|
ທີ່ນີ້ວິທະຍຸສາກົນແຫ່ງປະເທດຈີນ, ສະບາຍດີທ່ານຜູ່ຟັງທີ່ໂຄລົບ, ຍິນດີຕ້ອນຮັບທ່ານເຂົ້າສູ່ລາຍການໂລກກິລາ.
ທ່ານຜູ່ຟັງທີ່ໂຄລົບ, ຕົ້ນປີນີ້, ສະມາຄົມລົດຖີບຈີນແລະທີມລົດຖີບມາໂຄໂປໂລຂອງໂຮນລັງໄດ້ຮ່ວມກັນສ້າງທີມລົດຖີບອາຊີບຈີນທີມທຳອິດຢູ່ເມືອງຈູໄຫ ທາງພາກໃຕ້ຂອງຈີນຢ່າງເປັນທາງການ. ເຖິງວ່ານີ້ເປັນພຽງບາດກ້າວນ້ອຍຂອງກິລາລົດຖີບຈີນບົນເສັ້ນທາງຫັນເປັນອາຊີບທໍ່ນັ້ນກໍ່ຕາມ, ແຕ່ເວົ້າສຳລັບນັກກິລາແລະຄູຝຶກລົດຖີບຈີນແລ້ວ, ພັດມີຄວາມສັ່ນຄອນແຮງສົມຄວນ. ໃນລາຍການພາກນີ້ ເຊີນຟັງບົດແຈ້ງຂ່າວປະກອບສຽງທີ່ພາດຫົວເລື່ອງວ່າ: ຈີນສ້າງທີມລົດຖີບອາຊີບທີມທຳອິດ.
ຈີນເປັນ "ອານາຈັກລົດຖີບ", ຄົນຈີນສ່ວນຫຼາຍຖືລົດຖີບເປັນພາຫະນະຄົມມະນາຄົມປະຈຳວັນ. ແຕ່ວ່າ ລະດັບກິລາລົດຖີບຂອງຈີນພັດບໍ່ທັນລະດັບກ້າວໜ້າຂອງໂລກເທື່ອ, ຈົນຮອດປະຈຸບັນ, ລະດັບສູງທີ່ສຸດແມ່ນນາງຈຽງຢົງຮວາຊິງໄດ້ຫຼຽນເງິນໃນການແຂ່ງຂັນເພດຍິງກາງສະໜາມໃນງານກິລາໂອລິມປິກອາແຕນ. ໃນລາຍການແຂ່ງຂັນແລ່ນຕາມທາງຫຼວງທີ່ສະແດງເຖິງລະດັບລວມຂອງກິລາລົດຖີບຂອງປະເທດໜຶ່ງ, ນັກກິລາລົດຖີບຈີນບໍ່ເຄີຍມີຊື່ມີສຽງຈັກເທື່ອ, ສ່ວນໃນງານແຂ່ງຂັນລະດັບສູງສຸດໃນໂລກຄື ງານແຂ່ງຂັນລົດຖີບແລ່ນອ້ອມຝຣັ່ງ, ບໍ່ເຄີຍເຫັນມີນັກກິລາລົດຖີບຈີນຈັກຄົນເລີຍ.
ງານແຂ່ງຂັນລົດຖີບແລ່ນຕາມທາງຫຼວງແມ່ນລາຍການແຂ່ງຂັນປະເພດໜຶ່ງທີ່ລຳບາກທີ່ສຸດ ນັກກິລາລົດຖີບຕ້ອງມີຮ່າງກາຍແຂງແຮງ ມີອຸປະກອນດີແລະມີບົດຮຽນແຂ່ງຂັນຫຼາຍ, ຕ້ອງລົງທຶນຫຼາຍ, ສະເພາະແຕ່ຄ່າອຸປະກອນລົດຖີບໃນປີໜຶ່ງ ນັກກິລາຜູ່ໜຶ່ງກໍຕ້ອງການ 1 ແສນຢວນ, ນອກນີ້ຍັງມີຄ່າໃຊ້ຈ່າຍອື່ນໆ ຄືການຝຶກແອບແລະທາດບຳລຸງເປັນຕົ້ນ. ສະນັ້ນ ໂດຍຖອດຖອນເອົາບົດຮຽນຄຸ້ມຄອງແລະໃຊ້ລະບົບຝຶກແອບອັນສຸກງອມຂອງຝ່າຍຕາເວັນຕົກ, ການຫັນກິລາລົດຖີບເປັນອາຊີບໄດ້ກາຍເປັນເສັ້ນທາງຕ້ອງເປັນໄປຂອງການພັດທະນາລິກາລົດຖີບແລ່ນຕາມທາງຫຼວງຂອງຈີນ.
ການຮ່ວມມືກັບຝ່າຍໂຮນລັງສ້າງທີມລົດຖີບອາຊີບເທື່ອນີ້,ກໍ່ແມ່ນການເລີ່ມຕົ້ນຂອງການກິລາລົດຖີບຈີນຫັນເປັນອາຊີບ. ທ່ານຖຽນຈຸນຢົງ ຮອງຫົວໜ້າສະມາຄົມລົດຖີບຈີນຕີລາຄາວ່າ: ເວົ້າສຳລົບກິລາລົດຖີບຂອງຈີນແລ້ວ, ມື້ສ້າງທີມແມ່ນມື້ໜຶ່ງທີ່ເປັນປະຫວັດການ. ເພາະວ່າແຕ່ດຽວນີ້ເປັນຕົ້ນໄປ, ກິລາລົດຖີບຈີນໄດ້ເລີ່ມໝູນເດີນແບບອາຊີບຢ່າງແທ້ຈິງ, ບໍ່ວ່າຈະແມ່ນນັກກິລາຫຼືຈະແມ່ນຄູຝຶກ, ລ້ວນແຕ່ມີການປ່ຽນແປງຢ່າງໃຫຍ່ໃນດ້ານທັດສະນະການຝຶກແອບແລະການແຂ່ງຂັນ.
ທີມລົດຖີບທີ່ຊື່ວ່າມາໂຄໂປໂລນີ້ໄດ້ຈົດທະບຽນຢູ່ສະຫະພັນລົດຖີບສາກົນເມື່ອເດືອນທັນວາປີກາຍນີ້, ສະມາຄົມລົດຖີບຈີນເປັນຜູ່ຕິດຕາມກວດກາ. ເຖິງວ່າສະມາຄົມລົດຖີບຈີນແລະທີມລົດຖີບແຫ່ງຊາດທີ່ຄຸ້ມຄອງດ້ວຍສະມາຄົມລົດຖີບຈີນເປັນຝ່າຍຮ່ວມມືກໍ່ຕາມ, ແຕ່ທີມລົດຖີບມາໂຄໂປໂລມີສິດທຸລະກິດໂດຍເປັນເຈົ້າຕົນເອງ. ຕາມສັນຍາທີ່ສອງຝ່າຍເຊັນກັນ, ສະມາຄົມລົດຖີບຈີນສົ່ງນັກກິລາ 4 ຄົນແລະຄູຝຶກຜູ່ໜຶ່ງໄປເປັນສະມາຊິກທີມລົດຖີບມາໂຄໂປໂລ, ແຕ່ບໍ່ເຂົ້າແຊກວຽກງານຂອງທີມລົດຖີບ ຄືການຄຸ້ມຄອງ ການທຸລະກິດ ການເຂົ້າຮ່ວມການແຂ່ງຂັນແລະການຝຶກແອບຂອງນັກກິລາເປັນຕົ້ນ. ທ້າວລີຟູອີ້ ນັກກິລາລົດຖີບທາງຫຼວງຜູ່ດີເດັ່ນທີ່ສຸດຂອງຈີນ ດຽວນີ້ເປັນນັກກິລາຜູ່ໜຶ່ງໃນທີມລົດຖີບມາໂຄໂປໂລ, ເພິ່ນເຕັມໄປດ້ວຍຄວາມຫວັງຕໍ່ອະນາຄົດ, ເພິ່ນເວົ້າວ່າ: ດີໃຈຫຼາຍທີ່ໄດ້ມີໂອກາດເຂົ້າເປັນສະມາຊິກທີມລົດຖີບນີ້, ກິລາລົດຖີບທາງຫຼວງໄດ້ເປັນຕົວແທນໃຫ້ແກ່ລະດັບກິລາລົດຖີບປະເທດໜຶ່ງ, ຢູ່ໃນຖານະສຳຄັນກວ່າໝູ່ໃນລາຍການແຂ່ງຂັນກິລາລົດຖີບ. ປະເທດຈີນເປັນປະເທດໃຫຍ່ດ້ານລົດຖີບ, ຜົນງານລົດຖີບແລ່ນຕາມທາງຫຼວງດີຂຶ້ນແລ້ວ, ຈຶ່ງເປັນຂີດໝາຍສະແດງໃຫ້ເຫັນວ່າ ລະດັບກິລາລົດຖີບໄດ້ສູງຂຶ້ນ. ສະນັ້ນ ກ່ອນອື່ນ ຂ້າພະເຈົ້າຫວັງໃຫ້ຕົນເອງມີຄວາມກ້າວໜ້າ, ຊົງຕົວຢູ່ຢ່າງໝັ້ນຄົງໃນທີມລົດຖີບນີ້, ເປົ້າໝາຍຂັ້ນສຸດທ້າຍແມ່ນຫວັງໃຫ້ກິລາລົດຖີບຈີນນອກຈາກລາຍການແຂ່ງຂັນກາງສະໜາມແຂ່ງຂັນແລ້ວ ລາຍການແລ່ນຕາມທາງຫຼວງກໍ່ໃຫ້ຊິງໄດ້ລາງວັນໃນງານແຂ່ງຂັນລະດັບໂລກຈົນຮອດໃນງານກິລາໂອລິມປິກ.
ເມື່ອທຽບກັບເມື່ອກ່ອນແລ້ວ, ລາຍຮັບຂອງນັກກິລາໃນທີມລົດຖີບອາຊີບຈະເພີ່ມຂຶ້ນຫຼາຍ. ຕາມໄດ້ຊາບ, ພາຍຫຼັງສ້າງຕັ້ງທີມລົດຖີບອາຊີບແລ້ວ, ຄຽງຄູ່ກັບໂອກາດເຂົ້າຮ່ວມງານແຂ່ງຂັນເພີ່ມຂຶ້ນ, ລາຍຮັບຈາກການເຂົ້າຮ່ວມການແຂ່ງຂັນແລະເງິນລາງວັນລ້ວນແຕ່ຈະເພີ່ມຂຶ້ນສົມຄູ່ກັນ. ທ່ານຈຽງໂກເຟິງ ເຈົ້າໜ້າທີ່ສະມາຄົມລົດຖີບຈີນສະເໜີວ່າ,ຕາມແຜນການເຂົ້າຮ່ວມງານແຂ່ງຂັນປະຈຳຂອງທີມລົດຖີບອາຊີບຂ້າມທະວີບ, ໃນປີ 2005, ພຽງແຕ່ຢູ່ອາຊີທໍ່ນັ້ນ ທີມລົດຖີບມາໂຄໂປໂລຈະເຂົ້າຮ່ວມການແຂ່ງຂັນ 20 ເທື່ອຫາ 30 ເທື່ອ, ສ່ວນຢູ່ເອີລົບ ການແຂ່ງຂັນຍິ່ງມີຫຼາຍ, ປະມານອາທິດລະສອງເທື່ອ.
ທີມລົດຖີບອາຊີບມີບົດບາດຊຸກຍູ້ລະດັບຂອງນັກກິລາແລະລາຍຮັບສູງຂຶ້ນພ້ອມກັນ, ສ່ວນການຮ່ວມມືລະຫວ່າງຈີນກັບໂຮນລັງເທື່ອນີ້ກໍສາມາດເວົ້າໄດ້ວ່າແມ່ນໄດ້ຜົນປະໂຫຍດທັງສອງຝ່າຍ: ທີມລົດຖີບມາໂຄໂປໂລໂຮນລັງໄດ້ເປີດກວ້າງຜົນສະທ້ອນຢູ່ຈີນ, ພໍ່ຄ້າອຸປະຖຳທີມລົດຖີບດັ່ງກ່າວກໍເລັງສາຍຕາໃສ່ໂອກາດຈີນຈະເປັນເຈົ້າພາບຈັດງານກິລາໂອລິມປິກປີ 2008, ຫວັງຜ່ານຈາກທີມລົດຖີບຕີເຂົ້າຕະຫຼາດຈີນ; ສ່ວນຝ່າຍຈີນນັ້ນ ກໍອາໄສທຶນກ້ອນໃຫຍ່ແລະບົດຮຽນຝຶກແອບແລະຄຸ້ມຄອງຂອງທີມລົດຖີບອາຊີບ, ອົບຮົມນັກກິລາລົດຖີບແລ່ນຕາມທາງຫຼວງ, ເພື່ອໃຫ້ໄດ້ຮັບຜົນງານທີ່ມີການບຸກທະລຸຈົນຮອດຊິງໄດ້ຫຼຽນຄຳໃນງານກິລາໂອລິມປິກປັກກິ່ງປີ 2008.
ຕາມແຜນການຂອງສະມາຄົມລົດຖີບຈີນ, ທີມລົດຖີບມາໂຄໂປໂລພຽງເປັນບາດກ້າວທຳອິດຂອງຈີນທີ່ສົ່ງນັກກິລາໜຸ່ມໄປຝຶກແອບຢູ່ຕ່າງປະເທດ, ຕໍ່ໄປພາຍໜ້າ, ສະມາຄົມລົດຖີບຈີນຍັງຈະຮ່ວມມືກັບທີມລົດຖີບອື່ນໆອີກ, ສົ່ງນັກກິລາລົດຖີບຫຼາຍກວ່າເກົ່າ ເຊິ່ງລວມທັງລາຍການແຂ່ງລົດຖີບຕາມທາງພູໄປຝຶກແອບຢູ່ຕ່າງປະເທດ. ພ້ອມກັນນັ້ນ ສະມາຄົມລົດຖີບຈີນຍັງຈະສ້າງຕັ້ງທີມລົດຖີບອາຊີບທີ່ຈີນຄຸ້ມຄອງຝຶກແອບໝົດໃນເວລາອັນເໝາະສົມ. ທ່ານຖຽນຈຸນຢົງ ຮອງຫົວໜ້າສະມາຄົມລົດຖີບຈີນເວົ້າວ່າ: ນີ້ພຽງແຕ່ແມ່ນບາດກ້າວທຳອິດທໍ່ນັ້ນ, ຕໍ່ໄປພາຍໜ້າ ພວກຂ້າພະເຈົ້າຍັງຈະໃຊ້ຫຼາຍມາດຕະການ, ຕົວຢ່າງຄື ສົ່ງນັກກິລາຜູ່ດີເລີດໄປເຂົ້າຮ່ວມສະໂມສອນອື່ນໆຂອງເອີລົບ; ສ້າງຕັ້ງທີມລົດຖີບອາຊີບເພດຍິງແຂ່ງຕາມທາງຫຼວງທີມທຳອິດຂອງຈີນ; ຈັດງານແຂ່ງຂັນລົດຖີບຊິງລາງວັນໃຫຍ່ອາຊີບລະດັບຊາດ, ດຳເນີນການກິລາລົດຖີບຂອງຈີນໃຫ້ດີຢ່າງແທ້ຈິງ. ຖ້າສາມາດໝູນເດີນໄປຢ່າງປອດໃສແລະປົກກະຕິ, ເຊື່ອວ່າອີກ 2-3 ປີ, ນັກກິລາລົດຖີບແຂ່ງຕາມທາງຫຼວງຂອງຈີນຍ່ອມຈະມີລະດັບສູງຂຶ້ນແບບກ້າວກະໂດດ, ແລ້ວຈະດຳເນີນການກິລາລົດຖີບແຂ່ງຕາມທາງພູ ລົດຖີບລໍ້ນ້ອຍໃຫ້ເປັນອາຊີບ, ຍົກລະດັບແຂ່ງຂັນລົດຖີບສັງລວມຂອງຈີນໃຫ້ສູງຂຶ້ນໃນທີ່ສຸດດ້ວຍວິທີປອດໃສແລະມີລະບຽບ.
ທ່ານຜູ່ຟັງທີ່ໂຄລົບ ລາຍການໂລກກິລາຂອງພວກເຮົາພາກນີ້ ຂໍສ້ຽງສຸດລົງພຽງທໍ່ນີ້, ຂອບໃຈທີ່ທ່ານຮັບຟັງ, ພົບກັນໃໝ່ໃນອາທິດໜ້າ, ສະບາຍດີ.
|
