|
ເມື່ອເດັກນ້ອຍເປັນພະຍາດດ່ວນຫຼຶເຈັບໜັກ,ພໍ່ແມ່ສ່ວນຫຼາຍຈະຟ້າວຟັ່ງສົ່ງລູກໄປໂຮງໝໍ. ຍ້ອນວ່າຟ້າວຫຼາຍແລະດູແລບໍ່ຖືກຕ້ອງໃນເວລາສົ່ງເດັກນ້ອຍໄປໂຮງໝໍ,ມັກຈະເຮັດໃຫ້ເດັກນ້ອຍມີອາການໜັກເຂົ້າ,ຕື່ມງຄວາມຫຍຸ້ງຍາກໃຫ້ນາຍໝໍທີ່ປົ່ວພະຍາດ.
ໃນເວລາສົ່ງເດັກນ້ອຍໄປໂຮງໝໍນັ້ນ ພໍ່ແມ່ຕ້ອງລະວັງຫຼາຍບັນຫາດັ່ງລຸ່ມນີ້,ຄື:
ກ່ອນອື່ນ,ພໍ່ແມ່ຕ້ອງເຮັດໃຈທຸ່ນທ່ຽງ,ເດັກນ້ອຍຈຶ່ງຮູ້ສຶກປອດໄພແລະໄວ້ໃຈ,ຈຶ່ງສາມາດເຮັດໃຫ້ເດັກນ້ອຍຟັງຄວາມ. ຖ້າພໍ່ແມ່ສະທ້ານຢ້ານກົວ,ກະວົນກະວາຍ,ຄວບຄຸມອາລົມຂອງຕົນບໍ່ໄດ້,ເດັກນ້ອຍກໍ່ຍິ່ງຈະຢ້ານ,ຮ້ອງໄຫ້ບໍ່ຢຸດບໍ່ເຊົາ,ຖ້າແມ່ນເດັກນ້ອຍທີ່ຖືກເອົາໃຈໂພດແລະແພງຫຼາຍໃນຍາມທຳມະດາກໍຍິ່ງຈະຮ້ອງໄຫ້ແຮງ,ທີ່ຈິງບາງທີກໍບໍ່ເຫັນວ່າຈະເຈັບແຮງປານໃດ,ຊຶ່ງຈະປິດບັງອາການແທ້ຂອງເດັກນ້ອຍ,ແລ້ວເຮັດໃຫ້ນາຍໝໍບົ່ງມະຕິພະຍາດບໍ່ຖືກຕ້ອງ.
ໃນເວລາເດັກນ້ອຍເຈັບໄຂ້ໄດ້ພະຍາດນັ້ນ,ບາງທີອາດຈະຂັດກິນນັ້ນກິນນີ້, ພໍ່ແມ່ສ່ວນຫຼາຍມັກຈະໃຫ້ກິນຕາມໃຈ. ແຕ່ວ່າ,ການໃຫ້ເດັກນ້ອຍກິນຂອງຕາມໃຈບໍ່ພຽງແຕ່ກະທົບກະເທືອນການບົ່ງມະຕິພະຍາດທໍ່ນັ້ນ ຊ້ຳບໍ່ໜຳ,ຍັງອາດຈະເຮັດໃຫ້ອາການໜັກເຂົ້າ. ມີພະຍາດບາງຢ່າງເຊັ່ນພະຍາດໝາກໄຂ່ຫຼັງອັກເສບ,ຕ້ອງຄະລຳອາຫານບາງຢ່າງ,ຖ້າກິນຂອງຄະລຳເຫຼົ່ານີ້ເຂົ້າໄປຈະເຮັດໃຫ້ອາການພະຍາດໜັກເຂົ້າ; ພະຍາດບາງຢ່າງເຊັ່ນຕັບອັກເສບ,ຕ້ອງແທງເອົາເລືອດມາກວດໃນເວລາທ້ອງເປົ່າ,ຖ້າກິນອາຫານກ່ອນແລ້ວ,ກໍຈຳເປັນຕ້ອງເລື່ອນເວລາກວດ,ຈະເຄີກເວລາບົ່ງມະຕິພະຍາດ.
ເຊັ່ນດຽວກັນ,ອາການທີ່ຕ່າງກັນກໍຕ້ອງໃຊ້ວິທີບົວລະບັດທີ່ຕ່າງກັນ.
ຕົວຢ່າງຄືເດັກນ້ອຍທີ່ຖືຄີງໄຂ້ສູງ,ຄວນເອົານ້ຳໄປນຳ,ໃຫ້ເດັກນ້ອຍກິນຫຼາຍເທື່ອ,ເທື່ອລະໜ້ອຍ,ທັງເອົາຜ້າຂົນໜູຈຸ່ມນ້ຳເຢັນປັ້ນແຫ້ງວາງໃສ່ໜ້າຜາກຂອງເດັກນ້ອຍ. ຖ້າເດັກນ້ອຍເປັນລົມ,ໃຫ້ໃຊ້ນີ້ວໂປ້ກົດຄອງສົບ,ບ່ອນຕິດກັບດັງ,ກົດຈຸດຢູ່ຫຼັງມືຫວ່າງກາງກະດູກງ່າມມືນິ້ວໂປ້ກັບນິ້ວຊີ້. ຕໍ່ເດັກນ້ອຍທີ່ຖອກທ້ອງ,ຄວນກຽມນ້ຳຈືດໜ້ອຍໜຶ່ງ,ໃຫ້ເດັກນ້ອຍກິນໃນເວລາໄປໂຮງໝໍ,ຖ້າເດັກລົງທ້ອງ,ຕ້ອງເອົານ້ຳຈາງໆໄປພ້ອມໃຫ້ກິນຢູ່ກາງທາງ. ຖ້າມີອຸດຈາລະ,ຄວນເກັບໄວ້ເພື່ອເອົາໄປກວດຢູ່ໂຮງໝໍ. ຖ້າເດັກນ້ອຍຮາກແຮງ,ຄວນໃຫ້ເດັກນ້ອຍງ່ຽງຫົວໄປເບື້ອງໜຶ່ງ,ເພື່ອປ້ອງກັນບໍ່ໃຫ້ສິ່ງທີ່ຮາກອອກນັ້ນເຂົ້າຫຼອດລົມແລ້ວພາໃຫ້ຫາຍໃຈບໍ່ອອກ. ຖ້າເດັກນ້ອຍເຈັບທ້ອງ,ຄວນນວດທ້ອງໃຫ້ເບົາໆເພື່ອຜ່ອນຄາຍຄວາມເຈັບປວດ,ຖ້ານວດແລ້ວແຮ່ງເຈັບແຮງຂຶ້ນ,ກໍບໍ່ຄວນນວດອີກເພື່ອບໍ່ໃຫ້ອາການໜັກເຂົ້າ. ຖ້າເດັກນ້ອຍເຈັບທ້ອງຍ້ອນໄສ້ລົງຢ່ອນແມ່ນນວດບໍ່ໄດ້,ເພາະຈະເຮັດໃຫ້ອາການໜັກເຂົ້າ,ບໍ່ມີຜົນດີຕໍ່ການປິ່ນປົວ. ໃນເວລາສົ່ງເດັກນ້ອຍທີ່ທໍ່ຍ່ອຍອາຫານອອກເລືອດຫຼາຍຫຼືສະຫຼົບນັ້ນ,ຕ້ອງລະວັງທ່ານອນຂອງເດັກນ້ອຍ,ຄືໃຫ້ນອນຫງາຍບໍ່ໝູນໝອນ,ກ່າຍຕີນໃຫ້ສູງຂຶ້ນ,ເຮັດແນວນີ້ຈະຊ່ອຍໃຫ້ການສົ່ງເລືອດໃຫ້ຫົວໃຈແລະສະໝອງເປັນຕົ້ນ. ຕໍ່ເດັກນ້ອຍທີ່ຫົວໃຈອ່ອນເພຍ,ຄວນໃຫ້ນັ່ງເທີ້ງ,ເພື່ອຫຼຸດການຫາບແບກຂອງຫົວໃຈ,ຊ່ອຍໃຫ້ຫາຍໃຈໂລ່ງ.
ໃນເວລາສົ່ງເດັກແດງທີ່ບໍ່ແຂງແຮງ,ເປັນພະຍາດໜັກໄປໂຮງໝໍຕ້ອງລະວັງການປ່ຽນແປງຂອງອາການປ່ວຍຂອງເດັກນ້ອຍ,ຖ້າບໍ່ສັງເກດຢ່າງລະອຽດ,ອາດຈະເກີດອຸບັດເຫດ. ດັ່ງນັ້ນ ໃນເວລາສົ່ງເດັກແດງໄປໂຮງໝໍ,ຕ້ອງລະວັງສັງເກດເບິ່ງສີໜ້າຂອງເດັກນ້ອຍ,ສີໜ້າແດງຮຸນໆຈືດເຂົ້າແລະສົບແຫຼ້,ການຫາຍໃຈທີ່ເປັນຈັງຫວະສະໝ່ຳສະເໝີກາຍເປັນບາງທີໄວບາງທີຊ້າ,ຈົນກະທັ້ງເຊົາຫາຍໃຈຊົ່ວຄາວ;ທຳອິດຍັງມືນຕາເບິ່ງຄົນ,ປ່ຽນເປັນຫຼັບຕາບໍ່ຫົວຊາໃຜ,ຫຼືຮ້ອງໃສ່ກໍບໍ່ຕອບ,ບາຍກໍບໍ່ເໜັງຕີງ; ຕີນມືເຢັນເຂົ້າແລະຈັງ,ບາງທີຊັກ,ຫຼືຕີນມືຮ້ອນເກີນໄປແລະເຢັນເກີນໄປເປັນຕົ້ນ. ຖ້າມີອາການທີ່ກ່າວມາເທິງນີ້,ໝາຍຄວາມວ່າອາການໜັກເຂົ້າ,ອັນຕະລາຍ,ຄວນສົ່ງໄປກວດຢູ່ໂຮງໝໍທີ່ຢູ່ໃກ້,ຢ່າໄປໂຮງໝໍທີ່ຢູ່ໄກ,ຖ້າບໍ່ດັ່ງນັ້ນ ອາດຈະພາດໂອກາດປິ່ນປົວຍ້ອນສົ່ງໄປບໍ່ທັນ.
ເວົ້າລວມແລ້ວ,ທະແນມແຕ່ສັງເກດເບິ່ງອາການຂອງເດັກຢ່າງລະອຽດ,ບວກກັບການເບິ່ງແຍງຢ່າງເໝາະສົມ,ກໍຈະສາມາດສົ່ງເດັກນ້ອຍໄປຮອດໂຮງໝໍຢ່າງສະດວກໄດ້.
|
