|
ແຕ່ຕົ້ນປີນີ້ມາ,ຫວຽດນາມແລະປະເທດອື່ນໆໄດ້ເກີດມີພະຍາດໄຂ້ຫວັນສັດປີກແຜ່ລະບາດຢ່າງຮ້າຍແຮງອີກ.ອົງການທີ່ຊົງອິດທິພົນສາກົນກ່າວເຕືອນວ່າ,ພະຍາດໄຂ້ຫວັດສັດປີກບໍ່ອາດຈະຖືກກຳຈັດພາຍໃນເວລາສັ້ນໄດ້,ພະຍາດຊະນິດນີ້ຍັງຈະຂົ່ມຂູ່ສຸຂະພາບຂອງສັດແລະມະນຸດຢ່າງຍາວນານ,ການປ້ອງກັນແລະປົວພະຍາດໄຂຫວັດສັດປີກແມ່ນວຽກງານທີ່ຍືດເຍືອຍາວນານ.
ພໍກ້າວເຂົ້າສູ່ປີ 2005,ພຽງເດືອນກວ່າທໍ່ນັ້ນ,ຢູ່ແຂວງແລະຕົວເມືອງເກືອບເຄິ່ງໜຶ່ງຂອງຫວຽດນາມກໍໄດ້ປະກົດມີໄຂ້ຫວັດສັດປີກເກີດຂຶ້ນຕາມໆກັນ,ມີ 17 ຄົນຖືກບົ່ງມະຕິຕິດເຊື້ອໂຣກໄຂ້ຫວັດສັດປີກ,ໃນນັ້ນມີ 12 ຄົນຕາຍ,ສັດປີກທີ່ຖືກຂ້າຖິ້ມຍ້ອນຕິດເຊື້ອໂຣກໄດ້ລື່ນກາຍ 1 ລ້ານ 2 ແສນໂຕແລ້ວ.ຝ່າຍທາງການຫວຽດນາມຊີ້ອອກວ່າ,ໄຂ້ຫວັດສັດປີກແຜ່ລະບາດໃນປີນີ້ໄວກວ່າປີ 2004.ນອກນີ້,ໃນເດືອນມັງກອນປີນີ້,ໄທກໍ່ລາຍງານວ່າ,ໄດ້ມີສັດປີກຕິດເຊື້ອໂຣກໄຂ້ຫວັດສັດປີກ.
ໂດຍແນໃສ່ຫວຽດນາມແລະປະເທດອື່ນປະກົດມີພະຍາດໄຂ້ຫວັດສັດປີກຮອບໃໝ່,ວັນທີ 1 ກຸມພາ,ອົງການຟາວແລະອົງການອະນາໄມໂລກກ່ຽວກັບສັດໂຣກໄດ້ອອກຖະແຫຼງການຮ່ວມຊີ້ອອກວ່າ,ຢູ່ປະເທດແລະເຂດແຄວ້ນທີ່ເຄີຍມີໄຂ້ຫວັດສັດປີກແຜ່ລະບາດໃນປີ 2004 ນັ້ນ,"ພະຍາດຊະນິດນີ້ອາດຈະເກີດຂຶ້ນຊ້ຳແລ້ວຊ້ຳອີກພາຍໃນຫຼາຍປີຂ້າງໜ້າ."
ຄວາມເປັນຫ່ວງຂອງປະຊາຄົມໂລກໃນສະເພາະໜ້ານີ້ໄດ້ສຸມໃສ່ຢູ່ສອງຂໍ້ຄື:ໜຶ່ງ,ປີນີ້ ພະຍາດໄຂ້ຫວັດສັດປີກຈະເກີດຄືນອີກ,ຈະພາໃຫ້ເສຍຫາຍທາງເສດຖະກິດຢ່າງສາຫັດອີກເທື່ອໜຶ່ງ;ສອງ,ເຊື້ອໄວລັສໄຂ້ຫວັດສັດປີກມີການປ່ຽນແປງ,ພາໃຫ້ໄຂຫວັດໃຫຍ່ແຜ່ລະບາດຢູ່ໃນໝູ່ຄົນຢ່າງຂະໜາດໃຫຍ່.ຜູ້ຊ່ຽວຊານທັງຫຼາຍຊີ້ອອກວ່າ,ເພື່ອຫຼຸດຜ່ອນຜົນຮ້າຍຂອງໄຂ້ຫວັດສັດປີກທີ່ອາດຈະເກີດຂຶ້ນ,ບັນດາປະເທດຕ້ອງອີງຕາມບົດຮຽນສຳເລັດຜົນໃນການປ້ອງກັນຄວບຄຸມໄຂ້ຫວັດສັດປີກໃນປີ 2004,ເຮັດວຽກໃນສາມດ້ານດັ່ງລຸ່ມນີ້ໃຫ້ດີ.
ກ່ອນອື່ນ,ຕິດຕາມຄວບຄຸມບ່ອນເກີດພະຍາດນີ້ຢ່າງເຂັ້ມງວດ,ບໍ່ໃຫ້ເຊື້ອໄວລັສແຜ່ລາມ.ຜູ້ຊ່ຽວຊານອົງການຟາວເຫັນວ່າ,ທາງເສັ້ນໜຶ່ງເສັ້ນດຽວທີ່ຈະເອົາຊະນະພະຍາດໄຂ້ຫວັດສັດປີກໄດ້ ກໍແມ່ນຕ້ອງດັບເຊື້ອໄວລັສໄຂ້ຫວັດສັດປີກຢູ່ກັບບ່ອນທີ່ມັນເກີດຂຶ້ນ.ສັດປີກນ້ຳໂດຍສະເພາະແມ່ນເປັດຖືເປັນພາຫະນະທີ່ເຊື້ອໂຣກນີ້ແຜ່ລາມ,ຢູ່ບ່ອນລ້ຽງເປັດ,ຕ້ອງພະຍາຍາມບໍ່ໃຫ້ເຊື້ອໂຣກແຜ່ອອກນອກ,ຕ້ອງໃຊ້ວິທີຄຸ້ມຄອງໃຫ້ປອດໄພຢ່າງເຂັ້ມງວດໃນການລ້ຽງແລະປຸງແຕ່ງສັດປີກ.
ສອງ,ຕ້ອງຕັດໄພແຕ່ຫົວລົມ,ຕັ້ງໜ້າກຽມຕໍ່ສູ້ກັບໄຂ້ຫວັດສັດປີກຢ່າງຍາວນານ.ຫວ່າງກ່ອນນີ້,ຫົວໜ້າສູນປ້ອງກັນປີ່ນປົວໄຂ້ຫວັດສັດປີກຂອງໄທເຜີຍໃຫ້ຮູ້ວ່າ,ລັດຖະບານໄທໄດ້ເລີ່ມປະຕິບັດແຜນການສຸກເສີນເພື່ອຮັບມືກັບບັນຫາທີ່ພະຍາດໄຂ້ຫວັດສັດປີກອາດຈະແຜ່ລະບາດໃນໝູ່ຄົນແລ້ວ,ໃນນັ້ນລວມທັງກຽມຢາຕ້ານເຊື້ອໄວລັສເປັນຕົ້ນ.ນອກຈາກຫວຽດນາມແລະໄທມີພະຍາດໄຂ້ຫວັດສັດປີກແລ້ວ,ປະເທດແລະເຂດແຄວ້ນອື່ນໆກໍໄດ້ກຽມສູ້ກັບພະຍາດໄຂ້ຫວັດສັດປີກທີ່ຟື້ນຊີບຄືນມານັ້ນໃນທຸກເວລາ.ທ້າຍເດືອນມັງກອນ,ລັດຖະບານສິງກະໂປໄດ້ເລີ່ມປະຕິບັດແຜນການປ້ອງກັນຄວບຄຸມພະຍາດໄຂ້ຫວັດສັດປີກ,ລັດຖະບານຈີນກໍໄດ້ໄຂກອງປະຊຸມທາງໂທລະພາບໂທລະສັບໃນວັນທີ 28 ມັງກອນ,ຈັດວາງວຽກງານປ້ອງກັນຄວບຄຸມພະຍາດໄຂ້ຫວັດສັດປີກທີ່ມີຄວາມອັນຕະລາຍເຖິງແກ່ຊີວິດ.
ສາມ,ຕ້ອງການໃຫ້ປະຊາຄົມໂລກສືບຕໍ່ສົ່ງເສີມນ້ຳໃຈກອບກູ້ຊ່ອຍເຫຼືອເຊິ່ງກັນແລະກັນ,ສາມັກຄີຊ່ອຍເຫຼືອກັນ,ຮ່ວມໃຈຮ່ວມແຮງກັນເອົາຊະນະພະຍາດໄຂ້ຫວັດສັດປີກ.ທ່ານທອມເຊີນ ໂຄສົກອົງການອະນາໄມໂລກກ່າວເນັ້ນວ່າ,ເວົ້າໃນດ້ານການບໍລິການທາງສັດຕະວະແພດແລະວາງຍຸດທະສາດປ້ອງກັນປີ່ນປົວແລ້ວ,ຈະຂາດການຊ່ອຍເຫຼືອຂອງປຊາຄົມໂລກບໍ່ໄດ້,ຕ້ອງທຸ່ມເທຊັບພະຍາກອນປ້ອງກັນປີ່ນປົວພະຍາດໄຂ້ຫວັດສັດປີກໃຫ້ຫຼາຍຂຶ້ນ.
ມີຫຼາຍໆປະເທດເຄີຍໄດ້ຮັບຜົນງານໃຫຍ່ຫຼວງໃນການຕໍ່ສູ້ຕ້ານພະຍາດໄຂ້ຫວັດສັດປີກ,ນີ້ໄດ້ຢັ້ງຢືນຢ່າງເຕັມສ່ວນວ່າ,ພະຍາດໄຂ້ຫວັດສັດປີກແມ່ນປ້ອງກັນແລະຄວບຄຸມໄດ້.ສິ່ງທີ່ຕ້ອງເຮັດໃນປະຈຸບັນແມ່ນສ້າງຄວາມໝັ້ນໃຈອັນເດັດດ່ຽວໜຽວແໜ້ນ,ເພີ່ມທະວີສະຕິປ້ອງກັນ,ເພີ່ມຄວາມແຮງໃນການປ້ອງກັນ.ອົງການອະນາໄມໂລກແລະອົງການຟາວໄດ້ກຽມຈັດກອງປະຊຸມສາກົນກ່ຽວກັບການປ້ອງກັນປີ່ນປົວພະຍາດໄຂ້ຫວັດສັດປີກຢູ່ປາຣີໃນເດືອນເມສາປີ 2005,ອົງການອາເປັກກໍ່ກຽມຈັດກອງປະຊຸມສຳມະນາກ່ຽວກັບພະຍາດໄຂ້ຫວັດສັດປີກຢູ່ຊານຟຼານຊິສໂກແຫ່ງອາເມລິກາໃນເດືອນກໍລະກົດ,ຄົ້ນຄວ້າຫາລືກົນໄກຮັບມືອັນເໝາະສົມ,ເພື່ອແກ້ບັນຫາພະຍາດຂ້າມພາກພື້ນເຊັ່ນພະຍາດໄຂ້ຫວັດສັດປີກເປັນຕົ້ນ.ເຊື່ອວ່າ,ເມື່ອມວນມະນຸດຮ່ວມກັນພະຍາຍາມແລ້ວ,ຍ່ອມຈະໄດ້ຮັບໄຊຊະນະແນ່ນອນ.
|
