ຢູ່ເຕລາວິຟແຫ່ງອິສຣາແອນເກີດການລະເບີດແບບຂ້າໂຕຕາຍ, ເຮັດໃຫ້ 40 ກວ່າຄົນຕາຍແລະບາດເຈັບ
cri
Author: MO
ຕາມຂ່າວCRI: ຕອນເດິກທ່ຽງຄືນຂອງວັນທີ 25 ກຸມພາ, ຢູ່ເມືອງເຕລາວິຟແຫ່ງອິສຣາແອນໄດ້ເກີດເຫດການລະເບີດແບບຂ້າໂຕຕາຍລາຍໜຶ່ງ, ຢ່າງໜ້ອຍເຮັດໃຫ້ 4 ຄົນຕາຍ, 38 ຄົນບາດເຈັບ.
ຕອນຮຸ່ງເຊົ້າວັນທີ 26 ກຸມພາ, ທ່ານເອເລັກຄັດ ຫົວໜ້າຜູ້ແທນເຈລະຈາຂອງປາເລັສຕີນໄດ້ກ່າວປະນາມຢ່າງຮຸນແຮງຕໍ່ເຫດການລະເບີດລາຍນີ້. ທ່ານເວົ້າວ່າ, ຜູ້ວາງແຜນເຫດການເຈຕະນາຜ່ານການກໍ່ການລະເບີດ, ທຳລາຍຄວາມພະຍາຍາມຂອງບັນດາຝ່າຍທີ່ກ່ຽວຂ້ອງໃນການຟື້ນຟູຂະບວນວິວັດສັນຕິພາບຄືນໃໝ່. ທ່ານອັບບາສ ປະທານອົງການອຳນາດແຫ່ງຊາດປາເລັສຕີນກ່າວວ່າ, ອົງການອຳນາດແຫ່ງຊາດປາເລັສຕີນຕັດສິນໃຈຈັບຜູ້ກໍ່ເຫດການລະເບີດລາຍນີ້ແລ້ວລົງໂທດຕາມກົດໝາຍ. ທ່ານອັບບາສຍັງຮຽກຮ້ອງໃຫ້ປາເລັສຕີນອິສຣາແອນດຳເນີນການສຳຫລວດຮ່ວມຕໍ່ເຫດການລາຍນີ້.
ຕາມຂ່າວແຈ້ງວ່າ, ຕອນຮຸ່ງເຊົ້າວັນທີ 26 ກຸມພາ, ເຈົ້າໜ້າທີ່ຊັ້ນສູງປາເລັສຕີນໄດ້ຈັດກອງປະຊຸມດ່ວນ, ຫາລືຜົນສະທ້ອນຕໍ່ສະຖານະການປາເລັສຕີນອິສຣາແອນຍ້ອນເຫດການລາຍນີ້ແລະມາດຕະການຮັບມື. ມື້ດຽວກັນ, ເຈົ້າໜ້າທີ່ຊັ້ນສູງຜູ້ໜຶ່ງຂອງກະຊວງການຕ່າງປະເທດອິສຣາແອນກ່າວວ່າ, ເຫດການລະເບີດລາຍນີ້ສະແດງໃຫ້ເຫັນວ່າ, ປາເລັສຕີນຕ້ອງຍົກເລີກອົງການຫົວຮຸນແຮງຢ່າງເຖິງຖອງ, ຖ້າບໍ່ດັ່ງນັ້ນ, ຂະບວນວິວັດສັນຕິພາບປາເລັສຕີນອິສຣາແອນກໍບໍ່ຫ່ອນຈະມີການຄືບໜ້າ.
ພາຍຫລັງເກີດເຫດການແລ້ວ, ທ່ານອານນານ ເລຂາທິການໃຫຍ່ສະຫະປະຊາຊາດກໍອອກຖະແຫລງການ, ກ່າວປະນາມຢ່າງຮຸນແຮງ.
|
|