|
|
 |
| (GMT+08:00)
2005-02-03 15:56:29
|
 |
|
ພະຍາດໄຂ້ຫວັດສັດປີກເປັນສິ່ງທ້າທາຍກັບບຸນກິນເຕັດຫວຽດນາມ
cri
Author: da
ເວົ້າສຳລັບສາມັນຊົນຫວຽດນາມແລ້ວ,ຊີ້ນສັດປີກ ໂດຍສະເພາະແມ່ນຊີ້ນໄກ່,ແຕ່ໃດມາກໍແມ່ນອາຫານສຳຄັນໃນຍາມບຸນກິນເຕັດຫວຽດນາມໂດຍຕະຫຼອດ.ເມື່ອຮອດເວລາກ່ອນບຸນກິນເຕັດທຸກປີ,ແຕ່ລະຄອບຄົວລ້ວນແຕ່ຂ້ຽວຊື້ໄກ່ເຮັດອາຫານແຊບຢູ່ບ້ານ.ແຕ່ໃນເວລາບຸນກິນເຕັດຫວຽດນາມໃກ້ຈະວຽນມາເຖິງນີ້,ພະຍາດໄຂ້ຫວັດສັດປີກຊ້ຳພັດໄດ້ແຜ່ລະບາດຢ່າງຕໍ່ເນື່ອງ,ປະຊາຊົນຫວຽດນາມຈຳນວນຫຼວງຫຼາຍຈຳເປັນວາງແຜນການໃໝ່ກ່ຽວກັບປຸງແຕ່ງອາຫານການກິນໃນວັນສິ້ນປີເກົ່າແລ້ວ.
ຕາມສະຖິຕິຫຼ້າສຸດຂອງຂະແໜງການທີ່ກ່ຽວຂ້ອງຂອງຫວຽດນາມ,ນັບມາຮອດທ້າຍເດືອນມັງກອນປີ 2005,ຝ່າຍໂຮງໝໍຂອງຫວຽດນາມໄດ້ຢືນຢັນວ່າ ຜູ້ເປັນພະຍາດໄຂ້ຫວັດສັດປີກໄດ້ເພີ່ມຂຶ້ນຮອດ 16 ຄົນ,ໃນນັ້ນມີ 11 ຄົນໄດ້ເສຍຊີວິດ.ໃນຂະນະດຽວກັນ,ໃນທົ່ວປະເທດຫວຽດນາມມີແຂວງແລະຕົວເມືອງເກືອບເຄິ່ງໜຶ່ງໄດ້ເກີດມີພະຍາດໄຂ້ຫວັດສັດປີກເປັນລຳດັບ,ຍອດຈຳນວນສັດປີກທີ່ຖືກຂ້າຫຼາຍເຖິງ 8 ແສນ 3 ໝື່ນກວ່າໂຕ,ຫວຽດນາມໄດ້ກາຍເປັນປະເທດໜຶ່ງທີ່ມີພະຍາດໄຂ້ຫວັດສັດປີກແຜ່ລະບາດຂ້ອນຂ້າງຮ້າຍແຮງໃນອາຊີແລ້ວ.
ພະຍາດໄຂ້ຫວັດສັດປີກແຜ່ບະບາດເຮັດໃຫ້ປວງຊົນຫວຽດນາມຮູ້ສຶກວິຕົກກັງວົນຫຼາຍ.ໄທເມືອງຮ່າໂນ້ຍຫຼາຍຄົນເວົ້າວ່າ,ບຸນກິນເຕັດຫວຽດນາມປີນີ້ ພວກເຂົາເຈົ້າບໍ່ຢາກຊື້ ສັດປີກເປັນແລ້ວ.ພ້ອມກັນນັ້ນ,ເພື່ອບໍ່ໃຫ້ບຸນກິນເຕັດປີນີ້ເສຍບັນຍາກາດຂອງປີໃໝ່,ພວກເຂົາເຈົ້າຈະຊື້ຊີ້ນໄກ່ສຸກແທນຊີ້ນໄກ່ດິບ,ຫຼີກເວັ້ນບໍ່ໃຫ້ເກີດມີຄວາມອັນຕະລາຍທີ່ຕິດເຊື້ອພະຍາດໃນເວລາຂ້າໄກ່.
ຢູ່ບັນດາແຂວງແລະຕົວເມືອງພາກໃຕ້ຫວຽດນາມທີ່ພະຍາດແຜ່ລະບາດຢ່າງຮ້າຍແຮງແດ່ນັ້ນ,ປະຊາຊົນມີສະຕິລະວັງຕົວສູງກວ່າຍາມທຳມະດາ.ຢູ່ເມືອງໂຮຈິມິນ,ເຖິງວ່າບຸນກິນເຕັດໃກ້ຊິວຽນມາເຖິງ,ແຕ່ປະຊາຊົນສ່ວນຫຼາຍບໍ່ຊື້ຊີ້ນໄກ່ແລະໄຂ່ໄກ່,ຢູ່ຕະຫຼາດ ເສລີຫຼາຍແຫ່ງເກືອບບໍ່ມີຄົນຊື້.
ເວົ້າສຳລັບຜູ້ບໍລິໂພກແລ້ວ,ເວລາຊຸມພາເຂົ້າບຸນກິນເຕັດບໍ່ມີໄກ່ ຄືຈັ່ງວ່າກິນອາຫານອື່ນໆກໍບໍ່ແຊບບໍ່ນົວ,ແຕ່ເວົ້າສຳລັບຜູ້ຜະລິດສັດປີກພັດໄດ້ປະສົບຄວາມເສຍຫາຍຍິ່ງຫຼາຍ.ຕາມສະຖິຕິຂອງຂະແໜງການທີ່ກ່ຽວຂ້ອງຂອງຫວຽດນາມ,ແຕ່ຫວຽດນາມເກີດພະຍາດໄຂ້ຫວັດສັດປີກໃນປີ 2003 ເປັນຕົ້ນມາ,ຢູ່ທົ່ວປະເທດໄດ້ມີສັດປີກ 40 ລ້ານກວ່າໂຕຕາຍຍ້ອນພະຍາດຫຼືຖືກຂ້າ,ຂະແໜງການລ້ຽງສັດປີກກໍໄດ້ເສຍຫາຍ 82 ລ້ານກວ່າໂດລາສະຫະລັດຍ້ອນ.
ຜູ້ຮັບຜິດຊອບຕະຫຼາດແຫ່ງໜຶ່ງຂອງເມືອງໂຮຈິມິນກ່າວວ່າ,ຍ້ອນວ່າປະຈຸບັນ,ປະຊາຊົນສ່ວນຫຼາຍໄປຊື້ຊີ້ນໄກ່ທີ່ຖືກຄຸນນະພາບຢູ່ຊູເບີມາເກັດ,ສະນັ້ນ ດຽວນີ້, ຕະຫຼາດຂອງເຂົາເຈົ້າກໍບໍ່ຂາຍໄກ່ອີກແລ້ວ.ພ້ອມກັນນັ້ນ,ນັກທຸລະກິດຂອງຊູເບີມາເກັດສ່ວນໜຶ່ງກໍສະແດງວ່າ,ດຽວນີ້,ຊີ້ນແລະໄຂ່ໄກ່ເປັດກໍຂາຍບໍ່ດີປານໃດ,ເມື່ອທຽບກັບເດືອນມັງກອນແລ້ວ,ດຽວນີ້ ລາຄາໄກ່ໃນຊູເບີມາເກັດໄດ້ຕ່ຳລົງ 30% .
ເພື່ອຮັບປະກັນປະຊາຊົນປາສະຈາກການຂົ່ມຂູ່ຈາກພະຍາດໄຂ້ຫວັດສັດປີກໃນໄລຍະບຸນກິນເຕັດຫວຽດນາມ,ນະຄອນໂຮຈິມິນໄດ້ວາງຂໍ້ກຳນົດທີ່ກ່ຽວຂ້ອງວ່າ,ຫ້າມລ້ຽງໄກ່ ເປັດ ນົກທາແລະສັດປີກອື່ນໆໃນເຂດເທດສະບານເມືອງ,ທວງໃຫ້ຜູ້ລ້ຽງຂົນສົ່ງສັດປີກໄປຊານເມືອງຫຼືວ່າຂ້າຕາຍໂດຍໄວເທົ່າທີ່ຈະໄວໄດ້,ພ້ອມກັນນັ້ນຍັງກຳນົດວ່າ ໃນຍາມບຸນ ຫ້າມບໍ່ໃຫ້ຈັດງານວາງສະແດງນົກຫຼືການແຂ່ງຂັນນົກຢູ່ສະຖານທີ່ບັນເທີງ,ແລະກຳນົດວ່າຕ້ອງລ້ຽງແລະຂ້າສັດປີກຢູ່ບ່ອນກຳນົດ,ເພື່ອຮັບປະກັນໃຫ້ສັດປີກຖືກຕາມມາດຖານກວດຄຸນນະພາບດ້ານສາທາລະນະສຸກ.
ຫວ່າງກ່ອນນີ້ບໍ່ດົນ ພາກສ່ວນສາທາລະນະສຸກຫວຽດນາມຊີ້ອອກວ່າ,ລະດູໜາວແມ່ນໄລຍະເກີດພະຍາດໄຂ້ຫວັດສັດປີກຫຼາຍ,ຂະນະດຽວກັນນີ້ ກ່ອນແລະຫຼັງບຸນກິນເຕັດ, ການຂົນສົ່ງແລະການຊື້ຂາຍສັດປີກກໍຈະເພີ່ມຂຶ້ນຫຼາຍ,ດັ່ງນັ້ນ ວຽກງານປ້ອງກັນແລະຄວບຄຸມພະຍາດໄຂ້ຫວັດສັດປີກກໍກ້າວເຂົ້າສູ່ໄລຍະຫົວລ້ຽວຫົວຕໍ່.ລັດຖະບານຫວຽດນາມໄດ້ອອກຄຳສັ່ງເພີ່ມທະວີການຄຸ້ມຄອງຊ່ອງທາງຊື້ຂາຍແລະຂົນສົ່ງສັດປີກ,ຕິດຕາມຄວບຄຸມສະພາບໄຂ້ຫວັດສັດປີກຢ່າງເຄັ່ງຄັດ,ຍົກສູງສະຕິປ້ອງກັນແລະຄວບຄຸມຂອງປວງຊົນທີ່ມີຕໍ່ພະຍາດໄຂ້ຫວັດສັດປີກ,ພ້ອມກັນນັ້ນຍັງຮຽກຮ້ອງຂະແໜງການຕ່າງໆເພີ່ມທະວີການກວດກາແລະແຈ້ງຂ່າວສະພາບພະຍາດໄຂ້ຫວັດສັດປີກ,ດັບເຊື້ອພະຍາດຢູ່ເຂດເກີດພະຍາດແລະສະຖານທີ່ລ້ຽງສັດເລື້ອຍໆ,ຕິດຕາມຄວບຄຸມການຂົນສົ່ງສັດປີກແລະໄຂ່ສັດປີກຢ່າງເຄັ່ງຄັດ,ຫ້າມຂາຍສັດປີກທີ່ຕິດເຊື້ອພະຍາດຢ່າງເຄັ່ງຄັດ ຂ້າສັດປີກທີ່ຕິດເຊື້ອພະຍາດຢ່າງເດັດດ່ຽວ.
ແຕ່ວ່າ,ສື່ມວນຊົນຫວຽດນາມລາຍງານວ່າ,ຢູ່ຊົນນະບົດຫວຽດນາມບາງແຫ່ງ,ຍ້ອນມະຫາຊົນຂາດສະຕິປ້ອງກັນພະຍາດໄຂ້ຫວັດສັດປີກ,ເຫດການຄົນຕາຍຍ້ອນກິນຊີ້ນສັດປີກນັ້ນ ຍັງເກີດຂຶ້ນບໍ່ແລ້ວຈັກເທື່ອ.
ໂດຍປະເຊີນສະຖານະການອັນຮ້າຍແຮງດັ່ງກ່າວນີ້,ປະຊາຊົນຈີນເຊື່ອວ່າ,ພາຍໃຕ້ການນຳພາແລະຄວາມພະຍາຍາມຂອງລັດຖະບານ ແລະຂະແໜງການທີ່ກ່ຽວຂ້ອງຫວຽດນາມ,ປະຊາຊົນຫວຽດນາມອ້າຍນ້ອງຈົ່ງສາມາດຜ່ານຜ່າຄວາມຫຍຸ້ງຍາກໂດຍໄວ,ຟື້ນຟູຊີວິດການເປັນຢູ່ອັນເປັນປົກກະຕິ.
|
|
|
