ຕາມ​ຂ່າວCRI: ວັນ​ທີ 14 ກຸມພາ, ຈີນ ຣັດ​ເຊຍ ສ.​ເກົາຫຼີ​ແລະ​ຍີ່ປຸ່ນ​ຕ່າງ​ໄດ້​ສະ​ແດງ​ທ່າ​ທີ, ຮຽກ​ຮ້ອງ​​ໃຫ້ຊຸກ​ຍູ້​ການ​ເຈລະຈາ 6 ຝ່າຍ​ກ່ຽວ​ກັບ​ບັນຫາ​ນິວ​ເຄຼຍ​ແຫຼມ​ເກົາ​ຫຼີ.

​ໃນ​ມື້​ດຽວ​ກັນ ທ່ານ​ລີ​ຈ້າວ​ຊິ​ງ ລັດຖະມົນຕີ​ການ​ຕ່າງປະ​ເທດ​ຈີນ​ໄດ້​ໂທລະ​ສັບ​ລົມ​ກັບ​ທ່ານ​ລາວຼົບ ລັດຖະມົນຕີການ​ຕ່າງປະ​ເທດຣັດ​ເຊຍ​ກ່ຽວ​ກັບ​ບັນຫາ​ນິວ​ເຄຼຍ​ແຫຼມ​ເກົາ​ຫຼີ. ທ່ານ​ລີ​ຈ້າວ​ຊິງ​ເວົ້າວ່າ, ຫຼັກໝັ້ນຂອງ​ຝ່າຍ​ຈີນ​ກ່ຽວ​ກັບ​ການ​ໃຫ້​ແຫຼມ​ເກົາຫຼີ​ປອດ​ນິວ​ເຄຼຍ​ແລະ​ປົກ​ປັກ​ຮັກ​ສາ​ສັນຕິພາບ​ຂອງ​ແຫຼມ​ເກົາຫຼີ​ແມ່ນ​ເດັດດ່ຽວ​ໜຽວ​ແໜ້ນ. ຝ່າຍ​ຈີນ​ຍິນ​ດີ​ພ້ອມ​ກັນ​ກັບ​ບັນ​ດາ​ຝ່າຍ​ທີ່​ກ່ຽວຂ້ອງ, ຊຸກ​ຍູ້​ການ​ເຈລະຈາ 6 ຝ່າຍ.

ທ່ານ​ລາວຼົບກ່າວ​ວ່າ, ຣັດ​ເຊຍ​ມີ​ເຈດ​ຈຳນົງ​ແກ້​ໄຂ​ບັນຫາ​ພາຍ​ໃນ​ຂອບ​ການ​ເຈລະ​ຈາ 6 ຝ່າຍ, ຍິນ​ດີ​ແລກປ່ຽນ​ແລະ​ປະສານ​ງານ​ກັບ​ຝ່າຍ​ຈີນ​.

ວັນ​ທີ 14 ກຸມພາ, ​ໃນ​ເວ​ລາ​ທ່ານ​ຈຸ​ງດົງ​ຢຸງ ປະທານປະຈຳການກອງ​ປະ​ຊຸມ​ຮັບ​ປະ​ກັນ​ຄວາມ​ປອດ​ໄພ​ແຫ່ງ​ຊາດ​ທັງ​ເປັນລັດຖະມົນຕີກະຊວງ​ໂຮມ​ເຂົ້າເປັນ​ເອກະ​ພາບ​ສ.​ເກົາ​ຫຼີ​ເຂົ້າ​ຮ່ວມ​ງານ​ຟັງ​ຄຳ​ໃຫ້ການຂອງ​ລັດຖະສະພາ​ສ.​ເກົາຫຼີນັ້ນ ທ່ານ​ກ່າວ​ວ່າ, ລັດຖະບານ​ສ.​ເກົາຫຼີ​ຍຶດ​ໝັ້ນ​ໂດຍ​ຕະ​ຫຼອດ​ໃຫ້ຜ່ານ​ການ​ສົນທະນາ​ແລະ​ຫາລື​ມາ​ແກ້​ໄຂ​ບັນຫາ​ນິວ​ເຄຼຍ​ແຫຼມ​ເກົາ​ຫຼີ​, ​ແລະ​ຈະ​ສືບ​ຕໍ່​ຂະຫຍາຍ​ການ​ພົວພັນ​ລະຫວ່າງ​ເໜືອ​ໃຕ້.

ວັນ​ທີ 14 ກຸມພາ, ທ່ານ​ໂຄ​ອີ​ຈູ​ມີ ຈູ​ນີຊີ​ໂລ ນາຍົກລັດຖະມົນຕີຍີ່ປຸ່ນ​ກ່າວ​ວ່າ, ​ໃນ​ສະ​ເພາະ​ໜ້າ​ນີ້ ລັດຖະບານ​ຍີ່ປຸ່ນ​ຈະ​ພະຍາຍາມຊັກ​ຊວນ​ໃຫ້​ສ.ປ.ປ.​ເກົາຫຼີກັບ​ຄືນ​ສູ່ການ​ເຈລະຈາ 6 ຝ່າຍ​ໂດຍ​ໄວ.