|
ຕາມຂ່າວCRI: ວັນທີ 13 ກຸມພາ, ຄະນະກຳມະການເລືອກຕັ້ງອີຣັກປະກາດຜົນການເລືອກຕັ້ງທົ່ວໄປຂອງອີຣັກທີ່ຈັດຂຶ້ນໃນທ້າຍເດືອນມັງກອນປີນີ້, ວັນທີ 14 ກຸມພາ, ບາງປະເທດແລະອົງການຈັດຕັ້ງໄດ້ສະແດງຄວາມຊົມເຊີຍຕໍ່ຜົນການເລືອກຕັ້ງທົ່ວໄປຂອງອີຣັກ.
ວັນທີ 14 ກຸມພາ, ທ່ານອານນານ ເລຂາທິການໃຫຍ່ສະຫະປະຊາຊາດກ່າວວ່າ, ຜົນການເລືອກຕັ້ງທົ່ວໄປຂອງອີຣັກໄດ້ສ່ອງແສງເຖິງຄວາມປາຖະໜາແລະນ້ຳໃຈຊຸກຍູ້ຂະບວນວິວັດການເມືອງຂອງປະຊາຊົນອີຣັກ. ທ່ານຫວັງໃຫ້ປະຊາຊົນອີຣັກທຸກຖ້ວນໜ້າຖືເລື່ອງນີ້ເປັນໂອກາດ, ສາມັກຄີເປັນຈິດໜຶ່ງໃຈດຽວກັນ, ບັນລຸການປອງດອງຊາດ, ພ້ອມກັນພະຍາຍາມເພື່ອສ້າງອີຣັກໃຫ້ເປັນປະເທດໃໝ່ທີ່ມີສັນຕິພາບ ຄວາມຈະເລີນຮຸ່ງເຮືອງແລະປະຊາທິປະໄຕ.
ວັນທີ 14 ກຸມພາ, ທ່ານຢາໂຄເວັນໂຄ ໂຄສົກກະຊວງການຕ່າງປະເທດຣັດເຊຍກ່າວວ່າ, ຣັດເຊຍໂຄລົບຄວາມປາຖະໜາຂອງປະຊາຊົນອີຣັກທີ່ສະແດງອອກໃນການເລືອກຕັ້ງທົ່ວໄປ, ແລະຍິນດີຮ່ວມມືກັບລັດຖະບານຂ້າມຜ່ານໃນອະນາຄົດຢ່າງມີລັກສະນະສ້າງສັນ.
ໃນມື້ດຽວກັນ ທ່ານຄາຣາຊີ ລັດຖະມົນຕີການຕ່າງປະເທດອີຣານ ທ່ານແອກເວ ລັດຊູ ໂຄສົກກະຊວງການຕ່າງປະເທດຝຣັ່ງກໍ່ໄດ້ອອກຖະແຫຼງການຊົມເຊີຍຜົນການເລືອກຕັ້ງອີຣັກ.
|
