|
ທີ່ນີ້ວິທະຍຸສາກົນແຫ່ງປະເທດຈີນ, ສະບາຍດີທ່ານຜູ່ຟັງທີ່ໂຄລົບ, ຍິນດີຕ້ອນຮັບທ່ານເຂົ້າສູ່ລາຍການນິທານສຸພາສິດ.
ທ່ານຜູ່ຟັງທີ່ໂຄລົບ, ຜູ່ໃດກໍ່ມີອຸດົມການອັນດີງາມຂອງຕົນ, ເພື່ອເຮັດໃຫ້ອຸດົມການປະກົດຜົນເປັນຈິງ, ບາງຄົນໄດ້ພະຍາຍາມ ບຸກບືນສູ້ຊົນຢ່າງບໍ່ລົດລະ, ແຕ່ກໍ່ມີບາງຄົນເປັນແຕ່ເວົ້າທໍ່ນັ້ນ, ຫຼືຈົມຢູ່ໃນຄວາມໃຝ່ຝັນທີ່ບໍ່ຕິດແທດຕົວຈິງບາງຢ່າງ , ບໍ່ມີການກະທຳອັນແທ້ຈິງຈັກເທື່ອ. ເມື່ອໄດ້ເຫັນຄົນປະເພດນີ້ແລ້ວ, ຄົນທັງຫຼາຍມັກຈະຊັກຊວນເຂົາວ່າ: "ນັ່ງຊົມປາຢູ່ແຄມນ້ຳ, ແໜງວ່າກັບເມືອສານແຫຈະດີກວ່າ." ໝາຍຄວາມວ່າ ເຈົ້ານັ່ງເບິ່ງປາຢູ່ແຄມນ້ຳຫວັງຢ່າງແຮງກ້າແລະຝັນຈະໄດ້ປາ, ບໍ່ທໍ່ກັບເມືອໄປສານແຫ, ເຮັດແນວນີ້ບໍ່ຢ້ານວ່າຈະບໍ່ໄດ້ປາ. ປະໂຫຍກ "ນັ່ງຊົມປາຢູ່ແຄມນ້ຳ ແໜງວ່າກັບເມືອສານແຫຈະດີກວ່າ" ໄດ້ບັນທຶກເຂົ້າໃນ "ບົດຊີວະປະຫວັດຕົງຈົ້ງຊູ" ຂອງປື້ມ "ພົງສາວະດານລາຊະວົງຮັ້ນ", ໂດຍບັນທຶກໄວ້ວ່າ: ຕັ້ງແຕ່ລາຊະວົງຮັ້ນໄດ້ສ້າງຕັ້ງຂຶ້ນເປັນຕົ້ນມາ, ຜູ່ປົກຄອງຫວັງຢາກໃຫ້ລັດໄດ້ຮັບການປົກຄອງເປັນຢ່າງດີທີ່ສຸດ, ແຕ່ບໍ່ໄດ້ສົມຫວັງຈັກເທື່ອ, ມູນເຫດແມ່ນຍ້ອນຜູ່ປົກຄອງບໍ່ໄດ້ທຳການປະຕິຮູບແລະປັບປຸງອັນຈຳເປັນຈາກດ້ານທັດສະນະແລະດ້ານລະບອບ, ສະນັ້ນ ຕົງຈົ້ງຊູເລີຍນຳເອົາຄຳສຸພາສິດຂອງຄົນບູຮານທີ່ວ່າ "ນັ່ງຊົມປາຢູ່ແຄມນ້ຳ ແໜງວ່າກັບເມືອສານແຫຈະດີກວ່າ" ມາເຕືອນຜູ່ປົກຄອງວ່າຖ້າຢາກປົກຄອງບ້ານເມືອງໃຫ້ດີ, ກໍຕ້ອງກຳທັດສະນະແລະລະບອບທີ່ເປັນກົກຮາກນີ້ໃຫ້ດີ.
ນິທານປະຫວັດສາດ "ນັ່ງຊົມປາຢູ່ແຄມນ້ຳ ແໜງວ່າກັບເມືອສານແຫຈະດີກວ່າ" ນີ້, ກໍ່ໄດ້ເຕືອນໃຫ້ຄົນທັງຫຼາຍຮູ້ວ່າ, ຢູ່ລະຫວ່າງຈຸດປະສົງກັບພາຫະນະນັ້ນ, ການທີ່ມີຈຸດປະສົງອັນຄັກແນ່ນັ້ນແມ່ນມີຄວາມສຳຄັນແທ້, ແຕ່ຖ້າບໍ່ມີພາຫະນະອັນຈຳເປັນໃນການບັນລຸຈຸດປະສົງນີ້ແລ້ວ, ຈຸດປະສົງກໍ່ຈະກາຍເປັນຄວາມໃຝ່ຝັນທີ່ບໍ່ຕິດແທດຕົວຈິງທັງນັ້ນ. ຕົວຢ່າງຄື, ຈຸດປະສົງຂອງພວກເຮົາແມ່ນຕຶກປາ, ແຕ່ມີແຕ່ "ກັບເມືອໄປ" ສານແຫເທົ່ານັ້ນ, ຈຶ່ງມີຄວາມອາດສາມາດທີ່ຈະໄດ້ປາ. ຄຳວ່າ "ກັບເມືອໄປ" ນະທີ່ນີ້ສຳຄັນຫຼາຍ, ໝາຍຄວາມວ່າໃຕ້ເງື່ອນໄຂໃດໜຶ່ງ, ຈຳເປັນຕ້ອງໂຈະຈຸດປະສົງໄວ້ຊົ່ວຄາວ, ແລະພະຍາຍາມແກ້ໄຂບັນຫາກ່ຽວກັບຈະໃຊ້ພາຫະນະຫຍັງກ່ອນ, ເໝືອນດັ່ງພວກເຮົາຢາກຂ້າມແມ່ນ້ຳ, ກໍ່ຕ້ອງແກ້ໄຂບັນຫາກ່ຽວກັບເຮືອແລະຂົວກ່ອນ. ໃນຊີວິດປະຈຳວັນ, ເມື່ອໄດ້ເຫັນຜູ່ອື່ນລ້ຳລວຍຂຶ້ນແລ້ວ, ບາງຄົນກໍ່ຈະອິດສາ, ແນ່ນອນແລ້ວນີ້ແມ່ນເລື່ອງທຳມະດາຂອງຄົນເຮົາ, ແຕ່ພຽງແຕ່ອິດສາຍັງບໍ່ພໍ, ຄວນພະຍາຍາມກຳກັບຄວາມສາມາດສ້າງຮັ່ງຄູນມີ, ຊອກຫາຊ່ອງທາງສ້າງຮັ່ງຄູນມີ, ນີ້ຈຶ່ງແມ່ນເລື່ອງກົກຮາກກວ່າໝູ່ແລະເປັນໄປໄດ້. ນີ້ແຫລະກໍ່ແມ່ນ "ກັບເມືອໄປສານແຫ".
ນິທານປະຫວັດສາດດັ່ງກ່າວຍັງບົ່ງບອກຄົນທັງຫຼາຍວ່າ, ເຮັດຫຍັງກໍ່ຕ້ອງພະຍາຍາມສະແຫວງຫາ, ມີແຕ່ເວົ້າເປັນເທົ່ານັ້ນແມ່ນບໍ່ໄດ້, ສິ່ງສຳຄັນແມ່ນໃຊ້ການກະທຳຕົວຈິງ. ເປົ້າໝາຍທີ່ຍິ່ງໃຫຍ່ແລະແນວຄິດທີ່ຍິ່ງໃຫຍ່ທັງໝົດ, ລ້ວນແຕ່ເລີ່ມຕົ້ນຈາກເລື່ອງເລັກເລື່ອງນ້ອຍທັງນັ້ນ. ຫຼາວຈື ນັກແນວຄິດຜູ່ຍິ່ງໃຫຍ່ໃນສະໄໝຊຸນຊິວຂອງຈີນເຄີຍເວົ້າວ່າ: "ການວາງເປົ້າໝາຍອັນຍິ່ງໃຫຍ່, ຍັງຕ້ອງເລີ່ມຕົ້ນຈາກເລື່ອງເລັກເລື່ອງນ້ອຍທີ່ບໍ່ປະຈັກຕາ, ແກ້ໄຂເລື່ອງຍາກ, ແລະກໍ່ຕ້ອງເລີ່ມຈາກເລື່ອງງ່າຍ.
ທ່ານຜູ່ຟັງທີ່ໂຄລົບ, ລາຍການນິທານສຸພາສິດພາກນີ້ຂໍສ້ຽງສຸດລົງພຽງທໍ່ນີ້, ຫວັງວ່າເພື່ອນຜູ່ຟັງທັງຫຼາຍຄົງຈະໄດ້ຮັບອຸທາຫອນສອນໃຈຈາກລາຍການຂອງພວກເຮົາ, ບໍ່ເປັນຄົນທີ່ມັກແຕ່ "ນັ່ງຊົມປາຢູ່ແຄມນ້ຳ", ຫາກຄວນພະຍາຍາມຕິດແທດຕົວຈິງ. ສຸດທ້າຍ, ເນື່ອງໃນໂອກາດວັນບຸນກຸດຈີນຈະວຽນມາເຖິງນີ້, ຂ້າພະເຈົ້າອຸດົມຂໍອວຍພອນໃຫ້ເພື່ອນຜູ່ຟັງທັງຫຼາຍຈົ່ງຢູ່ເຢັນເປັນສຸກ, ສຳເລັດໜ້າທີ່ການງານທຸກຢ່າງ. ພົບກັນໃໝ່ໃນລາຍການໜ້າ, ສະບາຍດີ.
|
