕ່າງກັນຂອງຄົນແລະສັບພະຄຸນຂອງອະໄວຍະວະເປັນຕົ້ນ,ເລືອກເອົາຢາທີ່ເໝາະສົມແລະປະລິມານຢາທີ່ເໝາະສົມພາຍໃຕ້ການຊີ້ນຳຂອງນາຍໝໍ.
ພະຍາດເລືອດດັນສູງແມ່ນເກີດຂຶ້ນຍ້ອນຫຼາຍປັດໄຈ,ສະນັ້ນ ໃນເວລາປິ່ນປົວ ກໍຕ້ອງປົວແບບສັງລວມ,ຖ້າບໍ່ດັ່ງນັ້ນ,ກໍບໍ່ອາດຈະໄດ້ຮັບຜົນທີ່ດີຕາມຄາດຫວັງ. ໃນເວລາປິ່ນປົວ,ນອກຈາກເລືອກເອົາຢາທີ່ເໝາະສົມແລ້ວ,ຍັງຕ້ອງລະວັງເຮັດວຽກແລະພັກຜ່ອນສົມທົບກັນຢ່າງເໝາະສົມ,ຄວນກິນອາຫານຈາງແດ່,ຢ່າກິນເຄັມຫຼາຍ,ເຂົ້າຮ່ວມການເຄື່ອນໄຫວລື້ນເລີງແລະຫັດກາຍຢ່າງເໝາະສົມແລະລົດນ້ຳໜັກເປັນຕົ້ນ.
ໃນຈຳນວນຜູ້ເປັນພະຍາດເລືອດດັນສູງນັ້ນ,ຄົນເຈັບ 80% ຂຶ້ນໄປເປັນເລືອດດັນສູງໂດຍບໍ່ຮູ້ມູນເຫດ,ຕ້ອງກິນຢາເພື່ອຄວບຄຸມຄວາມດັນເລືອດ,ເພື່ອຫຼຸດແລະເລື່ອນເວລາອະໄວອະວະຖືກທຳລາຍແລະເພື່ອຕໍ່ອາຍຸໃຫ້ຍືນແດ່. ສະນັ້ນ ວິທີທີ່ຖືກຕ້ອງແມ່ນ,ໃຫ້ຮູ້ຈັກຄວາມສຳຄັນຂອງການເຮັດໃຫ້ຄວາມດັນເລືອດຕ່ຳລົງ,ຄວບຄຸມຄວາມດັນເລືອດຢ່າງເຄັ່ງຄັດ. ວິທີທີ່ຖືກຕ້ອງແມ່ນສັບຊ້ອນຢາທີ່ກິນໃຫ້ທັນຄວາມຕ້ອງການຂອງອາການພະຍາດພາຍໃຕ້ການຊີ້ນຳຂອງນາຍໝໍ.
ທຳມະດາແລ້ວ,ຖ້າຄວາມດັນເລືອດຂອງຜູ້ໃຫຍ່ສູງກວ່າ 140/85,ກໍຖືວ່າເປັນພະຍາດເລືອດດັນສູງແລ້ວ. ແຕ່ຜູ້ເປັນເລືອດດັນສູງໄລຍະຕົ້ນບາງຄົນ,ຄວາມດັນເລືອດຂອງຜູ້ກ່ຽວຢູ່ໃກ້ແຕ່ບໍ່ຮອດມາດຖານດັ່ງກ່າວ,ສະນັ້ນ ຈຶ່ງບໍ່ເອົາໃຈໃສ່. ເລື່ອງຈິງສະແດງໃຫ້ເຫັນວ່າ,ຄວາມດັນເລືອດລະດັບນີ້ກໍຈະທຳລາຍຮ່າງກາຍເຊັ່ນດຽວກັນ.
ນອກນີ້,ຄົນໄວຊະລາ(ໝາຍເຖິງອາຍຸ 60 ປີຂຶ້ນໄປ)ລ້ວນແຕ່ມີອາການສາຍເລືອດແດງແຂງໃນລະດັບຕ່າງກັນ,ສຳຄັນໝາຍເຖິງສາຍເລືອດແດງໃນໝາກຫົວໃຈ,ສະໝອງແລະໝາກໄຂ່ຫຼັງ,ຖ້າຄວາມດັນເລືອດສູງໜ້ອຍໜຶ່ງ,ຈະມີຜົນດີຕໍ່ການສະໜອງເລືອດໃຫ້ອະໄວຍະວະ,ຖ້າບໍ່ເອົາຫົວຊານຳອາຍຸແລະສະພາບຮ່າງກາຍຂອງຄົນເຈັບ,ແລ້ວຫຼຸດຄວາມດັນເລືອດໃຫ້ຕ່ຳເຖິງລະດັບປົກກະຕິ,ພັດບໍ່ດີຊ້ຳ. ຄວາມດັນເລືອດຈະຫຼຸດລົງລະດັບໃດຈຶ່ງເໝາະສົມ,ແມ່ນແລ້ວແຕ່ສະພາບຂອງແຕ່ລະຄົນ,ຕີລວາດກວາດພຽງໃຫ້ທໍ່ກັນໝົດກໍບໍ່ດີ.
|
