|
|
(GMT+08:00)
2005-02-28 15:34:34
|
|
ໃຊ້ທ່າທີທີ່ມີສະຕິສຳປະຊັນຍະມາທັບມ້າງວົງວຽນຂອງກຳລັງຮຸນແຮງ
cri
Author: MO
ຕາມຂ່າວCRI: ເຫດການລະເບີດແບບຂ້າໂຕຕາຍທີ່ເກີດຂຶ້ນຢູ່ເຕລາວິຟໃນວັນທີ 25 ກຸມພາໄດ້ທຳລາຍສະພາບສະຫງົບອັນສັ້ນໆລະຫວ່າງປາເລັສຕີນອິສຣາແອນ, ທົ່ວໂລກລ້ວນແຕ່ສົນໃຈວ່າ ຍ້ອນເຫດການດັ່ງກ່າວ ປາເລັສຕີນອິສຣາແອນຈະຕົກຢູ່ໃນວົງວຽນທີ່ຕ້ານກຳລັງຮຸນແຮງດ້ວຍກຳລັງຮຸນແຮງອີກຫຼືບໍ່? ແລ້ວເສຍໂອກາດສັນຕິພາບທີ່ໄດ້ມາບໍ່ງ່າຍ? ແຕ່ວ່າ, ທ່າທີທີ່ມີສະຕິສຳປະຊັນຍະທີ່ລັດຖະບານແລະພົນລະເຮືອນຂອງປາເລັສຕີນອິສຣາແອນສະແດງອອກຫລັງເກີດເຫດການລະເບີດນັ້ນ ໄດ້ເຮັດໃຫ້ຊາວໂລກມີຄວາມໝັ້ນໃຈແລະຄວາມຫວັງຕໍ່ອະນາຄົດຂອງຂະບວນວິວັດສັນຕິພາບປາເລັສຕີນອິສຣາແອນ.
ພາຍຫລັງເກີດເຫດການລະເບີດຢູ່ເຕລາວິຟແລ້ວ, ປາເລັສຕີນໄດ້ໃຊ້ຄຳເວົ້າຮຸນແຮງທີ່ບໍ່ເຄີຍມີມາກ່ອນ ກ່າວປະນາມເຫດການລາຍນີ້. ທ່ານອັບບາສ ປະທານອົງການອຳນາດແຫ່ງຊາດປາເລັສຕີນຊີ້ອອກຢ່າງແຫຼມຄົມວ່າ, ຜູ້ບົງການໃນເຫດການລະເບີດແມ່ນນັກກົນອຸບາຍທີ່ເຈດຕະນາທຳລາຍຂະບວນວິວັດສັນຕິພາບ, ປາເລັສຕີນຕັດສິນໃຈຈັບຕົວພວກເຂົາແລ້ວລົງໂທດຕາມກົດໝາຍ, ບໍ່ອະນຸໂລມຢ່າງເດັດຂາດ.
ສິ່ງທີ່ເປັນໜ້າສົນໃຈນັ້ນແມ່ນ, ແຕ່ກ່ອນ, ເມື່ອເກີດເຫດການລະເບີດແບບຂ້າໂຕຕາຍຢູ່ໃນແດນອິສຣາແອນແລ້ວ, ອົງການຫົວຮຸນແຮງປາເລັສຕີນມັກເປີດປ່າວຢ່າງໄວວາແລະເປັນເຈົ້າການວ່າຮັບຜິດຊອບຕໍ່ເຫດການ, ແຕ່ໃນເທື່ອນີ້, ອົງການຫົວຮຸນແຮງຕ່າງໆຂອງປາເລັສຕີນພັດທະຍອຍກັນປະຕິເສດບໍ່ຮັບຮູ້ວ່າມີການກ່ຽວພັນກັບເຫດການລາຍນີ້. ຫາງສຽງທ້ອງຖິ່ນເຫັນວ່າ, ນີ້ຕົ້ນຕໍແມ່ນຍ້ອນສະພາບພາຍໃນປາເລັສຕິນໄດ້ມີການປ່ຽນແປງຫລວງຫລາຍ. ພາຍຫລັງທ່ານອັບບາສຂຶ້ນຄອງອຳນາດແລ້ວ, ສະຖານະການປາເລັສຕີນອິສຣາແອນໄດ້ປະກົດມີສະພາບຜ່ອນຍານທີ່ຫາຍາກ. ໃຕ້ຄວາມພະຍາຍາມຂອງທ່ານອັບບາສ, ອິສຣາແອນເຫັນດີຜ່ອນສັ້ນຜ່ອນຍາວຢ່າງເປັນລະບົບຕໍ່ຝ່າຍປາເລັສຕີນ, ປະຊາຄົມໂລກກໍພາກັນສະໜອງຄວາມຊ່ອຍເຫຼືອດ້ານການເມືອງແລະເສດຖະກິດໃຫ້ປາເລັສຕີນ. ໄທເມືອງປາເລັສຕີນເຫັນໂດຍທົ່ວໄປວ່າ, ນະໂຍບາຍການເຈລະຈາສັນຕິພາບຂອງທ່ານອັບບາສແມ່ນມີຜົນສັກສິດ, ແລະຝາກຄວາມຫວັງຫລາຍຕໍ່ທ່ານ. ອົງການຫົວຮຸນແຮງກໍ່ເລື່ອງກໍ່ລາວໃນເວລາຫົວລ້ຽວຫົວຕໍ່ທີ່ປະຊາຊົນປາເລັສຕີນໃກ້ຈະໄດ້ຮັບ"ໝາກຜົນສັນຕິພາບ"ນັ້ນ, ແນ່ນອນແລ້ວວ່າແມ່ນເລື່ອງບໍ່ຖືກໃຈຄົນ.
ພາຍຫລັງເກີດເຫດການລະເບີດແລ້ວ, ອິສຣາແອນກໍໄດ້ສະແດງຄວາມອົດກັ້ນໄວ້ແລະໃຊ້ທ່າທີຕ່ຳທີ່ຕ່າງກັບແຕ່ກ່ອນ. ເມື່ອກ່ອນ, ອິສຣາແອນມັກໃຊ້ການເຄື່ອນໄຫວແກ້ແຄ້ນທາງການທະຫານຢ່າງຂະໜາດໃຫຍ່ໃນທັນທີ, ແຕ່ເທື່ອນີ້, ອິສຣາແອນບໍ່ໄດ້ໃຊ້ວິທີການແກ້ແຄ້ນທາງການທະຫານ, ຫາກໃຊ້ກຳລັງໜິບທາງການເມືອງແລະທາງການທູດຕໍ່ຝ່າຍປາເລັສຕີນ, ບັງຄັບໃຫ້ປາເລັສຕີນໃຊ້ມາດຕະການໂຈມຕີອົງການຫົວຮຸນແຮງ. ຫາງສຽງອິສຣາແອນກໍສະແດງທ່າທີທີ່ມີສະຕິສຳປະຊັນຍະຢ່າງສູງສົ່ງ, ພາກັນຮຽກຮ້ອງໃຫ້ລັດຖະບານຈົ່ງໃຫ້ເວລາດົນແດ່ແລະມີຈິດໃຈອົດທົນແກ່ທ່ານອັບບາສ.
ທ່າທີອົດກັ້ນຂອງຝ່າຍອິສຣາແອນຕົ້ນຕໍມີສາມປັດໃຈດັ່ງລຸ່ມນີ້: ກ່ອນອື່ນ, ຊັ້ນຜູ້ນຳແລະພົນລະເມືອງປາເລັສຕີນລ້ວນແຕ່ໄດ້ສະແດງຄວາມຈິງໃຈຕໍ່ສັນຕິພາບຫລາຍສົມຄວນ, ສ່ວນຄວາມຫຍຸ້ງຍາກຂອງຝ່າຍປາເລັສຕີນໃນດ້ານໂຈມຕີອົງການຫົວຮຸນແຮງນັ້ນກໍແມ່ນໄດ້ເຫັນມາແລ້ວ; ຖັດມາ, ພຶດຕິກຳຢັ້ງຢືນໃຫ້ເຫັນວ່າ, ມີແຕ່ຮ່ວມມືກັບອົງການນຳປາເລັສຕີນທີ່ມີຄວາມຈິງໃຈໃນສັນຕິພາບທໍ່ນັ້ນ, ອິສຣາແອນຈຶ່ງຈະປົວແປງສະພາບແວດລ້ອມຄວາມປອດໄພຂອງຕົນຈາກດ້ານກົກຮາກໄດ້; ສາມ, ອາເມລິາກໄດ້ພິຈາລະນາຈາກຜົນປະໂຫຍດຍຸດທະສາດຕາເວັນອອກກາງໃຫຍ່, ຫວັງໃຫ້ອິສຣາແອນຮັກສາຄວາມອົດກັ້ນໄວ້ຕໍ່ການທ້າທາຍຂອງອົງການຫົວຮຸນແຮງປາເລັສຕີນ, ຫລີກເວັ້ນບໍ່ໃຫ້ສະຖານະການຊຸດຮ້າຍລົງ.
ບຸກຄົນວິເຄາະຊີ້ອອກວ່າ, ໃນການປະທະກັນລະຫວ່າງປາເລັສຕີນອິສຣາແອນໃນ 4 ປີກວ່າມານີ້, ເຄີຍເກີດສະພາບການຕັ້ງຫລາຍເທື່ອທີ່ລູກລະເບີດລູກໜຶ່ງກໍເຮັດໃຫ້ສອງຝ່າຍຕົກຢູ່ໃນສະພາບໝູນວຽນດ້ວຍກຳລັງຮຸນແຮງຄືນໃໝ່. ການທີ່ສອງຝ່າຍປາເລັສຕິນອິສຣາແອນສາມາດຮັກສາຄວາມໃຈເຢັນແລະຄວາມອົດກັ້ນ, ຊຳລະວິກິດການເທື່ອນີ້ຢ່າງເໝາະສົມໄດ້ຫຼືບໍ່, ແມ່ນຂໍກະແຈທີ່ທັບມ້າງວົງວຽນຕ້ານກຳລັງຮຸນແຮງດ້ວຍກຳລັງຮຸນແຮງລະຫວ່າງປາເລັສຕີນອິສຣາແອນ, ແລະເລີ່ມຕົ້ນຂະບວນວິວັດສັນຕິພາບຄືນໃໝ່.
|
|
|