|
ຕາມຂ່າວ CRI: ກອງປະຊຸມສະພາປຶກສາການເມືອງປະຊາຊົນແຫ່ງຊາດຈີນຄັ້ງທີ 3 ສະໄໝທີ 10 ທີ່ໄຂຂຶ້ນຢູ່ປັກກິ່ງເປັນເວລາ 10 ມື້ນັ້ນໄດ້ອັດລົງແລ້ວໃນຕອນບ່າຍວັນທີ 12 ມີນາ. ທ່ານເຈຍຊິງລິນ ປະທານສະພາປຶກສາການເມືອງປະຊາຊົນຈີນໄດ້ເປັນປະທານຈັດພິທີປິດກອງປະຊຸມ. ກອງປະຊຸມໄດ້ຜ່ານມະຕິການເມືອງ,ຮຽກຮ້ອງໃຫ້ບັນດາພັກຝ່າຍ,ອົງການຈັດຕັ້ງ,ບຸກຄົນບັນດາເຜົ່າແລະວົງການຕ່າງໆທີ່ເຂົ້າຮ່ວມສະພາປຶກສາການເມືອງປະຊາຊົນ ສາມັກຄີທຸກກຳລັງທີ່ສາມັກຄີໄດ້,ອຸດທິກຳລັງເພື່ອສ້າງສາສັງຄົມທີ່ກົມກຽວກັນ. ໃນພິທີປິດປະຊຸມ,ທ່ານຕົງຈຽນຮວາທີ່ຫາກໍ່ສະເໜີລາອອກຈາກຕຳແໜ່ງຜູ້ວ່າການເຂດບໍລິຫານພິເສດຮົງກົງພ້ອມດ້ວຍທ່ານນາງຈາງເໝອິງແລະທ່ານນາງຈາງຢົງມິງໄດ້ຮັບເລືອກຕັ້ງເປັນຮອງປະທານຄະນະປະຈຳສະພາປຶກສາການເມືອງປະຊາຊົນແຫ່ງຊາດຈີນ.
ມະຕິການເມືອງຊີ້ອອກວ່າ,ກອງປະຊຸມເຫັນດີຢ່າງສົມບູນນຳການສ້າງ"ກົດໝາຍວ່າດ້ວຍຕ້ານການແບ່ງແຍກປະເທດ",ເຫັນວ່າການສ້າງກົດໝາຍດັ່ງກ່າວໄດ້ສ່ອງແສງໃຫ້ເຫັນຫຼັກໝັ້ນອັນສະເໝີຕົ້ນສະເໝີປາຍຂອງແຜ່ນດິນໃຫຍ່ປະເທດຊາດໃນການທຳຄວາມພະຍາຍາມສຸດຂີດ,ຍາດແຍ່ງໂຮມປະເທດຊາດເຂົ້າເປັນເອກະພາບກັນໂດຍສັນຕິດ້ວຍຄວາມຈິງໃຈຫຼາຍທີ່ສຸດ.
ກອງປະຊຸມເທື່ອນີ້ແມ່ນໄຂຂຶ້ນຢູ່ປັກກິ່ງໃນວັນທີ 3 ມີນາ. ໃນໄລຍະໄຂກອງປະຊຸມ,ກຳມະການສະພາປຶກສາການເມືອງທົ່ວປະເທດ 2200 ກວ່າຄົນໄດ້ຮັບຟັງແລະອະພິປາຍບົດລາຍງານວຽກງານຂອງລັດຖະບານ,ຄຳອະທິບາຍກ່ຽວກັບ"ກົດໝາຍວ່າດ້ວຍຕ້ານການແບ່ງແຍກປະເທດ"ສະບັບຮ່າງແລະບົດລາຍງານອື່ນໆ,ແລະໄດ້ປຶກສາຫາລືກ່ຽວກັບບັນຫາສຳຄັນໃນຊີວິດເສດຖະກິດ,ການເມືອງ,ສັງຄົມແລະວັດທະນະທຳຂອງຊາດພ້ອມດ້ວຍບັນຫາທີ່ມວນຊົນເອົາໃຈໃສ່ໂດຍທົ່ວໄປ. ກອງປະຊຸມເທື່ອນີ້ໄດ້ຮັບຍັດຕິຂອງກຳມະການແລະບັນດາພັກຝ່າຍແລະອົງການຈັດຕັ້ງຕ່າງໆທີ່ເຂົ້າຮ່ວມສະພາປຶກສາການເມືອງປະຊາຊົນ 4508 ສະບັບ.
|
