|
|
 |
| (GMT+08:00)
2005-01-31 11:24:21
|
 |
|
ຂະບວນການສ້າງຕັ້ງອຳນາດການປົກຄອງຂອງອີຣັກຄືນໃໝ່
cri
Author: MO
ວັນທີ 9 ເມສາປີ 2003, ພາຍຫລັງທະຫານອາເມລິກາຍຶດຄອງແບກແດກ ນະຄອນຫລວງອີຣັກແລ້ວ, ເຈົ້າໜ້າທີ່ຍຶດຄອງອາເມລິກາອັງກິດກໍໄດ້ລົງມືສ້າງຕັ້ງອົງການຄຸ້ມຄອງຊົ່ວຄາວຢູ່ອີຣັກ.
ວັນທີ 13 ກໍລະກົດປີ 2003, ຄະນະກຳມະການຄຸ້ມຄອງຊົ່ວຄາວອີຣັກທີ່ແຕ່ງຕັ້ງໂດຍທ່ານເບຼເມີ ຜູ້ວ່າການບໍລິຫານພົນລະເມືອງອາເມລິກາທີ່ຮັບຜິດຊອບການສ້າງສາອີຣັກຄືນໃໝ່ຫລັງສົງຄາມໄດ້ປະກາດສ້າງຕັ້ງຂຶ້ນຢູ່ແບກແດກ, ໜ້າທີ່ຕຳແໜ່ງຕົ້ນຕໍແມ່ນໃຫ້ຄຳປຶກສາແລະວາງຂໍ້ສະເໜີໃຫ້ເຈົ້າໜ້າທີ່ການທະຫານປະສົມ, ມີສິດອຳນາດແຕ່ງຕັ້ງແລະປົດລັດຖະມົນຕີຂອງລັດຖະບານຊົ່ວຄາວ, ທູຕານຸທູດປະຈຳຕ່າງປະເທດ, ເຂົ້າຮ່ວມການວາງນະໂຍບາຍແຫ່ງຊາດ, ສຳຫລວດພິຈາລະນາງົບປະມານການເງິນ, ແລະວາງລັດຖະທຳມະນູນເປັນຕົ້ນ, ສິດຕົກລົງສຸດທ້າຍຢູ່ນຳທ່ານເບຼເມີ.
ວັນທີ 1 ກັນຍາ, ຄະນະກຳມະການຄຸ້ມຄອງຊົ່ວຄາວປະກາດລາຍຊື່ລັດຖະມົນຕີ 25 ທ່ານຂອງລັດຖະບານຊົ່ວຄາວອີຣັກຊຸດໃໝ່. ວັນທີ 3 ກັນຍາ, ສະມາຊິກຄະນະລັດຖະບານຊຸດໃໝ່ໄດ້ສາບານຕົວຂຶ້ນຮັບຕຳແໜ່ງຢູ່ທີ່ແບກແດກ.
ວັນທີ 16 ຕຸລາ, ສະພາຄວາມໝັ້ນຄົງສະຫະປະຊາຊາດໄດ້ຜ່ານມະຕິເລກທີ 1511 ກ່ຽວກັບການສ້າງສາອີຣັກຄືນໃໝ່ຫລັງສົງຄາມເຊິ່ງອາເມລິກາຍຶ່ນໃຫ້ນັ້ນ. ມະຕິ ກ່າວເນັ້ນວ່າ, ການຍຶດຄອງອີຣັກພຽງແຕ່ແມ່ນເລື່ອງຊົ່ວຄາວ. ມະຕິຍັງໄດ້ມອບສິດໃຫ້ສ້າງກອງທະຫານນາໆຊາດປະຈຳອີຣັກກອງໜຶ່ງຊຶ່ງນຳໂດຍອາເມລິກາ.
ວັນທີ 15 ພະຈິກ, ທ່ານເບຼເມີເຊັນສັນຍາກັບຄະນະກຳມະການຄຸ້ມຄອງຊົ່ວຄາວ, ກຳນົດຕາລາງເວລາກ່ຽວກັບອາເມລິກາອີຣັກສຳເລັດວຽກງານມອບຮັບອຳນາດ.
ວັນທີ 8 ມີນາປີ 2004, ຢູ່ທີ່ແບກແດກ, ຄະນະກຳມະການຄຸ້ມຄອງຊົ່ວຄາວເຊັນເອກະສານລັດຖະທຳມະນູນຊົ່ວຄາວເຫຼັ້ມທຳອິດຫລັງສົງຄາມອີຣັກຢ່າງເປັນທາງການ, ໄດ້ໃຫ້ຫລັກອ້າງອິງສຳຄັນແກ່ການປະກອບອຳນາດຄືນໃໝ່ແລະການເຄື່ອນໄຫວທາງກົດໝາຍທີ່ກ່ຽວຂ້ອງຂອງອີຣັກພາຍໃນໄລຍະຂ້າມຜ່ານ.
ວັນທີ 4 ເມສາ, ທ່ານເບຼເມີປະກາດສ້າງຕັ້ງກະຊວງປ້ອງກັນປະເທດອີຣັກ.
ວັນທີ 28 ພຶດສະພາ, ຄະນະກຳມະການຄຸ້ມຄອງຊົ່ວຄາວສະເໜີໃຫ້ທ່ານອາລາວີ ຂອງນິກາຍຊີອິດເປັນນາຍົກລັດຖະມົນຕີຊົ່ວຄາວອີຣັກ, ໄດ້ຮັບການສະໜັບສະໜູນຈາກອາເມລິກາແລະສະຫະປະຊາຊາດ.
ວັນທີ 1 ມິຖຸນາ, ທ່ານອາລາວີປະກາດບັນຊີລາຍຊື່ຂອງສະມາຊິກລັດຖະບານຊົ່ວຄາວຂອງອີຣັກ. ມື້ດຽວກັນ, ທ່ານຢາວາ ຂອງນິກາຍຊຸນນິດ, ເວລານັ້ນເປັນປະທານຝຽນປະຈຳເດືອນຂອງຄະນະກຳມະການຄຸ້ມຄອງຊົ່ວຄາວເປັນປະທານາທິບໍດີອີຣັກຜູ້ໃໝ່.
ວັນທີ 8 ມິຖຸນາ, ສະພາຄວາມໝັ້ນຄົງສະຫະປະຊາຊາດເປັນເອກະສັນກັນຜ່ານມະຕິເລກ 1546 ກ່ຽວກັບບັນຫາອີຣັກ, ຮັບຮອງລັດຖະບານຊົ່ວຄາວອີຣັກ, ກຳນົດວ່າ, ອາເມລິກາອັງກິດສິ້ນສຸດການຍຶດຄອງອີຣັກກ່ອນວັນທີ 30 ມິຖຸນາ, ພ້ອມທັງມອບສິດໃຫ້ກອງທະຫານນາໆຊາດທີ່ນຳໂດຍອາເມລິກາສືບຕໍ່ປະຈຳຢູ່ອີຣັກ, ຈົນຮອດສຳເລັດຂະບວນວິວັດທາງການເມືອງຂອງອີຣັກ.
ວັນທີ 28 ມິຖຸນາ, ເຈົ້າໜ້າທີ່ທະຫານປະສົມປະຈຳອີຣັກຈັດພິທີນ້ອຍຢ່າງລັບໆຢູ່ແບກແດກ, ທ່ານເບຼເມີ ຜູ້ວ່າການບໍລິຫານພົນລະເຮືອນສູງສຸດຂອງອາເມລິກາປະຈຳອີຣັກຍື່ນເອກະສານກົດໝາຍທີ່ເປັນສັນຍະລັກອະທິປະໄຕຂອງອີຣັກໃຫ້ລັດຖະບານຊົ່ວຄາວຂອງອີຣັກ, ເປັນຂີດໝາຍສະແດງໃຫ້ເຫັນວ່າ, ສະພາບການຖຶກຍຶດຄອງເປັນເວລາ 14 ເດືອນຂອງອີຣັກໄດ້ສິ້ນສຸດລົງຢ່າງເປັນທາງການໃນດ້ານກົດໝາຍ.
ແຕ່ວັນທີ 15 ຫາວັນທີ 18 ສິງຫາ, ອີຣັກຈັດກອງປະຊຸມການເມືອງແຫ່ງຊາດພັນຄົນ, ກອງປະຊຸມຄັ້ງນີ້ໄດ້ຜ່ານການປຶກສາຫາລືກັນກັບພັກໃຫຍ່ຕົ້ນຕໍ, ໄດ້ກຳເນີດສະພາແຫ່ງຊາດຊົ່ວຄາວທີ່ປະກອບດ້ວຍສະມາຊິກສະພາ 100 ຄົນ. ພາລະກຳຕົ້ນຕໍຂອງສະພາແຫ່ງຊາດຊົ່ວຄາວແມ່ນຕິດຕາມກວດກາລັດຖະບານຊົ່ວຄາວອີຣັກ, ແລະຮັບຜິດຊອບກະກຽມວຽກການເລືອກຕັ້ງສະພາແຫ່ງຊາດຂ້າມຜ່ານໃນເດືອນມັງກອນປີ 2005.
|
|
|
