|
ທ່ານຜູ່ຟັງທີ່ໂຄລົບ, ເມື່ອທຽບກັບເມື່ອກ່ອນແລ້ວ, ດຽວນີ້ ຮູບການຄົນຈີນສະຫຼອງບຸນກຸດຈີນ--ເຊິ່ງເປັນປີໃໝ່ຕາມຈັນທະຄະຕິຈີນໄດ້ມີການປ່ຽນແປງຢ່າງໃຫຍ່. ຄົນທັງຫຼາຍບໍ່ສະເພາະເຮັດແຕ່ງານຊຸມນຸມມິດຕິງແລະໄປທ່ອງທ່ຽວທໍ່ນັ້ນແລ້ວ, ການອອກກຳລັງກາຍຫຼິ້ນກິລາກໍ່ກາຍເປັນຮູບການສຳຄັນໃນໄລຍະບຸນກຸດຈີນ. ໃນລາຍການໂລກກິລາພາກນີ້, ເຊີນຟັງບົດແຈ້ງຂ່າວປະກອບສຽງທີ່ພາດຫົວເລື່ອງວ່າ: ຄົນຈີນຫຼິ້ນກິລາຫັດກາຍສະຫຼອງບຸນກິດຈີນ.
ສະຫະປະຊາຊາດກຳນົດປີ 2005 ເປັນ "ປີກິລາສາກົນ", ກົມໃຫຍ່ກິລາແຫ່ງຊາດຈີນກໍ່ຖືອັນນີ້ເປັນຫົວຂໍ້, ຈັດ "ການເຄື່ອນໄຫວຫຼິ້ນກິລາຫັດກາຍຂະໜາດໃຫຍ່ສະຫຼອງບຸນກຸດຈີນທົ່ວປະເທດ" ໃນໄລຍະບຸນກຸດຈີນ, ເພື່ອຊຸກຍູ້ການເຄື່ອນໄຫວຫັດກາຍບໍລິຫານທົ່ວປວງຊົນຢູ່ແຫ່ງຕ່າງໆຕື່ມອີກ. ໃນໄລຍະບຸນກຸດຈີນ, ແຫ່ງຕ່າງໆຂອງຈີນໄດ້ຈັດການເຄື່ອນໄຫວຫັດກາຍບໍລິຫານທົ່ວປວງຊົນທີ່ມີຫຼາຍຮູບຫຼາຍແບບໂດຍອີງຕາມຈຸດພິເສດຂອງທ້ອງຖິ່ນ. ຢູ່ຕົວເມືອງພາກເໜືອຈີນຄື ນະຄອນຫຼວງປັກກິ່ງແລະນະຄອນຮາເອີປິ່ນ ເທດສະບານແຂວງເຫີຍຫຼົງຈຽງທີ່ອາກາດໜາວຈັດ ໄດ້ພາກັນຈັດໃຫ້ມີການແລ່ນສະກີ ການຫຼິ້ນສະເກັດບົນນ້ຳແຂງ ການລອຍນ້ຳຍາມໜາວແລະອື່ນໆ, ສ່ວນຢູ່ຕົວເມືອງພາກໃຕ້ທີ່ອາກາດອົບອຸ່ນຊຸ່ມຊື່ນໂດຍທຽບຖານໃນລະດູໜາວ ໄດ້ຈັດໃຫ້ມີການແລ່ນນອກສະໜາມແລະການປິນພູເປັນຕົ້ນ.
ສະໜາມແລ່ນສະກີພູຢຸນຟໍຕັ້ງຢູ່ເຂດຊານເມືອງປັກກິ່ງ, ໃນໄລຍະບຸນກຸດຈີນ, ຜູ່ມັກຫຼິ້ນກິລາໄປແລ່ນສະກີຢູ່ຫັ້ນຢ່າງບໍ່ຂາດສາຍ. ທ້າວຈິນເຜິງເຜິງ ນັກສຶກສາມະຫາວິທະຍາໄລການບິນແລະການບິນອະວະກາດປັກກິ່ງກ່າວວ່າ, ຝ່າຍໂຮງຮຽນພວກເຂົາເຈົ້າໄດ້ຈັດຕັ້ງນັກສຶກສາໄປຈັດການແຂ່ງຂັນແລ່ນສະກີເພີດເພີນຢູ່ຫັ້ນ. ທ້າວຈິນເຜິງເຜິງເວົ້າວ່າ:ໃນໄລຍະບຸນກຸດຈີນ, ນອກຈາກກັບພໍ່ແມ່ໄປຢາມຍາດພີ່ນ້ອງແລ້ວ, ຂ້າພະເຈົ້າຍັງເຂົ້າຮ່ວມການແລ່ນສະກີທີ່ຈັດໂດຍມະຫາວິທະຍາໄລພວກເຮົາ, ແລະໄປຫຼິ້ນດອກປີກໄກ່ຢູ່ຫໍກິລາໃນມະຫາວິທະຍາໄລເປັນປະຈຳ. ເວລາສອບເສັງປາຍເທີມ, ນັກສຶກສາຮູ້ສຶກເຄັ່ງຕຶງຫຼາຍ, ດຽວນີ້ ຫຼິ້ນກິລາກໍ່ແມ່ນເພື່ອຢ່ອນອາລົມ, ໃຫ້ຮ່າງກາຍແຂງແຮງຂຶ້ນ, ຍິ່ງສຳຄັນກວ່ານັ້ນແມ່ນຈະທຸ່ມເທເຫື່ອແຮງຫຼາຍກວ່າເກົ່າເຂົ້າໃນການຮ່ຳຮຽນແລະເຮັດວຽກຫຼັງເປີດຮຽນແລ້ວ.
ຜູ່ເຂົ້າການເຮັດວຽກສ່ວນໜຶ່ງຂອງປັກກິ່ງນອກຈາກໄປຊຸມນຸມມິດຕິງກັບໝູ່ເພື່ອນທີ່ຈຳເປັນແລ້ວຍັງໄປຫຼິ້ນກິລາຢູ່ສູນຫັດກາຍແລະສູນກິລາສະເພາະໃນໄລຍະບຸນກຸດຈີນ. ຢູ່ສູນກິລາຫັດກາຍຊິງໜຽວປັກກິ່ງ, ນັກຂ່າວໄດ້ເຫັນຄົນທັງຫຼາຍພວມຫຼິ້ນກິລາຈົນເຫື່ອໄຫຼໄຄຍ້ອຍ. ການຝຶກກາຍດ້ວຍອຸປະກອນຕ່າງໆ ການຫັດກາຍແບບໂຍຄະ ເຕັ້ນລຳກິລາ ເທຄວນໂດ ກິລາປະເພດບານດັ້ງເດີມແລະອື່ນໆ, ໄດ້ປະກອບເປັນບັນຍາກາດມ່ວນຊື່ນສະບາຍໃຈ.
ທ່ານຈາງຊູເຮັດວຽກຢູ່ບໍລິສັດໄອທີແຫ່ງໜຶ່ງ ລາວໄດ້ຊື້ບັດສະມາຊິກສູນກິລາແຫ່ງໜຶ່ງກ່ອນຈະເຖິງບຸນກຸດຈີນ, ທ່ານບອກນັກຂ່າວວ່າ, ໃນໄລຍະບຸນກຸດຈີນ, ທ່ານກັບເພື່ອນຮ່ວມງານໄດ້ມາຫັດກາຍບໍລິຫານຢູ່ສູນຫັດກາຍແຫ່ງນີ້ເລື້ອຍໆ, ແບບແຜນຊີວິດການເປັນຢູ່ນີ້ໄດ້ກາຍເປັນເນື້ອໃນທີ່ຂາດບໍ່ໄດ້ໃນຊີວິດການເປັນຢູ່ໃນໄລຍະບຸນກຸດຈີນ. ທ່ານຈາງຊູກ່າວວ່າ, ສິ່ງປະເສີດອັນໃດຈະປ່ຽນແທນສຸຂະພາບແຂງແຮງບໍ່ໄດ້, ການຫັດກາຍບໍລິຫານສາມາດເຮັດໃຫ້ທ່ານພັກຜ່ອນຢ່ອນອາລົມແລະຮ່າງກາຍທັງຈິດໃຈຢ່າງເຖິງຖອງ. ທ່ານເວົ້າວ່າ: ໃນຍາມທຳມະດາ, ຂ້າພະເຈົ້າຂຸ້ນນຳວຽກຫຼາຍ, ຊຸມນຸມມິດຕິງກໍ່ຫຼາຍ, ຕອນເຊົ້າ 9 ໂມງເຂົ້າການ, ຕອນແລງ 17 ໂມງຈຶ່ງເລີກການ, ຂ້າພະເຈົ້າບໍ່ມີເວລາຫວ່າງໄປຫັດກາຍ, ສະນັ້ນ ໃນວັນພັກບຸນກຸດຈີນຫຼາຍມື້ລຽນຕິດນັ້ນ, ຂ້າພະເຈົ້າຊັກຊວນໝູ່ເພື່ອນໄປຫັດກາຍຢູ່ສູນຫັດກາຍແລະຫໍກິລານະຄອນຫຼວງ. ໃນເວລາເຮັດວຽກເຄັ່ງຫຼາຍ, ຂ້າພະເຈົ້າຮູ້ສຶກກຳລັງວັງຊາບໍ່ພຽງພໍ, ນີ້ອາດຈະແມ່ນຍ້ອນຫຼິ້ນກິລາຫັດກາຍບໍລິຫານໜ້ອຍໂພດ. ສະນັ້ນການສວຍໂອກາດພັກບຸນກຸດຈີນໄປຫຼິ້ນກິລາ, ຝຶກຮ່າງກາຍໃຫ້ແຂງແຮງຂຶ້ນ, ຈັ່ງຊີ້ມີກຳລັງວັງຊາຫຼາຍກວ່າເກົ່າເວລາເຮັດວຽກ.
ຄົນຈີນມັກຫຼິ້ນກິລາຫັດກາຍບໍລິຫານນັ້ນ, ແມ່ນຍ້ອນແຜນການຫັດກາຍບໍລິຫານທົ່ວປວງຊົນທີ່ເລີ່ມປະຕິບັດເມື່ອປີ 1995. ນັກກິລາຈີນໄດ້ຮັບຜົນງານດີເດັ່ນໃນງານກິລາໂອລິມປິກອາແຕນ, ແລະປັກກິ່ງຈະຈັດງານກິລາໂອລິມປິກໃນປີ 2008, ທັງໝົດເຫຼົ່ານີ້ໄດ້ກະຕຸກຄວາມກະຕືລືລົ້ນຂອງຄົນຈີນທີ່ມີຕໍ່ການຫຼິ້ນກິລາຫັດກາຍບໍລິຫານຕື່ມອີກ. ຕາມໄດ້ຊາບ, ນັບມາຮອດປີ 2004, ຈີນໄດ້ເຮັດໂຄງການຫັດກາຍບໍລິຫານທົ່ວປວງຊົນສຳເລັດ 1939 ໂຄງການ. ທຶນສາທາລະນູປະໂພກທີ່ຫ້າງຫາໄດ້ຈາກການຂາຍຫວຍກິລາຈີນໃນເວລາ 8 ປີມານີ້ ສ່ວນຫຼາຍໄດ້ຖືກໃຊ້ເຂົ້າໃນການປະຕິບັດແຜນການຫັດກາຍບໍລິຫານທົ່ວປວງຊົນ, ເງິນເຫຼົ່ານີ້ໄດ້ບໍລິຈາກໃຫ້ໂຄງການຫັດກາຍບໍລິຫານທົ່ວປວງຊົນ ສ້າງສູນກິລາ ຊື້ອຸປະກອນກິລາແລະອື່ນໆ. ໃນໄລຍະ 10 ປີຄືແຕ່ປີ 1995 ຫາປີ 2004, ອາຍຸຍືນຂອງປະຊາກອນຈີນສະເລ່ຍຕໍ່ຫົວຄົນໄດ້ຍືນ 3,45 ປີ, ດຽວນີ້ໄດ້ບັນລຸ 72 ປີແລ້ວ, ເທົ່າກັບລະດັບປະເທດພັດທະນາຜ້ານກາງ, ນີ້ແມ່ນຍ້ອຍແຜນການຫັດກາຍບໍລິຫານທົ່ວປວງຊົນແລະແບບແຜນດຳລົງຊີວິດທີ່ປອດໃສໄດ້ເສີມຂະຫຍາຍບົດບາດສຳຄັນ.
ແຕ່ກ່ອນ, ເມື່ອບຸນກຸດຈີນຫາກໍ່ຫວິດໄປ, ມັກຈະມີຄົນບໍ່ໜ້ອຍໄປປິ່ນປົວຢູ່ໂຮງໝໍຍ້ອຍກິນດຶ່ມຫຼາຍເກີນໄປໃນໄລຍະບຸນກຸດຈີນ. ຜູ່ປ່ວຍໂຣກເສັ້ນເລືອດເຈັບໝາກຫົວໃຈແລະອື່ນໆຈຶ່ງໄດ້ເພີ່ມຂຶ້ນຫຼາຍກວ່າຍາມທຳມະດາຕັ້ງຫຼວງຫຼາຍ. ແຕ່ເມື່ອໄດ້ເອົາໃຈໃສ່ນຳການຫັດກາຍແລ້ວ, ສະພາບດັ່ງກ່າວໃນປີນີ້ໄດ້ຫຼຸດລົງຫຼາຍແລ້ວ. ທ່ານລີຢາງ ນາຍໝໍໂຮງໝໍເລກສາມສັງກັດມະຫາວິທະຍາໄລປັກກິ່ງເວົ້າວ່າ: ໃນໄລຍະບຸນກຸດຈີນປີນີ້, ຜູ່ມາປົວພະຍາດຢູ່ໂຮງໝໍພວກຂ້າພະເຈົ້າມີໜ້ອຍແລ້ວ, ມູນເຫດຕົ້ນຕໍມີຫຼາຍດ້ານດັ່ງລຸ່ມນີ້: ກ່ອນອື່ນ, ໃນຈິດສຳນຶກຂອງຄົນທັງຫຼາຍ, ສະຫຼອງບຸນກຸດຈີນຢ່າງປອດໃສແລະສະຕິຕໍ່ການຫັດກາຍບໍລິຫານແຮງກ້າກວ່າເມື່ອກ່ອນ. ຄົນທັງຫຼາຍບໍ່ສະເພາະແຕ່ຊຸມນຸມພາເຂົ້ານຳກັນທໍ່ນັ້ນດອກ, ຫາກຍັງເອົາໃຈໃສ່ນຳການຫຼິ້ນກິລາຫັດກາຍບໍລິຫານ. ຖັດມາ ອາກາດໃນຍາມບຸນກຸດຈີນປີນີ້ອົບອຸ່ນ, ນີ້ໄດ້ອຳນວຍໂອກາດໃຫ້ຄົນທັງຫຼາຍໄປຫຼິ້ນກິລາຢູ່ນອກເຮືອນ.
|
