|
ຕາມຂ່າວCRI: ວັນທີ 14 ມີນາ, ກອງປະຊຸມປະຈຳປີຂອງອົງການອຳນາດສູງສຸດແຫ່ງລັດຈີນທີ່ໄຂຂຶ້ນຢູ່ປັກກິ່ງເປັນເວລາ 9 ມື້ເຄິ່ງໄດ້ອັດລົງແລ້ວ. ກ່ອນຈະປິດປະຊຸມ, ກອງປະຊຸມໄດ້ລົງຄະແນນສຽງຜ່ານ "ກົດໝາຍຕ້ານການແບ່ງແຍກປະເທດ" ຢ່າງສະດວກ, ແລະໄດ້ອະນຸມັດບົດລາຍງານວຽກງານລັດຖະບານທີ່ບັນດາຜູ່ແທນສະພາປະຊາຊົນແຫ່ງຊາດໄດ້ສຳຫຼວດພິຈາລະນາແລະດັດແກ້ແລ້ວ.
ທ່ານອູປາງໂກ ປະທານຄະນະປະຈຳສະພາປະຊາຊົນແຫ່ງຊາດເປັນປະທານຈັດພິທີອັດກອງປະຊຸມ.
"ກົດໝາຍຕ້ານການແບ່ງແຍກປະເທດ" ແມ່ນສ້າງຂຶ້ນໂດຍແນໃສ່ສະຖານະການໃນໄລຍະໜຶ່ງມານີ້ ເຈົ້າໜ້າທີ່ໄຕ້ຫວັນຂ້ຽວເລັ່ງດຳເນີນການເຄື່ອນໄຫວແບ່ງແຍກໃຫ້ໄຕ້ຫວັນເປັນເອກະລາດ ເຈດຕະນາປ່ຽນແປງເລື່ອງຈິງຄືແຜ່ນດິນໃຫຍ່ຈີນແລະໄຕ້ຫວັນແມ່ນຂຶ້ນກັບປະເທດຈີນດຽວ. ກົດໝາຍໄດ້ລະບຸໄວ້ວ່າ, ໄຕ້ຫວັນແມ່ນພາກສ່ວນໜຶ່ງຂອງຈີນ, ລັດເດັດຂາດບໍ່ອະນຸຍາດໃຫ້ອິດທິກຳລັງແບ່ງແຍກຕັດແຍກໄຕ້ຫວັນອອກຈາກຈີນ. ລັດຈະທຳຄວາມພະຍາຍາມສຸດຂີດໂຮມປະເທດເຂົ້າເປັນເອກະພາບກັນໂດຍສັນຕິດ້ວຍຄວາມຈິງໃຈທີ່ສຸດ. ພາຍຫຼັງໂຮມປະເທດເຂົ້າເປັນເອກະພາບກັນໂດຍສັນຕິແລ້ວ, ໄຕ້ຫວັນຈະປະຕິບັດລະບອບທີ່ຕ່າງກັນກັບແຜ່ນດິນໃຫຍ່ກໍ່ໄດ້, ໃຫ້ປົກຄອງຕົນເອງໃນລະດັບສູງ. ພ້ອມກັນນັ້ນ ກົດໝາຍໄດ້ລະບຸໄວ້ວ່າ, ຕາບໃດອິດທິກຳລັງແບ່ງແຍກທີ່ໃຫ້ໄຕ້ຫວັນເປັນເອກະລາດກໍ່ເລື່ອງເຮັດໃຫ້ໄຕ້ຫວັນແຍກອອກຈາກຈີນໃນນາມໃດໆແລະດ້ວຍແບບວິທີໃດໆ, ຫຼືເກີດກໍລະນີໃຫຍ່ຫຼວງຈົນເຮັດໃຫ້ໄຕ້ຫວັນແຍກອອກຈາກຈີນ, ຫຼືເສື່ອມເສຍເງື່ອນໄຂທັງໝົດໃນການໂຮມປະເທດເຂົ້າເປັນເອກະພາບກັນໂດຍສັນຕິແລ້ວ, ລັດຕ້ອງໃຊ້ແບບວິທີບໍ່ແມ່ນສັນຕິວິທີແລະມາດຕະການຈຳເປັນອື່ນໆ, ປົກປັກຮັກສາອະທິປະໄຕແລະຜືນແຜ່ນດິນອັນຄົບຖ້ວນຂອງຊາດ. ກົດໝາຍຍັງກຳນົດເປັນພິເສດວ່າ, ແກ້ໄຂບັນຫາໄຕ້ຫວັນແມ່ນວຽກງານພາຍໃນຂອງຈີນ, ບໍ່ໃຫ້ອິດທິກຳລັງປະເທດໃດໆມາແຊກແຊງ.
1 2 3 4 5 6 7
|
