|
ປັດຈຸບັນຢູ່ເຂດພາກເຫນືອຂອງຈີນພວມແມ່ນຍາມລົມແຮງ,ແຕ່ກ່ອນ,ກ່ອນແລະຫລັງໄຂກອງປະຊຸມສອງສະພາ,ປັກກິ່ງກໍ່ຈະມີລົມຂີ້ຊາຍພັດຂຶ້ນເລື້ອຍໆ,ແຕ່ປີນີ້ ຈົນຮອດດຽວນີ້ຍັງບໍ່ໄດ້ມີລົມຂີ້ຊາຍເທື່ອ, ຈິ່ງເຮັດໃຫ້ທ່ານເສິນໂຊເພິງ ຜູ່ແທນສະພາປະຊາຊົນແຫ່ງຊາດຈີນທີ່ມາຮ່ວມປະຊຸມນັ້ນມີຄວາມຮູ້ສຶກຢ່າງເລິກເຊິ່ງ.
ທ່ານເວົ້າວ່າ:"ມີນະໂຍບາຍດີ ຄົນກໍ່ພະຍາຍາມ ອາກາດກໍ່ອຳນວຍ, ທັງຫມົດເຫລົ່ານີ້ໄດ້ນຳເອົາລະດູບານໃຫມ່ຢ່າງແທ້ຈິງມາໃຫ້ປັກກິ່ງ."ທ່ານເສິນໂຊເພິງເວົ້າວ່າ,ໂຄງການຊີວະພາບທີ່ລັດລົງທຶນກ້ອນໃຫຍ່ຄື ການປົວແປງແຫລ່ງພາຍຸຂີ້ຊາຍຢູ່ປັກກິ່ງແລະທຽນສິນ ການສ້າງປ່າໄມ້ປ້ອງກັນພາກຕາເວັນຕົກສຽງເຫນືອ ການເຊົາປູກຝັງສ້າງປ່າຄືນໃຫມ່ແລະການເຊົາລ້ຽງສັດປູກທົ່ງຫຍ້າຄືນໃຫມ່ເຫລົ່ານີ້ເປັນຕົ້ນໄດ້ເລີ່ມປະກົດມີຜົນແລ້ວ.
ຜູ່ຊ່ຽວຊານຂອງສະຖານີອຸຕຸນິຍົມປັກກິ່ງແນະນຳວ່າ, ແຕ່ເຂົ້າສູ່ລະດູບານໃຫມ່ປີນີ້ມາ, ປັກກິ່ງບໍ່ພຽງແຕ່ບໍ່ໄດ້ຖືກພາຍຸຂີ້ຊາຍກະຫນ່ຳທໍ່ນັ້ນ, ຈົນຮອດລົມຂີ້ຊາຍກໍ່ບໍ່ໄດ້ເກີດຂຶ້ນເທື່ອ,ນີ້ແມ່ນບໍ່ເຄີຍມີໃນໄລຍະດຽວກັນໃນຫລາຍປີນີ້.
ທ່ານເສິນໂຊ້ເພິງເປັນປະທານສະມາຄົມສົ່ງເສີມການຄົ້ນຄວ້າປົວແປງພາຍຸຂີ້ຊາຍຂອງເຂດມົງໂກໃນຈີນ,ທ່ານໄດ້ເປັນຜູ່ແທນສະພາປະຊາຊົນແຫ່ງຊາດສາມສະໄຫມລຽນຕິດແລ້ວ. ໃນ 10 ກວ່າປີມານີ້ ທ່ານໄດ້ເຫັນການປ່ຽນແປງຂອງລະດູປານໃຫມ່ຢູ່ນະຄອນຫລວງປັກກິ່ງດ້ວຍປະສົບການຂອງຕົນເອງ.
"ໃນຫລາຍມື້ມານີ້, ປັກກິ່ງກໍ່ມີລົມແຮງເລື້ອຍໆ, ວັນທີ 4 ມີນາ ໃນມື້ໄຂກອງປະຊຸມກຽມ,ກໍ່ລົມແຮງຫລາຍ, ຈົນຂ້າພະເຈົ້າຕັ້ງໄວ້ບໍ່ຢູ່,ແຕ່ຊ້ຳພັດບໍ່ມີຂີ້ຝຸ່ນ."ແຕ່ສະພາບພາຍຸຂີ້ຊາຍກະຫນ່ຳເມື່ອຫລາຍປີກ່ອນ,ທ່ານເສິນໂຊເພິງ ຍັງຈື່ບໍ່ລືມເທື່ອ."ທ່ານເວົ້າວ່າ,ຕົ້ນເດືອນເມສາປີ 2000, ກອງປະຊຸມສອງ ສະພາຫາກໍ່ສິ້ນສຸດລົງ,ພາຍຸຂີ້ຊາຍກະຫນ່ຳເຂດປັກກິ່ງ, ຈົນເຮັດໃຫ້ຖ້ຽວບິນຮ້ອຍກວ່າຖ້ຽວຢູ່ສະຫນາມບິນນະຄອນຫລວງຕ້ອງເລື່ອນເວລາ."
ເອກະສານຂອງພະແນກອຸຕຸນິຍົມສະແດງໃຫ້ຫັນວ່າ, ແຕ່ປີ 1998 ຫາປີ 2002, ເຂດພາກເຫນືອຂອງຈີນເກີດພາຍຸຂີ້ຊາຍເພີ່ມຫລາຍຂຶ້ນຊັກໄຊ້, ໃນມື້ທີ່ມີລົມຂີ້ຊາຍປະສົບກັບຝົນຕົກພ້ອມກັນນັ້ນ, ຍັງຈະພາໃຫ້ປັກກິ່ງແລະເຂດພາກເຫນືອຈີນມີຝົນຂີ້ຕົມຕົກໃນບໍລິເວນກວ້າງຂວາງ,ທັງກະທົບເຖິງເຂດກວ້າງຂວາງຢູ່ເບື້ອງເຫນືອແມ່ນ້ຳຢາງເຊ.ປີ 2003, ນະຄອນປັກກິ່ງໄດ້ເກີດພາຍຸດິນຊາຍພຽງແຕ່ 3 ເທື່ອ,ແມ່ນປີທີ່ເກີດພາຍຸຊີ້ຊາຍຫນ້ອຍກວ່າຫມູ່ໃນຫລາຍປີມານີ້.
ທ່ານເສິນໂຊເພິງເຮັດວຽກແລະດຳລົງຊີວິດຢູ່ມົງໂກໃນເປັນເວລາດົນ ນານ,ທ່ານໄດ້ເຫັນຂະບວນການບຸກເບີກກໍ່ສ້າງທົ່ງຫຍ້າເນື້ອທີ່ກວ້າງແບບທຳລາຍໃນຊຸມປີ 50-60 ສະຕະວັດແລ້ວນີ້ກັບຕາຕົນເອງ.ທ່ານພັນລະນາໂສກນາຕະກຳທີ່ທຳການຕັດສິນຢ່າງຫລັບຫູຫລັບຕາວ່າ:" ປີຫນຶ່ງ ສ້າງທົ່ງຫຍ້າ, ສອງປີສາມປີປູກທັນຍາຫານ, ຫ້າປີກາຍເປັນທະເລຊາຍ."ທ່ານຖືວ່າອາກາດດຽວນີ້ດີຂຶ້ນແມ່ນຍ້ອນສູນກາງໄດ້ອອກແຮງສົ່ງເສີມໃຫ້ສ້າງແລະປະຕິບັດພັດທະນະທັດວິທະຍາສາດ ຍຶດຫມັ້ນປະຕິບັດນະໂຍບາຍສ້າງສາຊີວະພາບຢ່າງຫມັ້ນຫນຽວບໍ່ປ່ຽນແປງ.ປັດຈຸບັນ, ອັດຕາປ່າໄມ້ປົກຫຸ້ມຂອງມົງໂກໃນໄດ້ເພີ່ມຈາກ 14,82% ໃນປີ 1998 ຂຶ້ນຮອດ 17,57%ໃນປີ 2004,ເນື້ອທີ່ທົ່ງຫຍ້າທີ່ໃຊ້ໄດ້ມີ 60% ໄດ້ຫ້າມລ້ຽງສັດແລະເຊົາລ້ຽງສັດຊົ່ວຄາວແລ້ວ.
|
