|
|
 |
| (GMT+08:00)
2005-01-31 13:39:09
|
 |
|
ງານຄອນເສີດບໍລິຈາກກູ້ໄພ"RADIO AID" (ສຽງ)
cri
Author: MO
|
ທີ່ນີ້, ວິທະຍຸສາກົນແຫ່ງປະເທດຈີນ, ສະບາຍດີທ່ານຜູ້ຟັງທີ່ເຄົາລົບ, ຊົມເຊີຍທ່ານຮັບຟັງລາຍການຢ່ອນອາລົມໃນວັນເສົາ. ຂ້າພະເຈົ້າແມ່ນແສງແກ້ວ. ຄື້ນທະເລຊູນາມີມະຫາສະໝຸດອິນເດຍໄດ້ເຮັດໃຫ້ມີຜູ້ເສຍຊີວິດແລະບາດເຈັບຢ່າງຫຼາກຫຼາຍໃນຫລາຍປະເທດອາຊີອາຄະເນແລະອາຊີໃຕ້. ຕໍ່ມະຫັນຕະໄພບັ້ນນີ້, ບັນດາປະເທດໃນໂລກໄດ້ພາກັນເດ່ມືຊ່ອຍເຫຼືອ. ວົງການສິລະປະຂອງຈີນກໍໄດ້ເຄື່ອນໄຫວຢ່າງຫ້າວຫັນ, ຈັດງານຄອນເສີດບໍລິຈາກກູ້ໄພ. ໃນລາຍການມື້ນີ້, ຂ້າພະເຈົ້າຂໍສະເໜີງານຄອນເສີດທີ່ຈັດຂຶ້ນຢູ່ປັກກິ່ງໃນວັນທີ 13 ມັງກອນປີນີ້, ນັ້ນກໍຄືງານຄອນເສີດ"RADIO AID".
ຕອນຄ່ຳວັນທີ 13 ມັງກອນ, ຢູ່ສະຖານທີ່ລື້ນເລີງທີ່ໃຫ້ຊື່ວ່າ:Tango cosplay, ຜູ້ຊົມທັງຫລາຍໂບກມືຢ່າງຟົດຟຶ້ນ, ຮ້ອງເພງນຳກັນກັບນັກຮ້ອງຢູ່ເທິງເວທີ. ຜູ້ຊົມເຫຼົ່ານີ້ຕ່າງໄດ້ຊື່ບັດຜ່ານປະຕູ ຊື່ງເປັນການບໍລິຈາກດ້ວຍຄວາມເມດຕາ, ແຕ່ເມື່ອເຂົ້າຊົມໃນບ່ອນສະແດງແລ້ວ, ຜູ້ຊົມທັງຫລາຍຍັງພາກັນປ່ອນເງິນໃສ່ຫີບບໍລິຈາກເຄື່ອນທີ່ໃນງານນັ້ນອີກດ້ວຍຄວາມເອື້ອເຟື້ອເຜື່ອແຜ່.
ງານຄອນເສີດບໍລິຈາກກູ້ໄພ"RADIO AID"ອາດເວົ້າໄດ້ວ່າແມ່ນການສະແດງທີ່ມີລະດັບສູງໃນປະເທດຈີນ. ເພງທີ່ທ່ານພວມຟັງຢູ່ນີ້ກໍແມ່ນເພງFei Fei Run ຂັບຮ້ອງໂດຍຄະນະດົນຕີມູມາຢ່າງກະຕືລືລົ້ນ.
ງານຄອນເສີດບໍລິຈາກກູ້ໄພ"RADIO AID"ແມ່ນວິທະຍຸສາກົນແຫ່ງປະເທດຈີນກັບສະມາຄົມກຸສົນຈີນຮ່ວມກັນຈັດຂຶ້ນ. ວິທະຍຸສາກົນແຫ່ງປະເທດຈີນແມ່ນວິທະຍຸສາກົນທີ່ກະຈາຍສຽງຕໍ່ອາຊີອາຄະເນກໍຄືທົ່ວໂລກດ້ວຍ 43 ພາສາ, ເທື່ອນີ້ຮ່ວມກັນກັບສະມາຄົມກຸສົນຈີນຈັດງານຄອນເສີດ, ແມ່ນເຜື່ອໂຮມເອົາແຮງສະເທືອນຂອງດົນຕີ ອິດທິພົນຂອງສື່ມວນຊົນ ແລະຄວາມຮັກແພງຂອງມວນຊົນວົງການຕ່າງໆໃນສັງຄົມ, ຊ່ອຍເຫຼືອຜູ້ປະສົບໄພໃນເຂດມະຫາສະໝຸດອິນເດຍຢ່າງແຂງແຮງ. ທ່ານຕິງປາງອິງ ຮອງບັນນາທິການໃຫຍ່ຂອງວິທະຍຸສາກົນແຫ່ງປະເທດຈີນເວົ້າວ່າ, ມະຫັນຕະໄພທີ່ຄື້ນທະເລຊູນາມີມະຫາສະໝຸດອິນເດຍນຳມາໃຫ້ປະຊາຊົນອາຊີອາຄະເນນັ້ນ, ໄດ້ເຮັດໃຫ້ພະນັກງານທຸກຄົນແລະບັນດາຜູ້ຊ່ຽວຊານຕ່າງປະເທດທີ່ເຮັດວຽກຢູ່ວິທະຍຸCRI ເປັນຫ່ວງເປັນໃຍນຳ. ທ່ານເວົ້າວ່າ:
ພາຍຫລັງພວກເຮົາຮູ້ຂ່າວນີ້ແລ້ວ, ພະນັກງານຈີນພ້ອມຜູ້ຊ່ຽວຊານສັນຊາດຕ່າງປະເທດຂອງວິທະຍຸCRIໄດ້ຈັດໃຫ້ມີການບໍລິຈາກເອົາເອງ, ເພື່ອສະແດງຄວາມຮັກແພງຂອງຕົນ. ດຽວນີ້ພວກເຮົາຮຽກຮ້ອງໃຫ້ວົງການຕ່າງໆໃນສັງຄົມບໍລິຈາກເງິນຫລາຍກວ່າເກົ່າເພື່ອສະແດງຄວາມເອົາໃຈໃສ່ແລະຊ່ອຍເຫຼືອມວນຊົນໃນປະເທດປະສົບໄພຍິ່ງຫລາຍກວ່າເກົ່າ.
ທີ່ທ່ານພວມຟັງຢູ່ນີ້ແມ່ນເພງທີ່ຄັດເລືອກຈາກງານຄອນເສີດບໍລິຈາກກູ້ໄພ"RADIO AID". ເພງນີ້ຊື່ວ່າWoshinideluomiou ຂ້ອຍແມ່ນໂລມີໂອຂອງເຈົ້າ ຂັບຮ້ອງໂດຍຄະນະດົນຕີHuaer.
ຝ່າຍເຈົ້າພາບຈັດງານ"RADIO AID"ແນະນຳວ່າ, ຮູບການງານຄອນເສີດແລະຊ່ອງທາງບໍລິຈາກເງິນຂອງງານ"RADIO AID"ແມ່ນເຄັ່ງຄັດທີ່ສຸດ, ນັກຮ້ອງແລະຄະນະດົນຕີທັງໝົດທີ່ເຂົ້າຮ່ວມການສະແດງໃນຄ່ຳຄືນມື້ນັ້ນບໍ່ເອົາຄ່າຕອບຫຍັງໝົດ, ເງິນບໍລິຈາກທີ່ໄດ້ຮັບໃນງານນີ້ ລ້ວນແຕ່ບໍລິຈາກໃຫ້ເຂດປະສົບໄພມະຫາສະໝຸດອິນເດຍທັງໝົດ.
ຕໍ່ໄປ ພວກເຮົາມາຟັງເພງXingfushenchu ສ່ວນເລິກຂອງຄວາມສຸກ ຂັບຮ້ອງໂດຍນາງເຢ້ໄປ້. ເພື່ອເຂົ້າຮ່ວມການສະແດງເທື່ອນີ້, ນາງເຢ້ໄປ້ໄດ້ເດີນທາງຈາກຊຽງໄຮ້ກັບເມືອປັກກິ່ງ, ແລ້ວເຂົ້າຮ່ວມການເຝິກຊ້ອມໂລດໂດຍບໍ່ໄດ້ພັກຜ່ອນ. ເພາະນາງຮູ້ສຶກວ່າ, ເຂົ້າຮ່ວມການສະແດງປະເພດນີ້ແມ່ນ, ເພື່ອໃຫ້ຄົນຍິ່ງຫລາຍໄປເອົາໃຈໃສ່ນຳເລື່ອງນີ້, ແມ່ນຈຸດປະສົງໜຶ່ງຂອງພວກເຮົາ. ເທື່ອນີ້ແມ່ນເຫດການທີ່ເກີດຂຶ້ນກະທັນຫັນ, ເວລານີ້ຍິ່ງຕ້ອງການຄວາມຮັກແພງແລະຄວາມຊ່ອຍເຫຼືອເຊິ່ງກັນແລະກັນ.
ເພື່ອໃຫ້ແຟນເພງຍິ່ງຫລາຍແບ່ງປັນຄວາມຮັກແພງໃນງານຄອນເສີດ, ຊ່ອງດົນຕີຂອງວິທະຍຸCRI ຄືຄື້ນ HIT FM 88.7 ໄດ້ຖ່າຍທອດສົດງານຄອນເສີດເທື່ອນີ້. ພ້ອມກັນນັ້ນ, ເວບໄຊcri online ແລະເວບໄຊTOM ຍັງໄດ້ຖ່າຍທອດສົດທາງສຽງແລະພາບ, ເຮັດໃຫ້ຜູ້ຟັງຂອງ HIT FM ແລະຜູ້ອ່ານເວບໄຊໃນແຫ່ງຕ່າງໆກໍໄດ້ຊົມສະພາບຄືກຄື້ນຂອງງານຄອນເສີດ. ຄືນມື້ນັ້ນ, ຍັງມີຜູ້ຟັງແລະຜູ້ອ່ານເວບໄຊໄດ້ໂທລະສັບສາຍດ່ວນຫລືສົ່ງຈົດໝາຍສັ້ນ, ເຂົ້າຮ່ວມການບໍລິຈາກໃນງານ, ອຸທິດຄວາມຮັກແພງຂອງຕົນໃຫ້ແກ່ມວນຊົນເຂດປະສົບໄພ.
ຕໍ່ໄປ, ເຊີນຟັງເພງChuntian ລະດູບານໃໝ່ ຂັບຮ້ອງໂດຍຄະນະດົນຕີThe Verse.
ທ່ານຜູ້ຟັງ, ຄື້ນທະເລຊູນາມີທີ່ເຮັດໃຫ້ອາຊີໃຕ້ແລະອາຊີອາຄະເນມີຄົນເສຍຊີວິດຫລາຍແສນນັ້ນ, ໄດ້ເຮັດໃຫ້ຄົນເຫັນຢ່າງຈະແຈ້ງວ່າ, ຢູ່ຕໍ່ໜ້າມະຫາສະໝຸດ, ມວນມະນຸດແມ່ນນ້ອຍຫລາຍ, ພວກເຮົາບໍ່ສະກັດກັ້ນໄພພິບັດໄດ້. ແຕ່ພວກເຮົາມີຄວາມຮັກ, ມັນສາມາດເຕົ້າໂຮມເປັນກ້ອນກຳລັງອັນມະຫາສານ, ເພື່ອຕາບຈູນຄວາມເສຍຫາຍຂອງໜ່ວຍໂລກ. ສະນັ້ນ, ພວກເຮົາຈົ່ງສາມັກຄືເປັນຈິດໜຶ່ງໃຈດຽວກັນ ສ້າງສາໜ່ວຍໂລກຄືນໃໝ່, ໃຫ້ຜູ້ປະສົບໄພຮູ້ສຶກວ່າ, ຢູ່ເທິງໜ່ວຍໂລກນີ້ບ່ອນໃດກໍເຕັມໄປແຕ່ຄວາມອົບອຸ່ນ. ມ້ວນທ້າຍລາຍການມື້ນີ້, ເຊີນຟັງເພງ Lianhua ດອກບົວ ຂັບຮ້ອງໂດຍຄະນະລົງຄວນຈິວຕ້ວນ.
ທ່ານຜູ້ຟັງທີ່ເຄົາລົບ, ລາຍການຢ່ອນອາລົມໃນວັນເສົາພາກນີ້, ຂໍຈົບລົງພຽງທໍ່ນີ້, ຂອບໃຈທ່ານທີ່ຮັບຟັງ, ສະບາຍດີ.
|
|
|
