|
|
 |
| (GMT+08:00)
2005-02-02 21:24:03
|
 |
|
ລະບົບເຕືອນໄພຄື້ນຊູນາມີທີ່ພວມປົວແປງໃຫ້ດີຂຶ້ນເລື້ອຍໆຂອງຈີນ
cri
Author: li
ຕາມຂ່າວ CRI: ໄພແຜ່ນດິນໄຫວແລະຄື້ນທະເລຊູນາມີມະຫາສະໝຸດອິນເດຍທີ່ເກີດຂຶ້ນໃນທ້າຍປີ 2004 ຍ້ອນບໍ່ໄດ້ສົ່ງສັນຍານໄພຄື້ນຊູນາມີຢ່າງທັນການ,ຄື້ນທະເລໄດ້ກືນເອົາຊີວິດເກືອບ 1 ແສນ 7 ໝື່ນຄົນ. ບົດຮຽນອັນນອງເລືອດເຮັດໃຫ້ສາທາລະນະຊົນໃນທົ່ວໂລກຮັບຮູ້ເຖິງຄວາມສຳຄັນຂອງລະບົບເຕືອນໄພຄື້ນຊູນາມີທີ່ມີປະສິດທິພາບສູງ.
ຕາມມູນເຫດໃນການເກີດຂຶ້ນ,ຄື້ນຊູນາມີສາມາດແບ່ງອອກເປັນສາມປະເພດຄື:ຄື້ນຊູນາມີຍ້ອນແຜ່ນດິນໄຫວ,ຄື້ນຊູນາມີຍ້ອນພູໄຟລະເບີດແລະຄື້ນຊູນາມີຍ້ອນດິນເຈື່ອນ. ໃນນັ້ນ ອັດຕາເກີດຄື້ນຊູນາມີຍ້ອນແຜ່ນດິນໄຫວກວມ 95%,ກຳລັງທຳລາຍຂອງມັນກໍແຮງກວ່າໝູ່,ຄື້ນຊູນາມີມະຫາສະໝຸດອິນເດຍກໍແມ່ນຢູ່ໃນປະເພດນີ້.
ທ່ານເສີນຢູ ນັກຟິຊິກສາດໜ່ວຍໂລກທີ່ມີຊື່ສຽງຂອງຈີນ ບັນດິດສະພາບັນດິດວິທະຍາສາດຈີນໄດ້ແນະນຳເງື່ອນໄຂອັນຈຳເປັນຫຼາຍຂໍ້ຂອງການເກີດຄື້ນຊູນາມີຍ້ອນແຜ່ນດິນໄຫວໃຫ້ນັກຂ່າວຊາບຢ່າງງ່າຍໆ,ທ່ານເວົ້າວ່າ:
"ການເກີດຄື້ນຊູນາມີຍ້ອນແຜ່ນດິນໄຫວຕ້ອງມີເງື່ອນໄຂສາມຂໍ້,ຂາດຂໍ້ໃດກໍບໍ່ໄດ້. ເງື່ອນໄຂຂໍ້ທີໜຶ່ງແມ່ນທະເລເລິກ,ນ້ຳທະເລຕ້ອງເລິກກວ່າ 1000 ຮອດ 2000 ແມັດ. ເງື່ອນໄຂຂໍ້ທີສອງແມ່ນພື້ນທະເລເກີດແຜ່ນດິນໄຫວແຮງ,ຂັ້ນ 7 ລິກເທີຫຼື້ແຮງກວ່ານີ້ກໍອາດຈະເກີດຄື້ນຊູນາມີ. ເງື່ອນໄຂຂໍ້ທີສາມແມ່ນແຜ່ນດິນໄຫວພາໃຫ້ເປືອກໂລກຂຶ້ນໆລົງໆ,ແລ້ວນ້ຳທະເລສູງຂຶ້ນຈາກພື້ນທະເລ."
ເມື່ອຄື້ນຊູນາມີຈໍ່ຕົວຂຶ້ນແລ້ວ,ຄວາມໄວສູງສຸດສາມາດບັນລຸ 1 ພັນກິໂລແມັດຕໍ່ຊົ່ວໂມງ,ໄວກວ່າຍົນໂດຍສານອາຍພົ່ນ.ໃນຂະບວນການແຜ່ກະຈາຍຄື້ນຊູນາມີນັ້ນ,ໜ້ານ້ຳທະເລບໍ່ມີການປ່ຽນແປງຢ່າງເດັ່ນຊັດ,ເຮືອທີ່ແລ່ນຢູ່ໜ້ານ້ຳທະເລກໍບໍ່ມີຄວາມຮູ້ສຶກ. ແຕ່ວ່າ,ໃນເວລາຄື້ນຊູນາມີຄ່ອຍໆໃກ້ຝັ່ງນັ້ນ,ຍ້ອນຄວາມເລິກຂອງນ້ຳທະເລຕື້ນຂຶ້ນຢ່າງໄວພະລັນ,ພະລັງງານອັນມະຫາສານຖືກປ່ອຍຕົວອອກຢ່າງກະທັນຫັນ,ຄື້ນສູງສຸດສາມາດສູງເຖິງຫຼາຍສິບແມັດ,ແລ້ວເກີດມີຜົນຮ້າຍຢ້ອນຫຼັງອັນມະຫາສານ.
ຜູ້ຊ່ຽວຊານຊີ້ອອກວ່າ,ລະບົບເຕືອນໄພຄື້ນຊູນາມີທີ່ມີປະສິດທິພາບສູງຕ້ອງສອດຄ່ອງກັບສາມມາດຖານດັ່ງລຸ່ມນີ້,ຄື: ໜຶ່ງແມ່ນສາມາດວັດແທກແຜ່ນດິນໄຫວທີ່ເກີດຂຶ້ນຢູ່ພື້ນທະເລແລະລະດັບໜ້ານ້ຳທະເລປ່ຽນແປງຜິດປົກກະຕິ; ສອງແມ່ນຜ່ານຈາກການວິໄຈຕົວເລກທີ່ວັດແທກໄດ້ມາວິນິດໄສວ່າໄດ້ເກີດຄື້ນຊູນາມີຫຼືບໍ່,ແລະຄິດໄລ່ເວລາທີ່ຄື້ນຊູນາມີແຜ່ກະຈາຍຮອດຊາຍຝັ່ງທະເລຂອງປະເທດຕົນພ້ອມດ້ວຍຂອບເຂດແລະຄວາມແຮງຂອງຄື້ນຊູນາມີ; ສາມແມ່ນສົ່ງສັນຍານໄພໃຫ້ເຂດທີ່ຄື້ນຊູນາມີຈະໄປເຖິງນັ້ນຢ່າງທັນການ,ແລະເລີ່ມປະຕິບັດຕາມແຜນການສຸກເສີນກ່ຽວກັບຄື້ນຊູນາມີ.
ອີງຕາມມາດຖານຫຼາຍລາຍດັ່ງກ່າວ,ເລີ່ມແຕ່ຊຸມປີ 70 ສະຕະວັດແລ້ວນີ້ເປັນຕົ້ນມາ ຈີນກໍໄດ້ເພີ່ມຄວາມແຮງໃນການພະຍາກອນຄື້ນຊູນາມີ,ໄດ້ສ້າງລະບົບເຕືອນໄພຄື້ນຊູນາມີຂອງປະເທດຕົນເທື່ອລະກ້າວ. ສູນພະຍາກອນສິ່ງແວດລ້ອມທະເລແຫ່ງຊາດຈີນແມ່ນອົງການຄົ້ນຄວ້າວິທະຍາສາດທີ່ຮັບຜິດຊອບຄຸ້ມຄອງລະບົບດັ່ງກ່າວ. ທ່ານຢູຟູຈຽງ ນັກຄົ້ນຄວ້າຂອງສູນດັ່ງກ່າວແນະນຳວ່າ,ລະບົບເຕືອນໄພຄື້ນຊູນາມີຂອງຈີນຕົ້ນຕໍປະກອບດ້ວຍສອງສາຂາລະບົບ:
"ໜຶ່ງແມ່ນລະບົບຕິດຕາມວັດແທກ,ຕົວເລກຂອງລະບົບຕິດຕາມວັດແທກມາຈາກສະຖານີຕິດຕາມວັດແທກຢູ່ເກາະດອນແລະລຽບຝັ່ງ,ກົມແຜ່ນດິນໄຫວແຫ່ງຊາດຈີນແລະສູນເຕືອນໄພຄື້ນຊູນາມີປາຊິຟິກ. ສອງແມ່ນລະບົບເຕືອນໄພ."
ຕາມແນະນຳວ່າ,ຈີນໄດ້ສ້າງສະຖານີຕິດຕາມວັດແທກທະເລ 70 ກວ່າແຫ່ງຢູ່ເກາະທະເລແລະແຄມດອນ,ຕົວເລກຕິດຕາມວັດແທກຈະຜ່ານດາວທຽມສົ່ງໄປຮອດລະບົບຕິດຕາມວັດແທກຢູ່ປັກກິ່ງໂດຍ,ນັກວິທະຍາສາດທັງຫຼາຍສາມາດກວດເບິ່ງການປ່ຽນແປງຂອງລະດັບນ້ຳທະເລຢູ່ມໍ່ສະຖານີຕິດຕາມວັດແທກຢູ່ທຸກເວລາ. ນອກນີ້,ລະບົບຕິດຕາມວັດແທກຍັງໄດ້ເຊື່ອມຕໍ່ກັບສູນເຕືອນໄພຄື້ນຊູນາມີມະຫາສະໝຸດປາຊິຟິກ ເຊິ່ງເປັນອົງການເຕືອນໄພຄື້ນຊູນາມີທີ່ມີຊື່ສຽງກວ່າໝູ່ໃນໂລກ,ເພື່ອຈະໄດ້ຮັບຕົວເລກກ່ຽວກັບຄື້ນຊູນາມີຍ້ອນແຜ່ນດິນໄຫວທີ່ແມ່ນຢຳກວ່າໝູ່ຢູ່ທຸກເວລາ.
ທ່ານຫຼີເຊຍຄູນ ນັກຄົ້ນຄວ້າສູນພະຍາກອນສິ່ງແວດລ້ອມທະເລແຫ່ງຊາດຈີນທີ່ຮັບຜິດຊອບພັນທະນາຊອຟແວລະບົບເຕືອນໄພຄື້ນຊູນາມີໄດ້ແນະນຳວ່າ,ເມື່ອໄດ້ຮັບຂໍ້ມູນຂ່າວສານກ່ຽວກັບຄື້ນຊູນາມີແລ້ວ,ລະບົບເຕືອນໄພກໍຈະເຕືອນໄພຢ່າງອັດຕະໂນມັດ.
ເມື່ອໄດ້ຮັບສັນຍານໄພແລ້ວ,ພະນັກງານພະຍາກອນຄື້ນຊູນາມີຂອງຈີນກໍຈະໃຊ້ຄອມພິວເຕີຄວາມໄວສູງວິໄຈຕົວເລກຕິດຕາມວັດແທກ,ຄິດໄລ່ເວລາແລະບ່ອນທີ່ແມ່ນຢຳທີ່ຄື້ນຊູນາມີຈະມາຮອດ,ໃນທີ່ສຸດຜ່ານຈາກລະບົບໂທລະຄົມດາວທຽມສົ່ງສັນຍານໄພຄື້ນຊູນາມີທີ່ແມ່ນຢຳໃຫ້ເຂດແຄມທະເລ. ຈາກນັ້ນ ເຂດແຄມທະເລຈະປະຕິບັດຕາມແຜນການສຸກເສີນ,ຜ່ານຈາກສື່ມວນຊົນແຈ້ງຂໍ້ມູນຂ່າວສານກ່ຽວກັບຄື້ນຊູນາມີ,ຍົກຍ້າຍປະຊາຊົນທີ່ຢູ່ເຂດອັນຕະລາຍຢ່າງຮີບດ່ວນ,ເພື່ອຫຼຸດຜົນເສຍຫາຍໃຫ້ໜ້ອຍລົງເຖິງລະດັບຕ່ຳສຸດ.
ຜູ້ຊ່ຽວຊານທັງຫຼາຍຊີ້ອອກ່າ,ການບູລະນະລະບົບເຕືອນໄພຄື້ນຊູນາມີໃຫ້ສົມບູນຂຶ້ນນັ້ນພຽງແຕ່ແມ່ນວຽກງານດ້ານໜຶ່ງໃນການຫຼຸດໄພຄື້ນຊູນາມີເທົ່ານັ້ນ,ຈາກບົດຮຽນທາງລົບຂອງຄື້ນຊູນາມີມະຫາສະໝຸດອິນເດຍເທື່ອນີ້ ສາມາດເຫັນໄດ້ວ່າ,ການເຜີຍແຜ່ຄວາມຮູ້ກ່ຽວກັບຄື້ນຊູນາມີໃຫ້ສາທາລະນະຊົນຮູ້ແລະຍົກສະຕິປ້ອງກັນໃຫ້ສູງຂຶ້ນນັ້ນກໍສຳຄັນທີ່ສຸດຄືກັນ. ຕໍ່ໄປພາຍໜ້າ,ເຂດແຄມທະເລຂອງຈີນຈະຈັດການເຄື່ອນໄຫວຊ້ອມການຍົກຍ້າຍປະຊາຊົນໜີຄື້ນຊູນາມີຢູ່ເລື້ອຍໆ,ແລະຕັກເຕືອນປະຊາຊົນທ້ອງຖິ່ນແລະຜູ້ທ່ອງທ່ຽວວ່າ,ໃນເວລາຟອງໃຫຍ່ມາຮອດນັ້ນ,ຕ້ອງຖອຍໄປຮອດບ່ອນທີ່ຂ້ອນຂ້າງສູງ,ຫາກບໍ່ແມ່ນແລ່ນໄປສູ່ຫາຍຊາຍເພື່ອເບິ່ງຟອງນ້ຳ.
|
|
|
