|
|
 |
| (GMT+08:00)
2005-01-31 12:17:49
|
 |
|
ລັດຖະບານຊົ່ວຄາວພ້ອມກົນໄກໝູນເດີນຂອງອີຣັກ
cri
Author: li
ລັດຖະບານຊົ່ວຄາວຂອງອີຣັກແມ່ນສ້າງຕັ້ງຂຶ້ນເມື່ອວັນທີ 1 ມິຖຸນາປີ 2004 ໂດຍອີງຕາມລັດຖະທຳມະນູນຊົ່ວຄາວທີ່ຄະນະກຳມະການຄຸ້ມຄອງຊົ່ວຄາວຂອງອີຣັກລົງລາຍເຊັນເມື່ອເດືອນມີນາປີ 2004. ພາລະໜ້າທີ່ຂອງລັດຖະບານຊົ່ວຄາວແມ່ນຮັບເອົາອຳນາດການປົກຄອງຈາກເຈົ້າໜ້າທີ່ອາເມລິກາແລະອັງກິດທີ່ຍຶດຄອງ,ແລະກຳອຳນາດຈົນເຖິງອີຣັກເລືອກຕັ້ງສະພາແຫ່ງຊາດຂ້າມຜ່ານແລະລັດຖະບານຂ້າມຜ່ານຊຸດໃໝ່ຂອງອີຣັກໃນຕົ້ນປີ 2005.
ໃນດ້ານຈັດວາງສະມາຊິກ,ລັດຖະບານຊົ່ວຄາວຍັງຄົງໃຊ້ເບົ້າແບບແບ່ງປັນອຳນາດຕາມພັກຝ່າຍ,ຊົນເຜົ່າແລະນິກາຍສາສະໜາທີ່ໃຊ້ໃນເວລາສ້າງຕັ້ງຄະນະກຳມະການຄຸ້ມຄອງຊົ່ວຄາວຂອງອີຣັກ.
ອີງຕາມລັດຖະທຳມະນູນຊົ່ວຄາວ,ອີຣັກປະຕິບັດລະບອບໃຫ້ປະທານາທິບໍດີແລະນາຍົກລັດຖະມົນຕີແບ່ງປັນອຳນາດ. ລັດຖະບານຊົ່ວຄາວມີປະທານາທິບໍດີຜູ້ໜຶ່ງ,ຮອງປະທານາທິບໍດີສອງຄົນແລະນາຍົກລັດຖະມົນຕີຜູ້ໜຶ່ງ. ນາຍົກລັດຖະມົນຕີກຳວຽກງານຂອງຄະນະລັດຖະບານ,ປະທານາທິບໍດີມີລັກສະນະພິທີການໃນລະດັບຫຼາຍສົມຄວນ,ແມ່ນສັນຍະລັກຂອງຊາດ.
ທ່ານອາລາວີ ນາຍົກລັດຖະມົນຕີລັດຖະບານຊົ່ວຄາວມາຈາກນິກາຍຊີອິດທີ່ກວມປະຊາກອນອີຣັກປະມານ 60%,ທ່ານ ຢາວາ ປະທານາທິບໍດີມາຈາກນິກາຍຊຸນນິດຂອງອີຣັກ. ທ່ານ ຈາຟາລີ ຜູ້ນຳພັກຮຽກຮ້ອງອິສລາມ ເຊິ່ງເປັນພັກການເມືອງນິກາຍຊີອິດແລະທ່ານ ຊາວິສ ຜູ້ນຳຕົ້ນຕໍຂອງພັກປະຊາທິປະໄຕເຄີດ ເປັນຮອງປະທານາທິບໍດີ.
ໃນສະມາຊິກລັດຖະບານຊົ່ວຄາວທີ່ປະກອບດ້ວຍ 33 ທ່ານ,ນອກຈາກທ່ານນາຍົກອາລາວີແລ້ວ,ຍັງໄດ້ຕັ້ງຮອງນາຍົກລັດຖະມົນຕີຜູ້ໜຶ່ງແລະລັດຖະມົນຕີ 31 ຄົນ,ໃນນັ້ນ ລວມມີເພດຍິງ 6 ຄົນ. ໃນສະມາຊິກຄະນະລັດຖະບານເຫຼົ່ານີ້,ມີເກືອບ 1 ສ່ວນ 3 ແມ່ນສະມາຊິກຄະນະກຳມະການຄຸ້ມຄອງຊົ່ວຄາວ. ນອກນີ້ ລັດຖະບານຊົ່ວຄາວຍັງໄດ້ຮັບເອົາບຸກຄົນວິຊາການຫຼາຍຄົນທີ່ບໍ່ສັງກັດພັກຝ່າຍໃດ.
ອີງຕາມມະຕິເລກ 1546 ຂອງອົງການສະຫະປະຊາຊາດ,ລັດຖະບານຊົ່ວຄາວຂອງອີຣັກໄດ້ຮັບເອົາອຳນາດການປົກຄອງຈາກເຈົ້າໜ້າທີ່ຄຸ້ມຄອງຊົ່ວຄາວຂອງກອງທະຫານປະສົມເຊິ່ງຊີ້ນຳໂດຍອາເມລິກາໃນວັນທີ 28 ມິຖຸນາປີ 2004. ຫຼັງຈາກຈັດພິທີມອບຮັບອຳນາດແລ້ວ,ທ່ານເບຼເມີ ຜູ້ວ່າການບໍລິຫານພົນລະເຮືອນສູງສຸດຂອງອາເມລິກາປະຈຳອີຣັກໄດ້ໜີອອກຈາກອີຣັກກັບຄືນອາເມລິກາ.
ອີງຕາມລັດຖະທຳມະນູນຊົ່ວຄາວ,ເພື່ອຕິດຕາມລັດຖະບານຊົ່ວຄາວແລະທຳການກະກຽມເພື່ອຈັດຕັ້ງລັດຖະສະພາຂ້າມຜ່ານຊຸດໃໝ່ໂດຍຜ່ານການເລືອກຕັ້ງທົ່ວໄປໃນເດືອນມັງກອນປີ 2005,ອີຣັກໄດ້ໄຂກອງປະຊຸມການເມືອງພົນລະເມືອງພັນຄົນໃນວັນທີ 15 ສິງຫາປີ 2004,ອັນໄດ້ກຳນົດສະພາແຫ່ງຊາດຊົ່ວຄາວທີ່ປະກອບດ້ວຍສະມາຊິກ 100 ຄົນ.
ສິດແລະໜ້າທີ່ຕົ້ນຕໍຂອງສະພາແຫ່ງຊາດຊົ່ວຄາວຍັງລວມມີ: ມີສິດຢັບຢັ້ງນະໂຍບາຍຂອງລັດຖະບານຊົ່ວຄາວ,ພິຈາລະນາສຳຫຼວດແລະອະນຸມັດງົບປະມານຂອງລັດຖະບານສົກປີ 2005 ແລະຕັ້ງກະທູ້ຖາມສະມາຊິກຄະນະລັດຖະບານ. ຖ້າປະທານາທິບໍດີຫຼືຮອງປະທານາທິບໍດີຂອງລັດຖະບານຊົ່ວຄາວເຖິງແກ່ກຳໃນໄລຍະຮັບຕຳແໜ່ງ,ສະພາແຫ່ງຊາດຊົ່ວຄາວຍັງຮັບຜິດຊອບເລືອກຕັ້ງປະທານາທິບໍດີແລະຮອງປະທານາທິບໍດີຜູ້ໃໝ່.
|
|
|
