|
ສະບາຍດີທ່ານຜູ່ຟັງທີ່ໂຄລົບ, ຍິນດີຕ້ອນຮັບທ່ານເຂົ້າສູ່ລາຍການນິທານສຸພາສິດ. ໃນລາຍການພາກນີ້, ຂ້າພະເຈົ້າຈະເລົ່າເລື່ອງປະຫວັດສາດ "ສິງເຢິນເອີຫວໍອູສິງ" ໝາຍຄວາມວ່າ "ໃຊ້ກົນອຸບາຍໃຫ້ເຫັນຮອຍສັດຕູ ແຕ່ບໍ່ໃຫ້ສັດຕູເຫັນຮອຍເຮົາ" ສູ່ຟັງ, ຫວັງວ່າທ່ານຄົງຈະມັກ.
ຊຸນອູ ນັກການທະຫານທີ່ມີຊື່ສຽງໃນສະໄໝບູຮານຂອງຈີນໄດ້ຂຽນໃນ "ຊຸນຈືປິງຝາ" ຕຳລາພິໄຊສົງຄາມທີ່ມີຊື່ສຽງດົ່ງດັງຂອງເພິ່ນວ່າ: ໃຊ້ກົນອຸບາຍໃຫ້ເຫັນຮອຍຝ່າຍສັດຕູ, ແຕ່ບໍ່ໃຫ້ຝ່າຍສັດຕູເຫັນຮອຍຂອງຝ່າຍເຮົາ, ເມື່ອເປັນຈັ່ງຊັ້ນ, ກຳລັງທະຫານຂອງຝ່າຍເຮົາຈະເປັນກ້ອນກຳລັງດຽວ ສ່ວນກຳລັງທະຫານຂອງສັດຕູພັດແຍກອອກເປັນຫຼາຍກອງ. ກຳລັງທະຫານຂອງຝ່າຍເຮົາໂຮມກັນເປັນກອງກຳລັງດຽວ, ສ່ວນກຳລັງທະຫານຂອງສັດຕູພັດແຍກອອກເປັນ 10 ກອງ, ກໍ່ເທົ່າກັບໃຊ້ກຳລັງທະຫານຫຼາຍກວ່າຝ່າຍສັດຕູ 10 ເທົ່າໄປບຸກໂຈມຕີສັດຕູ, ຝ່າຍເຮົາຈະຢູ່ໃນທ່າແຮງຍ້ອນກຳລັງທະຫານຫຼາຍກວ່າຝ່າຍສັດຕູ.
ໃນຊູ່ມື້ນີ້ ນັກການທະຫານໄດ້ສະຫຼຸບແນວຄິດດັ່ງກ່າວເປັນ "ຊື້ສິງຕົ້ງຕີ", ໝາຍເຖິງ "ເຄື່ອນຍ້າຍສັດຕູດ້ວຍການປະກົນລວງຕາ, ຫຼອກໃຫ້ສັດຕູທຳການວິນິດໄສຢ່າງຜິດພາດ, ແລ້ວສ້າງໂອກາດສູ້ລົບທີ່ມີຜົນດີແກ່ຝ່າຍຕົນ". ເຮີ້ຣໍ້ປີ້ ແມ່ທັບລາຊະວົງສຸຍຂອງຈີນທີ່ລືຊື່ກໍ່ເຄີຍໃຊ້ກົນອຸບາຍດັ່ງກ່າວຢ່າງສຳເລັດຜົນ.
ປີ 588 ຄິດຕະສັງກາດ, ເຮີ້ຣໍ້ປີ້ ແມ່ທັບລາຊະວົງສຸຍໄດ້ນຳພາກອງທະຫານເຄື່ອນທັບຈາກກວາງຫຼິງໄປຂ້າມແມ່ນ້ຳຢູ່ກວ່າໂຈ່ວ, ເພື່ອບຸກໂຈມຕີລັດເສິນ. ເພື່ອປິດບັງເຈດຕະນາຂ້າມແມ່ນ້ຳ, ເຮີ້ຣໍ້ປີ້ໄດ້ເຊື່ອງເຮືອຈຳນວນຫຼວງຫຼາຍທີ່ຊື້ມາໃໝ່, ແຕ່ພັດວາງເຮືອທີ່ເປ່ເພ 50-60 ລຳຢູ່ໃນຄອງເໝືອງແຄມແມ່ນ້ຳ, ຕັ້ງແກ້ງເຜີຍໃຫ້ນັກສືບສອດແນມລັດເສິນໄດ້ເຫັນ.
ນັກສືບສອດແນມລັດເສິນບໍ່ຮູ້ວ່ານີ້ເປັນກົນອຸບາຍຂອງເຮີ້ຣໍ້ປີ້,ເມື່ອໄດ້ເຫັນມີແຕ່ເຮືອເປ່ເພຫຼາຍສິບລຳກໍ່ນຶກວ່າກອງທະຫານລາຊະວົງສຸຍບໍ່ອາດຂ້າມແມ່ນ້ຳໄດ້.
ເພື່ອຫຼອກລວງຝ່າຍສັດຕູຕື່ມອີກແລະເຄື່ອນຍ້າຍທະຫານຂອງຝ່າຍສັດຕູ, ກ່ອນຈະເປີດບັ້ນລົບ, ເຮີ້ຣໍ້ປີ້ຍັງໄດ້ປ່ຽນຍາມກອງທະຫານປ້ອງກັນຢູ່ແຄມແມ່ນ້ຳຢ່າງເນື່ອງນິດ, ປັກທຸງໄວ້ຢ່າງຫຼວງຫຼາຍ, ແລະຕັ້ງຄ້າຍທະຫານເຕັມທົ່ງ.
ກອງທະຫານລັດເສິນນຶກວ່າກອງທະຫານລາຊະວົງສຸຍຈະບຸກເຂົ້າມາ, ເລີຍຕັ້ງແຖວຕັ້ງທ່າກຽມສູ້ລົບ. ພາຍຫຼັງມາພັດເຫັນວ່າແມ່ນກອງທະຫານລາຊະວົງສຸຍປ່ຽນຍາມ, ເລີຍຖອນທະຫານກັບຄືນ. ພາຍຫຼັງມາ, ກອງທະຫານລາຊະວົງສຸຍປ່ຽນຍາມຢ່າງເນື່ອງນິດ, ກອງທະຫານລັດເສິນເຄີຍຊິນແລ້ວ, ເລີຍບໍ່ໄດ້ລະມັດລະວັງ.
ໃນເວລາກອງທະຫານປ້ອງກັນຢູ່ແຄມແມ່ນ້ຳຂອງລັດເສິນລະເຫຼິງສະຕິລະວັງຕົວນັ້ນ, ເຮີ້ຣໍ້ປີ້ໄດ້ນຳພາກອງທະຫານຂ້າມແມ່ນ້ຳຢ່າງກະທັນຫັນ, ຍຶດໄດ້ຈິງໂຄວໃນພິບຕາດຽວ. ໃນຄາວນັ້ນ ເມື່ອສັງເກດຈາກເງື່ອນໄຂນອກຕົວແລ້ວເຫັນວ່າ, ໃນບັ້ນລົບຄັ້ງນີ້ ເມື່ອທຽບກັບກອງທະຫານລັດເສິນແລ້ວ ກອງທະຫານລາຊະວົງສຸຍບໍ່ມີທ່າແຮງ. ມູນເຫດທີ່ເຮີ້ຣໍ້ປີ້ໄດ້ຮັບໄຊຊະນະນັ້ນແມ່ນເພິ່ນໄດ້ໃຊ້ກົນອຸບາຍ "ເຄື່ອນຍ້າຍຝ່າຍສັດຕູດ້ວຍປະກົດການລວງຕາ ແລ້ວທຳການວິນິດໄສຢ່າງຜິດພາດ, ສ້າງໂອກາດສູ້ລົບທີ່ມີຜົນດີແກ່ຝ່າຍຕົນ".
ໃນການແກ່ງແຍ່ງກັນຢ່າງດຸເດືອດນັ້ນ, ຜ່ານຈາກການໃຊ້ກົນອຸບາຍ "ໃຫ້ເຫັນຮອຍຝ່າຍສັດຕູ ແຕ່ບໍ່ໃຫ້ຝ່າຍສັດຕູເຫັນຮອຍຂອງຝ່າຍເຮົາ" ຢ່າງເໝາະສົມ, ຈະສາມາດຮູ້ແຈ້ງເຈດຕະນາແລະກຳລັງຂອງຄູ່ປໍລະປັກ, ສະໜອງຫຼັກອ້າງອີງທີ່ໄວ້ໃຈໄດ້ໃຫ້ແກ່ການຕົກລົງຢ່າງຖືກຕ້ອງ, ທັງສາມາດຫຼີກເວັ້ນບໍ່ໃຫ້ແຜນການຂອງຕົນເສຍລັບກ່ອນ, ແລ້ວຫຼຸດກຳລັງສະກັດກັ້ນທີ່ບໍ່ຈຳເປັນໃຫ້ໜ້ອຍລົງ.
|
