|
|
 |
| (GMT+08:00)
2005-02-07 17:37:18
|
 |
|
ພັກໄທຮັກໄທໄດ້ຮັບໄຊຊະນະໃຫຍ່ຫຼວງໃນການເລືອກຕັ້ງສະພາຜູ້ແທນລາດຊະດອນຂອງໄທ
cri
Author: da
ຕາມຂ່າວCRI:ການປ່ອນບັດເລືອກຕັ້ງສະພາຜູ້ແທນລາດຊະດອນຂອງໄທໄດ້ສີ້ນສຸດໃນຕອນບ່າຍວັນທີ 6 ກຸມພາ.ຕອນຄ່ຳມື້ດຽວກັນ,ທ່ານທັກສິນ ຊິນນະວັດ ນາຍົກລັດຖະມົນຕີໄທປະກາດວ່າ,ພັກໄທຮັກໄທທີ່ທ່ານເອງເປັນຫົວໜ້າໄດ້ຮັບທ່າແຮງດ້ວຍທົ້ນໃນການເລືອກຕັ້ງ.ທ່ານບັນຢັດ ບັນທັດຖານ ປະທານພັກປະຊາທິປັດ ເຊິ່ງເປັນພັກຝ່າຍຄ້ານທີ່ໃຫຍ່ກວ່າໝູ່ຂອງໄທໄດ້ຮັບຮອງວ່າໄດ້ເສຍໄຊໃນການເລືອກຕັ້ງສະພາຜູ້ແທນລາດຊະດອນເທື່ອນີ້.
ການເລືອກຕັ້ງສະພາຜູ້ແທນລາດຊະດອນຂອງໄທເທື່ອນີ້ລວມມີຜູ້ສະໝັກຮັບເລືອກຕັ້ງທັງໝົດ 2298 ຄົນທີ່ສັງກັດ 36 ພັກການເມືອງໄດ້ເຂົ້າຮ່ວມການແຂ່ງຂັນເອົາ 500 ທີ່ນັ່ງໃນສະພາຜູ້ແທນລາດຊະດອນ.ການແຂ່ງຂັນຕົ້ນຕໍແມ່ນດຳເນີນຢູ່ລະຫວ່າງພັກໄທຮັກໄທທີ່ຄອງອຳນາດ ພັກປະຊາທິປັດທີ່ບໍ່ຄອງອຳນາດແລະພັກມະຫາຊົນທີ່ສ້າງຕັ້ງຂຶ້ນໃໝ່.ເຖິງວ່າຜົນທາງການຂອງການເລືອກຕັ້ງຍັງບໍ່ທັນໄດ້ປະກາດ,ແຕ່ການສຳຫຼວດຂອງບັນດາຝ່າຍແລະສະຖິຕິປະຈຸບັນລ້ວນແຕ່ໄດ້ສະແດງໃຫ້ເຫັນວ່າ,ພັກໄທຮັກໄທທີ່ນຳໂດຍທ່ານທັກສິນ ຊິນນະວັດ ນາຍົກລັດຖະມົນຕີຊຸດປະຈຸບັນຈະໄດ້ 399 ທີ່ນັ່ງໃນສະພາຜູ້ແທນລາດຊະດອນ,ກາຍເຄິ່ງໜຶ່ງຂອງຈຳນວນທີ່ນັ່ງໃນສະພາຜູ້ແທນລາດຊະດອນ.ພັກໄທຮັກໄທກໍຈະກາຍເປັນພັກການເມືອງທີ່ໄດ້ສິດຄອງອຳນາດແຕ່ພັກດຽວໃນການເລືອກຕັ້ງທົ່ວໄປເທື່ອທຳອິດຂອງໄທ.ທ່ານທັກສິນກໍຈະກາຍເປັນນາຍົກລັດຖະມົນຕີໄທຜູ້ທຳອິດໃນປະຫວັດສາດທີ່ເຮັດວຽກຄົບອາຍຸຕຳແໜ່ງແລະຈະດຳລົງຕຳແໜ່ງອີກວາລະໜຶ່ງ.
ບຸກຄົນວິເຄາະເຫັນວ່າ,ແຕ່ຂຶ້ນຄອງອຳນາດໃນຕົ້ນປີ 2001 ມານີ້,ພັກໄທຮັກໄທທີ່ນຳໂດຍທ່ານທັກສິນໄດ້ປະຕິຮູບຢ່າງຕັ້ງໜ້າ,ໃຊ້ນະໂຍບາຍທີ່ບັງເກີດຜົນໃນຂົງເຂດວຽກງານພາຍໃນແລະຕໍ່ຕ່າງປະເທດ,ນີ້ແມ່ນສາຍເຫດຕົ້ນຕໍເຮັດໃຫ້ພັກນີ້ໄດ້ຮັບໄຊຊະນະ.
ໃນດ້ານວຽກງານພາຍໃນ,ລັດຖະບານທັກສິນໄດ້ດຳເນີນການປະຕິຮູບການບໍລິຫານແຫ່ງລັດແຕ່ເດືອນຕຸລາປີ 2002 ເປັນຕົ້ນມາ,ມີຈຸດປະສົງຢາກປ່ຽນແປງວິທີເກົ່າໃນການຄຸ້ມຄອງອົງການຈັດຕັ້ງແຫ່ງຊາດ,ເພີ່ມທະວີການຕິດຕາມຄວບຄຸມຂະແໜງການຕ່າງໆຂອງລັດຖະບານ,ສ້າງລັດຖະບານທີ່ປອດໄສແລະມີສະມັດຖະພາບສູງ.ໃນໄລຍະຄອງອຳນາດ, ທ່ານທັກສິນໄດ້ປັບປຸງຄະນະລັດຖະບານ 10 ເທື່ອ ,ເຮັດໃຫ້ກົງຈັກລັດຖະບານກະທັດຮັດ,ອັນໄດ້ຍົກສູງສະມັດຖະພາບການຄອງອຳນາດ.
ໃນຂະນະດຽວກັນນີ້,ລັດຖະບານທັກສິນຍັງໃຊ້ມາດຕະການຕ່າງໆນາໆ,ເຊັ່ນ:ສ້າງຕັ້ງທະນາຄານປະຊາຊົນ,ສະໜັບສະໜູນວິສາຫະກິດຂະໜາດກາງແລະຂະໜາດນ້ອຍ; ແກ່ຍາວເວລາຊຳລະໜີ້ສິນຂອງຊາວກະສິກອນອອກໄປອີກ 3 ປີ; ສ້າງກອງທຶນລ້ານບາດພັດທະນາຊົນນະບົດ;ແລະປະຕິບັດແຜນການປີ່ນປົວ 30 ບາດເປັນຕົ້ນ, ຫຼຸດພາລະແລະເພີ່ມລາຍຮັບຂອງປະຊາຊົນ,ດັ່ງນັ້ນ,ລັດຖະບານທັກສິນຈຶ່ງໄດ້ຄວາມໄວ້ວາງໃຈຈາກປະຊາຊົນ.
ໃນດ້ານເສດຖະກິດ,ລັດຖະບານທັກສິນໄດ້ໃຊ້ມາດຕະການ,ເພີ່ມທະວີການລົງທຶນຂອງລັດຖະບານ,ສົ່ງເສີມການບໍລິໂພກ,ຊັກຈູງຄວາມຮຽກຮ້ອງຕ້ອງການຢູ່ພາຍໃນ,ເພີ່ມທະວີການສົ່ງອອກ,ເຮັດໃຫ້ເສດຖະກິດໄທເຕີບໂຕຂຶ້ນຢ່າງວ່ອງໄວ,ໜີ້ສິນຕ່າງປະເທດກໍຫຼຸດໜ້ອຍລົງ,ຄັງສຳຮອງເງິນຕາຕ່າງປະເທດກໍເພີ່ມຂຶ້ນ,ຕະຫຼາດຫຸ້ນກະເດື່ອງດີຂຶ້ນ.
ໃນວຽກງານການຕ່າງປະເທດ,ລັດຖະບານທັກສິນໄດ້ປະຕິບັດນະໂຍບາຍບ້ານໃກ້ເຮືອນຄຽງທີ່ດີຕໍ່ກັນ,ໄດ້ສ້າງການພົວພັນໄວ້ເນື້ອເຊື່ອໃຈເຊິ່ງກັນແລະກັນ ແລະການຮ່ວມມືທີ່ດີງາມກັບມຽນມາ ສິງກະໂປ ລາວ ຫວຽດນາມ ກຳປູເຈຍແລະມາເລເຊຍ;ລັດຖະບານໄທປະຕິບັດນະໂຍບາຍການຕ່າງປະເທດຫຼາຍຝ່າຍ,ຫຼຸດຄວາມແຕກໂຕນກັນລະຫວ່າງບັນດາປະເທດສະມາຊິກອາຊຽນ,ໃນຂະບວນວິວັດເພີ່ມທະວີການເຊື່ອມໂຢງຂອງພາກພື້ນ,ເພີ່ມທະວີການຮ່ວມມືທາງເສດຖະກິດການເງິນຂອງອາຊີ,ຊຸກຍູ້ຂະບວນການເຈລະຈາການຄ້າເສລີສອງຝ່າຍລະຫວ່າງອາຊຽນກັບຈີນ ອິນເດຍ ຍີ່ປຸ່ນ ອາເມລິກາແລະອົສຕຼາລີເປັນຕົ້ນ,ລັດຖະບານທັກສິນໄດ້ທຳຄວາມພະຍາຍາມຢ່າງມີຜົນສັກສິດ.
ພາຍຫຼັງການເລືອກຕັ້ງສະພາຜູ້ແທນລາດຊະດອນຂອງໄທສິ້ນສຸດລົງແລ້ວ,ບັນດາຝ່າຍຂອງໄທແລະຫາງສຽງອາຊີອາຄະເນໄດ້ທຳປະຕິກິລິຍາຢ່າງກວ້າງຂວາງຕໍ່ໄຊຊະນະຂອງພັກໄທຮັກໄທ.ຊັ້ນຄົນກາງແລະລຸ່ມຄອງຄອຍທ່ານທັກສິນແລະພັກໄທຮັກໄທສືບຕໍ່ ພະຍາຍາມລົບລ້າງຄວາມທຸກຍາກ.ພັກຝ່າຍຄ້ານເວົ້າວ່າ,ຕໍ່ໄປພາຍໜ້າ ຈະຊອກຫາວິທີເພີ່ມທະວີການຕິດຕາມກວດກາລັດຖະບານ,ເພື່ອບັນລຸຄວາມກ້ຳເກິ່ງກັນຂອງສິດອຳນາດ,ປ້ອງກັນບໍ່ໃຫ້ພັກໜຶ່ງຢູ່ໃນທ່າກວມໝດແຕ່ຝ່າຍດຽວ.ຫາງສຽງອາຊີອາຄະເນເຫັນວ່າ,ພັກໄທຮັກໄທໄດ້ຮັບໄຊຊະນະມີຜົນດີຕໍ່ການຮັກສາຄວາມສືບເນື່ອງຂອງນະໂຍບາຍຂອງໄທທີ່ປະຕິບັດຢູ່ປະຈຸບັນຂອງໄທ,ແລະຮັກສາເສດຖະກິດການເມືອງແລະສັງຄົມຂອງໄທໃຫ້ມີສະຖຽນລະພາບ.
|
|
|
