|
ສະບາຍດີ, ທ່ານຜູ່ຟັງທີ່ໂຄລົບ, ຊົມເຊີຍທ່ານເຂົ້າສູ່ລາຍການນັດພົບກັນໃນວັນອາທິດ. ວັນທີ 9 ກຸມພາແມ່ນວັນບຸນກຸດຈີນ ເຊິ່ງເປັນມື້ບຸນຄຶກຄື້ນທີ່ສຸດຂອງຊາວຈີນໃນປີໜຶ່ງ. ໃນລາຍການມື້ນີ້, ຂ້າພະເຈົ້າສົມບູນໄດ້ຈັດເອົາເພງສິລິມຸງຄຸນແລະມ່ວນຊື່ນປະມວນໜຶ່ງມາສູ່ຟັງ, ຫວັງຈະໄດ້ມ່ວນຊື່ນກັບທ່ານໃນລາຍການມື້ນນີ້.
ທີ່ທ່ານພວມຟັງຢູ່ນີ້ແມ່ນເພງວ້ານຊື້ຢູອີ້ ແປວ່າ ສົນຫວັງທຸກປະການ ຂັບຮ້ອງໂດຍນາງຈ່າງເຢ. ເພງນີ້ອ່ອນຫວານແລະອົບອຸ່ນ, ສົ່ງພອນໃຫ້ຍາດພີ່ນ້ອງໃນວັນບຸນເນື້ອເພງມີຄວາມໝາຍໃນ 365 ຄືນ: ຫວານຊື່ນແລະສວຍງາມກວ່າໝູ່ກໍ່ແມ່ນຄືນວັນສິ້ນປີ. ກິ່ນຫອມໃນສາຍລົມ, ນ້ຳເຜິ້ງໃນຫິມະ, ຄະຕິຄູ່ຂຽນແຕ່ຄຳສິລິມຸງຄຸນ, ໃນຈອກເຫຼົ້າກໍ່ເຕັມໄປດ້ວຍຄວາມຮັ່ງມີ. ໂຄມໄຟແດງແສງເຍືອງຮຸ່ງຄອບຄົວມີຄວາມສຸກ, ທຽນສິແດງໄດ້ສົ່ງຂ່າວດີມາ, ລູກຫຼານປະຊາຊາດຈີນເພີດເພີນຢູ່ໃນຄວາມຮັກແພງຂອງຍາດຕິພີ່ນ້ອງໃນບ້ານເກີດ, ອວຍພອນເຈົ້າຈົ່ງສົມດັ່ງປາຖະໜາທຸກປະການ.
ທີ່ທ່ານຟັງມານັ້ນແມ່ນເພງ"ສົມດັ່ງປາຖະໜາທຸກປະການ"ທີ່ຂັບຮ້ອງໂດຍນາງຈ່າງເຢ. ຊາວຈີນສະຫຼອງບຸນກຸດຈີນກໍ່ເໝືອນດັ່ງຊາວຝ່າຍຕາເວັນຕົກສະຫຼອງບຸນໂນແອນ, ທຸກຄົນຕ້ອງເມືອບ້ານ, ເຕົ້າໂຮມມ່ວນຊື່ນນຳກັນກັບຄອບຄົວ. ເພງຮວນຈູ້ອີ້ຖາງ ຄື, ເຕົ້າໂຮມກັນ ທີ່ທ່ານຈະໄດ້ຟັງຕໍ່ໄປໄດ້ວາດພາບຄວາມມ່ວນຊື່ນແລະອົບອຸ່ນໃນວັນບຸນ. ເນື້ອເພງນີ້ແມ່ນ: ເອົາຄວາມມ່ວນຊື່ນມາໂຮມກັນ, ເອົາຄວາມສິລິມຸງຄຸນມາໂຮມກັນ, ປີໃໝ່ເດືອນເພັງມາລາງາມ. ພວກເຮົາຈົ່ງຍົກຈາກ, ດື່ມໃຫ້ຊື່ນອຸລາ, ຂໍໃຫ້ມິດຕະພາບຈົ່ງຍຶນຍົງຊົ່ວນິລັນ.
ບຸນກຸດຈີນເປັນການເລີ່ມຕົ້ນປີໃໝ່ໃນຈັນທະຄະຕິຂອງຈີນ, ພ້ອມນັ້ນກໍ່ໝາຍຄວາມວ່າ, ລະດູບານໃໝ່ໄດ້ວຽນມາເຖິງແລ້ວ. ໃນຍາມບຸນກຸດຈີນ, ເມື່ອຄົນທັງຫຼາຍພົບໜ້າກັນກໍ່ຈະຖາມສະບາຍດີປີໃໝ່, ແລະເວົ້າຄຳສິລິມຸງຄຸນຕໍ່ກັນ, ຫວັງໃຫ້ທຸກສິ່ງທຸກຢ່າງເດີນແມ່ນແລ່ນສະດວກ, ປະສົບແຕ່ເລື່ອງດີເລື່ອງງາມໃນປີໃໝ່.
1 2
|
