ຕາມຂ່າວສານຊິນຮວາ: ຕອນກາງຄືນວັນທີ 25 ກຸມພາ ຢູ່ເມືອງເຕລາວິຟແຫ່ງອິສລາແອນ ໄດ້ເກີດເຫດການລະເບີດແບບສະຫຼະຊີວິດ, ວັນທີ 26 ກຸມພາ, ປະຊາຄົມໂລກໄດ້ພາກັນກ່າວປະນາມຢ່າງຮຸນແຮງ.
ຣັດເຊຍກ່າວປະນາມຢ່າງເດັດດ່ຽວທີ່ສຸດຕໍ່ການກະທຳກໍ່ການຮ້າຍດັ່ງກ່າວນີ້, ແລະຮຽກຮ້ອງໃຫ້ຜູ່ນຳປາເລັສຕິນຕ້ອງໃຊ້ມາດຕະການທຸກຢ່າງກັ້ນກາງການເຄື່ອນໄຫວຂອງພວກຫົວຈັດ, ແລະກ່າວວ່າຣັດເຊຍຈະນຳໃຊ້ທຸກໂອກາດທຳຄວາມພະຍາຍາມຈົນສຸດຂີດເພື່ອສະແຫວງຫາເຂດຕາເວັນອອກກາງບັນລຸສັນຕິພາບຖາວອນແລະທ່ຽງທຳ.
ອາເມລິກາ ສະຫະພາບເອີລົບແລະຕວກກີຕ່າງໄດ້ອອກຖະແຫຼງການ, ກ່າວປະນາມຢ່າງຮຸນແຮງຕໍ່ເຫດການລະເບີດ. ອາເມລິກາຍັງທວງໃຫ້ຝ່າຍປາເລັສຕິນໃຊ້ມາດຕະການໃນທັນທີ ລົງໂທດຜູ່ກໍ່ເຫດການລະເບີດຕາມກົດໝາຍ; ສະຫະພາບເອີລົບເຫັນວ່າເຫດການດັ່ງກ່າວເປັນການທຳລາຍຄວາມຫວັງໃໝ່ທີ່ຢາກໃຫ້ມີສັນຕິພາບລະຫວ່າງປາເລັສຕິນອິສລາແອນ, ກ່າວເນັ້ນວ່າປາເລັສຕິນອິສລາແອນຄວນທຳປະຕິກິລິຍາໃຕ້ປະຖົມປັດໄຈບໍ່ທຳລາຍໝາກຜົນຂະບວນວິວັດສັນຕິພາບໃນຫຼາຍສັບປະດາມານີ້ແລະສືບຕໍ່ຮັກສາການຕິດຕໍ່ພົວພັນກັນ.
ກ່ອນນີ້ມື້ໜຶ່ງ, ທ່ານອານນານ ເລຂາທິການໃຫຍ່ສະຫະປະຊາຊາດກໍ່ອອກຖະແຫຼງການ ກ່າວປະນາມຢ່າງຮຸນແຮງຕໍ່ເຫດການລະເບີດ.
|