|
ເມື່ອເວົ້າເຖິງບັນຫາສຸຂະພາບທາງຈິດໃຈ,ມີຫຼາຍໆຄົນຖືວ່ານີ້ແມ່ນບັນຫາຂອງໄວກາງຄົນທໍ່ນັ້ນ. ແຕ່ຄວາມຈິງແລ້ວ,ຍ້ອນມູນເຫດໃນຫຼາຍດ້ານ,ມີນັກຮຽນປະຖົມແລະມັດທະຍົມບໍ່ໜ້ອຍກໍປະກົດມີບັນຫາດ້ານສຸຂະພາບທາງຈິດໃຈ. ຖ້າບັນຫາເຫຼົ່ານີ້ບໍ່ໄດ້ແກ້ໄຂໃຫ້ຕົກຢ່າງທັນການແລະບັງເກີດຜົນ,ກໍອາດຈະກະທົບກະເທືອນເຖິງການເຕີບໃຫຍ່ຢ່າງປອດໄສຂອງນັກຮຽນເຫຼົ່ານີ້. ກໍຍ້ອນມູນເຫດນີ້ເອງ,ປັດຈຸບັນ ພາກສ່ວນການສຶກສາຂອງຈີນສຸດທີ່ເອົາໃຈໃສ່ນຳການສຶກສາດ້ານສຸຂະພາບທາງຈິດໃຈໃນໝູ່ໃຫ້ນັກຮຽນປະຖົມແລະມັດທະຍົມ.
ບັນຫາສຸຂະພາບທາງຈິດໃຈຂອງນັກຮຽນປະຖົມແລະມັດທະຍົມແມ່ນຖືກເອົາໃຈໃສ່ຢູ່ຈີນໃນບໍ່ທໍ່ໃດປີມານີ້. ນີ້ຕົ້ນຕໍແມ່ນຍ້ອນວ່າຈີນປະຕິບັດນະໂຍບາຍຄຸມກຳເນີດ,ສະນັ້ນ ນັກຮຽນປະຖົມແລະມັດທະຍົມ 100 ກວ່າລ້ານຄົນຂອງຈີນໃນປັດຈຸບັນສ່ວນຫຼາຍແມ່ນລູກຜູ້ດຽວ,ພວກເຂົາເຈົ້າໄດ້ຮັບການຮັກແພງຫຼາຍເກີນໄປຈາກຜູ້ໃຫຍ່,ມີຄົນບໍ່ໜ້ອຍມີບັນຫາຕ່າງໆເຊັ່ນຄວາມສາມາດທົນຮັບດ້ານຈິດໃຈຕ່ຳ,ຢ້ານຄວາມທຸກຍາກລຳບາກແລະເອົາແຕ່ໃຈຕົນເປັນຕົ້ນ. ເມື່ອເປັນແນວນີ້ ໃນເວລາປະສົບກຳລັງໜີບຫຼືຄວາມຫຼົ້ມເຫຼວໃນການຮ່ຳຮຽນຫຼືຊີວິດການເປັນຢູ່,ຫຼືໃນການຄົບຄ້າກັບຜູ່ອື່ນນັ້ນ ກໍອາດຈະປະກົດມີບັນຫາທາງຈິດໃຈ. ນອກນີ້ ການພັດທະນາແລະປ່ຽນແປງຢ່າງໄວວາຂອງເສດຖະກິດແລະສັງຄົມຈີນໄດ້ກະໜ່ຳຢ່າງຮຸນແຮງຕໍ່ທັດສະນະຄະຕິຂອງສາທາລະນະຊົນເຊິ່ງລວມທັງນັກຮຽນປະຖົມແລະມັດທະຍົມ,ໃຕ້ສະພາບການດັ່ງກ່າວ,ນັກຮຽນປະຖົມແລະມັດທະຍົມທີ່ອາຍຸນ້ອຍແລະຄວາມສາມາດປັບຕົວຕ່ຳກໍມັກເກີດມີບັນຫາທາງຈິດໃຈ. ກໍແມ່ນຢູ່ໃຕ້ເບື້ອງຫຼັງດັ່ງກ່າວ,ກະຊວງສຶກສາທິທານຂອງຈີນຮຽກຮ້ອງໃຫ້ໂຮງຮຽນປະຖົມແລະມັດທະຍົມຂອງແຫ່ງຕ່າງໆເອົາໃຈໃສ່ນຳສະພາບທາງຈິດໃຈຂອງນັກຮຽນ,ແລະສົ່ງເສີມໃຫ້ບັນດາໂຮງຮຽນໃຊ້ຮູບການຫຼາຍຢ່າງຫຼາຍແນວທີ່ຄ່ອງແຄ້ວ,ດຳເນີນການສຶກສາດ້ານສຸຂະພາບທາງຈິດໃຈ.
ທ່ານກູ້ມິງຢວນ ສາດສະດາຈານຂອງມະຫາວິທະຍາໄລສ້າງຄູປັກກິ່ງຊີ້ອອກວ່າ,ການສຶກສາທາງຈິດໃຈແມ່ນພື້ນຖານຂອງການສຶກສາທຸກຢ່າງ,ຕ້ອງອົບຮົມ ໃຫ້ນັກຮຽນມີຈິດໃຈທີ່ສຸຂະພາບແຕ່ຍາມຍັງນ້ອຍ. ທ່ານເວົ້າວ່າ:
"ໃນດ້ານການສຶກສາດ້ານສຸຂະພາບທາງຈິດໃຈ,ພວກເຮົາຕ້ອງອົບຮົມເອົາໃຈໃສ່ເປັນພິເສດນຳການໃຫ້ນັກຮຽນມີຄວາມໝັ້ນໃຈ,ກຽດສັກສີຂອງຕົນແລະສ້າງຕົນໃຫ້ເຂັ້ມແຂງຕັ້ງແຕ່ຍາມຍັງນ້ອຍ,ຕ້ອງອົບຮົມໃຫ້ເດັກນ້ອຍປະຕິບັດຕໍ່ທຳມະຊາດ,ສັງຄົມ,ຜູ້ອື່ນແລະຕົນເອງຢ່າງຖືກຕ້ອງ."
ປັດຈຸບັນ,ແຫ່ງຕ່າງໆຂອງຈີນກໍໄດ້ເອົາໃຈໃສ່ນຳບັນຫາການສຶກສາດ້ານສຸຂະພາບທາງຈິດໃຈຂອງນັກຮຽນປະຖົມແລະມັດທະຍົມແລ້ວ. ຕົວຢ່າງຄືນະຄອນຮາງໂຈວແຂວງເຈີຈຽງ ພາກໃຕ້ຂອງຈີນກໍໄດ້ສ້າງຕັ້ງເຄືອຂ່າຍການສຶກສາທາງຈິດໃຈສາມຂັ້ນຄືນະຄອນ,ເຂດແລະໂຮງຮຽນ. ທາງນະຄອນໄດ້ສ້າງໜ່ວຍທີ່ປຶກສາທີ່ປະກອບດ້ວຍຜູ້ຊ່ຽວຊານດ້ານບັນຫາຈິດໃຈ,ແຕ່ລະເຂດມີຄູຊີ້ນຳ ສະເພາະກິດ,ແຕ່ລະໂຮງຮຽນໄດ້ມີຄູຊີ້ນຳສຸຂະພາບທາງຈິດໃຈທີ່ສະເພາະກິດຫຼືບໍ່ແມ່ນສະເພາະກິດ 1 ຄົນຂຶ້ນໄປ,ເພື່ອຮັບຜິດຊອບວຽກງານສຶກສາສຸຂະພາບຈິດໃຈ. ທ່ານຊູນອີນົງ ເຈົ້າໜ້າທີ່ຄະນະກຳມະການການສຶກສານະຄອນຮາງໂຈວບອກນັກຂ່າວວ່າ:
"ພວກເຮົາສຸດທີ່ເອົາໃຈໃສ່ນຳການສຶກສາດ້ານສຸຂະພາບທາງຈິດໃຈໃຫ້ແກ່ນັກຮຽນປະຖົມແລະມັດທະຍົມ. ປັດຈຸບັນ ນະຄອນຮາງໂຈວໄດ້ເປີດສາຍຮ້ອນດ້ານການສຶກສາດ້ານສຸຂະພາບທາງຈິດໃຈສາມສາຍ,ຄືສາຍຮ້ອນສຳລັບນັກຮຽນ,ສາຍຮ້ອນຊີ້ນຳການສຶກສາຢູ່ໃນຄອບຄົວແລະສາຍຮ້ອນສຳລັບຄູ,ສາມາດຕອບຄຳຖາມດ້ານຈິດໃຈຂອງນັກຮຽນ,ພໍ່ແມ່ຜູ້ປົກຄອງແລະຄູໄດ້ທຸກເວລາ. ຕໍ່ວິຊາສຶກສາດ້ານສຸຂະພາບທາງຈິດໃຈຂອງໂຮງຮຽນ,ພວກເຮົາຮຽກຮ້ອງໃຫ້ແຕ່ລະໂຮງຮຽນຢ່າງໜ້ອຍມີ 3 ຊົ່ວໂມງຮຽນໃນທຸກພາກຮຽນ. ບົນພື້ນຖານດັ່ງກ່າວ,ພວກເຮົາຍັງໄດ້ພິມຈຳໜ່າຍປຶ້ມອ່ານຊີ້ນນຳດ້ານຈິດໃຈແລະປຶ້ມສຳລັບນັກຮຽນລວມ 2 ລ້ານກວ່າຕົວໜັງສືຈີນ."
ໂຮງຮຽນມັດທະຍົມທີສາມຂອງເມືອງໂຟຊານແຂວງກວາງຕຸ້ງພາກໃຕ້ຂອງຈີນແມ່ນໂຮງຮຽນມັດທະຍົມທີ່ມີຊື່ສຽງຂອງທ້ອງຖິ່ນ,ໂຮງຮຽນດັ່ງກ່າວສຸດທີ່ເອົາໃຈໃສ່ນຳການສຶກສາດ້ານສຸຂະພາບທາງຈິດໃຈຕໍ່ນັກຮຽນ,ທາງໂຮງຮຽນໄດ້ສ້າງຕັ້ງສະໂມສອນແຫ່ງການເຕີບໃຫຍ່ຢ່າງປອດໄສໂດຍຈຳເພາະ,ແຕ່ງຕັ້ງຜູ້ຕິດຕໍ່ຂອງນັກຮຽນ,ເມື່ອນັກຮຽນມີບັນຫາດ້ານຈິດໃຈແລ້ວ ກໍສາມາດສ່ອງແສງຕໍ່ຜູ້ຕິດຕໍ່ເຫຼົ່ານີ້ໄດ້ທຸກເວລາ. ນອກນີ້,ໂດຍແນໃສ່ປະກົດການທີ່ນັກຮຽນມັກເກີດມີກຳລັງໜີບທາງຈິດໃຈໃນເວລາເສັງເຂົ້າມະຫາວິທະຍາໄລ,ໂຮງຮຽນດັ່ງກ່າວໄດ້ຖືເອົານັກຮຽນມ.6ເປັນຈຸດໜັກຂອງການສຶກສາດ້ານສຸຂະພາບທາງຈິດໃຈ,ປີໃດ ກໍໄດ້ເຊີນຜູ້ຊ່ຽວຊານດ້ານບັນຫາທາງຈິດໃຈຈັດງານບັນຍາຍຂະໜາດໃຫຍ່,ພ້ອມທັງພິມຈົດໝາຍໃຫ້ນັກຮຽນມ.6,ໃຫ້ກຳລັງໃຈແກ່ພວກເຂົາເຈົ້າປະເຊີນໜ້າກັບການສອບເສັງດ້ວຍຈິດໃຈປົກກະຕິ.
ຕໍ່ການກະທຳເຫຼົ່ານີ້ຂອງໂຮງຮຽນ,ທ້າວກາວລຽງ ທີ່ຫາກໍ່ຮຽນຈົບຈາກໂຮງຮຽນດັ່ງກ່າວແລ້ວເສັງເຂົ້າມະຫາວິທະຍາໄລໃນປີກາຍນີ້ມີຄວາມຮູ້ສຶກຢ່າງເລິກເຊິ່ງ,ລາວເວົ້າວ່າ:
"ການເຝິກອົບຮົມໃຫ້ຜ່ອນຍານທີ່ໂຮງຮຽນດຳເນີນກ່ອນສອບເສັງເປັນການຊ່ອຍເຫຼືອທີ່ມີປະໂຫຍດຕໍ່ການຜ່ອນຍານຈິດໃຈອັນເຄັ່ງຕຶງຂອງພວກເຮົາແລະເຮັດໃຫ້ພວກເຮົາປະເຊີນໜ້າກັບການສອບເສັງດ້ວຍສະພາບອັນດີງາມ."
|
