|
ປີ 2004, ກຳມະການທັງຫລາຍຂອງຄະນະກຳມາທິການວັດທະນະທຳປະຫວັດສາດຂອງສະພາປຶກສາການເມືອງປະຊາຊົນແຫ່ງຊາດຈີນໄດ້ນອນການແຈ້ງ ກິນກາງປ່າ,ລົງເລິກສຳຫລວດ 7 ຕົວເມືອງວັດທະນະທຳປະຫວັດສາດຂັ້ນລັດເຊັ່ນຊີອ່ານ ຫານເສີງ ຮ້ານຈົ່ງ ຄຸນມີງ ລີ້ຈ່ຽງ ຕ້າຫລີແລະປັກກິ່ງແລະເມືອງເຖີ່ງຊົງ ຕົວເມືອງວັດທະນະທຳປະຫວັດສາດຂັ້ນແຂວງ,ໄດ້ກວດພົບບັນຫາຕົ້ນຕໍໃນວຽກງານອະນຸລັກຕົວເມືອງວັດທະນະທຳປະຫວັດສາດໃນສະເພາະຫນ້ານີ້,ແລະວິເຄາະສາເຫດຢ່າງເລິກເຊິ່ງ,ອອກຫົວຄິດປະດິດສ້າງ,ໃນທີ່ສຸດໄດ້ຈໍ່ຕົວເປັນບົດລາຍງານການສຳຫລວດກ່ຽວກັບການອະນຸລັດຕົວເມືອງວັດທະນະທຳປະຫວັດສາດ.ບົດລາຍງານໄດ້ຮັບຄວາມເອົາໃຈໃສ່ໃນລະດັບສູງຈາກຄະນະລັດຖະບານຈີນ,ຜູ້ນຳຂອງຄະນະລັດຖະບານຈີນຊີ້ອອກວ່າ:ຕ້ອງເພີ່ມຄວາມແຮງໃນການອະນຸລັກຕົວເມືອງວັດທະນະທຳປະຫວັດສາດ,ຕ້ອງພ້ອມກັນກັບຝ່າຍທີ່ກ່ຽວຂ້ອງ,ພິຈາ ລະນາໂດຍສັງລວມ,ວາງແຜນໃຫ້ດີ,ແລ້ວປະຕິບັດໂດຍແບ່ງອອກເປັນບາດກ້າວ.ນີ້ເຮັດໃຫ້ຄົນທັງຫລາຍທີ່ເອົາໃຈໃສ່ນຳການອະນຸລັກຕົວເມືອງວັດທະນະທຳປະຫວັດສາດນັ້ນຮູ້ສຶກດີໃຈທີ່ສຸດ.
ທ່ານນາງຈາງເຕີເອີ້ກໍ່ແມ່ນກຳມະການສະພາປຶກສາການເມືອງປະຊາຊົນແຫ່ງຊາດຈີນຜູ້ຫນຶ່ງທີ່ເຂົ້າຮ່ວມການສຳຫລວດລາຍນີ້.ໃນການສຳຫລວດເທື່ອນີ້,ທ່ານນາງຈາງໄດ້ຮັບຫມາກຜົນຫລາຍທີ່ສຸດ,ໂດຍສະເພາະແມ່ນການສຳຫລວດ"ສານເຈົ້າທ້າຍຊືກົ່ງ"ໄດ້ເຮັດໃຫ້ນາງມີຄວາມຮູ້ສຶກເລິກເຊິ່ງທີ່ສຸດ.
ເມືອງຫານເສີງແຂວງສ້ານສີ່ແມ່ນບ້ານເກີດຂອງທ່ານສື່ມາຊຽນ,ແລະກໍ່ແມ່ນຕົວເມືອງວັດທະນະທຳປະຫວັດສາດຂັ້ນລັດ."ສານເຈົ້າສື່ມາຊຽນ ທ້າຍຊືຂອງລາຊະວົງຮ້ານ"ທີ່ສ້າງເມື່ອຄ.ສ.310 ກໍ່ຢູ່ແຫ່ງນີ້,ສານເຈົ້າດັ່ງກ່າວມີຄຸນຄ່າປະຫວັດສາດສູງທີ່ສຸດ,ແມ່ນຫົວຫນ່ວຍອະນຸລັກວັດຖຸບູຮານຈຸດຫນັກຂັ້ນລັດ,ມັກຖືກເອິ້ນເປັນ"ສານເຈົ້າທ້າຍຊືກົ່ງ".
ຕາມຜູ້ທີ່ເຄີຍໄປທ່ຽວສານເຈົ້າແຫ່ງນີ້ເລົ່າໃຫ້ຟັງວ່າ,"ສານເຈົ້າທ້າຍຊືກົ່ງ"ມີທີ່ຕັ້ງພູມສາດດີຫລາຍ,ຄືຕັ້ງຢູ່ເທີງພູນ້ອຍແຫ່ງຫນຶ່ງຢູ່ແຄມແມ່ນ້ຳເຫືຼອງ.ໃນເວລາຄົນທັງຫລາຍປີນຈາກທາງພູທີ່ສູງຊັນຂຶ້ນໄປຮອດຈອມພູນັ້ນ,ຢູ່ທາງຫນ້າຈະກວ້າງຂວາງອອກ,ຫລຽວເບິ່ງໄປໄກໆ,ແມ່ນ້ຳເຫືຼອງໄດ້ໄຫລໄປຫນ້າຢ່າງບໍ່ຢຸດຢັ້ງ,ໃນທັນໃດນັ້ນ,ອາລະຍະທຳແມ່ນ້ຳເຫືຼອງທີ່ມີປະຫວັດສາດ 5 ພັນປີແລະປະຫວັດສາດຈີນທີ່ເກົ່າແກ່ຫນ້າແຫນ້ນກໍ່ຈະແມນຢູ່ໃນຫົວໃຈປານຮູບແຕ້ມ,ເຮັດໃຫ້ຜູ້ຊົມມີຄວາມຮູ້ສຶກຕຶ້ນຕັນໃຈທີ່ສຸດ.
ແຕ່ວ່າ,ສິ່ງທີ່ທ່ານນາງຈາງເຕີເອີ້ແລະຄົນທັງຫລາຍໄດ້ເຫັນໃນເວລາປີນຂຶ້ນຮອດຈອມພູນັ້ນພັດບໍ່ແມ່ນພາບດັ່ງທີ່ເລົ່າລືກັນ,ເຫັນແຕ່ເສົາຂົວຊີມັງເປັນຕົ້ນໆ,ຕັ້ງຢູ່ໃນແມ່ນ້ຳເຫືຼອງຢ່າງຕຳຫູຕຳຕາ,ນີ້ແມ່ນທາງດ່ວນເສັ້ນຫນຶ່ງທີ່ພວມສ້າງຢູ່,ພໍດີຜ່ານທາງນີ້,ພຽງແຕ່ວ່າເມື່ອຮອດຕີນພູນ້ອຍກໍ່ຢຸດສະງັກລົງ,ແລ້ວອ້ອມຜ່ານ"ສານເຈົ້າທ້າຍຊືກົ່ງ"ເຫມືອນກ່ຽວ.
ການສ້າງໂຄງການຢູ່ໃກ້"ສານເຈົ້າທ້າຍຊືກົ່ງ"ປານນີ້ຈັ່ງແມ່ນບໍ່ຖືກທີ່ແທ້!ແຕ່ຄວາມເສຍຫາຍແມ່ນກູ້ຄືນມາບໍ່ໄດ້ແລ້ວ,ທ່ານນາງຈາງເຕີເອີ້ຮູ້ສຶກເສຍໃຈທີ່ສຸດ.ນາງເຫັນວ່າ,ເສດຖະກິດຕ້ອງພັດທະນາ,ແຕ່ວັດຖຸບູຮານກໍ່ຕ້ອງອະນຸລັກ.ການອະນຸລັກວັດຖຸບູຮານບໍ່ພຽງແຕ່ຕ້ອງອະນຸລັກກະໂຕວັດຖຸບູຮານເທົ່ານັ້ນ,ຍິ່ງຕ້ອງອະນຸລັກສະພາບແວດລ້ອມທຳມະຊາດແລະສະພາບແວດລ້ອມວັດທະນະທຳທີ່ຢູ່ອ້ອມຂ້າງວັດຖຸບູຮານໃຫ້ດີອີກດ້ວຍ.ສະນັ້ນ,ໃນກົດບັນຍັດທີ່ກ່ຽວຂ້ອງທີ່ມີຢູ່ໃນ ປະຈຸບັນກ່ຽວກັບອົງການປົກຄອງພິຈາລະນາອະນຸມັດໂຄງການຂະຫນາດໃຫຍ່ນັ້ນຄວນເພີ່ມຕື່ມຂໍ້ມາດຕາຂໍ້ຫນຶ່ງ,ຄືການສ້າງໂຄງການຢູ່ບ່ອນມໍ່ຮ່ອງຮອຍວັດຖຸບູຮານສຳຄັນຕ້ອງໄດ້ຮັບການສຳຫລວດກວດກາຈາກພາກສ່ວນວັດຖຸບູຮານ,ແລະໃຫ້ພາກສ່ວນຄຸ້ມຄອງວັດຖຸບູຮານເຂົ້າຮ່ວມການວາງຜັງອອກແບບໂຄງການ,ເພື່ອເຮັດວຽກງານອະນຸລັກວັດຖຸບູຮານໃຫ້ດີ.
ພາຍຫລັງສິ້ນສຸດການສຳຫລວດແລ້ວ,ທ່ານນາງຈາງເຕີເອີ້ກໍ່ໄດ້ວາງຂໍ້ສະເຫນີແລະຄວາມເຫັນຂອງຕົນເອງໃນດ້ານອະນຸລັກສະພາບກວມລວມຂອງວັດຖຸບູຮານ,ໄດ້ປະກອບສ່ວນສະຕິປັນຍາຂອງຕົນໃຫ້ແກ່ບົດລາຍງານສຳຫລວດກ່ຽວກັບການອະນຸລັກຕົວເມືອງວັດທະນະທຳປະຫວັດສາດ.
|
