|
ທີ່ນີ້ວິທະຍຸສາກົນແຫ່ງປະເທດຈີນ, ສະບາຍດີທ່ານຜູ່ຟັງທີ່ໂຄລົບ, ຍິນດີຕ້ອນຮັບທ່ານເຂົ້າສູ່ລາຍການໂລກກິລາ.
ທ່ານຜູ່ຟັງທີ່ໂຄລົບ, ເວົ້າສຳລັບເທັນນິສ ເຊິ່ງເປັນລາຍການກິລາອ່ອນແອຂອງຈີນ, ໃນປີ 2004 ທີ່ຫາກໍ່ຜ່ານພົ້ນໄປໄດ້ຮັບຜົນຫຼາຍ. ໃນປີ 2004, ລາຍການຕີຄູ່ເພດຍິງຈີນໄດ້ເຂົ້າສູ່ຮອບ 8 ທີມສຸດທ້າຍຄັ້ງປະຫວັດສາດໃນງານແຂ່ງຂັນເທັນນິສໂອເພນອົສຕຼາລີເຊິ່ງເປັນໜຶ່ງໃນງານແຂ່ງຂັນເທັນນິສກຼັງເຊແລມສີ່ປະເພດໃນໂລກ, ເຮັດໃຫ້ຄົນຈີນຮູ້ສຶກຕື່ນເຕັ້ນ; ສ່ວນໃນງານກິລາໂອລິມປິກອາແຕນ, ຄວາມຕື່ນເຕັ້ນດັ່ງກ່າວໄດ້ເຖິງລະດັບສຸດຍອດຍ້ອນນາງລີຖິງກັບນາງຊຸນຖຽນຖຽນຊິງໄດ້ແຊມປຽນການຕີຄູ່ເພດຍິງ. ທ້າຍປີ 2004, ນາງລີນ້າຊິງໄດ້ແຊມປຽນໃນງານແຂ່ງຂັນເທັນນິສໂອເພນກວາງໂຈ່ວ, ນີ້ແມ່ນແຊມປຽນຄັ້ງທຳອິດຂອງນັກກິລາຈີນໃນງານຕະເວນແຂ່ງຂັນ WTA. ປີ 2004 ເທັນນິສຈີນໄດ້ຜົນງານດີເດັ່ນ, ແຕ່ໃນປີ 2005 ນີ້, ເທັນນິສຈີນຈະຂະຫຍາຍຕົວໄປແນວໃດ? ໃນລາຍການໂລກກິລາພາກນີ້, ເຊີນຟັງບົດແຈ້ງຂ່າວປະກອບສຽງທີ່ພາດຫົວເລື່ອງວ່າ: ເທັນນິສຈີນໄດ້ເຂົ້າສູ່ໄລຍະຂະຫຍາຍຕົວຢ່າງວ່ອງໄວ.
ການບຸກທະລຸຂອງເທັນນິສຈີນໃນປີ 2004 ແມ່ນເລີ່ມຈາກງານແຂ່ງຂັນເທັນນິສໂອເພນອົສຕຼາລີທີ່ຈັດຂຶ້ນໃນຕົ້ນປີກາຍນີ້. ພາຍຫຼັງງານແຂ່ງຂັນເທັນນິສໂອເພນອົສຕຼາລີໄດ້ເລີ່ມຈັດຂຶ້ນເມື່ອວັນທີ 17 ມັງກອນປີ 2005 ອີກແລ້ວ, ການສະແດງຂອງນັກກິລາຈີນຍິ່ງເຮັດໃຫ້ຄົນຕື່ນເຕັ້ນກວ່າເກົ່າ. ເຖິງວ່າຜົນງານຂອງນັກກິລາຈີນໃນງານແຂ່ງຂັນເທັນນິສໂອເພນອົສຕຼາລີຄັ້ງນີ້ບໍ່ທໍ່ຄັ້ງກ່ອນໃນປີກາຍກໍ່ຕາມ, ແຕ່ລະດັບກວມລວມໄດ້ຍົກສູງຂຶ້ນຢ່າງໃຫຍ່. ໂດຍສະເພາະແມ່ນຄວາມກ້າວໜ້າຂອງລາຍການຕີດ່ຽວ.
ໃນກິລາເທັນນິສອາຊີບ, ຄົນທັງຫຼາຍຍິ່ງເອົາໃຈໃສ່ນຳຜົນງານຕີດ່ຽວ, ເພາະວ່າເຕັກນິກຕີຄູ່ເທັນນິສຕ້ອງຖືການຕີດ່ຽວເປັນພື້ນຖານ, ສ່ວນການລຽງລຳດັບຂອງນັກກິລາຕີຄູ່ໃນ ATP ແລະ WTA ກໍ່ຖືການຕີດ່ຽວເປັນພື້ນຖານ. ໃນການແຂ່ງຂັນຂອງປີກາຍແລະໃນງານກິລາໂອລິມປິກອາແຕນ, ນັກກິລາຈີນໄດ້ເລືອກເອົາການຕີຄູ່ທີ່ປະເທດອື່ນບໍ່ເອົາໃຈໃສ່ນັ້ນເປັນຂອດບຸກທະລຸ, ເຖິງວ່າໄດ້ຜົນງານດີກໍ່ຕາມ, ແຕ່ກໍ່ບໍ່ໄດ້ສະແດງເຖິງກຳລັງອັນແທ້ຈິງຂອງເທັນນິສຈີນຢ່າງສົມບູນ, ສ່ວນຜົນງານຂອງການຕີດ່ຽວຈະສຳຄັນກວ່າການຕີຄູ່. ທ່ານຈຽງຫົງເວີຍ ຄູຝຶກໃຫຍ່ຂອງທີມເທັນນິສແຫ່ງຊາດຈີນເຂົ້າໃຈຄວາມແຕກຕ່າງກັນລະຫວ່າງສອງອັນດັ່ງກ່າວເປັນຢ່າງດີ, ທ່ານເວົ້າວ່າ: ພາຍຫຼັງການຕີຄູ່ເພດຍິງຊິງໄດ້ແຊມປຽນໃນງານກິລາໂອລິມປິກອາແຕນແລ້ວ, ເທັນນິສຂອງຈີນຮູ້ສຶກວ່າຖືກກຳລັງໜີບຫຼາຍກວ່າເກົ່າ, ຄົນທັງຫຼາຍເຫັນວ່າລະດັບເທັນນິສຕີຄູ່ເພດຍິງໄດ້ສູງສົມຄວນແລ້ວ, ນີ້ເຂົ້າໃຈຜິດແລ້ວ, ເທັນນິສຈີນພຽງມໍ່ລະດັບກ້າວໜ້າຂອງໂລກທໍ່ນັ້ນ, ມີໂອກາດແຂ່ງຂັນກັບນັກກິລາເກັ່ງຫຼາຍກວ່າເກົ່າ, ແຕ່ຍັງຫຼ້າຫຼັງຢູ່. ລະດັບການຕີຄູ່ຢູ່ແຖວໜ້າ, ບໍ່ໝາຍຄວາມວ່າເທັນນິສຈີນໄດ້ຮັບການບຸກທະລຸຢ່າງໃຫຍ່ແລ້ວ. ເວົ້າຈາກດ້ານວິຊາສະເພາະແລ້ວ, ຕ້ອງຍົກສູງລະດັບຂອງການຕີດ່ຽວ, ຖ້າຜົນງານການຕີດ່ຽວບໍ່ດີ, ການລຽງລຳດັບຈະຢູ່ຫຼັງ, ຈະບໍ່ມີຄຸນວຸດທິເຂົ້າຮ່ວມການຕີຄູ່.
ປະຈຸບັນ ການກະທຳຂອງນັກກິລາຈີນພວມພິສູດໃຫ້ເຫັນທັດສະນະຂອງທ່ານຈຽງຫົງເວີຍ. ໃນງານແຂ່ງຂັນເທັນນິສໂອເພນອົສຕຼາລີປີນີ້, ຈີນມີນັກກິລາ 5 ຄົນເຂົ້າຮ່ວມການຕີດ່ຽວເພດຍິງ, ເຊິ່ງຫຼາຍກວ່າທຸກຄັ້ງທີ່ຜ່ານມາ, ເຖິງວ່າມີແຕ່ນາງລີນ້າກັບນາງເຜິງຊວ້າຍໄດ້ຜ່ານເຂົ້າຮອບທີສອງທໍ່ນັ້ນ, ແຕ່ເມື່ອທຽບກັບປີກາຍທີ່ມີແຕ່ນາງເຈິ້ງແຈຜູ່ດຽວເຂົ້າຮ່ວມການແຂ່ງຂັນເປັນທາງການ ແລະຍັງຕົກຮອບໃນຮອບທຳອິດແລ້ວ, ຜົນງານປີນີ້ນັບວ່າມີຄວາມກ້າວໜ້າແບບກ້າວກະໂດດ. ກ່ອນງານແຂ່ງຂັນເທັນນິສໂອເພນອົສຕຼາລີ, ນັກກິລາເພດຍິງຈີນຍັງໄດ້ສ້າງຜົນງານດີເດັ່ນລຽນຕິດ. ໃນງານແຂ່ງຂັນເທັນນິສສາກົນທີ່ຊິດນີ ເຊິ່ງເປັນງານແຂ່ງຂັນອຸ່ນຄີງກ່ອນໄຂງານແຂ່ງຂັນໂອເພນອົສຕຼາລີ, ນາງເຜິງຊວ້າຍທີ່ອາຍຸ 19 ປີໄດ້ເອົາຊະນະນາງອານາສ໌ຕາເຊຍ ມິສກີນາ ນັກກິລາຣັດເຊຍ ແຊມປຽນຂອງງານແຂ່ງຂັນເທັນນິສໂອເພນຝຣັ່ງເມື່ອປີກາຍ, ເປັນນັກກິລາຈີນຜູ່ທຳອິດທີ່ເອົາຊະນະແຊມປຽນຕີດ່ຽວຂອງກຼັງເຊແລມ, ພາຍຫຼັງມາ ນາງໄດ້ເອົາຊະນະນາງນາເດຍ ເປໂຕຼວາ ນັກກິລາຣັດເຊຍທີ່ດີເລີດອີກຜູ່ໜຶ່ງ, ເຮັດໃຫ້ນາງຕົກຮອບ. ເຖິງວ່າໃນທີ່ສຸດນາງບໍ່ໄດ້ເຂົ້າຮອບຊິງຊະນະເລີດກໍ່ຕາມ, ແຕ່ກໍ່ເຮັດໃຫ້ທົ່ວໂລກຕື່ນຕົກໃຈແລ້ວ. ພ້ອມກັນນັ້ນ, ໃນງານແຂ່ງຂັນເທັນນິສໂຮບາດ, ນາງເຈິ້ງແຈຊິງໄດ້ແຊມປຽນ WTA ຄັ້ງທຳອິດ, ນີ້ໄດ້ເຮັດໃຫ້ຄົນທັງຫຼາຍຕື່ນເຕັ້ນອີກ. ເຖິງວ່າໃນງານແຂ່ງຂັນເທັນນິສໂອເພນອົສຕຼາລີທີ່ມີນັກກິລາລະດັບສູງຫຼາຍໆຄົນເຂົ້າຮ່ວມນັ້ນກໍ່ຕາມ, ແຕ່ນັກກິລາຈີນກໍ່ໄດ້ສະແດງໃຫ້ເຫັນລະດັບຂອງຕົນ, ປະກົດການໃນເມື່ອກ່ອນທີ່ທະແນມແຕ່ແຂ່ງຂັນກັບນັກກິລາລະດັບສູງກໍ່ເສຍໄຊຢ່າງເຈັບແສບນັ້ນ ດຽວນີ້ບໍ່ມີອີກແລ້ວ. ມີຜູ່ຊ່ຽວຊານຊີ້ອອກວ່າ, ປະຈຸບັນ ໃນດ້ານຄວາມໄວ ນັກກິລາເພດຍິງຈີນສາມາດສູ້ກັບລະດັບສູງສຸດຂອງໂລກແລ້ວ.
ເທັນນິສຈີນມີຄວາມກ້າວໜ້າຢ່າງວ່ອງໄວ, ແມ່ນຍ້ອນໄດ້ກ້າວໄປຕາມເສັ້ນທາງຫັນເປັນອາຊີບຢ່າງສຳເລັດຜົນ, ນີ້ກໍ່ແມ່ນເສັ້ນທາງທີ່ຕ້ອງເດີນຕາມໃນການຂະຫຍາຍເທັນນິສ. ເມື່ອໄດ້ຮັບການທົດສອບໃນງານແຂ່ງຂັນອາຊີບຫຼາຍໆຄັ້ງແລ້ວ, ພຽງແຕ່ປີດຽວທໍ່ນັ້ນ ນັກກິລາຈີນກໍ່ໄດ້ຍົກລະດັບໃຫ້ສູງຂຶ້ນຢ່າງໃຫຍ່ຫຼວງ. ທັງນີ້ໄດ້ເຮັດໃຫ້ທ່ານຈຽງຫົງເວີຍ ຄູຝຶກໃຫຍ່ຂອງທີມເທັນນິສແຫ່ງຊາດຈີນຮູ້ສຶກປະເອີບໃຈ, ໂດຍສະເພາະແມ່ນຮູ້ສຶກດີໃຈຫຼາຍທີ່ໄດ້ເຫັນລະດັບລວມຂອງນັກກິລາຈີນໄດ້ສູງຂຶ້ນ, ທ່ານເວົ້າວ່າ: ແຕ່ກ່ອນພວກຂ້າພະເຈົ້າມີແຕ່ 1-2 ຄົນເກັ່ງທໍ່ນັ້ນ, ສິ່ງທີ່ໜ້າພາກພູມໃຈແມ່ນໃນປະຈຸບັນ ພວກຂ້າພະເຈົ້າມີກຸ່ມໜຶ່ງ. ສ່ວນຣັດເຊຍ, ຜູ່ເກັ່ງຈາກທີ 1 ຫາທີ 10 ຂອງໂລກມີ 4-5 ຄົນ, ກໍ່ເປັນປະເທດແຂງແຮງດ້ານເທັນນິສ. ສ່ວນຈີນພວກຂ້າພະເຈົ້າ ມີແຕ່ທີ 1 ຫາທີ 100 ແລະນັກກິລາທີ່ເຂົ້າຮ່ວມງານແຂ່ງຂັນເທັນນິສກຼັງເຊແລມສີ່ປະເພດໃນໂລກມີ 4-5 ຄົນ, ອັດຕາສ່ວນທີ່ໄດ້ຮັບຜົນງານດີກໍ່ຈະສູງຂຶ້ນເປັນກ້າວໆ.
ການຕີດ່ຽວຂອງນັກກິລາຈີນໄດ້ຮັບຜົນງານດີຢ່າງວ່ອງໄວ, ໄດ້ເຮັດໃຫ້ວົງການເທັນນິສສາກົນເອົາໃຈໃສ່ນຳ. ນາງລິນເຊ ດາເວັນພອດ ນັກກິລາທີ່ມີຊື່ສຽງຂອງອາເມລິກາທີ່ລຽງລະດັບເປັນທີໜຶ່ງໃນ WTA ໄດ້ໃຫ້ສຳພາດຕໍ່ນັກຂ່າວວ່າ: ຄົນຈີນມາແລ້ວ! ນາງວີນັສ ວິນລຽມສ໌ ນັກກິລາທີ່ຊື່ດັງຂອງອາເມລິກາອີກຜູ່ໜຶ່ງໄດ້ເອົາຊະນະນາງເຜິງຊວ້າຍໃນຮອບທີສອງ, ນາງກໍ່ຍ້ອງຍໍວ່ານາງເຜິງຊວ້າຍແມ່ນນັກກິລາທີ່ດີເລີດທີ່ສຸດ. ຈົນວ່າມີສື່ມວນຊົນຂອງອົສຕຼາລີຈົນຄາດຄະເນວ່າ, ຄົນຈີນຈະຊິງໄດ້ແຊມປຽນກຼັງເຊແລມເພດຍິງພາຍໃນ 4 ປີຂ້າງໜ້າ.
ໂດຍຢູ່ຕໍ່ໜ້າການຍ້ອງຍໍເຫຼົ່ານີ້, ຄູຝຶກແລະນັກກິລາເທັນນິສຈີນຮູ້ສຶກດີໃຈແຕ່ກໍ່ເຮັດໃຈເຢັນ. ນາງເຜິງຊວ້າຍແມ່ນຄົນຈີນຜູ່ທຳອິດທີ່ເອົາຊະນະແຊມປຽນກຼັງເຊແລມ, ໃນເວລາເວົ້າເຖິງຄວາມຫຼຸດລື່ນກັນລະຫວ່າງຕົນເອງກັບນາງມິສກີນາແລະນາງວີນັສ ວິນລຽມສ໌, ນາງເຜິງຊວ້າຍກ່າວວ່າ, ນີ້ບໍ່ແມ່ນຄວາມເວົ້າຄວາມໜຶ່ງກໍ່ຈະເວົ້າໃຫ້ຈະແຈ້ງໄດ້ດອກ, ຫາກແມ່ນຕ້ອງໄລ່ໃຫ້ທັນກັບນັກກິລາລະດັບສູງດ້ານເຕັກນິກ ກຳລັງກາຍແລະບົດຮຽນ. ເມື່ອທຽບກັບຄວາມກ້າວໜ້າຂອງເທັນນິສເພດຍິງແລ້ວ, ນັກກິລາເພດຊາຍຈີນຍັງມີຄວາມຈຳກັດຫຼາຍ.
ຈັ່ງໃດກໍ່ຕາມ, ເທັນນິສຈີນໄດ້ກ້າວຂຶ້ນສູ່ເສັ້ນທາງຂະຫຍາຍຕົວຢ່າງວ່ອງໄວແລ້ວ. ວົງການເທັນນິສຈີນມີຄວາມໝັ້ນໃຈຕໍ່ອະນາຄົດ. ການແຂ່ງຂັນກັບນາງວີນັສ ວິນລຽມສ໌ໃນງານແຂ່ງຂັນເທັນນິສໂອເພນອົສຕຼາລີປີນີ້, ແມ່ນນາງເຜິງຊວ້າຍລົງສະໜາມກາງເປັນຄັ້ງທຳອິດ ເຊິ່ງຈັດການແຂ່ງຂັນຊິງຊະນະເລີດສະເພາະແລະບັນຈຸຜູ່ຊົມໄດ້ຫຼາຍໝື່ນຄົນ. ເຖິງວ່າໄດ້ເສຍໄຊໃນການແຂ່ງຂັນກໍ່ຕາມ, ແຕ່ນາງເຜິງຊວ້າຍເວົ້າວ່າ: ນີ້ແມ່ນຂ້າພະເຈົ້າແຂ່ງຂັນຢູ່ສະໜາມກາງເປັນເທື່ອທຳອິດ. ຂ້າພະເຈົ້າເຊື່ອວ່າ, ນີ້ບໍ່ແມ່ນເທື່ອສຸດທ້າຍຢ່າງເດັດຂາດ.
ທ່ານຜູ່ຟັງທີ່ໂຄລົບ, ລາຍການໂລກກິລາພາກນີ້ຂໍສ້ຽງສຸດລົງພຽງທໍ່ນີ້, ຂອບໃຈທ່ານທີ່ຮັບຟັງ, ພົບກັນໃໝ່ໃນອາທິດໜ້າ, ສະບາຍດີ.
|
