|
ມືທັງສອງເບື້ອງປ່ຽນແປງວັບໆ, ສະແດງໃຫ້ເຫັນຄວາມປາຖະຫນາແລກປ່ຽນຄວາມຄິດຄວາມເຫັນຢ່າງແຮງກ້າ,ປະກົດການອັນປະຫລາດນີ້ໄດ້ເກີດຂຶ້ນຢູ່ທີ່ປະຊຸມຂອງຫນ່ວຍໃນກອງປະຊຸມສະພາປຶກສາການເມືອງແຫ່ງຊາດຈີນຄັ້ງທີ 3 ສະໄຫມທີ 10. ນີ້ບໍ່ແມ່ນວ່າກຳມະການຜູ່ນີ້ມັກເວົ້າເຮັດໄມ້ເຮັດມືຫລາຍເກີນໄປໃນເວລາປາກເວົ້າ,ພຽງແຕ່ແມ່ນຍ້ອນວ່າເພິ່ນແມ່ນຄົນຫູຫນວກປາກກືກຜູ່ຫນຶ່ງ.
ທ່ານຢູປິງ ກຳມະການທີ່ເຂົ້າຮ່ວມການອະພິປາຍໃນຫນ່ວຍວົງການສະຫວັດດີການສັງຄົມແລະຄ້ຳປະກັນສັງຄົມຂອງສະພາປຶກສາການເມືອງແຫ່ງຊາດຈີນດ້ວຍພາສາໃບ້ຜູ່ນີ້ແມ່ນຄົນຫູຫນວກປາກກືກພຽງຜູ່ດຽວໃນກຳມະການ 2295 ທ່ານຂອງສະພາປຶກສາການເມືອງສະໄຫມນີ້.
ທ່ານຢູປິງ ທີ່ມາຈາກເມືອງຊາງຊຸນແຂວງຈີລິນ,ມີສີຫນ້າດຳກ່ຳ,ອ້ວນທ້ວນ.ອາໃສຜູ່ແປພາສາໃບ້, ທ່ານບອກນັກຂ່າວວ່າ, ຕົນເອງໄດ້ເສຍຄວາມວິນຍານໃນເວລາອາຍຸ 1 ຂວບຍ້ອນອຸປະຕິເຫດການປິ່ນປົວ,ເລີຍຕ້ອງດຳລົງຊີວິດຢູ່ໃນໂລກທີ່ບໍ່ມີສຽງ. ຜ່ານການຮ່ຳຮຽນຢ່າງດຸຫມັ່ນພາກພຽນ,ທ່ານໄດ້ເຂົ້າຮ່ຳຮຽນໃນຂະແຫນງວິຊາສີລະປະຂອງມະຫາວິທະຍາໄລຊາງຊຸນ,ແລະໄດ້ໄປເຮັດວຽກຢູ່ສະຖາບັນວິຈິດຕະກຳຂອງວິທະຍາຄານສິລະປະຈີລິນໃສປີ 1990,ດຽວນີ້ ທ່ານເປັນນັກວິຈິດຕະກຳຊັ້ນສອງ.ທ່ານຢູປິງ ປີນີ້ອາຍຸ 41 ປີແມ່ນຮອງປະທານສະມາຄົມຄົນຫູຫນວກຈີນ,ອົງການນີ້ເອົາໃຈໃສ່ນຳຜົນປະໂຫຍດຂອງຄົນຫູຫນວກ 20 ລ້ານ 5 ແສນ 7 ຫມື່ນຄົນໃນທົ່ວປະເທດ.ໃນຖານເປັນບຸກຄົນທີ່ມີລັກສະນະຕົວແທນຂອງຊຸມຊົນພິເສດ,ແລະກໍ່ຍ້ອນມີຄວາມຫ້າວຫັນໃນການປົກປັກຮັກສາສິດປະໂຫຍດຂອງຄົນພິການປີ 2003, ທ່ານຢູປິງໄດ້ກາຍເປັນສະມາຊິກຫນຶ່ງໃນສະພາປຶກສາການເມືອງປະຊາຊົນແຫ່ງຊາດຈີນ ເຊິ່ງເປັນອົງການສຳຄັນທີ່ຈີນດຳເນີນການຮ່ວມມື ແລະປຶກສາການເມືອງກັບຫລາຍພັກ.
ພາລະຫນ້າທີ່ອັນສັກສິດຂອງກຳມະການສະພາປຶກສາການເມືອງແມ່ນປຶກສາການເມືອງ ເຂົ້າຮ່ວມແລະປຶກສາຫາລືວຽກງານການປົກຄອງ ຕິດຕາມ ປະຊາທິປະໄຕ, ທັງນີ້ຮຽກຮ້ອງໃຫ້ພວກເຂົາເຈົ້າຕ້ອງຟັງສຽງຂອງສັງຄົມແລະຄວາມເຫັນຂອງປະຊາຊົນ,ທັງຕັ້ງຫນ້າປະກອບຄວາມຄິດຄວາມເຫັນ.ແຕ່ຍ້ອນຕົນເອງເປັນຄົນຫູຫນວກ,ຖ້າທ່ານຢູປິງຢາກປະຕິບັດພາລະຫນ້າທີ່ຂອງຕົນ, ກໍ່ຕ້ອງຜ່ານຜ່າຄວາມຫຍຸ້ງຍາກຫລາຍຢ່າງຫລາຍແນວທີ່ຄົນປົກກະຕິບໍ່ສາມາດພັນລະນາໄດ້.
ທ່ານຢູປິງໃຊ້ພາສາໃບ້ເວົ້າວ່າ, ກ່ອນມາປະຊຸມຢູ່ປັກກິ່ງ, ເພື່ອເກັບໂຮມເອົາຄວາມເຫັນຂອງເພື່ອນພິການໃຫ້ຫລາຍ, ທ່ານໄດ້ພາຜູ່ແປພາສາໃບ້ໄປຊອກຮູ້ສະພາບຂອງບ້ານທີ່ຢູ່ສອກຫລີກ. ຂໍ້ຄວາມສັ້ນທາງໂທລະສັບມືຖືກໍ່ກາຍເປັນເຄື່ອງມີທີ່ໃຫ້ທ່ານໄດ້ແລກປ່ຽນກັບເພື່ອນຫູຫນວກປາກກືກຢູ່ໃນແຫ່ງຕ່າງໆທົ່ວປະເທດ.ໃນໄລຍະໄຂກອງປະຊຸມເທື່ອນີ້, ຄ່ຳມື້ໃດ, ທ່ານຢູປິງກໍ່ໄດ້ຮັບຂໍ້ຄວາມສັ້ນຈາກຫມູ່ເພື່ອນ.ທ່ານບອກນັກຂ່າວວ່າ, ເພື່ອນທັງ ຫລາຍຫວັງໃຫ້ທ່ານນຳເອົາຄວາມຄຶດຄວາມປາຖະຫນາຂອງຄົນຫູຫນວກທົ່ວປະເທດໄປສະເຫນີຢູ່ກອງປະຊຸມ.ເທື່ອນີ້ ທ່ານໄດ້ສະເຫນີຍັດຕິ 4 ສະບັບໃຫ້ກອງປະຊຸມ,ສະເຫນີໃຫ້ເພີ່ມຄຳອະທິບາຍໃນຫນ້າຈໍໂທລະພາບເພື່ອພິຈາລະນາຄວາມຕ້ອງການຂອງເພື່ອນຫູຫນວກ, ລົບລ້າງການດູຫມີ່ນດ້ານພາສາຂອງສື່ມວນຊົນທີ່ມີຕໍ່ຄົນພິການ,ສ້າງສະຖາບັນຄົ້ນຄວ້າພາສາໃບ້ແຫ່ງຊາດແລະອະນຸຍາດໃຫ້ຄົນຫູຫນວກຂັບລົດໄດ້ເປັນຕົ້ນ.
ວັນທີ 5 ມີນາ ທ່ານຢູປິງໄດ້ຮັບຟັງບົດລາຍງານວຽກງານຂອງລັດຖະ ບານທີ່ກ່າວໂດຍທ່ານນາຍົກເວິນເຈ່ຍປາວກ່າວໃນກອງປະຊຸມ,ທ່ານຮູ້ສຶກວ່າພັກແລະລັດຖະບານບໍ່ໄດ້ລືມຊຸມຊົນພິການ,ໄດ້ເອົາໃຈໃສ່ນຳຄົນພິການໂດຍຕະຫລອດ.ແຕ່ທ່ານເຫັນວ່າ,ໃນການສ້າງສາສັງຄົມທີ່ກົມກຽວກັນນັ້ນ,ສັງຄົມຍັງຕ້ອງເອົາໃຈໃສ່ແລະດູແລຄົນພິການຫລາຍຍິ່ງຂຶ້ນ.
ນອກຈາກອ່ານເອກະສານແລ້ວ, ບໍ່ວ່າທ່ານຢູປິງຈະຟັງການປະກອບຄວາມຄິດຄວາມເຫັນຫລືແລກປ່ຽນກັບກຳມະການຜູ່ອື່ນ, ທ່ານກໍ່ຕ້ອງອາໃສຜູ່ແປພາສາໃບ້.ສະນັ້ນ ທ່ານຢູປິງກັບທ່ານຊຽນຊູລີ ນາຍພາສາຂອງທ່ານເກືອບບໍ່ໄດ້ແຍກອອກຈາກກັນຈັກເທື່ອ.
ເຖິງວ່າທ່ານບໍ່ໄດ້ຍິນເນື້ອໃນທີ່ທ່ານຊຽນຊູລີລົມກັບນັກຂ່າວ, ແຕ່ທ່ານຢູປິງທີ່ຢູ່ຂ້າງຫັນກໍ່ຍິ້ມເລື້ອຍໆ. ເມື່ອການສຳພາດສິ້ນສຸດລົງ, ທ່ານອາດຈະເປັນຫ່ວງນຳຢ້ານທ່ານຊຽນຊູລີບໍ່ໄດ້ສະແດງຄວາມຫມາຍຂອງຕົນໄດ້ຫມົດ, ທ່ານຢູປິງໄດ້ຈັບເອົາຟື້ມຂອງນັກຂ່າວມາຂຽນໃສ່ວ່າ:"ຄົນຫູຫນວກກັບຄົນຫູດີເກາະແຂນກັນ, ພ້ອມກັນສ້າງສັງຄົມທີ່ກົມກຽວກັນ".
|
