ທີ່ນີ້, ວິທະຍຸສາກົນແຫ່ງປະເທດຈີນ. ສະບາຍດີ, ທ່ານຜູ່ຟັງທີ່ເຄົາລົບ, ຂ້າພະເຈົ້າແມ່ນສົມບູນ, ຊົມເຊີຍທ່ານຮັບຟັງລາຍການນັດພົບກັນໃນວັນອາທິດ. ວັນທີ 9 ກຸມພາປີນີ້ແມ່ນບຸນກຸດຈີນ. ສຳລັບຊາວຈີນແລ້ວ, ບຸນກຸດຈີນແມ່ນມື້ບຸນທີ່ຄຶກຄື້ນກວ່າເພີ່ນໃນປີຫນຶ່ງ. ໃນໄລຍະນີ້, ແຫ່ງຕ່າງໆຂອງຈີນລ້ວນແຕ່ໄດ້ຈັດໃຫ້ມີການເຄື່ອນໄຫວສະຫຼອງຫຼາຍຮູບຫຼາຍຢ່າງ, ຮີດຄອງປະເພນີບູຮານຫຼາຍຢ່າງກໍ່ແມ່ນໄດ້ສືບທອດກັນມາຈົນຮອດດຽວນີ້ໃນການເຄື່ອນໄຫວສະຫຼອງເຫຼົ່ານີ້. ໃນລາຍການພາກນີ້, ພວກເຮົາໄດ້ຈັດໃຫ້ທ່ານຟັງເພງຟື້ນເມືອງມ່ວນໆຫຼາຍເພງ, ເພື່ອໃຫ້ທ່ານໄດ້ຮູ້ຮີດຄອງປະເພນີພິເສດຂອງບຸນກຸດຈີນ, ແລະໃຫ້ທ່ານແບ່ງປັນຄວາມມ່ວນຊື່ນນຳກັນກັບພວກເຮົາ.
ທ່ານຜູ່ຟັງທີ່ໂຄລົບ, ເພງທີ່ທ່ານພວມຟັງຢູ່ນີ້ແມ່ນເພງພື້ນເມືອງພາກເໜືອແຂວງສ້ານຊີທີ່ຊື່ວ່າ ກວ້າຮົງເຕິ່ງ ແປວ່າ ແຂວນໂຄມແດງ. ເພງນີ້ມີທຳນອງມ່ວນຊື່ນບັນລະຍາຍຮີດຄອງປະເພນີທີ່ທຸກຄອບຄົວໃນຊົນນະບົດຕ້ອງແຂວນໂຄມແດງຢູ່ໜ້າປະຕູໃນຍາມບຸນກຸດຈີນ. ເນື້ອເພງຮ້ອງວ່າ, "ເດືອນຈຽງອອກໃໝ່, ປີໃໝ່ວຽນມາ, ຂ້ອຍເຮັດໂຄມເຈ້ຍແຂວນໃສູ່ໜ້າບ້ານ. ລົມພັດໂຄມແດງປິ່ນຄ້ວງໆ, ຂ້ອຍກັບອ້າຍຊ່ານເກີ່ຂອງຂ້ອຍສະຫຼອງບຸນປີໃໝ່."
ຕາມພື້ນເມືອງຂອງຈີນ, ບຸນກຸດຈີນກໍເອິ້ນວ່າ ໜຽນ ແປວ່າປີໃໝ່. ມີຂຶ້ນໃນການເສັ່ນໄຫວ້ບູຊາເທບພະເຈົ້າແລະບັນພະບູລຸດໃນສະໄໝບູຮານ. ການອວຍພອນກັນໃນບຸນປີໃໝ່ແມ່ນຮີດຄອງສຳຄັນຢ່າງໜຶ່ງໃນບຸນກຸດຈີນ, ແມ່ນຮູບການທີ່ຄົນທັງຫຼາຍສົ່ງທ້າຍປີເກົ່າຕ້ອນຮັບປີໃໝ່ແລະອວຍພອນເຊິ່ງກັນແລະກັນ. ໃນຕອນເຊົ້າມື້ທຳອິດຂອງບຸນກຸດຈີນ, ຫຼັງຈາກຕື່ນນອນແລ້ວ, ຜູ່ເປັນລູກຫຼານຈະຕ້ອງໄປອວຍພອນປີໃໝ່ຕໍ່ຜູ່ໃຫຍ່, ຂໍໃຫ້ພວກເພິ່ນມີຄວາມສຸຂະພາບແຂງແຮງອາຍຸໝັ້ນຂວັນຍືນ. ໃນເວລາອອກນອກພົບກັນກັບໝູ່ເພື່ອນ, ຄົນທັງຫຼາຍກໍ່ຕ້ອງເວົ້າແຕ່ຄຳສິລິມຸງຄຸນຕ່າງໆຕໍ່ກັນ ຄື, ຂໍໃຫ້ເຈົ້າຈົ່ງໂຊກຈົ່ງໝານແລະສະບາຍດີປີໃໝ່ເປັນຕົ້ນ. ຕໍ່ໄປ, ເຊີນຟັງເພງພື້ນເມືອງພາກຕາເວັນອອກສຽງເໜືອຈີນທີ່ຊື່ວ່າ, ສຽວປ້າຍນຽນ ແປວ່າ ສະບາຍດີປີໃໝ່. ເພງນີ້ໄດ້ວາດພາບບັນຍາກາດສິລິມົງຄຸນແລະອາລົມມ່ວນຊື່ນຂອງຄົນທັງຫຼາຍໃນຍາມບຸນປີໃໝ່, ໃນເພງມີເນື້ອຮ້ອງວ່າ, "ເດືອນຈຽງອອກໃໝ່, ປີໃໝ່ວຽນມາ, ທຸກຄອບຄົວຕິດຄະຕິຄູ່ໃສ່ບານປະຕູ. ມື້ໃໝ່ໜຶ່ງຄ່ຳ, ທຸກຄອບຄົວເຕົ້າໂຮມສາມັກຄືກັນ, ຍິງຊາຍນ້ອຍໃຫຍ່ນຸ່ງເສື້ອໃໝ່."
1 2
|