|
ຫວ່າງມໍ່ໆນີ້, ຢູ່ເຂດສ່ວນຫນຶ່ງຂອງແຂວງອານຮຸ່ຍ ພາກຕາເວັນອອກຂອງຈີນໄດ້ເກີດມີພະຍາດເຍື້ອສະຫມອງອັກເສບລະບາດ, ແຂວງອື່ນໆກໍ່ມີຜູ່ເປັນພະຍາດເຍື້ອສະຫມອງອັກເສບແຈກກະຈາຍຢູ່. ເຖິງວ່າສະພາບພະ ຍາດເຍື້ອສະຫມອງອັກເສບຢູ່ແຫ່ງຕ່າງໆຍັງຢູ່ໃນສະພາບປົກກະຕິກໍ່ຕາມ, ແຕ່ຍ້ອນບຸນກຸດຈີນຈະວຽນມາເຖິງ, ຈິ່ງມີຄົນສັນຈອນໄປມາຢ່າງຫລວງ ຫລາຍ. ເພື່ອປ້ອງກັນບໍ່ໃຫ້ພະຍາດນີ້ແຜ່ລະບາດ,ບັນດາຝ່າຍທີ່ກ່ຽວຂ້ອງຂອງຈີນຈິ່ງພວມໃຊ້ມາດຕະການອັນຕັ້ງຫນ້າ, ເພີ່ມທະວີການປ້ອງກັນແລະຄວບຄຸມພະຍາດເຍື້ອສະຫມອງອັກເສບ.
ພະຍາດເຍື້ອສະຫມອງອັກເສບປະເພດລະບາດແມ່ນພະຍາດທໍ່ຫາຍໃຈຕິດແປດທີ່ເຫັນໂດຍທົ່ວໄປ,ສ່ວນຫລາຍມັກເປັນໃນຍາມລະດູຫນາວແລະລະດູບານໃຫມ່.ແຕ່ຕ່າງກັບພະຍາດຊາສ໌,ພະຍາດເຍື້ອສະຫມອງອັກເສບມີວັກແຊງປ້ອງກັນທັງມີຢາປົວ.ຕັ້ງແຕ່ຈີນເລີ່ມສັກວັກແຊງພະຍາດເຍື້ອສະ ຫມອງອັກເສບໃຫ້ເດັກນ້ອຍເມື່ອປີ 1984 ເປັນຕົ້ນມາ, ການລະບາດຂອງ ພະຍາດນີ້ໄດ້ຖືກຄວບຄຸມໄວ້ໄດ້,ຈິ່ງບໍ່ເຄີຍເກີດການລະບາດຢ່າງຂະຫນາດໃຫຍ່.
ຕົວເລກທີ່ກະຊວງສາທາລະນະສຸກຈີນປະກາດສະແດງໃຫເຫັນວ່າ, ເດືອນມັງກອນປີນີ້ ທົ່ວປະເທດໄດ້ລາຍງານວ່າມີຜູ່ເປັນພະຍາດເຍື້ອສະ ຫມອງອັກເສບ 250 ກວ່າຄົນ,ໃນນັ້ນ 16 ຄົນໄດ້ເສຍຊີວິດ, ຜູ່ເປັນພະຍາດນີ້ໄດ້ເພີ່ມຂຶ້ນຫລາຍກວ່າໄລຍະດຽວກັນຂອງປີກາຍ 90 ກວ່າຄົນ. ໂດຍແນໃສ່ສະພາບດັ່ງກ່າວ, ກະຊວງສາທາລະນະສຸກຈີນຮຽກຮ້ອງໃຫ້ແຫ່ງຕ່າງໆຕ້ອງເພີ່ມທະວີການຕິດຕາມພະຍາດເຍື້ອສະຫມອງອັກເສບແລະລາຍງານສະພາບພະຍາດລະບາດ, ພະຍາຍາມກວດໃຫ້ຮູ້ໂດຍໄວ, ລາຍງານໂດຍໄວ,ບົ່ງມະຕິໂດຍໄວແລະປິ່ນປົວໂດຍໄວ, ແລະຕ້ອງໃຊ້ມາດຕະການກັກກັນຜູ່ເປັນພະຍາດດັ່ງກ່າວ.
ວັນທີ 2 ກຸມພາ ທ່ານກາວຄາຍອຽນ ຫົວຫນ້າພະແນກສາທາລະນະສຸກແຂວງອານຮຸ່ຍໃຫ້ສຳພາດຕໍ່ນັກຂ່າວວິທະຍຸ cri ວ່າ:
ປະຈຸບັນ ພວກຂ້າພະເຈົ້າພວມໃຊ້ມາດຕະການຫລາຍຢ່າງ, ເພີ່ມທະວີການປ້ອງກັນແລະຄວບຄຸມພະຍາດເຍື້ອສະຫມອງອັກເສບ.ມາດຕະການເຫລົ່ານີ້ກໍ່ຄື:ກວດກາຢ່າງເຄັ່ງຄັດ, ລາຍງານສະພາບພະຍາດຢ່າງບໍ່ຂາດໄລຍະ,ເມື່ອປະກົດເຫັນຜູ່ເປັນພະຍາດນີ້ກໍ່ຕ້ອງກອບກູ້ປິ່ນປົວໃນທັນທີ;ສັກວັກແຊງໃຫ້ເດັກນ້ອຍທີ່ມີຄວາມຈຳເປັນໂດຍດ່ວນເປັນຕົ້ນ. ອາດເວົ້າໄດ້ວ່າ,ປະຈຸບັນ ສະພາບພະຍາດໄດ້ຖືກຄວບຄຸມໄວ້ຢ່າງບັງເກີດຜົນ, ມີສອງມື້ມານີ້ບໍ່ໄດ້ປະກົດເຫັນຜູ່ເປັນພະຍາດນີ້ອີກ.ວຽກງານປ້ອງກັນແລະຄວບຄຸມທຸກລາຍຂອງແຂວງອານຮຸ່ຍພວມດຳເນີນໄປຢ່າງເປັນລະບຽບແລະສະດວກ.
ເຖິງຢ່າງໃດກໍ່ຕາມ, ຍ້ອນບຸນກຸດຈີນ ບຸນສຳຄັນທີ່ສຸດຂອງຈີນຈະວຽນ ມາເຖິງ, ຜູ່ທີ່ກັບເມືອຢາມບ້ານແລະອອກໄປທ່ອງທ່ຽວຢູ່ຕ່າງຖີ່ນຫລາຍທີ່ສຸດ.ເພື່ອບໍ່ໃຫ້ພະຍາດເຍື້ອສະຫມອງອັກເສບແຜ່ລະບາດຍ້ອນຄົນສັນຈອນໄປ ມາຢ່າງຂະຫນາດໃຫຍ່, ພາກສ່ວນທາງລົດໄຟ ທາງຫລວງແລະການບິນພົນລະເຮືອນຂອງຈີນກໍ່ທະຍອຍກັນໃຊ້ມາດຕະການປ້ອງກັນ.ທ່ານນາງຮານຊູຢົງ ເຈົ້າຫນ້າທີ່ກະຊວງທາງລົດໄຟຈີນແນະນຳວ່າ:
ພວກຂ້າພະເຈົ້າໄດ້ອົບຮົມພະນັກງານຫມົດທຸກຄົນ, ໃຫ້ພວກເຂົາເຈົ້າມີຄວາມຮູ້ກ່ຽວກັບພະຍາດຕິດແປດທາງທໍ່ຫາຍໃຈ,ເຊິ່ງລວມທັງຄວາມຮູ້ກ່ຽວກັບອາການພະຍາດເຍື້ອສະຫມອງອັກເສບແລະຄວາມຮູ້ປ້ອງກັນ.ສອງ, ພວກຂ້າພະເຈົ້າໄດ້ຈັດຕູ້ຢາສຸກເສີນຕູ້ຫນຶ່ງໃນລົດໄຟ,ຢູ່ໃນຕູ້ນີ້ມີຜ້າບັງຫນ້າ ເສື້ອກັກກັນພະຍາດແລະຢາທີ່ຕ້ອງການໃນເວລາປົວຜູ່ເປັນພະຍາດຕິດແປດລວມທັງພະຍາດເຍື້ອສະຫມອງອັກເສບ.ອີກດ້ານຫນຶ່ງ ພວກຂ້າພະເຈົ້າຍັງ ໄດ້ດຳເນີນການກວດກາອະນາໄມ,ເມື່ອປະກົດເຫັນຜູ່ເປັນພະຍາດກໍ່ຊຳລະແກ້ໄຂກັບບ່ອນໃນທັນທີ.
ນອກນີ້ ພາກສ່ວນຄົມມະນາຄົມແລະການບິນພົນລະເຮືອນເປັນຕົ້ນກໍ່ທະຍອຍກັນອອກປະກາດແຈ້ງການດ່ວນໄປໃຫ້ແຫ່ງຕ່າງໆ, ຮຽກຮ້ອງໃຫ້ແຫ່ງຕ່າງໆຕ້ອງເຮັດອະນາໄມໃຫ້ດີ,ດັບເຊື້ອຢູ່ສາທາລະນະສະຖານຄື ຫໍຄອຍຍົນ ຫ້ອງຄອຍລົດແລະທ່າກຳປັ່ນເປັນຕົ້ນ, ຮັບປະກັນໃຫ້ບ່ອນເຄື່ນໄຫວໃນຫ້ອງອາກາດລຸລ່ວງ; ລາຍງານສະພາບພະຍາດຕາມການກຳນົດ,ເມື່ອປະກົດເຫັນຜູ່ເປັນຫນ້າສົງໃສກໍ່ລາຍງານຕໍ່ພາກສ່ວນສາທາລະນະສຸກໃນທັນທີ່ໂລດ,ແລະສົມທົບກັບພາກສ່ວນປ້ອງກັນພະຍາດເຮັດວຽກກັກກັນແລະກວດກາໃຫ້ດີ.
|
