|
ທີ່ນີ້ວິທະຍຸສາກົນແຫ່ງປະເທດຈີນ, ສະບາຍດີທ່ານຜູ່ຟັງທີ່ໂຄລົບ, ລາຍການນິທານສຸພາສິດໄດ້ວຽນມາພົບກັບທ່ານອີກຕາມເຄີຍ, ຊົມເຊີຍທ່ານຕິດຕາມຮັບຟັງ.
ຊຸນອູ ນັກການທະຫານທີ່ມີຊື່ສຽງໃນສະໄໝບູຮານຂອງຈີນໄດ້ສະເໜີອອກມາໃນບົດໄຊຍະພຸມຂອງ "ຕຳລາພິໄຊສົງຄາມຊຸນຈື" ວ່າ: ທັງຮູ້ແຈ້ງຝ່າຍກົງກັນຂ້າມ, ທັງຮູ້ແຈ້ງຕົນເອງ, ກໍ່ຈະໄດ້ຮັບໄຊຊະນະຢ່າງບໍ່ຕ້ອງສົງໄສ; ທັງຮູ້ແຈ້ງເງື່ອນໄຂດິນຟ້າອາກາດທັງຮູ້ແຈ້ງໄຊຍະພູມ, ໄຊຊະນະຈະມີສິ່ງຮັບປະກັນ.
ຊຸນຈືໄດ້ເນັ້ນໜັກ "ຮູ້ແຈ້ງເງື່ອນໄຂດິນຟ້າອາກາດແລະຮູ້ແຈ້ງໄຊຍະພູມ", ແມ່ນຍ້ອນການເຄື່ອນໄຫວສົງຄາມຕ້ອງອາໄສເງື່ອນໄຂທຳມະຊາດຄື ດິນຟ້າອາກາດແລະໄຊຍະພູມເປັນຕົ້ນ. ໃນບັ້ນລົບລະຫວ່າງລັດສິນກັບລັດຈິ້ນທີ່ສູ້ກັນຢູ່ສຽວໃນໄລຍະກາງສະໄໝຊຸນຊິວຂອງຈີນ, ສິນມູ້ກົງ ເຈົ້າຊີວິດລັດສິນໄດ້ເສຍໄຊຢ່າງເຈັບແສບຍ້ອນທັງບໍ່ມີຄວາມສາມັກຄີທັງບໍ່ຮູ້ແຈ້ງເງື່ອນໄຂດິນຟ້າອາກາດແລະໄຊຍະພູມ.
ປີທີ 25 ລັດຊະການໂຈ່ວຊຽງຫວັງຫຼືປີ 628 ກ່ອນຄິດຕະສັງກາດ, ເຈິ້ງເຫວິນກົງ ເຈົ້າຊີວິດລັດເຈິ້ງແລະຈິ້ນເຫວິນກົງ ເຈົ້າຊີວິດລັດຈິ້ນໄດ້ສະຫວັນນະຄົດຕາມໆກັນ. ສິນມູ້ກົງ ເຈົ້າຊີວິດລັດສິນຕົກລົງສວຍໂອກາດນີ້ແຕ່ງກອງທະຫານຂ້າມແດນລັດຈິ້ນໄປຫຼອນໂຈມຕີລັດເຈິ້ງ, ເພື່ອແຜ່ຂະຫຍາຍອານາເຂດຂອງຕົນ.
ຈຽນຊູ ເສນາບໍດີຂອງລັດສິນເຫັນວ່າ, ລັດສິນກັບລັດເຈິ້ງໄກກັນຫຼາຍຮ້ອຍກິໂລແມັດ, ການແຕ່ງກອງທະຫານເດີນທາງໄກແສນໄກໄປບຸກໂຈມຕີລັດເຈິ້ງ, ລັດເຈິ້ງຍ່ອມຈະຮູ້ການເຄື່ອນໄຫວຂອງກອງທະຫານລັດສິນ ແລ້ວທຳການກະກຽມໃນການປ້ອງກັນ, ເມື່ອເປັນຈັ່ງຊັ້ນ, ກອງທະຫານລັດສິນທັງບໍ່ໄດ້ຫຼອນໂຈມຕີລັດເຈິ້ງຢ່າງສຳເລັດຜົນ, ຍັງຈະປະທະກັນກັບຜົນປະໂຫຍດຂອງລັດຈິ້ນອີກ, ສ່ວນລັດຈິ້ນກໍ່ເດັດຂາດບໍ່ຫ່ອນຈະໃຫ້ກອງທະຫານລັດສິນຂ້າມແດນໄປຢ່າງງ່າຍດາຍ. ສະນັ້ນ ການຫຼອນໂຈມຕີລັດເຈິ້ງເປັນໄປບໍ່ໄດ້.
ແຕ່ສິນມູ້ກົງຢາກແຜ່ຂະຫຍາຍອານາເຂດຂອງຕົນທີ່ສຸດ, ບໍ່ຮັບເຫັນດີນຳຄຳສຳເໜີຂອງຈຽນຊູ, ແລ້ວແຕ່ງກອງທະຫານໄປຫຼອນໂຈມຕີລັດເຈິ້ງໃນເດືອນທັນວາປີດຽວກັນ.
ຕົ້ນລະດູໃບໄມ້ປົ່ງປີລຸນມາ, ກອງທະຫານລັດສິນໄດ້ຜ່ານຮ່ອມພູສຽວ, ລັກລອບຂ້າມຊາຍແດນລັດຈິ້ນຕອນໃຕ້.
ຢູ່ກາງທາງພໍດີໄດ້ພົບກັບສຽນກາວ ພໍ່ຄ້າລັດເຈິ້ງທີ່ຂາຍງົວຕໍ່ນັ້ນໂດຍບັງເອີນ. ສຽນກາວເປັນຄົນມີສະຕິລະວັງຕົວ, ຄາດວ່າກອງທະຫານລັດສິນກອງນີ້ຄົງຈະແມ່ນໄປຫຼອນໂຈມຕີລັດເຈິ້ງ, ເລີຍໃຫ້ຄົນກັບເມືອລັດເຈິ້ງແຈ້ງຄວາມໂດຍດ່ວນ. ກອງທະຫານລັດເຈິ້ງເລີຍຂ້ຽວເລັ່ງປ້ອງກັນ. ກອງທະຫານລັດສິນໄດ້ປະກົດເຫັນວ່າລັດເຈິ້ງໄດ້ທຳການກະກຽມເປັນຢ່າງດີແລ້ວ, ເຫັນວ່າຖ້າບຸກໂຈມຕີລັດເຈິ້ງດ້ວຍກອງທະຫານຢ່າງດ່ຽວ, ກໍ່ຍາກທີ່ຈະໄດ້ຮັບໄຊຊະນະ, ເລີຍຢຸດການເຄື່ອນທັບ.
ໃນເວລານີ້, ຈຸ້ນຊຽງກົງກໍ່ໄດ້ຮູ້ຂ່າວກ່ຽວກັບກອງທະຫານລັດສິນແລ້ວ, ເລີຍພາກອງທະຫານເຄື່ອນທັບຢ່າງລັບໆໄປເຖິງບ່ອນທີ່ກອງທະຫານລັດສິນຕ້ອງຜ່ານເມື່ອກັບເມືອລັດສິນ, ລີ້ຊ່ອນຢູ່ຮ່ອມພູສຽວ. ເວລາກອງທະຫານລັດສິນເດີນຜ່ານ, ຖືກກອງທະຫານລັດຈິ້ນຫຼອນໂຈມຕີຢ່າງກະທັນຫັນ. ກອງທະຫານລັດສິນແຫຍ້ກັນຢູ່ໃນຮ່ອມທີ່ຄັບແຄບ, ຕື່ນຕົກໃຈຢ້ວນກົວທັງວຸ້ນວາຍ, ເດີນໄປໜ້າບໍ່ໄດ້, ຖອນຄືນຫຼັງກໍ່ບໍ່ໄດ້, ການຕໍ່ຕ້ານກໍ່ບໍ່ແຂງແຮງ, ໃນທີ່ສຸດຈຶ່ງຖືກດັບສູນໝົດ.
ໃນການສູ້ລົບບັ້ນນີ້, ສິນມູ້ກົງແຕ່ງກອງທະຫານໄປບຸກໂຈມຕີລັດເຈິ້ງຢ່າງບໍ່ຄຶດໜ້າຄຶດຫຼັງ, ບໍ່ຮູ້ຈັກເງື່ອນໄຂດິນຟ້າອາກາດແລະໄຊຍະພູມຢ່າງຈະແຈ້ງ, ນີ້ແມ່ນມູນເຫດຂໍກະແຈທີ່ພາໃຫ້ເສຍໄຊຢ່າງເຈັບແສບ.
ໃນຊູ່ມື້ນີ້, ການຮູ້ຈັກເງື່ອນໄຂດິນຟ້າອາກາດແລະໄຊຍະພູມນັ້ນ ບໍ່ພຽງແຕ່ເປັນຄະຕິເຕືອນໃຈຂອງນັກການທະຫານທໍ່ນັ້ນ, ໃນຂົງເຂດການຄ້າກໍ່ມີຄວາມໝາຍອັນຕັ້ງໜ້າເຊັ່ນດຽວກັນ, ໃນຊູ່ມື້ນີ້ທີ່ການຄ້າໂລກາພິວັດ, ການຮູ້ຈັກເງື່ອນໄຂດິນຟ້າອາກາດແລະໄຊຍະພູມ ໄດ້ກາຍເປັນຄະຕິເຕືອນໃຈຂອງນັກທຸລະກິດໃນຂົງເຂດຕ່າງໆ. ແຕ່ວ່າ ໃນຊູ່ມື້ນີ້ ມັນບໍ່ພຽງແຕ່ໝາຍເຖິງເງື່ອນໄຂດິນຟ້າອາກາດແລະພູມສາດທໍ່ນັ້ນ, ຫາກຍັງໝາຍເຖິງທົ່ວສະພາບແວດລ້ອມການທຸລະກິດອີກດ້ວຍ. ຖ້ານັກທຸລະກິດບໍ່ຮູ້ຈັກສະພາບຄວາມຕ້ອງການຂອງສັງຄົມ ສະຖານະການຕະຫຼາດໃນສັງຄົມ ເງື່ອນໄຂມະນຸດສາດແລະປັດໄຈອື່ນໆແລ້ວ, ກໍ່ຈະຍາກທີ່ຈະໄດ້ຮັບໄຊຊະນະໃນການແກ່ງແຍ່ງກັນດ້ານການທຸລະກິດ.
ທ່ານຜູ່ຟັງທີ່ໂຄລົບ, ລາຍການນິທານສຸພາສິດພາກນີ້ຂໍສ້ຽງສຸດລົງພຽງທໍ່ນີ້, ຂອບໃຈທ່ານທີ່ຮັບຟັງ, ພົບກັນໃໝ່ໃນລາຍການໜ້າ, ສະບາຍດີ.
|
