|
ສະບາຍດີທ່ານຜູ່ຟັງທີ່ໂຄລົບ, ລາຍການນິທານສຸພາສິດໄດ້ວຽນມາພົບກັບທ່ານອີກຕາມເຄີຍ, ໃນລາຍການພາກນີ້, ຂ້າພະເຈົ້າອຸດົມຈະເລົ່ານິທານເລື່ອງ "ປິ່ງເຟີຍຕໍ່ອີ້" ແປວ່າ "ພົນທະຫານບໍ່ແມ່ນຍິ່ງຫຼາຍຍິ່ງດີ" ສູ່ຟັງ. ນິທານເລື່ອງນີ້ໄດ້ບັນທຶກໄວ້ໃນປື້ມ "ບົດການເຄື່ອນທັບ" ຂອງຊຸນຈື ນັກການທະຫານທີ່ມີຊື່ສຽງໃນສະໄໝຊຸນຊິວຍຸດທະຈັກຂອງຈີນ. ໃນປື້ມ "ບົດການເຄື່ອນທັບ" ໄດ້ຊີ້ອອກວ່າ, ພົນທະຫານບໍ່ແມ່ນຍິ່ງຫຼາຍຍິ່ງດີ, ທະແນມແຕ່ບໍ່ແມ່ນມົວແຕ່ບຸກໄປໜ້າໂດຍອາໄສກຳລັງອາວຸດຂອງຕົນ, ແລະສາມາດເຕົ້າໂຮມກຳລັງທະຫານ ວິນິດໄສສະພາບຂອງສັດຕູຢ່າງຖືກຕ້ອງ ໄດ້ຮັບຄວາມໄວ້ເນື້ອເຊື່ອໃຈແລະການສະໜັບສະໜູນຈາກລູກນ້ອງແລ້ວ, ກໍ່ຈະເອົາຊະນະສັດຕູໄດ້. ກອງທະຫານ "ແຢ້ເຈ່ຍຈິ່ນ" ແລະກອງທະຫານ "ຊິເຈ່ຍຈິ່ນ" ທີ່ມີຊື່ລືນາມໃນປະຫວັດສາດຈີນໄດ້ພິສູດທັດສະນະດັ່ງກ່າວຂອງຊຸນຈືດ້ວຍຜົນສູ້ລົບທີ່ດົ່ງດັງ.
ກອງທະຫານ "ແຢ້ເຈ່ຍຈິ່ນ" ແມ່ນຄຳທີ່ຄົນທັງຫຼາຍເອີ້ນກອງທະຫານທີ່ນຳພາໂດຍແຢ້ເຟີຍ ແມ່ທັບຕ້ານລັດຈິ່ນທີ່ມີຊື່ສຽງໃນລາຊະວົງໜານຊົ້ງ. ໃນຫົວທີ, ກອງທະຫານ "ແຢ້ເຈ່ຍຈິ່ນ" ມີພຽງໜຶ່ງໝື່ນກວ່າຄົນ, ພາຍຫຼັງມາໄດ້ເຕີບໂຕຂຶ້ນຢ່າງບໍ່ຢຸດຢັ້ງໃນການຕໍ່ສູ້ຕ້ານ ລັດຈິ່ນ, ໄດ້ເພີ່ມຂຶ້ນຮອດ 1 ແສນກວ່າຄົນ, ກາຍເປັນກຳລັງແງ່ຫຼວງຂອງລາຊະວົງໜານຊົ້ງໃນການຕ້ານລັດຈິ່ນ.
ກອງທະຫານ "ແຢ້ເຈ່ຍຈິ່ນ" ທີ່ແຢ້ເຟີຍສ້າງຕັ້ງຂຶ້ນນັ້ນ ລ້ວນແຕ່ແມ່ນຊາວໜຸ່ມທີ່ມີນ້ຳໃຈອຸທິດໃຫ້ພາລະກິດຕ້ານລັດຈິ່ນທີ່ໄດ້ຜ່ານການຄັດເລືອກຢ່າງເຂັ້ມງວດ, ແຢ້ເຟີຍມີເຈດຈຳນົງວ່າ ໃນການສູ້ລົບນັ້ນ, ພົນທະຫານທີ່ເກັ່ງກ້າຈິ່ງແມ່ນປັດໄຈສຳຄັນ, ຫາກບໍ່ແມ່ນຍິ່ງຫຼາຍຍິ່ງດີ. ໃນຍາມທຳມະດາ, ກອງທະຫານທີ່ນຳໂດຍແຢ້ເຟີຍນັ້ນໄດ້ຂະຫຍັນຝຶກແອບ, ຊຳນານຍຸດທະວິທີໃນການສູ້ລົບ, ໃນເວລາສູ້ລົບກໍ່ກ້າຫານ. ກອງທະຫານ "ແຢ້ເຈ່ຍຈິ່ນ" ໄດ້ເຄື່ອນທັບຂຶ້ນພາກເໜືອຈີນແລະຜາບແພ້ກອງທະຫານລັດຈິ່ນຫຼາຍເທື່ອ, ໄດ້ກູ້ເອົາດິນແດນຜືນໃຫຍ່ຄືນມາ, ຈົນກອງທະຫານລັດຈິ່ນກໍ່ອຸທານວ່າ: ສັ່ນຄອນໜ່ວຍພູງ່າຍ, ສັ່ນຄອນກອງທະຫານ "ແຢ້ເຈ່ຍຈິ່ນ" ຍາກ!
ກອງທະຫານ "ຊິເຈ່ຍຈິ່ນ" ແມ່ນຄຳທີ່ຄົນທັງຫຼາຍມັກເອີ້ນກອງທະຫານທີ່ນຳໂດຍຊິຈີ້ກ່ວງ ແມ່ທັບຕ້ານໂຈນສະຫຼັດຍີ່ປຸ່ນໃນສະໄໝລາຊະວົງໝິງ. ເມື່ອປີ 1557, ເພື່ອຕ້ານກັບໂຈນສະຫຼັດຍີ່ປຸ່ນທີ່ຮຸກຮານແຄມທະເລແຂວງເຈີ້ຈຽງ, ເຈົ້າຊີວິດເຈ່ຍຈິ້ງຂອງລາຊະວົງໝິງໄດ້ຊົງແຕ່ງຕັ້ງຊິຈີ້ກ່ວງເປັນນາຍພົນ, ໄປນຳພາການຕ້ານໂຈນສະຫຼັດຍີ່ປຸ່ນຢູ່ແຂວງເຈີ້ຈຽງ.
ພາຍຫຼັງຊິຈີ້ກ່ວງໄປຮອດແຂວງເຈີ້ຈຽງແລ້ວ, ກໍ່ໄດ້ຮັບສະໝັກຊາວນາແລະກຳມະກອນບໍ່ແຮ່ 3000 ຄົນຈາກແຖບອີ້ອູ່ແຂວງເຈີ້ຈຽງ, ເລີ່ມຝຶກແອບແລະສ້າງເປັນກອງທະຫານໃໝ່. ຊິຈີ້ກ່ວງໄດ້ຍຶດຖືຫຼັກການສອງຂໍ້ຢ່າງສະເໝີຕົ້ນສະເໝີປາຍ, ຄື ໜຶ່ງແມ່ນຄັດເລືອກຢ່າງພຽນໃຈ, ສອງແມ່ນຝຶກແອບຢ່າງເຂັ້ມງວດ. ຊິຈີ້ກ່ວງສອນໃຫ້ພົນທະຫານຕ້ອງ "ເປັນຄົນດີແລະມີອຸດົມການ" "ຖືເອົາການປົກປັກຮັກສາປະຊາຊົນເປັນພາລະໜ້າທີ່".
ປີທີ 40 ຂອງລາຊະການເຈ່ຍຈິ້ງຂອງລາຊະວົງໝິງ, ຊິຈີ້ກ່ວງໄດ້ນຳພາກອງທະຫານ "ຊິເຈ່ຍຈິ່ນ" ສູ້ກັບໂຈນສະຫຼັດຍີ່ປຸ່ນຢູ່ລິນໄຫແຂວງເຈີ້ຈຽງ, ກອງທະຫານ "ຊິເຈ່ຍຈິ່ນ" ສູ້ກັບໂຈນສະຫຼັດຍີ່ປຸ່ນ 9 ເທື່ອແລະໄດ້ຮັບໄຊຊະນະ 9 ເທື່ອ, ໄດ້ໂຈມຕີໂຈນສະຫຼັດຍີ່ປຸ່ນຢ່າງໜັກໜ່ວງ, ໄດ້ປາບໂຈນສະຫຼັດຍີ່ປຸ່ນຢູ່ແຂວງເຈີ້ຈຽງຢ່າງຮາບຄາບ.
ປະຈຸບັນ, ວິສາຫະກິດຢ່າງຫຼວງຫຼາຍກໍ່ສຸດທີ່ເອົາໃຈໃສ່ນຳການຄຸ້ມຄອງຊັບພະຍາກອນມະນຸດ, ເອົາໃຈໃສ່ນຳການອົບຮົມຈິດໃຈຮວມໝູ່, ຈຸດປະສົງກໍ່ແມ່ນເພື່ອອົບຮົມພະນັກງານຜູ່ດີເດັ່ນຂອງວິສາຫະກິດ, ຍົກປະສິດທິຜົນຂອງວິສາຫະກິດໃຫ້ສູງຂຶ້ນ. ທັງນີ້ໄດ້ສະແດງໃຫ້ເຫັນວ່າ, ແນວຄິດຂອງຊຸນຈືທີ່ວ່າ "ພົນທະຫານບໍ່ແມ່ນຍິ່ງຫຼາຍຍິ່ງດີ" ກໍ່ມີບົດບາດຢ່າງກວ້າງຂວາງໃນຂົງເຂດທຸລະກິດຂອງວິສາຫະກິດສະໄໝປະຈຸບັນ.
ເລື່ອງທີ່ໜ້າສົນໃຈນັ້ນແມ່ນ ຄຳວ່າ "ພົນທະຫານບໍ່ແມ່ນຍິ່ງຫຼາຍຍິ່ງດີ" ນັ້ນ ກໍ່ບໍ່ແມ່ນວ່າພົນທະຫານຍິ່ງໜ້ອຍຍິ່ງດີ, ຫາກແມ່ນຍິ່ງດີເດັ່ນຍິ່ງດີ. ແລະໃນຂະນະດຽວກັນ ຍັງໄດ້ເນັ້ນໜັກວ່າ ໃນບັ້ນລົບໃດໜຶ່ງ ຕ້ອງຊ່າງເຕົ້າໂຮມກອງທະຫານດີເດັ່ນ ເພື່ອໃຫ້ຝ່າຍຕົນເອງຢູ່ໃນທ່າເໜືອກວ່າໃນພາກສ່ວນໜຶ່ງ, ເພື່ອໄດ້ຮັບຜົນສູ້ລົບທີ່ດີທີ່ສຸດ.
|
