|
ຕາມຂ່າວ CRI: ປັດຈຸບັນ ຈີນພວມປະຕິບັດແຜນການດຳເນີນງານທີ່ໝາຍຈະປັບປຸງສະພາບແວດລ້ອມການປະກອບອາຊີບຂອງຊາວນາທີ່ເຮັດວຽກຢູ່ໃນຕົວເມືອງ,ໃຫ້ການບໍລິການແລະຊ່ອຍເຫຼືອພວກເຂົາເຈົ້າໃນຫຼາຍດ້ານ,ການປະຕິບັດແຜນການດັ່ງກ່າວໄດ້ສ້າງສະພາບແວດລ້ອມອັນດີງາມໃຫ້ຊາວນາເຂົ້າເຮັດວຽກໃນເມືອງ,ແລະໄດ້ຮັບຄວາມຊົມເຊີຍຈາກພວກເຂົາເຈົ້າ.
ຕາມສະຖິຕິຂອງຝ່າຍທີ່ກ່ຽວຂ້ອງ,ນັບມາຮອດທ້າຍປີກາຍນີ້ ຊາວນາຊົນນະບົດທີ່ເຂົ້າມາເຮັດວຽກຢູ່ໃນຕົວເມືອງຂອງຈີນມີປະມານ 200 ລ້ານຄົນ. ແຜນການທີ່ໃຫ້ຊື່ວ່າ"ການເຄື່ອນໄຫວລົມລະດູບານໃໝ່"ມີເນື້ອໃນສຳຄັນດັ່ງນີ້ຄື: ອົງການແນະນຳອາຊີບສາທາລະນະໃນເມືອງໃຫຍ່ແລະເມືອງຜ້ານກາງຈະຈັດໃຫ້ມີງານຕິດຕໍ່ຮັບສະໝັກດ້ວຍຫຼາຍຮູບການ,ຫາວຽກອັນເໝາະສົມໃຫ້ຊາວນາທີ່ມາຫາເຮັດວຽກ; ໃຫ້ການເຝິກອົບຮົມລັກສະນະຊີ້ນຳເຊັ່ນຄວາມຮູ້ຮອບຕົວໃນການເຮັດວຽກຢູ່ຕົວເມືອງເປັນຕົ້ນແກ່ຊາວນາທີ່ມາຫາວຽກເຮັດຢູ່ໃນເມືອງຄັ້ງທຳອິດ,ປາບປາມອົງການສື່ກາງແນະນຳອາຊີບທີ່ຜິດກົດໝາຍ,ເຮັດໃຫ້ຕະຫຼາດແຮງງານເປັນແບບສະບັບຕື່ມອີກ.
ຕາມບຸກຄົນທີ່ກ່ຽວຂ້ອງຂອງກະຊວງແຮງງານແລະປະກັນສັງຄົມຂອງຈີນແນະນຳວ່າ,ປັດຈຸບັນ,ແຫ່ງຕ່າງໆຂອງຈີນລ້ວນແຕ່ພວມຕັ້ງໜ້າພະຍາຍາມເພື່ອປັບປຸງສະພາບແວດລ້ອມປະກອບອາຊີບຂອງຊາວນາທີ່ເຮັດວຽກຢູ່ໃນເມືອງໃຫ້ດີຂຶ້ນ,ໂດຍສະເພາະແມ່ນໄດ້ເຮັດວຽກຫຼາຍຢ່າງໃນດ້ານການບໍລິການແນະນຳອາຊີບໃຫ້ຊາວນາ. ໃນເວລານັກຂ່າວໄປເອົາຂ່າວຢູ່ສູນບໍລິການແນະນຳອາຊີບຂອງນະຄອນຈຸງກິ່ງ ທາງພາກຕາເວັນຕົກສຽງໃຕ້ຂອງຈີນນັ້ນ ໄດ້ເຫັນວ່າ,ຢູ່ໜ້າຈໍໃຫຍ່ທີ່ແຂວນໃສ່ຝາເຮືອນ,ໄດ້ປະກາດຂ່າວຕ້ອງການແຮງງານໃໝ່ສຸດຢ່າງບໍ່ຢຸດບໍ່ເຊົາຕະຫຼອດ 24 ຊົ່ວໂມງ,ຊີ້ນຳຜູ້ຫາວຽກເຮັດງານທຳດ້ວຍນຂໍ້ມູນຂ່າວສານຢ່າງທັນການແລະຄົບຖ້ວນ. ທ້າວຫຼີຮົງຈູນ ຊາວນາເມືອງປີຊານນະຄອນຈຸງກິ່ງເວົ້າວ່າ:
"ເບິ່ງໜ້າຈໍໃຫຍ່ນີ້ກໍຮູ້ໝົດທຸກຢ່າງ,ຄືເງິນເດືອນທໍ່ໃດ,ຫົວໜ່ວຍໃດຕ້ອງການຄົນ,ຈະແຈ້ງທີ່ສຸດ."
ຢູ່ບາງຕົວເມືອງໃນແຂວງເຈີຈຽງ ພາກຕາເວັນອອກຂອງຈີນ,ພະນັກງານຂອງຕະຫຼາດແຮງງານໄດ້ເບີກບັດຂໍ້ມູນຂ່າວສານໃຫ້ຊາວນາທີ່ມາຫາວຽກ,ໃນບັດໄດ້ຂຽນເລື່ອງທີ່ຕ້ອງລະວັງໃນເວລາຫາວຽກ,ຕົວຢ່າງຄືໄປຫາວຽກຢູ່ອົງການໃດແດ່ແມ່ນປອດໄພແລະໄວ້ໃຈໄດ້,ຕຳແໜ່ງວຽກທີ່ສະເໜີ,ຄຳຊີ້ນຳໃນເວລາຫາວຽກເຮັດງານທຳແລະເບີໂທລະສັບຂອງພະແນກຕິດຕາມກວດກາແຮງງານເປັນຕົ້ນ.
ແຂວງກວາງຕຸ້ງໄດ້ຖືເອົາການແກ້ໄຂບັນຫາຕິດຄ້າງເງິນເດືອນຊາວນາທີ່ເຮັດວຽກຢູ່ໃນເມືອງເປັນຈຸດໜັກຂອງວຽກງານ. ຢູ່ເຂດທີ່ຊາວນາເຮັດວຽກຫຼາຍເຊັ່ນກວາງໂຈວແລະເສີນເຈີນເປັນຕົ້ນ,ພະແນກແຮງງານແລະປະກັນສັງຄົມຂອງທ້ອງຖິ່ນໄດ້ສ້າງລະບົບເອເລັກໂຕຼນິກທີ່ຕິດຕາມຄວບຄຸມການຈ່າຍເງິນເດືອນຢູ່ນະຄອນ,ເມືອງແລະຕາແສງ,ເພື່ອຕິດຕາມຄວບຄຸມຢູ່ທຸກເວລາຕໍ່ສະພາບຈ່າຍເງິນເດືອນຂອງວິສາຫະກິດ. ທ່ານເພີງເຕີຮວາ ຮອງຫົວໜ້າພະແນກແຮງງານແລະປະກັນສັງຄົມຂອງເມືອງທຽນເຮີນະຄອນກວາງໂຈວແນະນຳວ່າ:
"ລະບົບດັ່ງກ່າວສາມາດສະແດງໃຫ້ເຫັນວິສາຫະກິດທີ່ຕິດຄ້າງເງິນເດືອນຂອງຊາວນາທີ່ເຮັດວຽກໃນເມືອງຢ່າງທັນການ,ແລະກ່າວເຕືອນ,ຜ່ານເຄືອຂ່າຍດັ່ງກ່າວສາມາດຊອກເຫັນບັນຫາຢ່າງທັນການ,ແກ້ໄຂໄວປົກປ້ອງສິດປະໂຫຍດທາງດ້ານຄ່າຕອບແທນການອອກແຮງງານຕາມກົດໝາຍຂອງຊາວນາຢ່າງແທ້ຈິງ."
ຕາມແນະນຳວ່າ,ເພື່ອຮັບປະກັນໃຫ້ຊາວນາທີ່ເຮັດວຽກຢູ່ໃນເມືອງແຕ່ລະຄົນໄດ້ຮັບເງິນເດືອນຕາມເວລາ,ບາງທ້ອງຖິ່ນຍັງໄດ້ເປີດກົ້ງບັນຊີເງິນເດືອນສະເພາະຢູ່ໃນທະນາຄານໃຫ້ຊາວນາທີ່ເຮັດວຽກຢູ່ໃນເມືອງ,ຮຽກຮ້ອງໃຫ້ວິສາຫະກິດທີ່ໃຊ້ແຮງງານທັງໝົດຝາກເງິນສຳຮອງຈຳນວນອັນແນ່ນອນໃສ່ທະນາຄານ,ເມື່ອເກີດເຫດການທີ່ຕິດຄ້າງເງິນເດືອນຂອງຊາວນາແລ້ວ,ກໍເອົາເງິນສຳຮອງເຫຼົ່ານີ້ມາຈ່າຍເງິນເດືອນໃຫ້ຊາວນາ.
ຢູ່ປັກກິ່ງ ນະຄອນຫຼວງຂອງຈີນ,ພະແນກທີ່ກ່ຽວຂ້ອງໄດ້ຈັດໃຫ້ມີການບໍລິການໂດຍຈຳເພາະຊ່ອຍຊາວນາປະກອບອາຊີບ,ພະແນກແຮງງານປັກກິ່ງໄດ້ພິມປຶ້ມໂຄສະນາບໍລິການປະກອບອາຊີບຢ່າງຫຼວງຫຼາຍ ແຈກໃຫ້ອົງການແນະນຳອາຊີບຢູ່ທຸກເຂດ,ອົງການແນະນຳອາຊີບສາທາລະນະຍັງໄດ້ຊ່ອຍຊີ້ນຳຊາວນາປະກອບອາຊີບຟີ,ແລະໄດ້ເກັບກຳຂໍ້ມູນຂ່າວສານໜ້າວຽກງວດໜຶ່ງທີ່ເໝາະສຳລັບຊາວນາເຮັດ,ແຈກໃຫ້ຊາວນາຟີ.
|
