|
|
 |
| (GMT+08:00)
2005-02-21 15:48:39
|
 |
|
ຈີນນຳໃຊ້ເຕັກນິກທັນສະໄໝພັດທະນາອຸດສາຫະກຳຢາຈີນ
cri
Author: li
ຕາມຂ່າວ CRI: ຈີນນັບມື້ນັບເອົາໃຈໃສ່ນຳການນຳໃຊ້ເຕັກນິກທັນສະໄໝມາພັດທະນາອຸດສາຫະກຳຢາຈີນ,ໃນຫຼາຍປີມານີ້ ຂົງເຂດດັ່ງກ່າວໄດ້ມີການຄືບໜ້າທີ່ໜ້າຊົມຊື່ນ,ລະບົບຄົ້ນຄວ້າພັດທະນາຢາຈີນກໍສົມບູນຂຶ້ນເລື້ອຍໆ,ຫົວຄິດປະດິດສ້າງຢາຈີນກໍແຂງແຮງຂຶ້ນຢ່າງເດັ່ນຊັດ,ໄດ້ຜະລິດຢາຈີນງວດໜຶ່ງທີ່ມີສິດຊັບສິນທາງປັນຍາແລະມີເຕັກນິກສູງຂອງຕົນເອງ.
ແພດສາດຈີນແລະຢາຈີນໄດ້ມີປະຫວັດມາ 5 ພັນກວ່າປີແລ້ວ,ມັນມີຜົນປິ່ນປົວດີຫຼາຍຕໍ່ພະຍາດຊຳເຮື້ອ,ພະຍາດປົວຍາກ,ພະຍາດໄວຊະລາແລະພະຍາດດ້ານສັບພະຄຸນຈຳນວນໜຶ່ງ,ແລະໄດ້ເສີມຂະຫຍາຍບົດບາດສຳຄັນໃນດ້ານປ້ອງກັນແລະປົວພະຍາດຕິດແປດແຮງ.
ແຕ່ວ່າ,ຍ້ອນຢາຈີນດັ້ງເດີມຂາດການຄົ້ນຄວ້າທາງດ້ານຫຼັກໝູນຂອງພະຍາດແລະຢຸກຢາທີ່ຖືແພດສາດຍຸກປັດຈຸບັນເປັນພື້ນຖານ,ເຕັກນິກກວດກາແລະຄວບຄຸມຄຸນນະພາບຂອງຢາຈີນກໍຂ້ອນຂ້າງຫຼ້າຫຼັງ,ອັນເປັນຈຳກັດຢາຈີນບໍ່ສາມາດເສີມຂະຫຍາຍທ່າແຮງແລະຈຸດພິເສດຂອງຕົນຢ່າງເຕັມສ່ວນ.
ເພື່ອແກ້ໄຂບັນຫາເຫຼົ່ານີ້,ເລີ່ມແຕ່ປີ 2002 ລັດຖະບານແລະພາກສ່ວນທີ່ກ່ຽວຂ້ອງຂອງຈີນຈຶ່ງຍິ່ງເອົາໃຈໃສ່ການນຳໃຊ້ເຕັກນິກຍຸກປັດຈຸບັນມາພັດທະນາອຸດສາຫະກຳຢາຈີນ.ທ່ານນາງອິຈິງ ຫົວໜ້າກົມຄຸ້ມຄອງແພດສາດແລະຢາຈີນແຫ່ງຊາດຈີນແນະນຳວ່າ:
"ພວກເຮົາໄດ້ຈັດຕັ້ງຜູ້ຊ່ຽວຊານຮ້ອຍກວ່າຄົນດຳເນີນການຄົ້ນຄວ້າຍຸດທະສາດພັດທະນາຢາຈີນໃຫ້ທັນສະໄໝ,ໄດ້ຕັ້ງຫົວຂໍ້ໃນດ້ານຕ່າງໆເຊັ່ນທິດສະດີແພດສາດຈີນ,ການກໍ່ສ້າງໃຫ້ເປັນມາດຖານ,ການຊຸກຍູ້ຢາຈີນໃຫ້ເດີນໄປສູ່ໂລກພ້ອມດ້ວຍເຕັກນິກຂໍ້ກະແຈໃນການຫັນແພດສາດຈີນໃຫ້ທັນສະໄໝ,ການອົບຮົມຜູ້ມີຄວາມຮູ້ຄວາມສາມາດແລະປົກປັກຮັກສາສິດຊັບສິນທາງປັນຍາເປັນຕົ້ນ,ຊອກຫາເນື້ອໃນ,ເບົ້າແບບແລະຊ່ອງທາງໃນການຫັນແພດສາດຈີນໃຫ້ທັນສະໄໝ."
ຕາມແນະນຳວ່າ,ໃນປີ 2004 ນັບສະເພາະແຕ່ກົມຄຸ້ມຄອງແພດສາດແລະຢາຈີນແຫ່ງຊາດທໍ່ນັ້ນກໍໄດ້ເພີ່ມທຶນຄົ້ນຄວ້າຮ້ອຍກວ່າລ້ານຢວນ,ຈັດຕັ້ງການຄົ້ນຄວ້າໝູນອ້ອມທິດສະດີພື້ນຖານດ້ານແພດສາດແລະຢາຈີນ,ຕີລາຄາຜົນປິ່ນປົວພະຍາດໜັກຂອງຢາຈີນພ້ອມທັງຄວາມປອດໄພແລະການຄວບຄຸມຄຸນນະພາບຂອງຢາຈີນເປັນຈຸດໜັກ.
ໃນຂະນະດຽວກັນນີ້,ໂດຍໝູນອ້ອມຫົວຂໍ້ທີ່ຫັນຢາຈີນໃຫ້ທັນສະໄໝ,ພາກສ່ວນທີ່ກ່ຽວຂ້ອງຂອງລັດຖະບານຈີນແລະແຫ່ງຕ່າງໆລ້ວນແຕ່ໄດ້ໃຊ້ການກະທຳຕົວຈິງ. ຕົວຢ່າງຄື,ພະແນກຕິດຕາມຄຸ້ມຄອງຢາໄດ້ດຳເນີນວຽກງານກ່ຽວກັບມາດຖານເຕັກນິກຂອງຢາຈີນ,ການຄຸ້ມຄອງຄຸນນະພາບຫວ້ານຢາຈີນແລະການຮັບຮອງວິສາຫະກິດຢາຈີນເປັນຕົ້ນ; ພະແນກສາທາລະນະສຸກໄດ້ລົງມືສ້າງສູນຄົ້ນຄວ້າຢາຈີນໃຫ້ທັນສະໄໝລະດັບຊາດ;ພະແນກກະສິກຳກໍຕັ້ງໜ້າພັດທະນາຫວ້ານຢາຈີນທີ່ບໍ່ມີມົນລະພິດ.
ທ່ານຫຼິເຊຍຢົງ ຮອງລັດຖະມົນຕີກະຊວງວິທະຍາສາດເຕັກໂນໂລຢີຈີນຊີ້ອອກວ່າ,ການທີ່ຈີນນຳໃຊ້ເຕັກນິກທັນສະໄໝພັດທະນາອຸດສາຫະກຳຢາຈີນນັ້ນໄດ້ມີການຄືບໜ້າຢ່າງຕັ້ງໜ້າມາແລ້ວ. ທ່ານເວົ້າວ່າ:
"ລະບົບຄົ້ນຄວ້າພັດທະນາຢາຈີນໄດ້ສົມບູນຂຶ້ນເລື້ອຍໆ,ມີຄວາມສາມາດປະດິດສ້າງຢາຈີນຊະນິດໃໝ່ໄດ້ແຂງແຮງຂຶ້ນຢ່າງເດັ່ນຊັດ,ໄດ້ບຸກເບີກຜະລິດຕະພັນຢາຈີນທີ່ມີສິດຊັບສິນທາງປັນຍາແລະມີເຕັກນິກສູງງວດໜຶ່ງແລ້ວ; ໄດ້ເຜີຍແຜ່ແລະນຳໃຊ້ເຕັກນິກປູກຫວ້ານຢາຈີນທີ່ເປັນແບບສະບັບງວດໜຶ່ງ,ເຕັກນິກແລະລະດັບເຄື່ອງປະກອບຂອງການຜະລິດຢາຈີນໄດ້ຍົກສູງຂຶ້ນຫຼາຍສົມຄວນ,ລະດັບການຜະລິດຢາຈີນຕາມມາດຖານແລະເປັນແບບສະບັບກໍສູງຂຶ້ນເລື້ອຍໆ."
ຕາມສະຖິຕິ,ໃນສອງປີມານີ້ ແຫ່ງຕ່າງໆຂອງຈີນໄດ້ສ້າງຕັ້ງສູນຄົ້ນຄວ້າພັດທະນາຢາຈີນປະເພດຕ່າງໆ 100 ກວ່າຫຼັງ,ສ້າງແຫຼ່ງປູກຫວ້ານຢາຈີນທີ່ເປັນແບບສະບັບ 400 ກວ່າແຫ່ງ. ສູນເຕັກນິກຂອງອົງການຄົ້ນຄວ້າທຸກຂັ້ນແລະວິສາຫະກິດໄດ້ຜະລິດຢາຈີນສຳເລັດຮູບທັນສະໄໝງວດໜຶ່ງ,ໃຊ້ພາສາວິຊາສະເພາະແພດສາດຈີນແລະແພດສາດຝ່າຍຕາເວັນຕົກບັນລະຍາຍສັບພະຄຸນແລະພະຍາດທີ່ປົວໄດ້,ໃຫ້ຮູ້ບົດບາດຂອງຢາຄັກແນ່,ຮູ້ສ່ວນປະສົມຂອງຢາຢ່າງຈະແຈ້ງ,ເຕັກນິກປຸງແຕ່ງກ້າວໜ້າແລະຄວບຄຸມຄຸນນະພາບໄດ້.
ນອກນີ້ ວົງການຕ່າງໆໃນສັງຄົມກໍເອົາໃຈໃສ່ນຳຢາຈີນຫຼາຍຂຶ້ນຢ່າງເດັ່ນຊັດ,ວິສາຫະກິດຢາຈີນຫຼາຍແຫ່ງລົງທຶນຄົ້ນຄວ້າພັດທະນາຢາຈີນຫຼາຍຂຶ້ນ,ຂອບເຂດແລະຂົງເຂດຮ່ວມມືລະຫວ່າງຊາດຜະລິດຢາຈີນກໍນັບມື້ນັບຂະຫຍາຍກວ້າງອອກ.
|
|
|
